مالي وطن في نجد الا وطنها

١٥

البــارت الخـامس عشـر...
.
.
.
وهذا نظام العرس بالديره اللي انتهى وقت العرسان فيه زفوهم لعرايسهم

اديم نقلوها لغرفتها هي ومطلق وسلمى تصور دخول الرجال واديم كل خليه فيها ترتجف

ومطلق كان وده يدخل حتى هايف معه من قو ماهو محتاج فزعه دخل مابين ابوه وعمه وفايز

سلم على امه وام فايز بس اديم ولا قدر انه يلتفت فيها وبعد السلام والتوصيات الكل طلعوا وتركوهم

وهم جالسين وكل الاثنين جامدين لا مطلق يلتفت فيها ولا اديم قادره تناظره

على ان مطلق منطلق وكلامه ثابت دايم الا انه عجز الحين يتكلم وهو يحس انه الحروف تطير بداخله ما قدر يرتبها وبعد جهاد حاد مع نفسه لف وليته ما لف طار كل شي قدر يجمعه اوجعه قلبه وهو يشوف اديم غير اليوم يشوفها مستعدة بفستانها الابيض وناظر فبشته ورفع راسه وهو الحين عرف ان الموضوع جدي خلاص وقال : اديم مبروك .

اديم عجزت عجزت ترد وهي تناظر بإنعكاسه بالمرايه كان ثاااابت وواثق ولا كأن صاير عنده شي

لكن مطلق داخلياً محتاااس ماهو على الشكل الخارجي قال بيخفف التوتر : ان شاء الله ان الليله بداية لحياه طيبه وان شاء الله ان ربي يكتب لنا كل خير

ماردت اديم عليه نهائياً واعتبرها مطلق فرصه انه ما يتعب نفسه اكثر ويسكت

................••............

في غرفة فايز وريوف

كانوا كلهم فرحانين وبعد ما طلعوا الكل من عندهم ولف فايز وهو يمد يده ويشد على يدها: مبروك يا ريوف

ريوف بهمس: يبارك فيك

فايز : الحمدلله اللي تمم لنا وجمعنا على خير وان شاء الله انها اول خطوات السعاده وانا متاكد ان معتس الحياه بتكون حلوه اكيد

ريوف ابتسمت وهو منزله راسها : ان شاء الله

فايز عطاه كوب العصير اللي معه: سمي

اخذتها ريوف بإرتباك وبعد ما اخذت حاجه بسيطه نزلتها

فايز: نطلع؟

ريوف فهت: ويين؟

فايز ضحك: الفندق

انخطف وجهه ريوف لكن شد فايز على يدها : لا تخافين

ماردت ريوف وطلع فايز ينادي احد يساعدها تلبس

................••............

في غرفة مطلق

مطلق اللي مابغى يطلع لين اتصل فيه زيد : يلا ما ودك تروح الفندق فايز بيمشي ودي تروحون مع بعض

مطلق : زين

وقف مطلق وهو مايدري كيف يقولها وتنحنح وهو يقول : ودتس نطلع !؟