جنون الهيام ( الموسم الثاني )

جنون الهيام .. الجزء 1

وقيل عن عيناك  أنهما تشبهان البحر الازرق  .. وشعرك الذهبي يشبه لون  الشمس الساطعة  المنيرة بضوئها  وقت المغيب .. لكن أنتي لي بمثابة بدر  زين السماء والاخرون نجوم أتباعك🍷🥀

وسعوو وسعوووو يا مدمنات .. جنون الهيام عادت ليكم بلجزء 2 بعد الجزء الاول الرائع 🔥 بعد جهاد وتهاني لي عشنا معاهم لحظة بلحظة  راح  نتعلمو من قصتنا  انو الدراهم مشي هوما كلشي في هذي الدنيا ونتعلمو انو الحب الصادق يبني ديار وجامي لا حب الشخص يتقاس بلمال   .. القصة طلعولهالي كي العادة 6k باه نكمل .. ارائكم ديما في القروب ... هي ليست قصة عادية إنها  :

🔥 جنون الهيام 🔥 ..الموسم الثاني ( شخص مجهول 🎭)

بقلم إدمان سيما ... sima jarisse A.Y 🥀🍷

👑 ملاكي 👑 

خارجة من المتوسطة لي فوت فيها اووف ليوم أخر نهار للباك وزيد تعبت 5 ايام كاملين رايحة جاية في البيس تاع الهم منحبش نركب فيهم خطرة نجي واقفة خطرة نقعد في لرض جامي لا حكمت بلاصة كي الناس .. مشيت لطرف الطريق نستنى شي طاكسي تفوت عليا نركب ونتهنى .. بسيف باه فاتت حبسلي ركبت وديمارا وريتلو الحومة تاعي لي نسكن فيها ... أنا اسمي جيهان عمري 21 سنة بزاف ناس يستغربو كيفاه عمري 21 ونفوت الباك .. بكل بساطة عاودت بزاف وانا منقراش ضامنة مستقبلي وعندي دراهم وعلابلي انو حتى كون منجيبوش مراح يزيد فيا ولا ينقص بحكم عايشة مع جداتي موفرتلي كلش ... اما والديا ميتين ملي كان عمري 17 سنة كنا عايلة لباس بينا فرحانين مع بعض يحبوني ونحبهم خاصة انا بنتهم الوحيدة مي جا النهار لي درنا فيه العرس تاع عمي وروحنا في الكورتاج ثما تقلبت الطومبيل بينا كنا  في ثلاثة ومعانا بنت خالتي إحسان  بابا وماما ماتو في البلاص وبنت خالتي دخلت كومة وانا تجرحت جروح خطيرة بصح مش كيما هوما ثما هبلت تمنيت اني نموت ولا نعيش هذا الشي مي وقت بنت خالتي سلكت على خير طمنت شوي ورجعتلي الروح خاصة انو هي متربية معايا كثرمن ختي خالتي مدتها لماما ملي كان عمرها عامين بسبة محبيناش نتفارقو كل ما نبعدو على بعض نبداو نبكو ايا خالتي قررت اني تمدها وتربات معايا ... وبعد ما ماتو ماما وبابا عمومي حبو ياكلوني في الورث تاعو وذهبها عمي الكبير قالي نتي مزلتي صغيرة وانا نخبيلك كلش لوقت ربي يجيبلك مكتوبك ثما نرجعلك ... يقولك الغدرة من عند الحبيب صعيبة وهذاك لي كان عمومي كلاولي حقي وورثي لي ورثتو وجدة مسكينة مقدرتش عليهم مزيا كان بمالها ولا رانا تشردنا وهوما حاوزونا من الدار الكبيرة لي هي تاع جدي وجدة دعات عليهم حتى شبعت والوحيد لي وقف معانا هو راجل خالتي الله يكثر من مثالو قال لجدة ارواحي تسكني عندي قالتو لالا عندي داري والحمد لله مكتوبة باسمي وراني بدارهمي نتا الله يحفضك اذا حاب دير فيا مزيا خليلي احسان مع جيهان هوما خيات وجامي تفارقو خليهم يكملو هكا قالها مشي مشكل .. من ثما تنقلنا نعيشو في الحومة لي كانت تسكن فيها جدة من عهد الثورة حومة قديمة بزاف فيها سكنات تاع فرنسا ومنهم سكنة جدة لي مزالت جديدة وشادة روحها رغم انو فات عوام طويلة عليها ... روحنا سكنا شرينا قش جديد للدار بدينا حياة جديدة صح اني مراحش ننسى بابا ولا ماما ولكن هذي سنة الحياة ولا تقنطو من رحمة الله اذا الانسان عمرو يبقى حازن على شي فات ربي قال ( ولا تأسو على ما فاتكم ) الموت مرة مي كامل نروحو ليها والانسان ما يدي غير اعمالو من هذي الدنيا باه يتلاقى مع حبابو ويتلاقى مع خير خلق الله الرسول صلى الله عليه وسلم ... لا مال ولا بنون راح يفيدو اعمالنا هي لي تفيد ... فاتو عوام وانا واحسان نقراو هي كانت بنت قراية وعندها في الراس وانا كنت غير البلاص منقرى منندب لاتية مع الفيس واللبسة والتلفونات لي نضل نبدل فيهم .. جدة مكانتش تعرف علاما نقولها مديلي تمدلي .. هي تخلص تاع المجاهدين وعندها خلصة خلاف من بكري يسما لباس بينا عايشين في نعيم الدنيا تقولنا لي نخصكم راني هنا  ... بصح كاين مثل يقول انو اذا زاد الشي عن حده إنقلب اذا ضده .. من كثرة ولاو عندي الدراهم طغيت حسبت كلش يتشرى بدراهم والانسان لي معندوش دراهم ميسوى والو حتى انو رجعت نقرا في ايكول بريفي ونخير صحابي لي عندهم ولاباس بيهم نحتقر الناس بزاف واغلبهم يكرهوني عارفين عقليتي خاصة صحاب الحومة لي كون نلقى كيفاه نرحلهم منها عادي .... وصلت للحومة خلصت مولا الطاكسي كانت الشمس ترعف جمل هبطت نتمايل من ومن بصندالة الطالو لي معرفتش نمشي بيها هنا الطريق محفرة مع كنت راح نفوت حتى طار عليا الما عيطت تشمخت كامل معرفتش باه تلبيت مع طلعت راسي نلقاها جارتنا شيبة النار نصيرة عيطت عليها نتيييييييييي مراكيش تشوفييييييي طلت عليا قالتي وشبيك طيري وحدك كي البلوطة كون شفتك منيش راح نلوح عليك الما قتلها وهذاااا وقت التسياق يا شيبة النار الخرفانة قالتي روحي الله يروح روحك ودخلت مخليتني نغلي وحدي بنت الحرام ديما ديريلي ليساجت منحبش نسبها بسك خطرة درتها وجدة حكمتني بلبليغة .. وليت نشوف في روحي كيفاه مبلولة مزيا تلفوني متقاسش .. مشيت نسب وحدي والجيران يطلو فت على كليكة تاع نسا يطحنو في القمح ولا حاجة هكا قالتي وحد اجيهان كشما خدمتي في الباك ولا غير روحتي تسخني الكرسي قتلها اوموا انا وصلت للباك شوفي بنتك لي زوجتيها عمرها 16 سنة وجابت طزينة ذراري وضك طلقت قاعدتلك هنا غلقت فمها مزادت حتى كلمة بقاو يشوفو فيا وفي حالتي لي حالة نحيت صندالتي وبديت نمشي تجهلني هذي الحومة وناسها وصلت للبلوك تاعنا طلعت بقيت نطبطب ولا نقول نخبط حلتلي خالتي قالتي ااا جيتي بنتي كنت نستنى فيك باه نروح بصح واش هذي الحالة جبدتني سلمت عليها قتلها خالتي وقتاه جيتي اقعدي تباتي قالتي يا بنتي منقدرش تعرفي عمك كريم يحبني نديرلو العشا قتلها امم احسان هنا قالتي خرجت تقضي وتجي دخلت نلقى جدة متكية تتفرج في المسلسل تاعها قتلها اووو فريدة راكي تتفرجي قالتي لالا راني نلعب كشما خدمتي ولا غير البلاص وزيد وشنو هذي الحالة  تنهدت قتلها الفيزيا صعيبة قالتي نتي من الوقت هذاك مكانش مادة قلتي عليها ساهلة دخلت خالتي   سقساتني نفس  الشي قتلها شوي شوي نشاله نجيبوه اسيدي قالتي نشاله ... قتلها خالتي انا جعت قالتي اصبري مالا روحي بدلي هذي الحالة تلقايني حطيتلك قتلها الكلبة تاع نصيرة لاحت عليا الما الناس نسيق ضك قالتي اسمعي متبدايش ديريلي في المشاكل مع الناس فهمتي منضلش نهدر قتلها صاي فريدة صابونجي.مكلاه تتقلقي ... طرت من بلاصتي قبل ما توصلني البليغة .. وخالتي تضحك من جيه .. دخلت لشمبرتي نحيت قشي وخرجت للدوش دوشت زوج مرات باه راحت مني الريحة كي خلصت لفيت روحي بفوطة  سمعت خالتي وجدة يحكيو على الجيران .. قبل ما ندخل طبطب الباب عرفتها احسان هي طبطب هكا شغل طبل حليت عليها قتلها اهلاااا بلخدامة واش جبتينا قالتي روحي قودي خدامة تاعك وقيل قتلها ايييه خدامة ونص قالتي بلعي كاش خدمة قتلها مكان ني خدمة ني والو الزهر على ربي نشاله نجيبوه قالتي هذي المرة الرابعة ونتي تعاودي فيه تفكري غير جداك قتلها اقراي نتي بزاف عليك ايا بلعي ودخلي دخلت قابلتها خالتي حكمت عليها الصواشي وانا لبست قشي جيب مع تريكو قصير شعلت الكليما في الشمبرة وهزيت تلفون نشوف في ليسطوري تاعي شحال طلعو دخلت عليا احسان قالتي ايماجيني شكون جا قتلها شكون قالتي أمين  دورت عيني لتلفون قتلها شكون امين  علاما ستوعبت طرت من بلاصتي قتلها اااه شكون امين  متقوليش هو  قالتي ايه ولد خالتي زكية هذا وين شفتو طالع بصح يا جيهان كون تشوفي كيفاه رجع هذاك الكور والكاريزما والمشية .. بلعت ريقي قتلها تعرفيني نكرهو .. امين يكون ولد حومتي ونفس الوقت جاري ملي جيت وجدة وصاتو علينا ديما يحكم فيا وعلى لبستي وزيد.جدة تقولو عندك الحق ... اول مرة شفتو فيها حسيت بلي وجهو مش غريب عليا بصح مقدرتش نميز وولينا عايشين توال بعض هو كان عسكري سابق في القوات الخاصة مي صرالتو اكسيدو لي خلاتو ميقدرش يكمل هذا الشي مالغري مكانش حاب غير هو وحيد يماه وخياتو وحدة ارملة بزوج ولاد ولوخرا معوقة غير هو لي يخدم عليهم بصح هكاك ومش مخليهم ناقصين ديما خياتو اللبسة الكلاص والحطة عليهم ومام ناس الحومة يحبوه لانو مولا خير وانا نشهد بهذا الشي مي منحبوش بسبة التحكم تاعو الزايد خاصة فيا انا قتلها بصح علااااه جا مش قالتي يماه بلي يقعد عام في خدمتو قالتي راه عندو قريب عام نضت ندور في الشمبرة ونهدر وحدي يسما ضك هذي المدة نبقى تحت عينو علاه احسان تفاهمت نخرج انا وليزامي تاعي اليوم نتعشاو بمناسبة كملنا الباك قالتي صاااار هذي قراية عليكم يا بنتي يهديك ربي ووقيل ناوية تتعشاي برا قتلها علاه قالتي احكمي بلاص تشوفي خيرمن نقول لجدة قتلها والفيديو كيما كنتي تهترفي بوليد الكراش تاعك راه عندي قالتي جيهاااان قتلها ني جيهان ني والو .. قطعنا على هدرتنا صوت الباب كي تحل كانت خالتي قالتي ارواحي تاكلي ابنتي قتلها صحا خرجت للكوزينة كليت ونحكي مع خالتي واحسان حتى نسمع صوت الباب راحت تحل .. قالتنا جدة هذي وقيل زكية قتلها اووف نكره ناس الحومة هذي اربي جيت نايضة قالتي تقعدي خيرمن تاكليها في لحمك تنهدت وقعدت دخلت زكية لاحت السلام وسلمنا عليها  قصرت مع خالتي وجدة حتى قالتها راه جا امين غمضت عيني عاصرتهم كي خزرت فيا جدة تمعنيلي راه جا العذاب تاعك قالتها جدة مزيا لي جا يخاه مسكين عندو شحال ما شاف عايلتو قالتها زكية ايه ولله توحشتو وحتى هو مقبيل سقساني على احسان وجيهان وعليك نتي قالتها جدة منبعد اني نجي نسهر شوي توحشتو قالتها مرحبا بيك نضت من الطابلة ودخلت لشمبرتي نخمم كيفاه نخرج نتعشى اليوم ... فات الوقت وراحت خالتي درنا انا واحسان العشا وقعدنا نتفرجو نطقت جدة قالتنا وحدة تروح تشريلي الدوا انا جاتني على قلبي باه نخرج قتلها ايه هاتي اصبري نلبس ونجي دخلت لشمبرتي هزيت فيزو كحل كع تريكو بلخيوط ابيض وفوقو بيل خفيف كتان فيه شراشف ملتحت لبست بليغة وسرحت شعري حكمتو مليح درت شوي ماجيك في خدودي وفمي والعقاشة تاع نيفي لي جامي نتخلى عليهاا ... انا من النوع لي يحب المكياج واللبسة والالوان بزاف مبدعة يعني ديما نلبس حاجة خارجة على المألوف وديما مدايرة عقاشة تاع هنودة في نيفي شارية باكي كل ما تتبحر وحدة نجبدة وحدة خلاف وهذا الشي لي يقلق جدة تقولي الملايكة يلعنوك وانا معلابليش بيها تعجبني روحي بزاف خاصة انو شابة عينيا زرق شعري اصفر سبحان الله تقول مدايرة ليماش بيضة غير طاشة صغيرة تبان فيا ونحمار بلخف نشبه لماما الله يرحمها وخالاتي ... هزيت دراهم والدوا لي نشري عليه قتلها جدة اني خارجة قالتي طلي عليا يا الهجالة معليش راه جا لي يحكم فيه تقلقت من كلامها حليت الباب مع جيت نخرج قابلني حتى هو حل باب دارهم بلعت ريقي شافني هز حاجب وياا شحال تبدل بصح زينو طاغي طويل ابو عضلات اسمر عينيه مارو في الشمس خضر كان لابس كلش ابيض شوميز مع سروال واديداس وحال القفالي تاع الشوميز وهاز لكمام لفوق  مداير سمسال فيه حرف  Dj وخاتم في يدو ليسرى شعرو جاي قصير زي العسكر بصح مواتيه .. صفات الرجولة متوفرة فيه ... تبسمت فوق قلبي كي غلق الباب وزدت انا غلقتو قالي مساء الخير يا لالة يهدر ويخزر من لفوق لتحت قتلو اهلا واش حوالك امين خويا عقد حواجبو قالي لباس وين بيها بهذي الحالة ؟؟؟  بديت نفكر في شي كذبة قتلو ههه اني مروحة لجارتنا سمية نشوف بنتها اذا خدمت في الباك راك عارف اني فوتو اليوم قالي واش خدمتي قتلو ايه حمد لله تبسم وقرب مني خفت منو رجعت لور قالي وشبيك ؟ متسلميش عليا .. ستفت روحي قتلو ههه وي قربت وسلمت عليه من ومن ريحتو ديما معبقة حط يدو على مسلاني قالي توحشتك هذا شحال ما تلاقينا وزيد بلوكيتي الفيس تاعك وقالولي معندكش ولا تخبي في حاجة خلاف ا جيهان قبل ما يكمل تحل الباب خرجت جداتي شافتنا مع بعض اووف مزيا سلكتني منو قتلها جدة انا راح نشوف خالتي  سمية لفوق اذا خدمت بنتها  في الباك كنت راح نطلع حبسني كلامو قالي جيهان نحي هذاك الشي منزديش نشوفو عليك كان قصدو على لي في نيفي .. صوتو تبدل عرفتو تقلق قتلو ..اوك اوك نحيتو توالو ورميتو في لرض وطلعت نرجف يا يما علاه رجع هذا ....