🥀الجوهر الحر 🥀

الفصل20🥀

🥀 #الجوُهرْ_الحُرْ🥀
🔱 تشبَّتتُ بالأمَلْ رُغم قساوة القَدرْ🔱
     🍂#جِرَاحُ_القُلوبْ🍂

🖋️Rah Ma🖋️
ج391:

كانت رحيل شادة فيد باها وهي لابسة كسيوة فالزرق طويلة وشعرها البندقي مضفور.. غادة فرحانة وعينيها الخضرين كيلمعو فديك المصاصة الجديدة لي شرا ليها باهاا... وصلو الگاراج ودخلات معاه وعينيها الخضرين لي كيلمعو ببرائة صادفو عيون خضراء كيلمعو بالحزن والدموع.. بقات واقفة تتشوف فديك لمرا لي كانت جايا جهتهاا تاوقفات قدامها على بعض خطوات بطيئة.. هزات عويناتها فباهاا وشافت فيه ببرائة: بابا شكون هادي؟!
قالتها وهي كتشير جهة ديك لمرا لي كانت واقفة ولي مجرد ماسمعات هضرتها انفجرات بالبكا وهي غادة لعندها وبلاماتنطق بحرف واحد خداتها فحظنهااا الدافئ وهي تتبكي وتشهق... بينما رحيل كانت غير تتشوف فيها مفاهمة والو وعينيها مرة مرة كيهربو جهة باها بخوووف.. ولكن مجرد مشافت ديك النظرة الحنونة من باها استكانت فحظن المرا لغريبة عليهاا وسكتات.. مدة وهي وخداها فحظنهاا ومقدراتش تشبع منها ولاتعوض دوك السنين لي عاشتهوم بلابيهاا.. بعدات عليها ولمسات وجهها وحناكهاا تتشوف فيها بعيون متلهفة وقلب كينزف الدم...
رحيل:(بصوت هامس طفولي نطقات)شكون نتي؟!
تانيرت:(سرطات ريقها وقالت بنبرة مرتاجفة من كمية لمشاعر لي تتحس بيها) أنا ماماك
ضورات رحيل وجهها جهة إدريس لي كان واقف بملامح قاتمة وعيونو كان فيهوم دفء وحنان ممناسبش لملامح وجهو وحرك راسو باه بهدوء ليها.. رجعات رحيل شافت فتانيرت مدة كتستوعب هضرتها وشوية بشوية بدات الضحكة تترسم فشفايفهااا وتلاحت على مها بتعنيقة قوية ونطقات بفرحة: نتي ماماااا وااااااو (هزات عينيها فالولد لي كان واقف حدا إدريس شاد فيه كيبان طويل على رحيل وعامر عليهاا وابتسمات بفرح) شوف امحمد طه تاأنا عندي ماما..
الفرحة لي كانت فنبرة صوتهاا خلات قلب تانيرت يدق بالجهد وابتسامة حنينة ترسمات على شفايفها عكس عيونها لي مضببين بالبكا: بنتي لغزالة
رحيل:(شافت فمها ونطقات بحب)صافي نتي جيتي من السفااار ومغاتمشيش وتخليني تاني ياكي..
"مغاتمشيش وتخليني تاني" جملة بدات تتعاودها رحيل وسط دموعهاا وبكاهاا وهي محبوسة فداك لگاراج ودكريات الماضي مونسينها.. معرفاتش شحال وهي محبوسة بلاماكلة ولاشراب وهادشي كولو مهمهاش قدما ماهمها تعرف شي خبار على مها لي طمن قلبهاا.. حدرات راسهاا وخشاتو وسط ركابيها تتبكي وشويية سمعات صوت الحلان دالزكرون دلباب وخطوات جايين جهتها.. ماهزاتش راسهاا تشوف شكون تاسمعات صوتو لي ولا كيستافزها: درتي عقلك ازيني
هز ليها راسها وسط ركابيها وشاف فعينيها لي منفوخين وحمرين تامبقااش لونهوم كيبان ونيفها تاهو حمر.. عوج عاصم راسو جهتها ونطق بهدوء: مال زيني تتبكي همم شكون قلقها ليااا
فهاد الساعة رحيل تأكدات أن عاصم إنسان مريض نفسيااا.. مرة كيتعامل معاهاا بالخايب ويضربها ومرة كيحن عليهاا ويتعامل معاها بهدوء.. مانطقااتش وفضلات تسكت حيت بصح هاد لمرة عياااات.. هزها عاصم بين يديه وهي مرخية بسباب الماكلة لي ماكلاتش هادي يوماين وزيد عليها جلستها فالضس  والبرد لي شرباتو وهي غيگلي.. غادي بيها لبيتهوم وفطريقو شاف فبدر الدين لي كان هاز لگارو بين يديه كيكمي فيه وعينو على رحيل لي كانت مكمش على بعضهاا ودوك لملامح ديالها الباااكية خلاوه يزيد يدقق فيها الشوفة.. واخا غبرو من حداه الاأنه بقا مفيكسي شوفتوو فنفس البلاصة كانو فيهاا.. غمض بدر الدين عينيه ونطق بهمس خشن: عمو..
وصلها عاصم لبيت وحطهاا فوق النموسية وبعد عليهاا وهي مشات جهة الشانطة ديالها خدات حوايجها وفوطة صحية ودخلات لحمام.. خرج عاصم من عندها ومشى لبيت مو ودخل لقاها ناعسة فوق النموسية متتحركش وصوت تنهيداتها كيتسمعوو.. قرب جهتها ونطق:شوية دابا
مليكة:(غمضات عينيها) هممم مقدراش نتحرك اولدي
عاصم:(ربع يديه) عادي الواليدة راك تهرستي فضهرك وغايخصك هاد لمدة تبقاااي ناعسة فالفراش وماتحركيش گاع
مليكة:(شافت فيه ) كلشي بسباب ديك بتلحرااام دمرتك بغيت ليها تشتيتة
عاصم:(حرك راسو) رتااحي دابااا ونساي عليك مرتي الواليدة الابغيتي شي حاجة عيطي على ربيعة
خرج وخلاهاا غير تتنهد وتنين حاسة بضهرها عاطيها حريق واخا خدات لكالمون ولكن مدار ليها والو.. وزيد عليها مكتقدر تاتحرك ولاضور فالفراش كيما حطوها فاش جابوهاا بقات..
---
كانت واقفة قدام لمرايا تتشوف فانعكاسها وصفورية لي على وجهها لي دغيا بان فيه الضعف ومع ديك التقطيعة دشعر بينات وجهها ضعيف كثر.. خدات لمقص لي تما وشدات خصلات شعرها لي كانو ساردين بلما وبدات تتقاد ليه لاكوب واخا مافيه مايتقاد.. خلات شعرها كولو فنفس الطول لي فايت ودنيها بشوية.. مبغاتش تبكي ومبغاتش تبين ليهوم بلي راه غلبوها واكتفت أنها دعي عليهوم وتخلي لخالق هو لي ياخد حقها منهوم.. خرجات من لحمام وبان ليها عاصم واقف حدا الشرجم.. ضار شاف فيها وطلعها بنظرة فهماتهاا ولكن ماتسوقاتش ليه.. قرب جهتها ونطق بهدوء: تبغي تهضري مع باك؟!