#غليل_الثأر
#خالدة....
#بقلمLina_sabrina
يلزم ندخل عليك ليوم ومادابيك الهدرة لي قلتيها قبيل تنسايها باسكو زواجنا وعلاقتنا راح تبدا لليوم بصفحة جديدة في تفس الوقت راح يكون قفلة للصراع على لفضيحة و الشرف والثأر ويخلاص ليلة وراكي علابالك واش راهم يستناو المهم نصححو الغطلة _هو ورايا يهدر والضجيج برا نسمع بيه بوذني كيفاه يغنو ويصفقو في نفس الثانية جاء قدامي وهز الموس لي فوق الفاكية وقدم ليا باه الليلة يدفن خالدة ويدفن مستقبلها معاه .
قبل سنة 1994
{{ اذا لي عمر طويل سأعود إليك مثل مايعود اليتيم إلى ملجأه الوحيد وسأضل أحاول أن أتغلب على القدر والنصيب وستبقين خالدة قلبي للأبد }}
________كنا راجعين لدار ركب بابا يسوق وقدامو يما وجات معانا عمتي لكبيرة تحتمت انا طلعت فوق الباشي من لور وديمارا بصح يلزم عليا نلبس الحايك ونغطي وجهي باه واحد مايكشفني ويضحك عليا وفي نفس الوقت نستر روحي. حنا ساكنين في دوار كبير وبعيد على المدينة ودوارنا ماش متقدم معزول ومافيهش أبسط متطلبات الحياة والعقلية صراحة من دارنا وروح كامل عندهم عقلية وتقاليد بكري يمشو عليها ماحبوش يتقدمو نهائيا كيجو عندنا بنات خالتي ليساكنين فلمدينة يحكونا كلش كيفاه عايشين هوما ويتشوكاو في عيشتنا وحنا مرات نروحو عندهم ننبهرو من المدينة كيفاه كلشي فيها مطور ومتقدم بصح الله غالب كاتبة علينا نعيشو هنا_وصلنا ودخلت لدار قبلهم جريا لقيت نجوى عند الباب تنحي في جلابتها _كنتي برا ؟_اسكتي لا يسمعوك و مادامك لابسة هزي لبيادن وروحي تعمري الماء بصح خرجي من جيهة الحوش راح تتلاقي بمجاهد راه برا يستنى فيا هاداوين صفر سمعتو من الحوش بصح نتوما جيتو روحي وفهمييه _مممم ستوتة كنتي خارجة لعند معشوقك _زربت هزيت لبيادن وخرجت شفت من ومن ماكان حتى واحد دخلت في وحد الكوروار فارغ يجي بين دارنا ودار جيرانا هوما دايما يتلاقاو فيه بزربة. لقيتو قدامي بعد عقد حواجبو _وينهي نجوى _روح ماتستناش بابا ويما جاو ماتقدرش تخرج _نتي تخرجي كما تحبي وهيا ممنوع راكم حابسين طفلة هكدا وراح تتحاسبو عليها والله هادا ظلم _وانا واش دخلني خاطيني هادا قانون بابا _ماعليش _دورت نخرج عيطلي _خاالدة قوليلها قالك مجاهد تواحشتك ونحبك وراح يجي يوم نديك عروسة بحصان أبيض لداري تعيشي وصليهاليها عندي بزاف ماتلاقيتهاش وسامحيني _هززت براسي وخرجت بوجهي أحمر اخااا تقول قالهالي ليا حشمت _رحت عمرت الماء كي كنت راجعة تلاقيت خويا هشام مع زوج رجال ماعرفتهمش بصح بانولي خاوة يتشابهو . قدم ليا خويا _علاه خرجتي انا ليوم ماخدمتش كون انا عمرت _عمتي جات وماعندهاش واش تشرب ونتا هامل مانقدروش نستناوك _جاء يرد عليا قاطعو راجل جاي من بعيد ويعيط عليه وفي يدو عصا خشينة موت وحييت كييشفتو هكداك باين جاء يضارب _اطلقي لبيادن وروحي لدار اجريييي _هو راح لعندو حسيتو رايح للموت لمزية صحابو وقفو معاه وقدرو عليه ماخلاوهش يوصلوه وزادت كبرت الحالة جاو رجال وولاد بزااف رجعو بين بعضهم وانا مازلت واقفة مصمرة من الخوف عليه اصلا ماعنديش كيفاه نروح لدار راه غاشي كببير تلم وخويا ماعودتش نشوف فيه بيناتهم .حتا جاء ليا واحد من صحابو ليكانو معاه _روحي لدار علاه واقفة هيااا_ قولي هشام كاش ماصرالو _ماصرا والو ماتخافيش بصح روحي ماتبقايش هنا هيا لحقيني _تبعتو كان يمشي قدامي وفتحلي طريق و خرجني من هاداك الغاشي _تعيش ماتخلوهش وحدو _سكت ثواني وبقا مثبث في عينيه عليا .ايه ايه عليا ماتخميش بصح قوليلي نتي ختو صغيرة ولا لكبيرة _لكبيرة _ هزز براسو جيت نمشي سمعت صوت خويا لكبير زوهير دورت لقيتو جاي يجري لجيهتي _رمضان واش جابك لعند ختي ونتي واش ديري هنا ؟_حكالو هو واش صرا وقالي روحي نتي لدار وانا نكمل نروح لعندو نفروها _دخلت لدار حكيتلهم واش صرا يما كييف العادة تبدا تعدد باسكو هشام حياتو طول وهو يضارب ماحبش يستعقل _ستنيا شوي ودخلو في زوج وهشام مضروب داواتو يما وفاتت على خير وكما قال كانت بيناتنا حساب وكيخرج من الحبس جاء يصفيه_فليل حكيت لنجوى واش قالي مجاهد سوطات من الفرحة وخليتها متكسلة مع أحلامها هادو زوج وعلى حساب واش تحكيلي يعشقو يموتو على بعضهم وتستنا غير وقتاه يوجد الدار ويجي يخطبها حاب يكون ساجي باه بابا مايرفضوش باسكو بابا حاب يزوجنا برجال همة وشان ماش تاع ميزيرية وفقر دايما يقول يكفي بناتي الفقر ليعاشوه عندي خلي نتهنى عليهم في دار العز يستاهلو_حكمت بلاصتي وجبدت آخر برية وصلتني من عند المجهول كاتبلي فيها (ماتزيديش تخرجي لبرا وحدك عيني عليك ومرة خلاف نزيد نلقاك كما ليوم دمك نشربو بلا رحمة )كاتبلي هكدا والورقة عليها قطرات دم هادا المجهول بدا يخوفني كل مرة البريات تاعو اشكال وألوان ومتناقض مع روحو مرة يعبر على حبو ومرة على غضبو وغيرتو ومرة يمازحني وهادو لبريات توصلني وحدة كل شهر وتجيبهملي بنت عمتي على قد ماحولتها تخبرني شكون ماحبتش تهدر بصح كون يسمع بابا ولا خاوتي يجلدوني بلا برحمة وكل مرة نقولها ماتجيبيليش فعادت تجي لدارنا وتحطها في بلاصة وتخبرني تحطني تحت الأمر الواقع وخفت نخبر يما ولا بالأحرى خقت من بنت عمي نصيرة تحول لحكاية ضدي باسكو فالأول كنت نقبلهم بيدي درت غلطة عمري __ فاتو يامات كل يوم نروح مع يما لدار جدي (باباها )نلقاو فيها خالتي ومرت خالي نفتلو طعام ونخبزو مطلوع ونغسلو الصوف نسترزقو بيهم وعندي ياربي شهور من بديت نجي مع يما انا تاني كنت ممنوع نخرج من الدار بزاف بصح بعد محاولات من عند يما واصرار منها أكثر شيئ باه قبل بابا ونجوى ماتحبش تخدم تحب تقلاش والواجد وانا الاكثرية نحب نروح باسكو دار جدي يشبعوني دلال وعايشين خير منا ابسط حاجة نتفرج فلاثيلي ومكانش حسابات كما في دارنا_ستينا بابا ولا واحد من خاوتي ماجاوش لينا فالوقت ولينا رحنا وحدنا غير وصلنا لدار شفت خاوتي مع رمضان عرفتو وواحد معاه ولا واحد انتبهو لينا من غير هو الوحيد ليبقاو عينيه مركزين فيا وانا حشمت هبطت راسي ودخلنا .فليل سمعت بابا يهدر مع يما وخاوتي عليا قالهم راجل هادا مايناسبش خالدة وراح يجيها ليخير منو مازالت صغيرة بصح نجوى راني نستنا في صاحبي يردلي الهدرة عليه ونردلو _وبالاك نجوى مايعجبهاش راجل _ماعندها ماتخير عليه ادا لقيتو وليد فاميلية نمدهالو راني نسقسي _رحت عند نجوى حكيتلها واش سمعت _زعما يكون مجاهد ياماامي ادا هو نأكدلك الفرحة تقتلني ياربي يكون هو ونتهنى_لغدوا خرجنا انا ونجوى نعمرو الماء وهيا سرقت روحها راحت عند مجاهد كانت ديجا دارت خطة من قبل هيا ادا خرجت حتى وتتلاقاه برك .وانا نعمر خلعني صوت ورايا نطق اسمي دورت لقيتو رمضان ويتبسم معايا وحاط يديه في جيوبو _من التالي كون نجي نخطبك تقبليني _تفرفشت واش نجاوب _خودي وقتك وخمي انا ماش حاب نطول فالهدرة معاك ونديرلك مشاكل ونلفت الأنظار بصح انا نتي عاجبتيني وبزااف تاني ومتمني تكوني ليا وباه يكون في علمك راني مطلق ديجا وبلا ولاد ونتي ادا ترفضيني انا ماش راح نقرب لا ليك ولا لباباك ولا لخاوتك مانحبش نكون راجل مرفوض أبداا مانقبلهاش لروحي انا عندي طموحات وأحلام والحق كيشفتك نسيتهم وحاباتك تكوني شريكة حياتي ومعاك نحقق الإرادة تاعي ودرك كما صارحتك بكلشي في دقيقة صارحيني نتيي بصح مع ليام ولحكاية تبقى يناتنا وجوابك راح نرجع كاش نهار ونسمعو منك .بسلامة _راح وخلى قلبي يرفرف من كلامو اول مرة واحد يتقرب مني ويصارحني ويروح بلا تحرشات ولا مقابل _خااالدة واش كان رمضان يقولك شفتو معاك _ايه جيتي ونتي وين تعرفيه _نندب عليك هادا أخ مجاهد لكبير وعندو توام تاعو اسمو سليمان _قولي والله والله مانعلم بيها كيفاه تعرفيهم ونتي وماتخرجيش من دار بزاف _حاجة ماتغفى عليا نعرف كيفاه نجبدهم قولي واش يحوس _حكيتلها كلش .ياااا غيرك قبلي بيه باسكو هو ومجاهد راح يعيشونا لحياة الكريمة فلمدينة ماش تمرميد لي هنا _بصح حبيبك يسكن هنا علاه راكي تحلمي باطل _بصح خدمتو فالمدينة أكيد يديني ونتي رمضان ماش موحال يديك للخارج ليخلاص باسكو عندو مؤهلات وموالف يروح ___فاتو يامات على نفس الروتين مرة على مرة نشوف رمضان وانا الحق بديت نحلم ونتهلوس بيه كلشي فيه يتحب وزيد ماش يقلق فيا .كيدخلنا للدار انا ويما ناضت عمتي صغيرة ليعايشة معانا تعرش على يما خليتهم ورحت للبيت نبدل لقيت لتم نحوى تبكي سقسيتها وشبيها _مجاهد قالي قريب نكمل الدار ونجي نخطبك _ااا مالا هادو دموع فرحة .ماحبتش ترد عليا وبقات تبكي وقاتلي حاجة بيني وبينو ماش محتمة نخبرك مادخليش روحك_ايه حاجتك وشبيكي شاعلة فيا __هاديك ليلة بعد سمعنا عياط من برا تاع راجل يعيط على هشام وصوتو غير طبيعي وبابا وزوهير كانو مازال باه يرجعو لدار _راح عندهم بعد ماقنع يما بلي ماكاين والو درك يفريها _كييراح تبعناه للسطحة تاع برا تفرجو لقيناه رمضان وجهو حمر وغير يسب في هشام وحاب يتلاح ليه وخوه الثاني سليمان حاكمو ببالقوة ماخلاهش يوصلو على قد ماحولنا نفهمو ماقدرناش راه يقولو راك تعمر في راس سليمان وتستغل فيه و مايليقش يصاحبك ونتا فيك وفيك يعني على حساب واش فهمت رمضان راه يعاير في هشام ببالفقر مافهمتش علاه باسكو شحال من مرة شفتهم مع بعض يبانو متفاهمين علاه درك راه يهدر هكدا مافهمتش_جاو رجال ومعاهم مجاهد باه حبسو لمخاصمة بصح رمضان تحلف فيه وراح مع خوتو وقالو كون تزيد تقرب منا ندبحك وخويا سليمان من لليوم خط أحمر ادا هو نية فأنا شيطان نحرقك ونتا حي _حطيت يدي على قلبي خفت منو _كيدخل خويا قال حاجة تافهة هو كبرها _ماحبش يزيد يشرحلنا _فاتت سمانة تصادفت مع رمضان ديراكت هبطت وجهي ومشيت باسكو يما خليتها تهدر ورايا مع جارة وفي نفس الوقت خفتو من هاديك ليلة وكما توقعت حبسني _خالدة فاهمك بلا ماتحكي بصح انا نظرتي ليك ماتغيرتش ولو انا وخوك صرا بيناتنا مشكل ودرك الهدرة تبقى رجال وراح نهدر مع باباك برك مديلي اشارة يا قابلة يارافضة _ماجاوبتوش ورحت مانعرف كيفاه درك يفهمها بصح بقى قلبي شوي مايل ليه تمنيت كون ماصراش هاداك المشكل ومع هكدا بقى كل مرة يخرجلي مرات ييقرب لعندي يلوحلي كلمات شابين ومرات يراقب من بعيد والحاجة ليعجبتني فيه انو صريح وعينيه يهدرو وحدهم وباين فيه انو انا نهمو وقيمتي كبيرة عندو ولا مرة ديرونجاني ولا حطني في موقف محرج حتى جاء اليوم المشؤوم خويا هشام 24 ساعة ماعندنا خبر عليه لا هو لا سليمان نار شعلت في قلوبنا وللأسف جاو جادارميا وعطاولنا الخبر المر انو خويا هشام وسليمان لقاوهم مقتولين فلجبل ولي توجع انو لقاوهم مدبوحين هنا ماش غير غير يما تغاشات وماش غير بابا تصدم وماش غير لافامي ناضو يبكو الدوار كلو بكى وحزن عليهم وحنا قلبنا تحرق على هشام سماطت الدار ودخلها غير الحزن والإكتآب من وراه موتو والموت تاعهم جات غدرة وبقات غامضة____فات كتر من عام على موت هشام ربي يرحمو في نهار دخل بابا عندنا لكوزينة وقال لنجوى كاين خطاب وهاد المرة هاد راجل عاجبني ومافيه حتى عيب وجدو رواحكم يجو مواليه درك يجو يشوفوها _يما رجعت تجري فينا كيعاد جايين على غفلة ونجوى دمعتها تهبط بساكت باسكو علاقتها بمجاهد مازالت متواصلة ومرة على مرة يتلاقاو برك موت خاوتنا خلى كلش يتأجل _جاو خرجت عندهم شفناهم ناس مقاقم لابسن الحطة ومبعد عرفنا بلي هوما من المدينة وجاو عند فاميلتهم وهدرولهم على نجوى عليها جاو وكما كان الحال عجبتهم بزاااف وراحت معاها وحدة وراتلها لعريس كان برا مع رجال وقالو ان شاءالله فيها خير _بعد ماراحو بدا بابا يبعت فالناس يعرفهم ييسقسو عليه منيين ييسكن ورجعولو بالخببر بلي راجل ناس ملاح ومافيه حتا عيب وكيراح بابا يهدر مع نجوى عليه شوكاتني كيقاتلو قابلة .كيخرج هو سقسيتها _خفتي تقولي لالا _هههه علاه نخاف نو راكي غالطة راجل عاجبني وربي ييكمل بيني وبينو نزيد نخير عليه _اااه ومجاهد كيفاه ؟_ربي يجيبلو من بلاصة خلاف صفحة وطويتها معاه ماعندي ماندير بيه _كاش ماصرا _لالا بصح كرهتو ودرك كيسمع راح نتزوج هو تاني يكرهني ونتعادلو خلينا من سيرتو _شوكاتني بكلامها وماضنيتهاش تخدعو وديرها بيه وخايفة من ردة فعلو باسكو مجاهد ييبالي انسان صارم تاع الصح خفت في بلاصتها .نهار خرجت نعمر الماء تصادفتو وقالي قوليلها ترفض هاد زواج وراني جاي انا نخطبها كيرجعت لدار وخبرتها قاتلي مسكين خليه يحلم يبقى غير هو مانديهش وكما كان الحال هاديك ليلة بابا كان فالحوش يهدر مع يما وانا فالدوش سمعتو كيقالها بلي مجاهد صح خطب نجوى بصح رفضو في دقيقتو باسكو ديجا مد الكلمة للخطاب الاول _لقيت نجوى دخلت باينة هيا تاني سمعت بصح قاتلي عادي وتضحك مكتوبي ماش مجاهد_هكدا راح تحرقيلو قلبو حرام عليك _مايهمنييش _حنا نهدرو ويما وبابا جابو سيرة المهر وقالو بلي طلب في نجوى شرط كبير باه بيهم يسقم الأرض تاعو وبلي المشكل تاع الارض يتحل بهادوك دراهم ويحمد في ربي كيجاه رزق حتا ليدو _ شفت معاها لقيت دموع في عينيها _شفتي خالدة باباك واش قال كل مرة يبرهنلي بلي رباني غير باه نكون سلعة للبيع _عيب واش راكي تقولي _هادي هيا الحقيقية انا بنت خوه ماش بنتو من بكري حابسني فادار ويحلم كينكبر يبيعني ماش يزوجني والدليل ليقالو حتا من انا من نهار نخرج من هادي دار وهاد الدوار ماش راح نزيد نرجع ليهم (نجوى هيا فالاصل بنت عمي ووالديها قتلوهم الارهاب بكري كانت صغييرة بزاف عليها بابا ويما تحملو مسؤوليتها كاملة بصح درك كيكبرت حبو يزوجوها ولو قبلنا كامل المهم يستروها باسكو بكل صراحة كانو خايفين عليها حتى من خاوتي بعيد الشر يغرهم الشيطان وهيا الله يبارك شابة )_وكما كان الحال نجوى فرحت بنهار خطبتها وراهي تستنى في عرسها بكل شوق ونجوى ليتحب مجاهد ماتت وجات وحدة في بلاصتها سبحان الله ماتوقعتش تكحل قلبها هكدا ومجاهد حسو ماكانش وطلع راجل ومادارلها حتا مشكل وانا رمضان قليل وين نشوفو بصح نظراتو مازالت كييف بكري بالعكس تطورت ورجعت ابتسامات والمجهول مابقاش بعتلي كيسقييت نصيرة عليه قاتلي كره منك وضحكتلي ضحكة الصفراء توسوست انا ثاني واش داني نسقسي عليه__بعد يامات تلاقيت برمضان وحاصرني وبدون مقدمات _خالدة مازلت حاطك في قلبي وعقلي وعينيا برح موت خاوتنا هشام خوك وسليمان خويا عطلت الامور حاب منك قرار يانتقدم خطوة يانبعد عشر خطوات اعطيني اشارة برك _هزيت راسي ليه وتبسمت ورحت جرية لدار كيشغل بالابتسامة مديت موافقتي وماخابش ضني وجاء خطبني من بابا وفاتت الأمور على مايرام انا قلبي زاهي وفرحان وعينيا يضحكو وحدهم تبان بديت نغرق فالحب بصح نجوى ماش حاجبها الحال تمنات مانتقربت لفاميلة مجاهد بصح مادرتلهاش أهمية كل واحد ومكتوبو _فاتو اليامات بسرعة البرق درت خطبة صغيرة وفاتحة وهو حضر لبسلي الخاتم وكانت اول مرة يمسني ويكون قريب ليا ويهدر بأريحية والابتسامة مافارقتش وجهو حتا فاميلتو ويماه وخواتانو في خمسة حبوني من غير ناناه حسيتها جابدة روحها بالاك ماعجبتهاش __جهزنا رواحنا انا ونجوى وفرحانين بصح هيا فرحتها ماكملتش نهار جاو فاميلة خطيبها ورجعو القش وفسخو الخطبة والسبب قالو دخلهم الوسواس منها علاه حتا تقبل في راجل كبير عليها بعشرين سنة وكلاها الطمع ولهادا بطلو هادا الزواج وهدرو وخرجو فينا لعجب حتا بابا خاف عليا يزيدو يبطلو عليا بصح رمضان كان مصمم عليا وماكانش عندو مشكل ونجوى حالتها رجعت كارثية ماش ساهلة عليها ربي يعوضها وفاتت فترة خطوبتي معاه ولا أروع كان انسان محترم معايا وطريقة الغزل تاعو معايا سبيال وتحشمني وتلاقيتو غير مرات قليلة وبالسرقة على خويا وبابا وأصلا فترة خطوبتي كانت قصيرة _وصل عرسي وعقدت مع رمضان وقبل العرس بنهار جاو حناولي كلشي فات هايل بصح كيدخل باه يلبسلي الخاتم لكبير من دخلتو حسيت بيه غريب ابتسامة معدومة _هز يديه لزوج قالهم اسكتو باسكو كانو يغنو بفمومهم مع البندير _كيعم السكوت قالهم سترو رواحكم كامل وخلو باباها وخوها وخاوتي يدخلو يتصورو_سترو رواحهم ودخلو كامل وجات مرا صورتنا و درنا فوطو مع بعضنا حتا لقيتو قرب مني وهمسلي في وذني _كنت متمنيك من قلبي بصح هشام خوك خسرها وخربط لحسابات وكحل لقلوب وحاجة ماترجع كيف ماكانت_هو بعد عليا وانا عقدت حواجبي واش تقصد _ماجاوبنيش وعيط لبابا وهو دور ليه قالو أنعم ورمضان خزر فيا ونطق _عمي بنتك بطلت عليها وراكي مطلقة مطلقة مطلقة وماعندي ماندير بوحدة شرفها مدتو لغيري ومادام عيني شافت واش دارت فأكيد عفتها وماش راح نوسخ يدي فيها والمحكمة بيناتنا _في رمشة عين تلقيت صدمتي الاولى في حياتي وناضت حرب بين عينيا وكانت بداية الثأر.
صفحتي الرسمية على فيسبوك بإسم (قصص لينا صبرينة)
