ظلال الحب

البارت السادس

‏كان موقف صغير، ولكنه كان إشارة لحسم حيرةٍ ما.

********

حسيت بأن فصل جديد بحياتها بدأ، فصل مليئ بالغموض والقوة والخطر.

جان اكو صوت خافت يجي من داخل البيت، كأنه همسات الماضي. جنت احس بأن هذا المكان  بيه هواي من الأسرار، أسرار يمكن تغير حياتي إلى الأبد.

جان الهواء بداخل القلعة بارد وثكيل، والهدوء يسيطر على كل شي، وكأنه ما يريد يكشف عن أسراره. بدأت امشي ورة نورا والسايق ببطء، واني احس بضغط غريب على صدري. كل خطوة اخطوها جانت تأخذني أعمق بهذا العالم الغامض.

بالداخل، جان المكان بيه اضوية خافتة، واكو على الحياطين لوحات قديمة وكتب متناثرة هنا وهناك. جان البيت يبدو وكأنه مكتبة ضخمة، متروسة بالمعرفة القديمة والرموز الغامضة.

وكف السايق كدام باب خشبي جبير ودك الباب ثلاث مرات. فتح الباب ببطء، وطلع من وراه رجل جبير بالعمر عندة شعر أبيض وعيون حادة. جان لابس عباية سوداء، وظهرت على وجهه علامات الزمن. لكن جانت عندة نظرة متروسة بالحكمة.

"هلا بيكم،" كال الرجل بصوت هادئ بس قوي. "أني الشيخ يونس، وهذا المكان هو ملاذنا الآمن."

تقدمت نورا وقدمتني. "هاي هي ليانور، الشخص الي جنه ننتظره."

باوعلي الشيخ يونس بهتمام، وكأنه يحاول قراءة الي بداخلي. "أهلاً بيج يا ليانور. احنا هنا لنساعدج على فهم قدراتج، بس قبل ما نبدأ، اكو شي لازم تعرفيه."

اقترب الشيخ يونس مني وكال: "هذا المكان، القلعة، مو مجرد ملجأ. هوة مركز قوة قديمة، مرتبط بالعالم الي بين النور والظلام. هنا، حتكشفين حقيقة منو أنتِ وليش تلاحكج. الظلال."

حسيت بأن هذا المكان يخفي شي جبير. جنت اريد أعرف كل شي، لكن بنفس الوقت خايفة من الي راح اكتشفه.

"بس قبل ما نبدأ،" كال الشيخ يونس وهو يأشر على واحد من الكراسي القريبة، "لازم تستريحي. أنتِ بحاجة إلى قوتج قبل ما نغوص بأسرار هذا المكان."

كعدت على الكرسي، واني احس بالتعب من كل ما مريت بيه اليوم. جانت عيوني تثكل، وكأنها بحاجة للنوم العميق. باوع الشيخ يونس لنورا وهز راسة الها.

"حتكونين بأمان هنا، ليانور"، كالت نورا وهي تخلي ايدها على كتفي بلطف. "راح اكون يمج طول الوكت."

غمضت عيني، وحسيت بأن النوم حاوطني ببطء. وبذيج اللحظة، بدأت احلم.

بالحلم، لكيت نفسي امشي بممر طويل ومظلم. جان هناك ضوة خافت بنهاية الممر، وجان الصوت الغريب الي سمعته من قبل يزداد وضوح. من اقتربت من الضوة، شفت باب قديم، بس قبل ما الزمة، سمعت صوت يكول: "لا تفتحي الباب. بعد وكت."