سقيت لك من حبي قدور وانت ياليتك له تقدر

Part29

ملاك: يامريضه!!! ليش تدفينها؟
ريم وهي تلعب بشعرها: مادفيتها، هي طاحت من كيفها
ندى: كيف نطلع هيام؟ ماتعرف تسبح
لورين: ماظن اقدر اطلعها، برفعها عن الماء
نزلت لورين للمسبح ومسكت هيام من بطنها ورفعتها بحيث راسها يطلع من الماء وتتنفس
ندى: وش نسوي الحين؟
هيام وهي تكح: بموت
لورين: ماني قادره ارفعك! يدي توجعني اصبري
ندى: اجي اساعدك؟
لورين: تستهبلين؟ لو جيتي بتغرقين
ملاك: ادق على سلطان؟
لورين: سلطان ايش؟؟ تبين سلطان يشيلها؟ دقي على هيثم اخلصي
ملاك: كيف ووين وين جوالك؟!!
لورين: عالطاوله اخلصي جيبيه
<<المكتب>>
كان جالس بمكتبه يعدل بعض الاوراق السريعه قبل لا يسلمها للموظف، ناظر جواله لما دقت عليه لورين، ظن انها بتحارشه كالعاده ف وضعه عالصامت وتركه بعيد عنه
<<الشاليه>>
لورين: مايرد
هيام: اتركيني بحاول ارفع نفسي
لورين: دقي على اي احد بسرعه يدي بدت تتشنج
ندى: لا تدقين على احد، اعرف كيف اطلعها
لورين: كيف؟ هي مو قادره تشيل نفسها وانا مو قادره اتحرك للحديد
ملاك: شايفه وضعهم؟ جايين بالنص ماحولهم شيء يتمسكون فيه ولورين ماراح تقدر تمسك هيام طول الوقت
ندى: تماسكي شوي بجيب لك عصى تمسكينها
لورين: هاتيها بسرعه
ندى: انا وملاك بنمسكها كويس، انتي اسحبي نفسك مع هيام ولما توصلون للحديده بتقدرون تطلعون
لورين: مو وقت شرح اخلصي
مدت لها العصى وسحبت نفسها بصعوبه مع هيام ولما وصلت قدرت ترفع هيام شوي للبنات ووقتها قدروا يطلعون هيام من هناك، وبعدها رفعت نفسها لورين اخيرا
لورين: رجلي مو قادره توجعني
هيام بتعب: شكرا مره
لورين: ريم انتظري دورك
ريم: ماسويت شيء! اف منكم
لورين: ندى اشكر مخك العسل ذا
ندى: بالخدمه حبيبتي
لورين: يا الله توقعوا من يتصل
هيام: خليه ياكل تبن
لورين: وصل
ردت عليه ونطقت: هيام تقول كل تبن، وانا بعد اقولك كل تبن
وقفلت على بوجهه بدون لا تسمع وده، اتصل مره ثانيه وتأففت
ملاك: ردي ردي ناخذه جدول
هيثم بحِده: وشبكم؟
هيام: بهمس لا تجيبين الطاري
لورين: معشوقتك كانت بتموت واتصلنا ولكنـ..
هيثم بمقاطعه: هيام وين؟ هي بخير الحين؟
لورين: هدها هدها، لو انها مو بخير كان ماكلمتك
وانهت الاتصال بدون لا تسمع ردّه،
هيام: طيب الحين بتصير مشكله
لورين: وانا ابغى تصير مشكله، خليه يجي ونشوف وش بيسوي
ندى: اجيب لك ملابس؟
هيام: لا شكرا
ملاك: بتبردين كذا
هيام: بقوم بعد شوي
لورين: وانا؟ ترى حتى انا ملابسي مبلله
ملاك: تبيني اجيب لك ملابس؟
لورين: ايوا
ملاك: لا
لورين بمزح: اكرهك
ملاك: شعور متبا..
قاطع كلامها صوت الجرس اللي بعده سمعوا صوت اتصال جوال لورين
لورين: يمه وصل بسرعه
ملاك: حماااااس قبت قبت قبت
لورين: نعم؟
هيثم: افتحي الباب بسرعه
وبالفعل اتجهت لورين وفتحت الباب له،
هيثم: وينها؟
لورين باستغباء: مين؟
هيثم: بذبحك ترى
لورين: امزح امزح، شوفها داخل
ملاك: ندى عطيني توقعاتك وش يصير
ندى: اخاف يذبح ريم
ملاك: الحمدلله
هيثم وهو يجلس بجانب هيام: فيك شيء؟
هزت راسها بالنفي، واردف هيثم بضحكه: ماتوقعتك ماتعرفين تسبحين
لورين: يمكن تعرف تسبح لو محد دفها
هيثم بإستغراب: كيف؟
لورين: ريم دفتها قبل لا تلبس ذاك الشيء
ملاك: طوق النجاة
لورين: بالضبط
هيثم بمحاوله لمسك اعصابه: ووينها هي الحين؟
لورين: بالجهة الثانيه
هيثم وهو يوقّف: حلو
هيام: اتركها خلاص
هيثم: ماراح اسوي لها شيء
ريم وهي تقبل عليهم بإبتسامه: اوه هيثم موجود
لورين بهمس: جت للموت بنفسها
هيثم: ياهلا، كيف حالك؟
ريم: قبل والا بعد شوفتك؟
هيثم وهو يشد شعرها: لا، بعد ما اغرقك
لورين بتصفيق: حيييووو
هيام: هيثم اتركها
ندى: مايصلح هالشيء خلاص
هيثم: لحد يتدخل، اي شخص بيتدخل بيلحقها
اتجه للمسبح وهو شادها من شعرها معاه، وجلس على ركبته عند طرف المسبح ومسك راسها ودخله بالماء، كان يغرقها الين يحس نفسها بينقطع ويطلعها تتنفس لثواني وبعدها يرجع يغرقها
لورين: يبنات احس حزنتني
ملاك: حتى انا
لورين: توقعت بيجيها كف وانتهى الموضوع
هيام وهي تحاول تسحب هيثم: اتركها ياهيثم
هيثم: بعّدي عني
هيام: اتركها ان كان لي معزه بقلبك، لا تلوث يدينك فيها
ناظر هيام لوهله، ووقّف وطلع راسها من الماء واول ماعدلت وقفتها دفها للمسبح والتفت على البنات: لا اشوف احد يساعدها
ندى: نخليها تموت
هيام: هيثم مايسوى والله
هيثم بإستنكار: مايسوى؟
هيام: ممكن؟
هيثم: لورين عطيها طوق النجاة تطلع نفسها
هيام: شكرا
هيثم: انا ماني فاهم ليش تساعدينها
هيام: اخاف تموت وانت تتحمل المسؤوليه، ماتسوى والله
هيثم: لعيونك كل شيء يسوى
ابتسمت ابتسامه خفيفه وبعدها مسكت راسها بألم،
هيثم: متاكده انك بخير؟
هيام: اي، عادي لها فتره تجي وتروح
هيثم: اوديك تاخذين ادويه؟
هيام: بعدين بعدين
هيثم: براحتك، لكن ماردك تاخذين، وادخلي تدفي قبل تمرضين
هزت راسها بالإيجاب: من عيوني
هيثم: ضروري اروح الحين، اذا بغيتي شيء اتصلي علي
لورين: بيصير نفس قبل شوي؟
هيثم: اذا هي اللي بتتصل، لا
لورين: ياثقل دمك
هيام: يبنات جوعانه
لورين: لسى بدري
هيام: يعني تبيني اقول لبطني انتظر لا تجوع؟ اقولك جوعانه
ملاك: طيب يلا وش تبغون تاكلون؟
لورين: يبنات لسسسى ماسبحنا ولا سوينا شيء
هيام: بعديييين الحين جوعانه
لورين: اذا سبحتي بتجوعين وبعدها يلا اطلبوا مره ثانيه
ملاك: اص حتى انا جوعانه
~تسريع للأحداث-بعد مده زمنيه~
هيام: فيني نوم
ندى: حتى انا
ملاك: بدري، دجاج انتوا؟
هيام: حبيبتي الساعه 3 الفجر وش دجاج بعد
ندى: افكر ارجع لبيتنا
هيام: حتى انا، بدق على هيثم
لورين: اي صح ملاك متى حددتي يوم العرس؟
ملاك: الخميس
لورين: وشو!! يعني بعد ثلاث ايام؟
هيام: امداك تخلصين كل شيء؟
ملاك: خلصت بعضهم، وكلموه اهلي بخصوص تحديد يوم العرس ومايبغى يغيره
ندى: تحمليه حبيبتي
لورين: ملاك الله يعينك، الحين لازم تتحملين ندى واخوها مو بس ندى
ندى: خيييير؟!
هيام: اتفق والله، الله يعينك
ندى: انقلعوا
لورين: الحين تكلم البودقارد حقها
ملاك: قصدك سعديه؟
لورين: ايي
هيام: مين سعديه
لورين: تشفير اسم سعود
ندى: انقلعي يامريضه
لورين: شدعوه شفيك زعلتي
هيام: تغلطين على حبيب القلب حقها وتسكت؟ مستحيل
ندى: انقلعي انتي وهيثمك
لورين: منجد هيام وش تدلعين هيثم؟ اسمه قبيح مايتدلع
ملاك: واحس الاسم نفسيه بعد
لورين: حبيبتي هيثم بكبره نفسيه وقفت على اسمه؟
هيام: صح انه اسمه قبيح، بس برضو مارضى عليه
ملاك: مسويه طالعه منها؟ ترى حتى اسمك قبيح
هيام: حبيبتي ترى اسمك ملاك زين؟ اذكرك بس
ملاك: ايوا طيب اسمي حلو، انتي اسمك كئيب زي زوجك
هيام: حبيبتي انتي كيف يدلعونك؟ مومو؟ ملوكه؟
ملاك: وانتي وشلون يدلعونك؟ هوهو؟ يدلعونك هم والا ينبحون لك؟
هيام: مايضحك، ينادوني بـ "هيامي"
لورين: محد يناديك هيامي الا هيثم ترى
هيام: عالاقل فيه احد يدلعني
لورين: تكفين عساس اني ميته على احد يدلعني
وبعدين صح ان اسمائكم كلها قبيحه بس تقبلوا الواقع
ملاك: ترى اسمك لورين! حتى دلع مايتدلع
لورين: الا! فيه لولي
ملاك: دلع محلوب واضافةً انه محد يقدر يناديك بياء التملك
هيام: تخيلت ينقال لها لوريني
ملاك: تعبتت يضحكك
لورين: خير؟ ترى اسمي فخم ومعناه حلو! مو اساميكم ذي
ندى: والله ياعليكم سواليف
هيام: صدق والله سواليفنا خايسه
ملاك: حلو انك حسيتي
هيام: بدعس عليك ترى
ملاك: تخسين
لورين: حبيب القلب يرسلي، قاعد ينتظرك
هيام: بمشيها لك عشان هيثم وصل والا غيره ياويلك مني
ملاك: هيام امشي تكفين
هيام: سمي
<<سيارة هيثم>>
هيثم لما شافها تركب: لا تكفين نامي بعد هناك، مو احسن؟
هيام: سد حلقك وامش
هيثم: نعم؟
هيام: ترى مالي خلقك والله
هيثم: الله يرزقك اخلاق
هيام: اخلاقي افضل من اخلاقك
هيثم: انطمي
هيام: يبوي اسمك هيثم وتسولف امش بس
هيثم: شدخل الاسم الحين
هيام: لا بس جتني لحظة ادراك ان اسمك مخيس، كيف قبلت فيك
هيثم: عساس اسمك حلو يعني؟
هيام: طبعا!
هيثم: هيام خلينا نسوي تحدي
هيام: وش هو؟
هيثم: اذا سديتي حلقك من الحين الين نوصل البيت بعطيك ١٥ ريال
هيام: بخيل
هيثم: ١٥ ريال تجيب لك وجبه ترى
هيام: طيب لو سكت زياده يتدبل المبلغ؟
هيثم: ممكن
هيام: يلا اجل بسكت
هيثم: الحمدلله
هيام: بس اسمع قبلها بقولك سالفه
هيثم: والله اني داري
هيام: خير ماتبغاني اسولف لك!!
هيثم: الا يلا
هيام: قبل شوي قاعدين نسولف انا والبنات، قاعدين يقولون ان اسمي مخيس ومايتدلع، تتفق؟
هيثم: هذا سوال مب سالفه
هيام: مايفرق، جاوب
هيثم: اتفق
هيام: حلو زين
هيثم: مازعلتي صح؟
هيام: وش متوقع اقول؟
هيثم: ادري بتقولين لا مع انك زعلانه بس عالاقل ارتاح شوي لانك قلتي لا ف بعدين اذا هاوشتيني اقولك..
هيام بمقاطعه: ياكثر سواليفك
هيثم: لحظه لحظه، مين صاير يزبد هاليومين الحين؟
هيام: والله التزبيد راحه نفسيه
هيثم: اجل انطمي
هيام: زين
<<تسريع للاحداث- يوم العرس>>
فتحت عيونها وهي مو مستوعبه انها اليوم بتتزوج، كبف بتقدر تترك اهلها وكل ناسها وتنتقل مع شخص ثاني، اخذت نفس عميق واتجهت لدورة المياه تغسل وجهها
~بالأسفل~
نزلت لهم وابتسمت من لما شافتهم ينادونها بـ "هلا بالعريسه"
ملاك: صباح الخير
ام سلطان: صباح النور
ابو سلطان: قايمه بدري عن العاده
ملاك بضحكه: مدري
سلطان: كلنا ندري انك متوتره الا انتِ
ملاك: هو صدق اني متوتره، بس ان شاء الله يخف
ام سلطان: عادي حبيبتي كلنا توترنا، هي فتره وبتروح
ابو سلطان: امك درس بالتوتر
ام سلطان: ماكنت متوتره بالحيل!
ابو سلطان: خلينا ساكتين يبنت الحلال
ام سلطان: ماعليك من ابوك، كولي عساس بعد شوي نروح نتجهز
ملاك بضحكه: ابشري
<<الـقـاعـة>>
لورين: ملاك متى بتجي؟
هيام: مدري عنها
لورين: خلاص اجل انا بروح اول للمكيب ارتست وانتوا بعدين تلحقوني
هيام: حلو
ندى: يبنات جعت
هيام: حتى انا، بس اصبري بعد شوي نروح سوا
ندى: اف ياليتني ولد اتجهز بسرعه
هيام: خليها على ربك بس
ملاك: يبنااات متوترررره
هيام: طيب سلمي بالاول
ملاك: شسوووي متوتررره بالحيل
ندى: كولي وبتروقين
ملاك: انتي كل همك بطنك؟
ندى: وش فيه احلى من الاكل؟
هيام: ترى جايك الدور
ندى: وش؟
هيام: ماردك تتزوجين
ندى: من قال؟
ملاك: كلنا نعرف انك تحبين سعود
ندى: لا علي صوتك اكثر خلي الناس يسمعون
ملاك: ياحبيبتي وخري عني ماني رايقه لك
ندى: هذي اخلاقها وهي بيوم عرسها، اجل كيف بعدين؟
هيام: انتي مستفزه مالومها