🥀 #الجوُهرْ_الحُرْ🥀
🔱 تشبَّتتُ بالأمَلْ رُغم قساوة القَدرْ🔱
♣️ #ومَالِي_قَلبِي_سِوَاكْ ♣️
🖋️Rah Ma🖋️
ج630:
هزات كلثوم عينيها كتشوف فمها لي كانت تاهي كتشوف فيها بدوك الشوفات لخبيثين.. تيقولو قلب البرمة على فمها تخرج لبنت تشبه لمها هي ديالتهوم لخبث والحسد والتحراميات لي فإيطوو رضعاتهوم منها كلثوم.. بلاصة ماتتنصحها إيطو تجمع راسهاا وتنسى عليها إدريس وتأنبها على فعايلها كانت تتزيد تشعلها وتخليه تفكر فماكفس.. وعقل كلثوم بدا يفصل ويخيط فهضرة مها.. السحووور هو الطريق لي فاش تيمشي فيه لوااحد عول عليه عمرو مايرجع مزااااال حيت صافي الشيطان كيولي يزين ليك الأمور وبلي داكشي لي تادير هو لي خصو يدار ناسين بلي راه تيشركوو بالله عز وجل.. باش أنك تفكر تأدي شي واحد فصحتو وفعقلوو فنتا قطعتي يديك من رحمة الله.. رجعات إيطو شافت فبنتها وقالت بخبث: ياك ابنت كرشي فرقتيها معاه ودرتي لعجب وفلخر طلقك ورجع ليهاا ونتي لي ديتي لعيييب وهاهي دات ليك تاولادك مبقاااو حاملينك والامعيطتيش ليهوم عمرهوم يعيطو ليييك
كلثوم:(بحقد) بغيتها تشوف لمرار
إيطو:(كمشات عينيها) واحد لفقييه كاااين ف**** خدمتو دقبطلا من لول يبان لعربووون خصك غير تحركي جيبك ليه
كلثوم:وتي شكون وراه ليك؟
إيطو:(ببرود) نسيتي مرااات جلالي لي كااان باغي يتزوج عليهاا ويجري عليها من الدار شكون عاونهاا ياك هو لي خدم ليهاا المحبة تاولى يموووت على تراب رجليهاا وهاهو داير ليها كي لما لقليل..
كلثوم:(حكات يديها) بعيد شوووية علينا
إيطو:لي بغاا لعسل يصبر لقريص النحل تي بغيتي كلشي يجيك بلبااارد
كلثوم:واخا نمشيو ليه ولكن تمشي معايا
إيطو:(هزات يديها لمكمشة ولي موشومة تاهي فوق يديها وحركات صبعها بلا) لا لا لا اخويتي بغيتي شغلك سيري ليه وحدك أناا مدخلينشاااي فمصايبك راااني غي ولية دروويشة مقداشاااي على تمااارة والمشاكيل
كلثوم:(بغيض) وشنو نمشي تم وحدي راااه خويا مايخلينيش
إيطو:تي قولي ليه غادة نجيب شي سخرررة وسيري مالو غايبقا مرافگااو واتي نوووضي داباا جمعي ديك الروبيييج رااه الدار خنااازت بزفووورية النعاااس تت (تكات على لعكاز وناضت كتكتم) نمشي نصلي صلاتي
غير مشات إيطو وهي تنوض كلثوم غادة جهة لبلاكار وبين لحوايج كانت مخبية صنديقة فيها دهب لي تكساااب هزاتووو دارتو فزيف حياتي ودارتو فصدرها وخدااات لفواطة لبساتها وحزمات ييجامتها لكبيرة ومشات تزرب على دوك الحوايج حيت غايبقاو تابعينها هي وحدهاا.. طلعات لسطح وخدات جفنة دارت فيها لما ولحوايج والتيد وطلعات تاتشتف عليهوم وتغكر كيف دير تخرج غدا وتمشي لعند لفقيه لي قالت ليهاا مها عليها واخا بعيد ولكن خصها تشوف بعدا خدمتو.. بقات فالسطح تاصبنات ونشراتهوم عاد نزلات وبيجامتها كلها ساردة بلمااا مشات بدلاتها وخرجات لصالة الصغيرة لقاتهم تيتعشاااو مع مشى لحااال جلسات كلات معاهوم شي دغمات وناضت لبيت باش تنعس.. ومع الستة دالصباااح كااانت كلثوم لابسة جلابتها ودايرة زيفها ولبسات صابوهاا وخرجات تاتسلت من الدار قبل مايشوفها خوها وتولي فمشكيل كبيييرر.. ضربات واحد طوالة ديال الطريق مع دارهوم جات فالخرررجة دلمدينة.. بقات تمشى وحدها وسط لخلى بحال لحلوووف مخيفااش يخرج ليها شي حد فداك الظلااام مع بااقي ماطلع الصباااح.. ضربات جبووود ديال الطريق وخرجات جهة الطاكسيات وهي تنهج ركبات وبقات تسنى يعمار وغير عمر تحرك بيهوم وهي حاضية الطريق لايفوتهاا.. معرفااش بالضبط فين كاين داك لفقيه حدهااا عارفة سمية لبلاصة ولكن فين بالضبط ماعرفاااش.. هز مول الطاكسي راسو علمها بلي وصبو لبلاصة لي بغات ونزلات تاضور فعينيها معاارفة فين تسووول.. باقي الصباااح بكررري دارتها فيد الله وبقات غادة فوااحد الطريق وضور عينيها كيف موووكة.. ماسولاتش حيت مباغااش تجبد لعين عليهاا.. بقات تتمشى تاحسات بلخطوات وراهاا وهي تزرب فمشيتها ولخطوات تاهوما تايزربووو.. بقات تتجري كلثوم ومضارتش تاحسات بيد جراتهاا وموس تحط ليهاا على جنبها وصوت راجل همس ليهاا:حطي لخنشة لي هازة فحجرك
كلثوم:(تاترعد) مااااهازة واااالو
... اتحطيها بلخاطر ولاندمك
كان يبرك على لمووس وكلثوم باغا غير لي يعتقها ساعة تم غير لخواا وبلاصة معارفها حد فيها.. مدات يديها لفواطة لي لابسة لداخل هزات منهاا الخنشة ومداتها ليه وهو هزها وغير شاف اش فيهاا طلقهااا بالجهد تجات طايحة ومجات فين تضور تالقاتو غبررر قدامهاا..
قلبها كان يضرب والخلعة شاداهاا تاسمعات تلفونهاا كيصوني فصدرهاا مهزاتوووش ورجعااات ملين جاات تاوصلات لجهة عامرة عاد شافت شكون لقاتو محمد طه لي نطق بهدوء:السلام لباس
كلثوم:(حاولات تصطانع لبرود باش مايعيقش بيها) لحمدلله كيف طرا وجرا تاتفكرتيني
محمد طه:(تنهد) كنت باغي نسول فيك واش نتي بخير ؟
كلثوم:لحمدلله هاد الساعة
محمد طه:ياكما خاصينك فلووس؟
كلثوم:(ميقات) لي كان عندي تقاااضي
محمد طه:دابا نسيفط ليك شي باركة واخاا ياليوم ياغدا
كلثوم:واخاا
محمد طه:يالاه نخليك الواليدة تهلاي فراسك
قطعات معاه كلثوم لابيل وركبات فالطاكسي راجعة فحالها ولخلعة باقا شاداهاا والشمتة ديال الدهب مبغاتش تهبط ليهاا..
أنت تقرأ
🥀الجوهر الحر 🥀
Kurzgeschichten❌#لاأحلل_النشر_أبدا❌ ♣ #️تقديم ♣️ وعْلِيّا قالوُ وماخْلاّوٍ مادَاروُ... ضحكُو فوجهِي ونمْمُو مورْ ضهري وهومَا ماعارفينْ عليا وَالوُ... قالوُ راها بدَارهَا ورَاجلها ومشافو غِير لي بغاوْ... ناسِي وحبَابي شافوُ الضّحكة فوجهِي وقالوُ هادِي مابي...
