الحلقة 12
#بقلمLina_sabrina
جامي نخون ثقة والديا سمعتني انا لا خاينة ولا خداعة _تبسم وفتح الباب ودخل بابا لقاه قدامو طبعو من صدرو وسبو وانا خفت موت بقيت وراء الباب ماعندي حتا وجه نقابلو بيه وشفت حتا يما ونجوى واقفين موراه مع عمتي وهيا تحرش فيه _واش ديرو مع بعض هنا ونتا واش جابك لنص داري ؟؟ _جيت نهدر مع خالدة ونروح _نتا حاب تموت تبالي كلشي درتو فيها ومعانا ومازلت ناوي على فضايح كتر _خويا راه جاء زوهير .أرواااح ياولد خويا تشوف هادي الشوفة لي هنا عدوك ليراك تحوس عليه راه جاء لنص دارك وزيد كان وحدو مع ختك داخل بيتي لا حشمة لا حياء ارواح تشوف بعينك العار ليجابتو ختك ومازالت تزيد عليها _وليت نندب في وجهي مادام زوهير جاء يعني درك تزيد تتعقد الامور وكما توقعت زوهير طاح عليه ضرب وهنا رمضان دافع على روحو بقى هاداك يضرب وهاداك يضرب وزوهير يتحلف ويقولو انا خاطيك وخليتك تعيش ونتمنى ماتطيحش في يدي ولا نشوف خليقتك وهكدا وجيت لنص الدار لعندها_رمضان ناض وحكم زوهير من لافاست ورماه بعيد عليه _جيت برك هدرت معاها وأولا هادي عمتك هيا ليدخلتني باه يكون في علمكم قاتلي انا ندخلك ونخرجك وواحد ماراح يشوفك وثانيا خالدة من حقها تعرف علاه درت هاد الشيى كامل معاها كلشي خبيتوه عليها راهي عرفتو _شكون نتا حتا تخبرها حابني نجهل ونقتلك _كنتو حابين تخلو صورة هشام دايما مليحة ياك وهو كان هاردها من كل جيهة بصح درك كلشي عرفتو غير هاديك العملة ليطعني بيها للظهر بيه بخويا راني ساكت عليها ماش على وجوهكم على جال مصلحة خويا محمود ومصلحة دارنا برك _تسكت ورد بالك هاديك لحكاية تخرج للعلن ماش ناقصنا مشاكل وثأر جديد يالحيوان _تخافو نعرفكم تخافو ماعندكم حتا جرأة والدليل راني قدامك للمرة الثانية ووحدي ومادرتلي والو فيكم غير الهدرة _هنا زوهير راح وزاد طاح عليه ضرب وبابا بعدو عليه قالو خلينا منو خليه يروح _بابا سمعتو واش يهدر حسباتلو كي مادرتلو والو يعني خايف .بقا يسب فيه ويتحلف _هيييي صااي اسكت ماتوسخش يديك فيه واش تفاهمنا قبل _بابا كان يهدر معاه بعينيه باه يفهم روحو ومايتسرعش وكيدور لقاني مقابلتو زاد هاج عليا _نتي هنا ياساقطة تستاهلي تموتي ونتهناو من عارك .جاء وحكمني من شعري وعطاني زوج كفوف _واش كنتي ديري معاه وحدك ااه جاوبي_عمتي جابتني وزادت دخلتو لعندي وغلقت علينا والباب ماكان علابالي بوالو _وعمتي علاه دير هكدا؟ _راهي تكدب انا جيت صدفة لقيتو معاها عليها غلقت الباب باه مايهربش وتشوفوهم نتوما انا تبالي جيبو قابلة تشوفها خالدة شكيت فيها تكون هاديك طبيبة كدبت وكلام رمضان صحيح عليها _نطق رمضان وقال لبابا .ختك هادي يلزم تزوجوها باه ماتزيدش تحقد باسكو الغيرة واضحة من وجها وفعايلها ستوتة من لكبار _اخرج نتا من داري يالله ورد بالك واحد يشوفك خارج هياااا برااا علينا _حاجة فيكم حيرتني علاه مادرتولي والو بصح ماعليش نعس روحي قادرة تجيني ظربتكم فالظهر كما هشام ليفيه طبع مايتبدل _زوهير بقى يشوف معاه وينهج ويعرق وماكانش ناوي على الخير بصح بابا بقى هازلو يدو باه مايقربش ليه حتا خرج وطاح عليا زوهير بالضرب وكمل عليا بابا دقدقو عضامي سيرتو كيقلت ليما ولبنات على حكاية هشام واش كان يدير هنا هبلو من راسهم ورجعو غشهم كلو فيا وللأسف كان كلام رمضان كلو صحيح ومازلت حابة نزيد نعرف السر الثاني لي مخبينو علينا __بقات يما معايا وانا نبكي ونتوجع ومن الضرب ليخديتو حتا دخل بابا قالي واش كان يدير معاك لداخل _خاف ربي ياراجل ياك قاتلك ختك هيا ليدخلتو عليها روح حاسبها هيا _ختي فالأصل علاه دير هكدا مادخلتش لراسي _قاتلو يما مالا ادا تحب روح جيبلها 10 قابلات وشوف كييفاه بنتك تخرج شريفة انا واثقة في بنتي _بابا تعيش ماتزيدش تحطني في هاداك الموقف ادا واثق من تربيتك كما يما ماتقتلنيش بالحياة مادمرش نفسيتي _اخرجي نتي خليني معاها وحدي _علاه نخرج اهدر وانا معاها _نكسرلك دراعك الثاني هيااا خرجييي ماتخلينيش نخرج من رحمة ربي _خرجت يما وبابا طبع الباب وقدم ليا .
الحلقة 13
بقلم لينا صبرينة
ماش راح نجيبلك حتا قابلة باسكو ماش حابة الناس تزيد تهدر نعرف النساء كيف لفعات يطلقو سمهم وينتشر الخبر وتزيد تثبث عليك التهمة مالا اصبري ليام الجاية ونشوفو واش يصرا _واش راح يصرا يا بابا كتر .ماراني متحملة والو أرحموني _كما تقاهمنا ماش حاب خوك يقتل و يدخل للحبس ويبقى الانتقام يدور راني نركح فيه ونطفي فالنار بأي طريقة ومجاهد مازال على كلمتو ادا رمضان دار رايو وطلقك مجاهد راح يستر عليك ويتزوجك ويسكت الناس _زوجوني لمهبول وماتزوجونيش لمجاهد ماتزوجونيش لهاديك العايلة _لالا يلزم تتزوجي ليهم ياإما رمضان ولا مجاهد ولا تتزوجي محمود ويدخلك على ضرة _حطيت يدي على وجهي ونبكي .خافو ربي فيا ماتحطونيش في وسط النار .علاه حابين بسيف دمرولي نفسيتي وتلعبو بحياتي _يلزم هكدا محمتمة عليك وعلينا .كيتزوجي واحد منهم الناس تسكت مايبقاوش يهدرو فيك وفينا ويقولو مادام رجعت هاديك العايلة وناسبتهم يعني كلشي تقال علينا كدب واتهامات باطلة انا الراجل يابنتي وانا لينعرف هادي الحياة كيفاه تمشي _هشام دارها قد راسو وخلاني انا نتحاسب خلاني ضحية من وراه وأنا ماعندي حتا ذنب _ادعيلو بالرحمة ماعندنا مانديرو الهدرة ماتفيد في والو_بصح واش دار ثاني كاين حاجة ماش حابين تهدروها _ناض وقف .هاديك الحاجة كبيرة وماتهدرش ونسايها على جال مصلحتنا كامل _خرج وعيط ليما قالها داوي وجه خالدة بالأعشاب رجعي وجها كيف ماكان _جات ليا يما وسقساتني واش كان يحكي معايا بابا _هززت براسي والو من غير مكتوبي ليرسمو على جبيني _حنا هكداك نسمعو في عمتي تصوغ وتعيط وبابا عقابها باين ناضتلها حالتها _روحي يما شوفيه تخاف يضربها ونحصلو فيها _خليه يضربها تستاهل سودتلي عيشتي وحابة تزيد تسودها عليكم _شوي ودخلت نجوى لعندي تشوف معايا _مافهمتكش مادام عمتي دخلتو عليك علاه ماعيطتيش علاه مادرتيش ردة فعل حتا زدتي تفضحتي وكليتي هاد الضرب _باسكو ضعفت وكلاني الفضول وحبيت نعرف السبب ليخلاه يدير فيا هكدا _واش حكالك بالضبط _ايييه حقا نتي واش دايرا معاه حتا قالي راكي تشبهي في عمتي _مادايرة والو علاه جبدلك سيرتي ؟؟_ايه وخيانة وعدو ومانعرف واش _يتهيبل بيك رمضان هادا يعرف غير يكدب هييا رقدي شوي ريحي ينقص عليك سطر _خرجت وخلاتني موسوسة منها حسيتها هربت مني ورمضان كان يحكي سيريو عليها مانعرف واش كان قصدو بصح ادا كاينة حاجة تعيا وتبان .حطيت راسي على لمخدة ونخمم واش قالي كامل بقا كلامو يدور في راسي ودموعي حرقوني غاضتني عمري انو ماعندي حتى ذنب في واش صرا علاه حتى يتبلاني وينتقم مني انا علاه كحل قلبو عليا ويوهم فيا ببلي يحبني وراح يوم ويرجعلي باينة نيتو حاب يأثر عليا ويهبلني وكما قال حاب يديرني عقدة نفسية باه جامي نتخطاه ويخليلي الأثر تاعو في حياتي __فاتو يامات حاسة روحي غريبة على هادي الدار مانهدر مانضحك مانجمع معاهم من غير يما تجي تواسيني بالحنانة تاعها اصلا بابا كل يوم يجيني يحدرني باه مانهدر والو وزوهير كون يلمحني يعطيني السوط الظغط ليراه عايش فيه بداو يبانو مضاعفاتو والانفجارات راهي تجي غير فيا._شفت مع لمرايا شفت مع وجهي بالدواء تاع الاعشاب راحو منو ليطراس تاع الضرب بصح لحمي من داخل غير الوان ويما كل مرة تداويني كما موصيها بابا _دخلت عندي نجوى وحسيت على لسانها كلام سقسيتها واش كاين _مانعرف سمعت يما تهدر مع بابا وتندب في وجها وتدعي على راجل _شكون هو ؟_مانعرف ماقدرتش نفهم عمتي لحقت بيا كانت تقول ييما الله لاتربحو ربي يتولاه وكون تسمع خالدة راح تتحرق من قهرها _تبسمت كيشغل راني نتنعم فالخير باينة غدوا يوم طلاقي ورمضان مازال مصمم على قرارو _كون غدوا يبدل رايو ترجعيلو ؟باسكو حاسة بيك مازال عندك أمل فيه _ في رايك باباك وخوك راهم يستناو فالراي تاعي _انا في رايي ماتقبليش ترجعي دييري أي حاجة المهم ماتذليش روحك وترجعيلو احملي الضرب والذل لي هنا خير من رمضان يزيد يرخسك ويعدبك _علابالك كون نقبل نرجعلو نتي راح تسهال عليك تتززوجي من مجاهد _ختي انا مانسناش ديري فيا مزية انا بعقلي وبزيني وبطريقتي نرجع مجاهد ليا ويتزوجني ماتخميش _هيا خرجت وانا بلعت ريقي ولو استفزتني بكلامها بصح غاضتني كون تسمع واش راح يصرا فالاحتمال الثاني ليراه يستنى فيا وفيها .
قريتي ديري جام
الحلقة 14
بقلم لينا صبرينة
لغدوا من داك كان يوم طلاقي من رمضان نوضتني يما على بكري .تقعدت شفت مع نجوى تشوف ليا _خالدة هزي كرعيك وتقبلي مكتوبك وواقعك وصلت دالتك ماعندك ماديري _سكتت وبقات غيير تشوف معايا بصح نظراتها وكلامها ماقدرتش نفهمهم اذا شفقة ولا شماتة .نضت فطرت ونسمع في بابا مع يما يهدر معاها بشوي ماقدرش نفرز كلامهم .دخلت عندي قاتلي كيتكملي هيا بنتي لبسي باه تروحو باباك قال نروحو على بكري خيير ونستناو _هززت براسي كيكملت نضت لبست حجاب رمادي فاتح ويما معايا لبستلي خمار وتعدلي فيه باسكو ماعنديش بزاف من تحجبت عكس نجوى حتمو عليها الحجاب وهيا صغيرة وزادت جابتلي مكياج قاتلي حطي في شواربك وعينيك وخدودك _علاه نحط رايحة لعرس ؟_باباك حاب هكدا حابك تروحي منظمنة ومتزينة هييا نجوى عاوني ختك درك نجي _ضحكت على روحي وفي نفس الوقت دموعي نزلو حسسيت صح بيه هاد المرة راه يعرض فيا كيف السلعة حاب مني نكون شابة ومتزينة غير باه رمضان نعحبو ويتراجع على قرارو _خالدة ختي علاه راكي تبكي وتضحكي _تشفاي نهار قلتي على روحك بلي راكي سلعة وبابا راه يبيع فيك لهاداك لي خطبك ليوم تبين بلي هاداك الموقف لا يقارن بالموقف تاعي درك .حاسة روحي رايحة للنار نتكوى ونرجع رماد وبابا راه يخطط باه يتهنى في حياتو _سكتت وكملنا درنا ليقاتلي يما وخرجت عند بابا لقيت معاه زوهير فالبااشي ركبت ورحنا وحدنا ماحبوش يجييبو معايا يما مسكينة خليتها تدعيلي بالخيير __وصلنا للمدينة ودخلنا للمحكمة قالولنا مازال دالتنا تطول .قعدنا نستناو بصح عيني وعقلي كانو يحوسو على رمضان وينو ماشفتوش وماجاش حتا بديت نتوتر خايفة يكون تراجع على قرارو وحاب يخليني معلقة معاه زكارة وحتا بابا قال لخويا بالاك بطل ماش راح يطلق _رجعلو زوهير مادابيا بابا بصح ادا تراجع على قراراو هكدا خالدة راح تدخل .... _سكتنا ماش وقت هادي الهدرة _سكتو ومافهمتش واش كانو حابين يهدرو وسكتو__ ستنينا وكل مرة دمعتي تغلبني غايضتني روحي _بعد ساعات باه شفتو جاء دخل مع محمود ديراكت قلبي رجع يضرب فالالف والفشلة حكمتني من رجليا سيرتو كيشفتو مكستم وحاجة فيه متغيرة بالاك كيحفف جديد برك بانلي مبدل _شافو مع بعضهم وناضو عندهم راحو هدرو معاهم شوي وشفتو حاء جيهتي وبابا هززلي براسو تاع يعني هدري معاه (حاجة حيرتني كيفاه حتا خلاوه يقرب مني ويهدر معايا ) .قعد بجنبي ولاح سلام وانا ولا رد مني _خالدة تعرفي هادي لبلاصة دخلتها من قبل واليوم نتي راح يصرا فيك كيما ليصرا فيها هيا _قصدك طليقتك _ايه حتا هيا جاتني لدار الشرع متأنقة ومتزية كما نتي ليوم بصح انا بلا تردد طلقتها بكل إصرار وسبحان الله نفس الشيئ راح ييصرا ليوم وكل الماضي تاعي متعلق بالحاضر وبيك وبهشام وبإنتقامي انا ليوم حاس نفسي منتصر من كل جيهة حتا طليقتي وجبتلها ثارها منو منك نتي وحطيتك في نفس الموقف والعار ليكانت فيه هيا وليومنا هادا راهي عايشة فالذكرى تاعي وتاع هشام _اااه انعم واش دخل طليقتك ثاني في خويا وفيا وعلاه حتا ليوم جاي تخبرلي عليها _اولا مانقدرش نقول واش دار خوك بالتفصيل باسكو لحكاية معقدة وثانيا ختك نجوى ليها دخل وحبيت نقولك قبل عرسنا هيا شوهت صورتك ليا وشوهتها بطريقة مباشرة _تكدب ختي ماتخرج ماتهدر معاك وخلينا من سيرتها وفهمني واش دار خويا مع طليقتك _اسمها جميلة هادي الطفلة حبها قلبي كنت نشوفها كييف لقمر في حياتي بصح ماكنتش نعرف الماضي تاعها كيحبيت نخطبها كامل جاو ضدي ورفضو باسكو خوك دارها فضيحة بكري كيف مادرتلك أنا _وقتاه وهو جامي تزوج _يجي نهار وتفهمي المهم جميلة كيحبيتها ماهمنيش في ماضيها و درت رايي ومدوهالي بصح المكتوب فض بيناتنا في فترة قصيرة وطلقتها وهيا مرضت بإكتآب حااد ووصلت للموت برك ساعتها ماوصلتش وبقاو دعاويها يمشو معايا في حياتي بصح جامي ننسالها الخيانة ليدارتهالي وهيا بنفسها طلبت طلب مني قبل عرسي بيك وحكاتلي امور تجهل لعقل وانا ماقدرتش نرفض طلب تاعها _وهاد الطلب ضدي انا ؟؟ _ايه ضدك وأنا وافقتها الرأي وريحتلها بالها _يعني كلشي درتو على جال باه ترضي طليقتك وتاخدلها ثارها مني انا _ايه باه نرضي طليقتي وغروري وكرامتي ونرضي نفسي بحد ذاتي .والناس وقلبي ومشاعري آخر همي_ يعني رضيتها هيا باه انا نتظلم وزيد تقولي نحبك ومانعرف واش !! نتا المرة هادي صح برهنتلي بلي تكرهني كنت نخمم من قبل نقول رمضان حاقد برك وحاب يننقم ويبرد قلبو وانتقامو غلب مشاعر حبو ليا و وانا هيا الطعم تاعو باه ياخد ثار خوه بصح بينتلي بكلامك ليوم بلي صح تكرهني وكره كبير واستغليتني .
قريتي ديري جام
الحلقة 15
بقلم لينا صبرينة
غالطة انا الحقد غالبني والحب حبيتك وهو يجي مرة فالعمر بصح ماننكرش حتا طليقتي مازالت في بالي وكنت منمنيي نتي تمحيها من ذاكرتي بصح الضروف كانت عكس وانا درك كسرتكم نتوما لزوج وخليت روحي عزيز وعالي ومنتصر وباه نكسركم ونحطم آمالكم فيا وننساكم نتوما الزوج ومانبقاش نعدب في روحي بتخمام فيكم هاد ليام تقدمت خطوة في حياتي وكبيرة وتزوجت يعني رجعت عندك ضرة ونتي مازلتي مرتي قانونيا جات ليتدي بلاصتك _بقيت نشوف معاه مصدومة درت كل الاحتمالات في راسي الا باه يقولي تزوجت مادرتلهاش حساب .هبطت راسي وبقيت نسمع _خالدة انا لبارح هزيت الفاتحة معاها وليوم خرجت مرتي عروسة من دارهم في عز النهار ودرتلها كورتاج بالشان وكل الناس شافتني باه ماتقوليش راني نكدب كل الدوار حتا الكورتاج فات على داركم وتمنيت تكوني حاضرة باه تشوفي بعينك بصح سمعت بلي خرجتو بكري وباباك دار حسابو باسكو يعرف بلي تزوجت ونتي درك مستحييل حاليا راني قلت حاليا مستحييل نرجع نتزوجك لا نتي تقبلي ضرة لا هيا تقبل ضرة وماكالاه تحاوليني باه نسترك خلاص انا انتقمت وخلصت مهمتي وشبعت غليلي بصح ياخسارة خوك وباباك مافيهمش ريحة رجال ماوقفو معاك ماكانو سند ليك حابين غير يرموك عليا بالرخيس عليها قتلك راح تبقاي متفكرتيني وراح نكون عقدة ليك طول حياتك وادا ليك نصيب معايا راح نرجع نديك_وقف وراح وانا عينيا فالأرض يهبطو منهم دموع الدمار وراسي نحسو في دوامة كببيرة يدور مافطنت مع روحي غير كيهززني بابا بيدو على كتفي_ علاه ماقبلتيش ترجعي علاه صممتي على طلاق نتي حابة نقتلوك _شكون ليقال هكدا _رمضان قال قلتلها بلي تزوجت وادا تحبي نرجع نتزوجك بصح تعيشي مع ضرة ونتي رفضتي وحبيتي تطلقي _جاتني حالة ادراك ونطقت .ايه طلاق ارحم اني نعيش مع انسان كما هادا _ختي تروحي لدار نشويك تعرفي كييفاه نشويك هو مدلك آخر فرصة ونتي زدتي خربتيها _عيب عليكم ترمو فيا للاهانة والذل ربي يحاسبكم عليها وهادا الانسان مريض في عقلو ماهوش طبيعي_كون ماجيتيش هنا قدام الناس كون قطعتلك لسانك يارخيسة الله ياخدك ونتهناو من عارك _زوهير اسكت وتهدن ماش بلاصة لحساب ___وصلت دالتنا ودخلنا لقاعة صغيرة سقساونا شوي اسئلة ووافقنا على طلاق وانا راسي ماهزيتوش ماقدرتش نزيد نشوف معاه _خرجت من تم مدمرة انسانة مغلوب من أمرها حتا سمعت بابا عيطلو قالو ارواح _خير اهدر واش عندك مرتي تستنا فيا اليوم عرسي كما علابالك ورايحين فواياج _شوف خوك محمود قالي هدرة قبيل ونعطيك آخر فرصة سمانة مانزيدكش _ههههه اوك بصح ماعليش نهدر معاها كلمة وحدنا _نطق زوهير .صيبو طلقتو ماعندكش هدرة معاها _زوهير ولدي خليه انا علابالي _هوما بعدو ركبو فالباشي وخوه هبط وهو نطق وتحرش بيا بيدو على يدي زربت بعدتها وشفت معاه _باباك مازال يبيع فيك ليا مسكين يبقى أب خايف على بنتو تبقى هجالة وخايف على وليدو يرجع قتال_ألزم حدك معايا ولا قسما بالله انا لي نقتلك بركات اهانة خاف ربي _ دموعك رخسية بصح لي في هاديك طونبيل هيا الغالية ومرتي لعزيزة ودرك رجعتي طليقتي وللمرة ثانية في هادي لبلاصة راح نكرر كلمة قلتها من زمان لجميلة وهاد المرة نقولها ليك نتي سامحيني خالدة ماش بيدي وراح تبقاي ديما متفكرة رمضان وتبقاي عايشة بذكرى رمضان وثارو ليرسختهم في عقلك انا ليدمرتك وانا ليقتلت روحك وقلبك وبصحتكم لفضيحة والرخس_حط نواضرو في عينيه وراح للطونوبيل شفت مرتو كيخرجت لابسة لونسوبل أبيض وسلمت عليه وتضحك وهو يشوف ليا ركبها وركب وراح يكلاكسوني فرحان وزاهي وخلاني وراه جثة بلا روح دموعي يحكو على الغدرة والخدلان والخيبة والانكسار العاطفي ليتعرضتلو اليوم _جاء خويا ركبني وسقساني واش كان يهدر قلتلهم رخسني برك واش كنتو تستناو منو _شفت يابابا قتلك ماتصدقوش الكللب الطحان لي في بالك مانضنش يديرو محمود برك يخرط علينا باه انا مانديرلو والو _بقاو يحكو وانا حطيت راس على الكارو وبالي رااح لبعيييد سافر في عالم خلاف غير دموعي يهدرو وحدهم ونعاتب في هشام خويا هو ليدمرلي حياتي بعد موتو كلشي طاح فيا وحتا ولقطة كيشفتو مع مرتو وهو فرحان ماحبتش تروح من بالي عرفتو دارها مكرة فيا باه يعدبني ويمرضني من وقتاه الكورتاج يكون صباح عارفة دار هكدا وختار هادا نهار بالدات وتزوج وجابها هنا غير باه يقهرني ووصل لمبتغاه وكيلو ربي.
الحلقة 16
بقلم لينا صبرينة
_وصلنا لدار شفت نساء دوار يشوفو معانا ويهدرو عليا ويقول تزوج قبل لا يطلقها ويلوحو في كلام عليا يجرح .دخلت لدار تلمو علينا يما وعماتي ونجوى حتا جدي شفتو حاضر وانا ديراكت الدار دارت بيا وجسمي حسيتو ماء بارد وصبوه عليا وحكمتني رجفة والكل يسقسي ويهدرو فالموضوع نفسو وانا رجعت مانشوفش قدامي ديراكت طحت على ركايبي وهزيت عيطة وصوغت بألى صوتي حتا النفس قريب تقطع عليا جاني انهيار عصبي نصوغ ونعيط نبكي ونخبش وجهي كانو دقايق عداب وقهر نفسي وساعات وانا نرجف وننهج وصورة رمضان ماراحتش من عينيا وكلامو يتعاود في وذني كنت راح نهبل حاجة فيا راهي تعدب فيا ماتصورتش روحي تصرالي هكدا حالتي غير ربي لكان عالم بيها كييفاه كانت كيشغل كل الضغوطات والمعانات النفسية والجسدية ليفاتت عليا وليصرا ليوم خلاص القطرة ليبقات هبطت وفيضت الكاس ودخلتي في حالة تبكي لحجر .ليوم فات عليا صعيب كانت فيه كسر روح بريئة ودمار شامل ومنو راح يخلق قلب جديد فيه حقد بصح المكتوب غالب وما بيدي حيلة .
القصة في صفحتي على فيسبوك (قصص لينا صبرينة Lina sabrina )
