جنون اولاد الجندي ( الجزء الثاني من السارقه البريئه)

الفصل الثاني

الفصل الثاني

صباحك بيضحك يا قلب فريده

ايه ده انتي مضايقه ...و لا مخنوقه...او يمكن حاسه ان الدنيا كلها جايه عليكي ...مش مهم الدنيا يا مسكره المهم ربنا الي خلق الكون معاكي مش هو قال سبحانه ( لا تحزن إن الله معنا ) يبقي متفكريش قولي يا رب و انتي كلك يقين انه هيحلها من عنده و حاشاه انه يخذل عبد احسن الظن بيه ...انا واثقه

و بحبك

بعد انتهاء وصله العراك الصباحي الذي اعتادت عليه عائله الجندي ...ذهب الرجال الي العمل و الشباب الي دراستهم

اما النساء و الفتيات فقد جلست معا كما العاده

حبيبه بنزق: يا ساتر اخيرا شويه هدوء انا ضغطي علي و مبقتش قادره اتحمل الي بيحصل كل يوم

امل : لا لسه مخلصناش لما مقاصيف الرقبه يروحو مدارسهم و كليتهم كده نقدر نقول الحرب خلصت

نظرت لها عشق بغيظ ثم قالت : شكرا شكرا انتي حما انتي ...بدل ما تربي ابنك بتتشطري عليا

ريم : و الله انتي و هو ما حد يقدر عليكم قال يعني انتي ملاك بريء

ملك : أحب اطمنك يا امل ان الهوانم مش رايحين انهارده

شهقت حبيبه بفزع ثم قالت : لييييه مش في جامعه و مدرسه

روح برقه : يا انطي اصل عمر منع عشق تروح الجامعه انهارده و طبعا احنا مينفعش نسيبها لوحدها

ردت حبيبه بغيظ : صدقي بالله يا روح لو حد غيرك الي قال الكلام ده كنت حدفته بالشبشب بس انتي طالعه لامك الواحد بيخاف يبصلك حتي

ريم : انا عن نفسي مش هينفع اقعد ...عندي محاضره مهمه

عشق : ما تبطلي ام النداله بتاعتك دي و اترزعي ياختي الدنيا مش هتخرب يعني

نورا: انتي فاشله عايزه الباقي يبقي شبهك ههههه

عشق : حتي انتي يا نوري ...طب انا ذنبي ايه مش حفيدك الي حكم عليا مروحش

نظرت امها لها بشك و قالت : ايه المصيبه الي عملتيها عشان يعمل كده ...عمر مش هيحبسك فالبيت الا لو في كارثه

زاغت ببصرها و قالت : معملتش حاجه هو الي بيحب يأفور المواضيع

ضحكت حبيبه الصغيره ثم قالت : ايوه صح هو بيحب يافور المواضيع ....انك تجيبي الست من شعرها في نص الشارع دي حاجه سهله صح

صدرت شهقات عاليه من الجميع و قالت حبيبه بجنون : يا نهار امك أسود...ست مين الي جبتيها من شعرها يا بت

ردت بتبجح : واحده صافره كده كانت بتتسهوك عليه ...اسكتلها

امل : لا غزيها بمطوه يا بت