قمر الصعيد

الفصل الثامن عشر🦋

اي يا قمرات فين الكومنتات والتشجيع يالا عاوزه كومنتات وفوت كتير يا حلوين🤍😊
جاهزين للفصل الجديد يالا بينا🤍😉

في صباح يوم جديد في القاهرة تحديدا بيت سارة
صحيت كالعادة علي صوت عالي بس مش صوت عطيات صوت اغاني عالية جداً
سارة بتأفأف: ياربي هو انا موعودة بالمصايب الناس تنام وتصحي علي صباح الخير انا بصحي علي مصيبه شكل
قامت من علي السرير وهي بتقول: استعنا علي الشقي بالله
فضلت تتبع صوت الاغاني لحد ما وصلت لأوضة عطيات فتحت الباب واتصدمت من الي شافتو
عطيات لابسه بدلة رقص ومبدهله وشها ميكاب وبتاكل لبان بمياعه وحاطه جهاز بيطلع انوار كتير وواقفة علي خشبه عالية عملاها استيدچ
عطيات بصوت مايع وهي بتغني: انا توته فروته وحلوة وقطة شربت انا شفطه جالها زغوطه وقعدت تضحك بصوت مايع وهي بتقول جيالك يا عطوة يا حبيبي مواه وبتغمز وتبعت بوسه في الهوا
سارة ده كلو واقفه مصدومه من الي شايفاه وعماله تفتح عينيها وتقفلها وحطت ايديها علي صدرها وهي بتشهق وتقول: احيه عطيات بقت فتاة ليل
راحت لعطيات ومسكتها من ايديها وبتقول بزعيق: اي الي انتي بتعمليه ده يا عطيات الكلاب بقيتي غازيه شربتي بانجو ولا لسه يا عطيات
عطيات بردح: جرا اي يا بت يا سكر انتي نسيتي نفسك ولا اي يا بت لما كنتي بتمسحي عربيات الشوارع ولميتك وجبتك هنا قولت اكسب فيكي ثواب
سارة بردح: لا يا عنينا اذا كان علي الردح عندي منه كتير اوي ده انا اغسلك وانشرك كدا تكسبي في مين ثواب يا فتاة الليل يا عطيات الكلب
عطيات بردح: عطيات مين يا بت اسمي زيزي هانم اي يا حبيبتي هو اسكتنالو دخل بحمارو جايه عاوزه تاخدي مكاني انا مهما لفيتي ودورتي مش هتعرفي تبقي زيزي الي وقفت شارع الهرم كلو علي رجل كدا
سارة بردح: زيزي مين يا عين النونه ده انتي من ايام حتشبسوت ده ابو الهول يقولك يا تيتا اتلمي كدا احسن المك
عطيات بردح: ليه شيفاني رز ومتبعتر
سارة بزعيق ونزلت مسكت الشبشب وبتجري ورا عطيات: والله منا سيباكي غير وانتي في قسم الحوادث جننتينييييييي يا عطيااااااااات
وفضلت تجري وراها وعطيات فتحت باب الشقة وطلعت
سارة بصويت: يا عطيااااااااات هتفضحينا يا بت الرفضي
عطيات طلعت شقة عبدالله ابو قمر وإياد وخبطت جامد فتحتلها وفاء وهي بتقول بزعيق: ما براحه احنا قاعدين علي الأوكره
وفاء اول ما شافت عطيات قالت بشهقه: يالهوي اي الي انتي عملاه ده يا حجه عطيات
عطيات راحت استخبت ورا وفاء
سارة طلعت وبتقول بزعيق: طنط وفاء ادهالي هقرقشها بسناني الي فضحاني دي
وفاء بضحك علي سارة: حرام عليكي يا عطيات جننتي البت في عز شبابها
سارة بتمثل العياط وقعدت علي الارض وقالت: اهئ اهئ هو بقي فيها شباب يا وفاء انا عجزت ياختي وبقيت عظام رميم من الي ما تتسمي دي
وفاء طبطت علي سارة وقالتلها: معلشي ياختي ستك برضو
سارة بصت لعطيات بصه شرانيه وقالت: فتاة الليل دي مش ستي ولا اعرفها بعد كدا هجبها من الكباريهات
وفاء ضحكت علي سارة وقامت جابت لعطيات جلابيه
وفاء لعطيات: خدي يا عطيات البسي دي اسطري نفسك ياختي
عطيات بصت لسارة بقرف وقالت لوفاء: مشي بت الشوارع دي من هنا مبقاش زيزي اما خلتها تلحس التراب تاني
سارة ببرود: خليكي كولي في نفسك مش هلك سعرات عليكي تاني يا عطاعيطو
عطيات لبست الجلابيه وقعدت تبص لسارة بقرف وسارة تطلعلها لسانها
عبدالله خرج من الاوضه وقال بضحك: عملت فيكي اي النهارده يا سارة
سارة: والنبي يا عبدو ما تفكرني احسن لما صدقت دمي برد من البتوجاز المتنقل دي
وفاء بتمثيل الغيره: بنت مية مرة اقول عبدو دي متتقالش
سارة بغمزه: بتغير يا جميل الله يسهلو ياعم
عبدالله بضحك وهو بيبوس راس وفاء: هو انا ليا غيرها حبيبة قلبي وروحي وام عيالي
وفاء وهي بتنغز عبدالله: اختشي يا راجل
سارة وهي حاطه ايديها بهيام: حيح تبا للسناجل الي زينا
سارة قامت وقالت بغمزه: اخد انا عطاعيطو وانزل افضلكو الجو
وفاء بتبريق: ماشي يا تربية زباله
سارة بضحك: تربيتك يا فوفا يوه
وفاء نزلت مسكت الشبشب ونشلتو في وش سارة بالظبط
سارة بوجع: استاذة في الرمايه يا فوفا
لسه وفاء هتمسك الشبشب التاني سارة خدت عطيات ونزلت جري وهي بتضحك
عند كارما.....
كانت لسه صاحيه وقامت عشان تشوف هتلبس اي لقت جرس الباب بيرن
كارما بإستغراب في نفسها: غريبة يعني البت سارة بقالها كتير مجتش الصبح
راحت فتحت الباب علطول واتصدمت من الي قدامها
كارما بصدمه: اي الي جابك هنا يا يزن
يزن بإبتسامة باردة: هو في حد بيقابل الضيوف كدا برضو
كارما بغضب: وهو في ضيوف برضو بيجو من صباحية ربنا
يزن ببرود: مش هتقولي اتفضل
كارما بغضب: لا معندناش النهارده
ولسه هتقفل الباب في وشو فتح الباب ودخل جوا بدون مبالاه لكلامها
كارما بردح: جرا اي يا عنيا هو الدم خلاص اتلحس ومبقاش موجود ما قولنا لا وبعدين انت ازاي تدخل كدا من غير ما تستأذن والي انت متعرفهوش ان انا قاعده لوحدي ومينفعش تدخل بالطريقة دي
يزن ببرود: منا عارف
كارما بغضب: طب يالا من غير مطرود احسن اطلعك علي ظهرك
يزن قلع الجزمه بتاعتو وقعد علي الكنبه بأريحيه وشغل التيلفزيون
كارما بزعيق: انت يا جدع انت اطرش قولت غور في داهيه
يزن طلع حاجه لكارما بعدها فتحت بوقها بصدمه
في منزل الهواري.....
كانت حنين قاعده في اوضتها بتكلم امها
حنين بتريقه: اما خليت هاشم بنفسو يرچعني مبجاش انا اما حتي شوفنا محاوله واحدة
سعدية بغضب: عيشتي وشوفتي يا سعدية بتك شمتانه فيكي ده بدل ما تساعدي امك يا بت الچزمه مش كفاية مرت خالك عليا
حنين: عملتك اي عاد
سعدية بغضب: شماته فيا واكمني مش ليا مكان اروح فيه مشغلاني عنديها شغاله وفي الرايحه والچايه تجول دي اخرة الي راسه في السما اخرتها بتتحط راسه في الطين حتي ما سابلك شيلن خدك لحم ورماكي عضم
حنين بغضب: هاچي اطربج البيت فوج راسها بت الفرطوس دي
سعدية بخبث: اصبري يا حنين التنفيذ جرب اوي اما خليتها تبوس رچلي مبجاش انا
حنين: ناويه علي اي يا اماي
سعدية بخبث: خليها مفاچأة
حنين: ربنا يستر
سعدية: يالا خليني اظبط الچو
حنين: سلام
في نفس المكان بس في اوضة قمر.....
كانت لبست دريس بيبي بلو لبعد الركبه ولبست هيلز اسود وفردت شعرها الكيرلي ونزلت قوصه وحطت ميكب خفيف
بصت علي نفسها في المراية وقالت: قمر يابت اسم علي مسمي وبعتت بوسه لنفسها علي الهوا
طلعت من الجناح في نفس الوقت الي كان طالع فيه مروان
مروان بغمزه: اسطا بليه لبس فستان
قمر لوت شفايفها وقالت: بقي القمر ده بليه
مروان بضحك: خلاص يا نونا متزعليش
قمر بتكشره: ياباي عليك متعرفش تقول كلمة حلوة ابدا
مروان قرب من ودانها بصوت عذب قال: الجمال ده يتخبي جوا القلب ويتقفل عليه من عيون الناس
بعدين غمز ليها ومشي
قمر قلبها قعد يدق جامد ومش مصدقه ان مروان ممكن يقول الكلام ده سيطرت علي نفسها ونزلت عشان يفطرو
مروان طول الفطار عمال يغمز لقمر من غير ما حد ياخد بالو وهي متوترة جداً
مروان ركز علي الميكاب الي حطاه قمر واديق من الروچ عشان ملفت
مروان: يالا يا قمر
قمر قامت وركبو العربية ومشيو
مروان لقمر: احم قمر ممكن اطلب منك طلب
قمر: اطلب عادي
مروان: امسحي الروچ الي انتي حطاه ده
قمر بصتلو بإستغراب: وده ليه يعني
مروان: كدا وخلاص
قمر: وانا عاجبني ومش حابه امسحو
مروان ادايق من ردها وفضل طول السكة ساكت وقمر مستغربه رد فعلو واشمعنا قالها كدا
عند سعدية....
كانت متخفيه بلبس غريب ومستنيه حد
بنت: اهو يا هانم الي انتي طلبتيه
سعدية بخبث: متأكده ان المعلومات دي صوح
بنت: عيب يا هانم دي مفيش حاچه بتخبيها عني واصل والمعلومات دي ميه في الميه موثوق فيها
سعدية بخبث: عفارم عليكي خدي دول نص الفلوس بعد التنفيذ النص التاني
بنت: ربنا ما يحرمنا منك يا هانم
بعد ما البنت مشيت سعدية راحت شركة الهواري بس بالتحديد الشركة الي بيقعد فيها هاشم
طلبت من السكرتيرة تقولو انها عاوزه تقابلو
السكرتيرة دخلت لهاشم وقالتلو
هاشم بإستغراب: عاوزه اي تاني عاد دخليها يابنتي
سعدية دخلت بوجه منكسر وتمثيل الدموع
سعدية بدموع: قبل ما تتكلم يا هاشم انا عاوزه اقولك اني بعد الي عوض عملو ولما بعدت عنكم عرفت قد اي اني غلطانه وغلطت في الراچل الوحيد الي اتمنالي الرضا ارضي وانا بغبائي كنت بضيعو
هاشم: وانتي فاكرة ان الشويتين دول هياكلو معايا
سعدية بدموع: حجك يا اخوي تجول اكديه انا كنت واعره معاكم لدرجه البشاعه بس انا النهارده چايه اثبتلك اني اتغيرت وهنقذكم من حاچه كان هتخليكم علي الحميد المچيد جريب
هاشم: جولي الي عندك عاد
سعدية: خود الملف ده اكديه وانا هجولك الي بيحصول من ورا ضهرك اولا انا بعد ما عوض طردني قررت بعدها انا اچيلك تاني يوم واستسمحك انك توجف چنبي عشان تساعدني چيت الشركة اهنيه ورچلي عماله تقدم خطوة وتأخر التانيه لجيت السكرتيرة بتاعتك واجفه مع حد برا الشركة وعماله تكلمو وتبص حواليها زي الحراميه استغربت الموضوع جولت لما ادور وراها فضلت اراجبها لما عرفت من واحدة صاحبتها بتفهم في النت انها كل اسبوع بتجيلها وتجولها انقلي المعلومات دي لواحد صاحبتها كانت فاكرة انها شغل عادي تبع الشركة لحد ما في مرة فتحت الملفات دي ولجت انها ورج صفقات ومشروعات ناوين تعملوها تبع الشركة فقررت انها لازم تجول لحد بس خافت محدش يصدق لانه مش دليل اوي فأنا لما عرفت عنها كل حاجه وعرفت انها صاحبتها المقربه جولت اعمل نفسي بهددها واقولها اني من عيلة الهواري واننا اكتشفنا الي بيعملوه وهوديهم في داهيه فخافت وحكت كل حاجه وادتني الدليل الي جدامك وجالت انها عاينه النسخه الاصلية وكل حاجه تثبت انها بتعمل كدا في صندوق في بيتها وعيناه في البدروم
هاشم: وانا اي الي يخليني اصدج كل ده
سعدية بدموع: حجك ادي جدامك الدليل الاول وهتلاجي كل حاجه في الصندوق الي جولتلك عليه
وراحت طلعت وسابته
هاشم فضل يفكر ياتري فعلا كلامها صح ولا خطة من الخطط بتاعتها وقرر انه يتأكد بنفسو
في الشركة عند مروان.....
كانو وصلو الشركة ودخلو مكتبو عشان يخلصو بقيت الشغل
وقمر مضايقه ان مروان مش بيتكلم معاها زي امبارح
عمر دخل مكتب مروان واول ما شاف قمر قال: ايش ايش يا ست قمر اي الحلاوة دي ياعم وراح غمزلها
قمر بتكبر: طول عمري يابني حلوة بس البني ادمين مبقاش عندهم نظر ومش بتقدر الجمال
عمر بغمزه: علفكرة انا بقدر الجمال اوي خدي في علمك
قمر بتمثيل الكسوف: بس عشان بتكسف
عمر بغمزه: اموت انا في الي بيكسف
قمر ضحكت عليه
عمر بإبتسامة وبغناء: ضحكت يعني قلبها مال
قمر بتكبر: ده بعينك
عمر بإبتسامة: ليه ده انا حتي حليوه بس اي يا معلم مش من عادتك الميكاب والحركات دي كنت عملنا فيها عبدالغفور البرعي
قمر بتكشيره:يووووه هي الرجالة متعرفش تكمل حلو للأخر
عمر بإسلوب البنات:عندك حق والله اوختشي رجالة ميملاش عينيها غير التراب
قمر فضلت تضحك عليه وقالتو: فظيع
مروان عينو بتطلع شرار وهيموت من الغيره
مروان بغضب: افتكر ده مكان شغل مش كافيه سبع نجوم كل واحد علي شغلو يالا
قمر بصوت واطي لعمر: رجع ابو بوز تاني اهو
عمر ضحك
مروان سمع كلامها اتنرفز اكتر
مروان لعمر بغضب: عمر يالا عاوز الشغل الي قولتلك عليه بسرعه علي مكتبك
عمر طلع
قمر كانت لسه هتطلع مروان قفل الباب وحجز عليها بإيدو وهي ظهرها للباب
قمر بتوتر: في اي يا مروان
مروان بغضب: انا قولت الروچ ده يتمسح هو والميكاب دي ولو شوفتك بتضحكي تاني مع عمر وتسمحيلو بالإسلوب ده هتشوفي وشي التاني
قمر بغضب: وده بصفتك اي
مروان بغضب: انا عاوز كدا يبقي تسمعي كلامي وبس
قمر بغضب: وانا قولت لا وبراحتي اعمل الي انا عاوزاه
مروان ادايق وراح جاب منديل ومسح الميكاب من علي وشها جامد
قمر بغضب: مروان اي الي بتعملو ده اه وشي
مروان بغضب: عشان تعاندي معايا بعد كدا ودي اقل حاجه اعملها في الي يعاند معايا لو شوفتك حاطه ميكاب تاني مش هتطلعي من باب البيت ولو اتكلمتي مع عمر هكسر عضمو في ثانيه
قمر بغضب: لا انت زودتها اوي انت مش بابا ولا ماما عشان تتحكم فيا كدا انا هنا المهندسة قمر وبنفذ شغل وبس
مروان بغضب: وانا قولت الي عندي وانتي حره واذا كان علي بصفتي اي بصفتي مديرك وانا مسمحش بكدا ويالا علي شغلك
قمر طلعت وهي متنرفزه منه ومروان مستغرب هو اتنرفز كدا ليه وهي عندها حق هو بيعمل كدا بصفتو اي واديق من نفسو عشان زعلها
عند مازن....
كان ركب عربيتو ولسه هيمشي راح باب العربية اتفتح ودخل يزن
مازن بإستغراب: انت مش قولت ياض انك مش هتسافر معايا
يزن بدلع: ياخي قول عامل اي الاول احضني وقولي وحشتني يا بيبي
مازن بقرف: جتك القرف مش هتغير التلزيق ده
يزن بدلع: قلبك قسي اوي يا مزاميزو
مازن بقرف: ولا قولتلك متقولش الاسم ده تاني
يزن بغيظ: مزاميزو
مازن بغضب: بطل بقي وقولي اي الي جابك
يزن: عادي هبت في دماغي وقولت ما اشوف الواد مازن واحشني ونقعد نحكي شويه بدل الملل ده واغير جو واشوف مارو احسن واحشني اوي وبالمرة نشوف المشروع عامل اي
مازن بإستغراب: ياخي اي الهمه الي حلت عليك دي
يزن بتكبر: انتو الي مش مقدرين النعمه الي في اديكو
مازن: ياخي اتنيل ربنا يقدرني ويخليني استحملك الكام ساعة بتوع الطريق دول استعنا علي الشقي بالله

انتظرو الفصل التاسع عشر.....
ياتري عطيات هتعمل اي تاني في سارة؟
وياتري اي الحاجة الي وراها يزن لكارما؟
وياتري خطة سعدية هتنجح وهاشم هيصدقها؟
وياتري مروان هيعتذر لقمر علي اسلوبو معاها؟
وياتري الثلاثي المرح لما يتجمع هيعملو اي؟
كل ده هنعرفوا مع قدر وبس🤍😉
اكتبولي توقعاتكم علي الاسئلة دي في الكومنتات يا قمرات ومتابعه وشير لصحابكم عشان الروم يكبر وانزل الفصول بسرعه واهم حاجه يا قمراتي الفوت قبل قراءة الفصل🤍😊
باي باي يا قمراتي الحلوين🤍😊