ماضي الإخوة (الوقوع في الحب)

اقتباس

"محدش قالك إن مينفعش راجل يرفع ايده علي ست"

أفلت الرجل يده من بين قبضة فايز تزامناً مع قوله الغليظ:
"وأنتَ مين انتَ كمان؟!،وايه اللي دخلك أصلا؟!،الموضوع مايخصكش"

ابتلع فايز ريقه ثم طالع الاخيرة التي كانت تقف بجواره وقد علقت عيناها به،تزامناً مع رده علي الاخير بنبرة جامدة:
"لا يخصني"

أشار له الرجل بعينه مرددا بحنقٍ:
"يعني السنيورة دي تبعك؟!"

عاد فايز إليه من جديد واومأ له بالإيجاب مرددا:
"آه تبعي،لو عايز تتكلم اتكلم معايا أنا"

"حلو،يبقي الكلام راجل لراجل أحسن"

"اتفضل سامعك"

"أنا عايز حق تصليحات عربيتي كامل،واللي هرفع عليها دعوة"

"مفيش مانع،شوف تتكلف كام وأنا هاديهولك"

"أي تمن؟!"

اومأ له فايز بالإيجاب مرددا ببرود:
"أي تمن"

طالع الرجل سيارته من الخلف ليحسب تكاليف الاضرار،ثم عاد لفايز من جديد وأردف ببسمة خبيثة:
"١٠٠ ألف"

"ومالو،حلو ١٠٠ الف رقم كويس..،علي كده بتكسب قد ايه في الشهر؟!"

تعجب الجميع من سؤاله الغريب هذا،وانكمش حاجبي الرجل واردف:
"تقصد ايه؟!"

"أقصد بيطلعلك كام في الشهر من امور النصب بتاعتك دي؟!"

صُدم الرجل من حديث الاخير،وازاد صدمته عندما أكمل فايز حديثه:
"أنا شوفتك علي فكرة وانت بتراقب عربيتها في المراية،وفضلت مستني لحد ماتقرب منك وروحت ماوقف عربيتك فجأة،علشان تبان هي الغلطانة وخبطتك"

حاول الرجل إنكار حديث فايز بقوله الحانق:
"الكلام ده مش صح،أنتَ بتقول اي كلام علشان ماتدفعش الفلوس،علشان المبلغ طلع كبير"

زفر فايز بضيق ثم مد يده السليمة في جيب بنطاله وأخرج حافظة نقوده،ثم أخرج إحدي بطاقته الإئتمانية ورفعها امام عين الرجل مرددا:
"دي فيزا انا معرفش فيها قد ايه بصراحة،بس واثق إنه مبلغ أكتر من اللي طلبته..،هتاخدها ليك كلها.."

حاول الرجل اخذ البطاقة،ولكن سحبها فايز بعيدا عنه ثم قال ببسمة خبيثة:
"استني..،أنا لسه ماخلصتش كلامي..،أنتَ هتاخدها كلها صح..لو طلعت فعلاً غلطانة..،وعلشان نتأكد ونشوف مين كلامه فينا صح أنت ولا أنا..هنشوف كاميرات المكان الجميل ده اللي اكيد صورت اللي حصل"

انهي جملته وهو ينظر صوب كاميرات  المقهي الذي كان به منذ قليل،ثم عاد للرجل مجددا ليجد لون وجهه قد تغير،فارتسم علي وجهه بسمة جانبية غامضة لاحظتها زينة فانكمش حاجبيها ونظرت له بإستغرابٍ شديد.
_____________________

ده كده اقتباس من الفصل القادم إن شاء الله واللي كان المفروض ينزل النهاردة،بس كنت تعبانة شوية النهاردة ومعرفتش أخلص كتابته فبعتذر بجد..،بس بإذن لله أخلصه وأنزله بكره.

دمتم بخير..سلام