احفاد آل سليمان

Part 1

ليـس عيبًا.
___________________________________
العـمارة____ 10:20 دقـيقة صباحًا

كاعدة بـرحلتـي ايدي عَ خدي اباوع للكتـاب واكول شيخلص السـنة وتجي العطلـة...
اجـت قـمر تركض

مُهرة :- ليش تركضين شكو بس لا تفتيش؟

قـمر :- لا ولج ام الإسلامية ممتحنة شعبة الف بالشرح كلـه.

مُهرة :- ها ضوكيهـا كتلج اقري والله ولا انطيج غش.

قـمر :- حـبابة عليچ الله والله اني اغسل المواعين اليوم والله.

مُهرة :- حرام غير نمتحن إسلامية شلون نغش بيها مطية انتِ؟

ويا كلامنا انفتح الباب دخلت امي وحجت

لُبابة :- الرحلات نضيفة؟

دنكت جوا اشوف رجعت رفعت راسي الها وحجيت

مُهـرة :- اي ماما نضيفة.

ابتسمت وطلعت رجعت قمر تلـح عـليـة ما قبلت انطيها الغش عفتها وطلعت برا جان وقت فرصـة
الجَو مغيم وهوة بدأ يعلى
البرد قيد اضلعي تقلصت اباوع البنات تفتر بالساحة فرحانة لابسة قماصلهـا واني ماعندي قمـصلة حتى البسها غير بس وحدة نتقاسمها اني واخواتي كل يوم وحدة تلبَـسها
شفت امي من بعيد يم حاويات النفايات لافة الشال على وجهه رحت الها تركض تقربت يمها شفـتها ترجف من البرد

لُبابة :- يمة شعندج هنا باردة روحي للصـف.

مُهرة :- باردة ماما عليج روحي جوا اني اسوي الباقي.

لُبابة :- صدريتج تدمر روحي لصفج لا تتـمرضيـن يمة وكولي لاخواتج وبنت عمج يكعدن بالصـف.

بستها هزيت راسي ورحت ويا مشيتي اسمع صوت بنية من ورا تكول

_ شلون هيج متحملة البـرد ما تلبسين قمـصلة؟

درت وجهي الـها مبتسمة حجيت

مُهرة :- ما بردانة حـيل جسمي حار.

عفتها ورحت لصفـي ويا دخلتي دك الجرس جان الدرس الرابع اجت مُدرسة الفنية كعدت ع الرحلة وسدت الباب كاعدة بصفي قمر

قـمر :- ست ماعدنا فنية اليوم.

ام الفنية :- اعرف ماما بس هذا اخير درس راح تطلعون خاف تـمطر.

ابتسمت والبنات شوية ويعيطن من الفرح ندستني قـمر وحجت بصوت ناصي

قـمر :- اليوم احلى يوم هم خميس وهم التحاضير نفسهن وهم راح ناكل لحم.

مُهرة :- ههههههه وهم نشبع نوم.

ضلينا ندردش الا ان دك الجرس للبيوت لبست جنطتي طلعنا اني وقـمر الدنيا بدت ترعـد ناس تتراكض للخطوط وناس تركض للبيت شفت امي كدام المدرسة ويمها خواتي رحت اركض الهن فتحت عبايتها ودخلنا بيها وركضـنا
وصلنا البيت وزختها حجت اختي شمس