رواية بسمة مدفونة في خيالي

بارت٢١

من الخارج يضحك ومبسوط لكن من الداخل مقهور من رونق ومن عنادها ...كل إخوانه مجتمعين مع زوجاتهم إلا هو !
رفع نظره وهو يشوفها داخله ...ظهرت الصدمة عليها وهي تشوف الحفلة للحين ما انتهت!
تقدمت بهدوء وهي ترد السلام ...وجلست جنب منار ....
سعاد بانتقاد : وينك جالسين من المغرب وما تسقبلينا
رونق بهدوء:-البيت بيتكم
ام راكان ناظرت سعاد: قفلي الموضوع !
منار :خلينا نعطي خالتي الهدايا لأنه تأخر الوقت وباكر عندنا دوام !
عفست ملامحها رونق توقعت هالفقرة انتهت!
ناظرت جراح الي يكلمها:رونق جيبي الهدايا الي احضرناها لأمي!
ناظرته بهدوء وتوجهت للغرفة ..بعد وقت قصير طلعت ومعها هدية وحدة ...تقدمت من جراح ومدت له الهدية ..مطنشة نظراته الغاضبه من عنادها!
بدأ الكل يقدم لها الهدايا ورونق جالسه تناظرهم بهدوء ..التفتت على سعاد الي تكلمت بانتقاد: ماكلفت نفسك تعطين أمي هدية!
رونق تعرف سعاد ما تعرف تجلس بدون ما تحفر ...وبهدوء نطقت: زواجي من ولدها هذه اكبر هدية حصلت عليها في الدنيا وما رح تحصل احلى من هذه الهدية!
سعاد انغاضت منها : قولي أكبر مصيبة !
ومب قادرين يتخلصوا منك !
رونق ببرود: عادي ترى متعادلين إذا أنا مصيبة بنظركم ...تراك إنت اكبر مصيبة تورطوا فيها بيت جدي وما هم قادرين يتخلصوا منك ... وأكيد جدتي ما تدري وش عملت بحياتها حتى تكوني زوجه لولدها!!
سعاد انفعلت من كلامها ...وقفت وهي ناوية تمسح فيها الأرض ....وقبل ما تقترب من رونق كان جراح بوجهها....بهمس ما تسمعه إلا سعاد « ان فكرت مجرد تفكير تمدين يدك اكسرها ..اجلسي باحترامك»
زياد سحب سعاد وأجلسها مكانها:حنا بالشارع!
سعاد بقهر وللحين نار شابه بقلبها: ما سمعتم وش تقول عني!
جراح بحدة: انت الي بدأت برمي الكلام والي بيته من قزاز ما يرمي بيوت الناس بحجارة !
ام راكان ناظرت سعاد بهدوء: سعاد خلاص قفلي السالفة!
سعاد النار تأكلها مو عارفه تسكت وبقوة نطقت: والله كلامك هذا عند دار عمي أبغى اشوف مين يتكلم علي كذا؟!
دامني مصيبة نلتقي بالمحكمة..وجدتك إذا طلع كلامك صحيح إلا
قاطعها راكان بقوة: خلااااص !
قلنا لك اسكتي!
وانت يا رونق مين الي يقول عن سعاد هالكلام ؟!،
رونق تكره فيه هالثقه وكأنه له سلطة على الجميع ...وبهدوء نطقت : ما يخصكم مين قال
قاطعها جراح ..يحس رح ينفجر من تصرفاتها وعنادها  ..نطق وهو يناظرها بقوة: رونق انتهينا !
راكان هز رأسه بخبث وهو يضرب بالكلام: شفت بعينك كيف تكلمني؟!
قبل ما تيجي يا جراح عند امي وترتجيها حتى نعامل رونق بالطيب بالأول علمها كيف تحترم الي أكبر منها !
وإذا انت تعاملها بالطيب من باب الشفقة مثل ما قلت لأمي..إنك تحزن عليها لأنها منبوذه.. ما تجبرنا نشفق عليها ونحزن عليها بحجة إنها منبوذة وما احد يحبها كل هذا نتائج تصرفاتها ...قومي مريم يلا !
جراح انتفخ وجهه من كلامه ...ناظر امه مقهور ليه خبرت راكان ...التفت على رونق الي الهدوء يغلفها ...
رونق ما توقعت جراح يتكلم من خلفها كذا ...تنفست وهي تحس بخنجر وسط قلبها ..ومع ذلك ما هي رونق الي تسكت ...رفعت رأسها بهدوء عكس الجرح الجديد الي ينزف بداخلها ونطقت بثقة :-وليه يشفق علي جراح ؟!
ترى أنا لي عائلة وأهل وأحباب بالقرية بس انتم دمرتوا كل شيء!
لا تظنوا إني وحيدة لأني ما أزور الجازي أو جواد أو اهلهم بالعكس كلهم ما يعنون لي شيء عشت حياتي بدونهم فوجودهم وعدمهم واحد بالنسبة لي !
زياد انقهر من جحدها لأهلها: وجراح عشت حياتك بدونه اشوفك ملتصقه فيه
رونق بهدوء ردت: جراح يختلف عن الكل الي جمعنا
قاطعتها ام راكان بكره وحقد : حسبي الله على كل زوجة تقطع الزوج من اهله وتحرضه على أهله !،
اقول امشوا يا عيالي
جراح ضايع بينهم:يمه لحظة !
ام راكان بأسف: لا تزعل علي يا جراح زوجتك ما تبغانا
قاطعتها رونق وهي تقترب منها وتتكلم بهدوء : خالتي أنا ما
دفتها ام راكان بقرف: لا تلمسيني...تراني انقرف منك...
انصدمت رونق من تصرفها وكأنها شيء قذر ...وبانفعال نطقت: عمرك ما شهدت مع الحق ..دوم تشوفين عيالك يرمون علي الكلام وإن نطقت بحرف واحد تصير علوم طويلة وعريضة !
مسكها جراح من كتفها وابعدها عن أمه برفق : رونق
أبعدت يده عنها بقهر:لمتى أسكت!
خلاص أنا مليت  من أهلك ومن كل هالحياة ،وبالذات أمك مو راضية عن هالزواج خلاص الحين رح ينتهي كل شيء ....وانا راضية بالانفصال بالمقابل حتى تحصل على راحة البال وتعيش سعيد مع أهلك !
راكان يستغل الفرصة: كوني قد كلمتك وباكر نلتقي بالمحكمة
جراح بغضب وهو يحس الأمور بدأت تطلع عن سيطرته : خلااااص
تراكم زودوتها !
وكأني رجل طاولة هنا !
وش طلاق وتخبيص!
مسك كتف رونق بتملك: لو عدت هالسوالف مرة ثانية ادفنك بأرضك!
اسمي واسمك انكتبوا مع بعض وما في قوة تفرقنا !
تفهمين!
رونق أبعدت يده بقهر:  وأهلك
قاطعهابغضب: ما أحد له دخل بحياتي ..رونق زوجتي غصب عن الكل وما أسمح لأحد يفرقنا !
يمه وقسم بالله إن رجعت سعاد ترمي كلام أو أي احد مرة ثانية ما لي قعدة هنا ...كرامة رونق من كرامتي !
ام راكان بزعل: ايه ارفع صوتك علي أكثر وكأني بزر ..يا خسارة تربيتي فيك !
ناظرته بأسف وطلعت من المكان متجاهله جراح الي يحاول فيها تجلس!!