أونوماليا

مـجـهُـول

كنت في أحلامي فكيف ظهرت؟ أكُتب لحلمي أن يتحقق!

#فريدة
ــــــــــــــــــــــــــــــــــــــــــــــــــــــــــــــــــــــ

جلسَت فتون في المقهى، عيناها تتابعان حركة الشارع من وراء الزجاج، تُفكر في المكالمة التي أجرتها للتو. أمجد كان محور الحديث دائمًا، حتى لو لم يكن حاضرًا. كان هناك شيء غريب في حياته مؤخرًا، شيء لم تستطع فهمه بالكامل. فجأة دخلت أرين، بابتسامتها الهادئة، لكنها كانت تحمل قلقًا واضحًا.

فتون: "بصراحة يا أرين، أنا مش عارفة أمجد مالو الفترة دي. فيه حاجة غريبة بتحصل معاه وأنا مش قادرة أفهمها."

أرين (تتنهد): "أنا كمان مش فاهمة. هو بيتكلم عن حاجات مالهاش أي منطق... بيقول إنه بيشوف حاجات في أحلامه، حاجات غريبة جدًا، ومرتبطة بوحدة اسمها فريدة. بس المشكلة مش بس في الأحلام، ده واضح عليه في الشغل كمان."

فتون: "فريدة؟ مين دي؟ أنا عمري ما سمعت عنه يتكلم عن حد بالاسم ده."

أرين (بحيرة): "دي البنت اللي بتظهر في أحلامه. فجأة طلع الاسم ده وبدأ يتكلم عنه كأنها حقيقة. هو كان دايمًا عنده مشاكل مع النوم، بس المرة دي الموضوع زايد عن حده."

فتون: "أنتِ كلمتيه عن الموضوع ده؟ حاولتي تفهمي منه؟"

أرين: "حاولت. بس مش سهل. كل ما أسأله يقول لي إنها مش مجرد حلم، وإنه بيحس إنه جزء من حياته مش فاهمه."

فتون (بقلق): "وأنتِ شايفة إيه؟ يعني ده ممكن يكون علامة على حاجة أخطر؟"

أرين: "مش عارفة. هو طبيب نفسي بنفسه، وده بيصعب الأمور أكتر. لو كان حد تاني، كان ممكن أقول إنه محتاج مساعدة. بس هو اللي المفروض يساعد الناس... هو اللي المفروض يبقى عارف، بس المرة دي هو اللي ضايع."

بينما كانت أرين تتحدث، كانت فتون تشعر بأن هناك شيئًا أعمق من مجرد قلق. أمجد كان يعيش دائمًا حياة معقدة، لكن هذه المرة الأمور أخذت منحى مختلفًا. شعرت بأن فريدة هذه تحمل مفتاحًا لمعرفة ما يجري.

فتون: "طيب... وفريدة دي، إيه علاقتها بموضوعه؟ هو بيقول إيه عنها بالضبط؟"

أرين (بتردد): "هو مش بيقول كتير، بس من كلامه واضح إنها مش مجرد شخصية في حلم. بيحس إنها بتتواصل معاه، زي ما تكون هي اللي بتقوده لحاجات هو مش عارفها. وكل ما يتكلم عنها بيبقى مرتبك أكتر."

فتون: "يا لهوي... يعني الوضع بقى لدرجة دي؟"

أرين: "أيوه. المرة الأخيرة لما اتكلمنا، قال إنها الحالة الجديدة، في الواقع مش في حلم."

فتون (مصدومة): "إيه؟!"

أرين (بتوتر): "أيوه... قال إنها الحالة الجديدة اللي يحيي سلمها له و ان مفيش غيره يقدر يتعامل يعني طلعت موجودة بجد."