هاي ذاار😼 البارت بلا تدقيق،
توضيح مهم✋🏼كل الهدرة افكار داخلية
الكلام المسموع (الحوارات)تلقاو قبلهم ذو الزوج نقاط: مع اسم الشخصية لي هدرت
الهدرة لي بين اقواس()كامل انا نشرح في لمسطلح لي قبلها ولا تعليقاتي
الجمل لي تلقاوهم بين ذو الزوج_ططط_ يكونو شرح او توضيح لكاش حاجة من طرف الشخصية لي كانت تهدر اوووو هذا مكان نورمالمو😍...منطولش ونبدا ديركت وين توقفنا البارت لي فات🎀
✨✨✨✨✨✨✨✨✨✨✨✨✨✨
Amin's pov:
بديت نلم في حوايجي حاجة خفيفة ساكادو(محفظة شغل) فيها لبسة نرقد فيها ووحدة نخرج فيها وحوايج نتاع نظافة...لميتهم وقعدت نتأمل في الميساج بلاك كذبة برك بصح لالا _وزارة الدفاع التونسية، نعلمك انه تم ترقيتك الى مساعد قائد الكتيبة الثالثة الياس طططط المتموضعة على الحدود الجزائرية التونسية_نقرا فيها ونعاود من بعد تفكرت خصني نعيد لآدم صاحبي نروحو غدوة كيف كيف سي نبان اجتماعي ومش غير نبان كاينة منها بصح فرق بين انو تخالط لعيباد وبين يكون عندك صحاب من بديت نخدم عندي صاحبي واحد ادم نتيجي فلعمر 24 سنة هو يتيم الابوين بصح جامي تحسو مغبون ولا مدبرس(مكتئب) عليها نشتيه (نحبو) بزاف وقعدنا صحاب من تلاقينا في اول نهار تجندنا فيه شفته كان قاعد وحده قلت نزدم عليه نفوت شوي وقت بصح لقيته صح ناس ملاح ويعرف يحكي فكلش من ثما ولينا صحاب...جيت حنعيطلو لقيته فذيك الدقيقة سبقني هزيت عليه بداها ديركت وااش راك صاحيي؟؟صاحبي ويعرف طبايعي...
ادم:وااش راك صاحيي؟
امين:ايه كنت نوجد فحوايجي للغدوة ا...
ادم:ايااه من وقتاه نتا توجد بكري هكذا!!
امين:خليني نكمل هدرتي ضكا تعرففف،لحقني ميساج ترقية قبيلة شوي و...
ادم: ايااا متقليش فبلاصة علي!!
امين:وينا علي؟
ادم:لي يخدم معانا وداروله ترقية سمانة لي فاتت نتاع مساعد السي الياس،تخاطرنا عليه ميصبرش سمانتين ذاك الفرويتي يسما جات دالتك نتايا؟
امين:هاااه ايه هيا بعد...
ادم:متخافش خويا كشما يخص قلي انا نعاونك
امين:صحيت صحبي غدوة نتلاقاو كيما موالفين؟
ادم:ايه بعد الفجر نشالله ايا صحا نروح نكمل نلم حوايجي
امين:صحا
وتكوبا الخط...حبيبنا علي مصبرش سمانتين خصني نصبر كثر منو باش منعشيش انا الفرويتي...هه نضحك برك مش ذي الحاجة لي حتخلعني⊙﹏⊙...
Author's pov:
وكيما كان الحال الغدوة مين ذاك صبح امين وادم منطحين للبلاصة وين يخدمو ركبو مع طاكسيور وصلهم،الطريق كامل وادم راقد وامين امم نقول نص رقدة يرقد شوي وينوض يخمم فذاك لي يخافو منو كامل واذا هو حيتحمل الخدمة معاه ولا يدير كي الباقي ويهرب منو هو صح ريح متهزوش بصح يبقا بنادم ويتوتر من حاجة توتر الناس كامل وهو في ذيك الحالة وصلو مع السبعة نتاع الصباح لباب لبلاصة لي يخدمو فيها(ساعفوني معنديش افكار على لبلايص لي يخدمو فيهم مهم غازيرنة ولا عفسة هكذا) خلص ادم السيد لي وصلهم ودخلو كيف كيف ديركت لبلاصة لي فيها الغرف نتاوعهم حطو قشهم فوق سريراتهم وراحو لساحة لي يديرو فيها التجمع الصباحي...وقفو بجنب بعضاهم كل واحد فص وقعدو يستناو يديرو الروتين نتاعهم اليومي من تحية وكذا كسع ينطح كل واحد لخدمته امين لمح بعينه الياس هذا لي يعرفو غير من الشائعات مي مكانش قريب بزاف باش يعرف مليح كيفاش مداير واصلا معندو ما قاصبه راه حيتلقاه بعد دقايق برك...
Amin's pov:
وحنايا واقفين شفت واحد جاي طويل على كامل لمسؤولين لهنا ويبان شوية جون عليهم مي مبانليش وجهو مليح وقيلا هذاك هو الياس يبان كيما قالو مي معليش رانا فالعسكر فالاخير...ملتيتش بزاف كملنا لبروڨرام الصباحي نتاعنا من تحية واحماء جست مخلصنا جاني واحد يبان منشوع قالي : نتا هو لي رقاوك جديد؟
قتلو:ايه انا...
قاطعني وقالي: صحا راه يستنا فيك القائد تقدر تروح ليه وخف مذبيك ميقعدش يستناك
ها...قبل منريبوندي عليه لقيته طار من قدامي ايا تجاهلتو ورحت ديركت للبيرو نتاع قائد الكتيبة نتاعنا ولا كيما يقولوله السي الياس...لحقت عند البيرو حسيت بوحد الجو خبطني عند الباب شغل برودة ولا عفسة تحس واحد فات عليك بلا متفيق بيه وخلاك بالقشعريرة نتاعك المهم لميت بعضايا وطبطبت زوج طبطيبات جيت حنزيد الثالثة حبست فنص كي سمعت ذاك الصوت وبلا منقلكم الفشلة تحكمك كي تسمعو...جامي خلعني صوت ولا عيطة بصح صوتو عفسة خرا خلاص تحس روحك حتغرق ونتا تسمعو (المهم عفنا من صوتو نكملو احداث)
الياس:ادخل...
دخلت لقيته قاعد قدام بيروه غرفة عادية مفيها والو ابار ذاك البيرو لي جاي بالحطب البني الداكن وكرسي قدامه وباينة منيش حنريح عليه كانت الغرفة فيها ريحة دخان بصح بلا دخان شغل عالقة فيها وقدامه حاط واريق وملفات بزاف وكاس كبير نتاعه قهوة هذو كامل روماركيتهم كي فتحت الباب منيش خفيف وشاطر ففراغ...جست مفتحت لباب وقفت بعيد شوي عالبيرو نتاعو وقعدت نستناه يهدر معايا صراحة سلام مقدرتش نقولها منيش عارف علاه هو طلع راسه وعطاني بالنظرة القاتلة جمدت في بلاصتي اثرو فيا الشائعات بزاف وقيلا ...كي شاف فيا حسيتو قاعد يقيم فيا من فوق للتحت حكمت النفس نتاعي شوي من بعد عاودت رجعت نورمال ورجعت لحالتي الطبيعية مهوش حياكلني يعني...هو قعد يكيل فيا وانا ثاني قعدت نشوف فيه ونستنا فيه يفتح الموضوع...وانا في دوامة افكاري سمعتو يقول...
الياس:نتا لي بعثوك جديد لهنا؟
تنفست وجاوبتو: نعم شاف انا امين طرطرطط مجند في الكتيبة الثالثة ترقيت باش نكون مساعد نتاعك...
قاطعني قبل منكمل هدرة على روحي ولا كملت؟منيش عارف مهم سمعتو قالي _لانو صح كنت مش قادر نحط معاه رغم انو كل تركيزي عندو منيش عارف لاه...
الياس: وزعما تقدر؟مقالولكش لي سبقوك كيفاش تكون الخدمة معايا؟
شوكاني(صدمني)سؤالو مي انا بعد كل شي نيفي ميسمحليش نبان معجونة
امين: نقدر شاف!!
الياس:صحا انا نجي على السبعة بيل خصك تكون هنايا قبلي وتجيبلي معاك قهوة ومذبيك منلقاهاش بردت! السبعة ونص نبدا التفتيش تروح معايا وتسجل اي غلطة نلقاوها وكي ترجع تفرزهم لاخطاء مادية ولا غلطات داروها عباد وتصنفهم على حساب درجة الخطورة بعد، وقت لغدا انا نخرج ونرجع على الزوج كي نرجع نلقا البيرو مرتب ونضيف يديرونجيني الغبار، والباقي حتى نرجع استراحة نتاعك، كي نرجع ندير تدريب للجدد في الساحة الخلفية تجي معايا وتقعد تراقب في سلوكاتهم وتمركي كلش مذابيك!! كي نكملو نرجع نخدم في البيرو تقعد تفرز في الملفات ورقيا وديرلهم ديكوبي في البيسي ومذبيك كي نعيطلك نلقاك قدامي، نخلص نهاري لهنا على الثمنية مذبيك تكمل خدمتك وتسكر لبيرو وراك قبل متخرج...اذا كشما ديرونجاك قلي!!
"ديرونجيتني نتا بكلك" حبيت نعيط بيها وسرطتها كي البڨرة...ملقيت منقول من ليوم ورايح وليت عبد مشي مجند المهم مخليتوش يستنا خلاص باينة هذي...
امين:اوكي شاف
الياس: هز وش تحتاج ولحقني
اا...هاااه وخرج لاه واحد ماهو يخلي فيا نكمل هدرتي ليوم؟؟؟ تخطيت الموضوع وهزيت ورقة وستيلو وعفسة نحط عليها ولحقت "السي الياس"
هو يجري وانا نجري وراه بيناتنا كنت متوقع كل هذا بصح متأكد قعد يستنا فيا وقيلا كانت عندي فكرة غالطة عليه؟ نشوف مع الوقت ضكا خصني نحط معاه...
Elyas's pov:
قالولي المساعد لي كان معايا مقدرش يواكب الريتم نتاعي وهرب مني؟ عمبالهم نربي فلي بيبي هنايا وقيلا!...ليوم نورمالمو يجي المساعد الجديد وديجا راه روطار بدقيقة زعما مات فالطريق؟!
سمعت طبطيبة خفيفة فالباب كي مديت لاذن باش يدخل دخل وخزر فكلش متأكد راه يقرا فالمحيط الجديد بالنسبة ليه مفقتش نلقاه وقف قدامي ويستنا فيا نهدر عجبني ميبانش مزعج ويبان كالم بلاك يصمد هذا كثر من لي قبلو...سألتو وسمعت صوتو كي ريبوندا عليا...بففف صوتو كيما شكلو يبان قطعتو فنص هدرتو ولا كملها؟منيش عارف المهم من بهدها قعدو اجاباتو قصار وفي المفيد مليح فهم كيفاش نحب يخدمو معايا...طيشتلو آخر كلمات وخرجت رايح نبدا جولة نتاعي كي العادة مي معلاباليش لاه قعدت نستنا فيه؟ شفتو كي جا خارج بديت نمشي وهو جاي يلحق فيا *وبدينا الجولة نتاعنا...
باينة اول بلاصة نروح ليها لشاليات(غرف يهز عدد كبير نتاع عباد)المجندين الجدد نشوف واذا مزال كشما واحد راقد ولا كشما كاين اعمال تخريب للاملاك ثما...حليت لباب لقيت واحد مزاله يلبس في قشه قدمت ليه طاح فلارض يكون خاف مني؟؟معلابالوش وقيلا سياسة الترهيب كانت بكري ضكا راهم شغل عند ماتهم...خزرت فيه مليح وقتلو
الياس:روطار؟
قالي:اسمحلي شاف مفيقونيش...
الياس:نفيقك انا الخطرة الجاية؟
قالي:اي..اا..
شفت في امين واقف ورايا وغير يخزر في المخلوق لي طايح فلارض هدرت معاه بعد معاودت شفت وين راه يشوف
الياس: مركي اسمو والڨروب لي فيها...
المجند لي يغيض:اسمحلي شاف والله منزيد نعاود...
قاطعتو بلا ميكثر عليا نداب قتلو
الياس:كمل البس واخرج دير لي بومب 100 مرة من بعد روح لوين راهم صحابك نعاود نحكم عليك هنايا فذا الوقت تصبح تجري عريان في الساحة!!
شفت في امين زرب هبط لمستوى هذاك المجند مركا اسمه وطبطب على كتافو ومشينا للبلاصة التالية يخدم خفيف مليح!
كملنا الجولة ومكانش كاين مشاكل بزاف غير لاعتيادية وامين يبان عندو عام وهو يخدم فذا المنصب ميش غير ليوم...رجعنا للبيرو وحط كل واحد راصو مع خدمتو ومسمعتش نفس منو زعما راه حي؟؟طلعت راصي نشوف بلاك السيد داخ وانا منيش فايق لقيته يخدم نورمال رجعت كملت خدمتي وانا الاز...
Amin's pov:
اووف اخيرا لحقت 12 شفتو شاف في الساعة بعدها خرج ديركت وخلاني في البيرو حبست خدمة وتكسلت فبلاصتي طبت وانا قاعد فيها من بعد نضت رحت نجري نتغدا ونرجع نضف البيرو كيما قالي باش يبقالي وقت كشما نقرا ديما نهز معايا كتب نتاع جيب كي نكون متفرغ نحب نقراهم يجو ممتعين بزاف...كنت قاعد في بلاصة فارغة من لعباد برا حتى شفتو رجع بالسيارة نتاعو...راهي 13.55 مريڨل على 100 وحبة واو...رحت ستنيتو عند باب البيرو ودخلت منوراه قعد شوي من بعد قالي نزيد نجيبلو كاس قهوة،رحت جبتولو بطبيعة الحال قعد شوي شرب منو من بعد رحنا باش نكملو البرنامج نتاعو... منيش حاب نصادف مواقف كيما نتاع الصباح غاضني المجند الجديد مسكين يبان غير 19 سنة هو مكانش حاجة تخلع في الياس برك عندو وحد الهالة تغم شوية...جازت الصبحة نورمال على حساب الحطة حنتمرمد من الوقوف ولا لقعاد لمدة طويلة خصني نبدا نربي في عضلات صباع رجليا، ميبانش تعبان زعما كي عاد موالف؟؟ خصني منبانش منيش قادر نواكب الريتم نتاعو...لحقنا للساحة وشفتو نحا الفاست لفوقانية نتاعو وقعد بتريكو بلا ذرعين اسود مزير عليه برك وبدا يدرب فالجدد وانا نراقب فيهم...جاز النهار بالخف ومكانش فيه اي حدث مميز،لحقت الثمنية هز حقيبة نتاع جلد نتاعو وخرج بنفس الطريقة نتاع الصباح=_=كملت خدمتي جوايه العشرة ودرت كيما قالي سكرت البيرو ورحت مباشرة نرقد سي مكان حتى حدث مميز بصح يتعب النهار...غدوة خصني نوض على الستة باش نلحق ندير كيما قالي هاااه من ليوم وروح نولي نعيطلو سيد متطلب...zzzzzz
Author's pov:
امين طاح ميت فوق لفراش وهكذا كان اغلب ليامات من ترقى يصبح على الستة يوجد ويدي كاس القهوة فيدو لبيرو السيد متطلب من بعد يعڨبو نهار روتيني بين تسجيل اخطاء المجندين الجدد ولا ترتيب الملفات...فاتوا ثلث سمانات وهو في نفس الروتين برك عاد فرحان شوي خطراه مش حيكون فرويتي الكتيبة لكن وحد النهار صرات عفسة كانت السبة في تغير هذا الروتين لحاجة مكانش يتخيلها امين...
النهاية.
امين؟
ادم؟
الياس!؟
1630 كلمة
هاا طولت ذي المرة الشابيتر شوي يادرا عجبكم؟؟كشما ندير تعديلات🤔 امطرونييي بالافكار😼
هممم وش تتوقعو يكون الحدث نحرڨ عليكم 🥰نااه هه كن نحرڨ متقراوش الشابيتر الجاي😏 ندير الخط لكبير للهدرة المسموعة والخط الرقيق للافكار الداخلية؟ ولا نكمل كيما راني وش يناسبك تال مي؟ نتلاقاو في التحديث
see uuu💋
أنت تقرأ
PiNkyyCoffEe~
Romanceالقصة حتكون احداثها في تونس بت حنكتب باللهجة الجزائرية لاني فنيانة نكتب بشي غيرها🥰 القصة bl وكامل عارفين وشنو هذا لي ميعجبوش ميدخلش يقرا💋 تكملة الوصف فاول شابتر تشااوس🎀
