البـارت العـاشـر >
.
.
.
في الرياض في بيت ابو نجد
عند نجد اللي طول الوقت عينها على التليفون وابوها فيه وماصدقت انه تغدى وراح ينام وامها بعد راحت تنام وركضت وهي تجلس جنبه ولا يمديها جلست الا دق التليفون ورفعت بسرعه : الوو
غزيل: نجد وشلونتس؟
نجد بخيبه : هلا بخير انتي شلونتس؟
غزيل: بخير والله اني طفشانه قلت ادق عليتس نسولف
نجد: اسمعيني يا غزيل بدق عليتس انا شوي بس اخلص شغله يلا مع السلامه
وسكرت وهي تخاف يدق هايف والرقم مشغول وفعلاً دق ورفعت بسرعه وهي تنتظر من المتصل
هايف اللي جالس بعيييد عن البيوت وهو قلبه يدق مع كل دقه وقال: الو
نجد اوجعها قلبها : الو
هايف : نجد؟
نجد سوت نفسها ما تعرف تبي تشوف وش يقول : من معي؟
هايف : ما ظنتي انتس استخرتي ولا اذا استخرتي بتعرفيني
ابتسمت نجد بتوتر : ايييه ليتني مستخييره من قبل ولا ما انكسرت رجلي ورجل غيري
ضحك هايف : الله يسامح اللي كان السبب لكن وشلون رجل نجد؟
نجد : مايصير لنجد شي وهي بخير
كان ودها تكمل وتقول ( مادام هايف شايل همها )
هايف ابتسم: هذا المعهود عن قمراي
نجد : وش اخبار الليل؟
هايف: الليل بخير بس ناقصته القمرا
نجد اللي سدت السماعه وهي تضحك بوناسه ورفعتها بثقل لكن مايمدي الا وخرتها برعب وهي تسمع ابوها :من تكلمين ؟!
نجد:غزيل
ابو نجد: هاتيها بسألها عن احوالها
ارتبكت نجد واعطته وهي تقول : الخط عند غزيل يقطع
ابو نجد: الو غزيل
فز هايف واوجعته رجله بس شد على نفسه بوجع وارتبك وهو ينعم صوته غصب لايفضح نجد :هلا
ابو نجد : وشلونتس؟
هايف: بخير
ابو نجد: علامه صوتس !؟
هايف اللي مايدري من وين طلع صوت البنت عنده وهو يقلد بخوف : متقطع صوتي شوي بس بخير
ابو نجد: سلامتس سلامتس وشلونه فلاح وامتس؟
هايف: بخير يسلمون عليك
ابو نجد اللي مستغرب صوتها : محتاجين شي؟
هايف: سلامتك
ابو نجد: اجل فمان الله لاتتعبين صوتس بالهذره وروحي اشربي شي يشفيتس
أنت تقرأ
مالي وطن في نجد الا وطنها
De Todoللكاتبة: أديم الراشد نجد، هايف، زيد، ميثى، محسن، اصايل، مطلق، شريفة، ريوف، حسين، سلمى، فايز، لطيفة، اديم، مؤيد رواية منقولة
