#غليل_الثأر
الحلقة 2
بقلم Lina sabrina
#توضيح ::خالدة وهشام وزوهير خاوة
رمضان وسليمان ومجاهد وعندهم الأخ الأكبر اسمو محمود خاوة وبلا خواتاتهم لبنات //وهشام وسليمان هوما ليماتو .نكملو قصتنا.
______قعدت على الكرسي وكلشي فيا رجع يرجف وعيني مارمشت بقيت غير نشوف كيفاه تلاح عليه زوهير بالضرب وكملو عليه ولاد عمي وعمتي خلاوه غارق في دمو والناس الحاضرة كل واحد كيفاه راه يهدر ونسمع غير فالكلام العاطل سيرتو من فاميلتو وفيساع زادو تلمو الرجال من فاميلتي فالصالة وفكوه منهم وخوه لكبير رجع يقولهم راح تقتلوه بلعقل عليه اصبرو نفهمو عليه راه يقول بلي عينو شافت علاه حطيتو اللوم كلو عليه سقسو بنتكم واش دايرا وراء ضهركم موحال خويا يهدر هكدا من روحو سور كاينة وشاف كاش حاجة _بنتي ربيتها تصون شرفي اكيد واثق فيها بصح وليدكم ليراه يقدف في شرفها ويهدر عليها بالعاطل_هز روحو رمضان ومسح الدم ليعلى فمو _خالدة فالاول كنت شايفها ملايكة هابطة من سماء عليها خطبتها بصح درك بدلت رايي باسكو الله غالب غرني الشيطان وتقربت منها كي كانت تروح عند جدها كانت تغفل الكل وتجيني والشيطان لعب بيا بصح لقيتها ماش عذراء وهيا حبت تديرلي فيها دراما وتلم عليا الغاشي هاديك دقيقة وتحصل فيا وتفضحني بصح سكتها بلي نسترها مي بعد تخمام طويل بطلت مانقدرش نستر بنت حرام وندخلها لداري _هنا ديراكت فقت لروحي ووقفت ونخبط بوجهي بيديا ليفيهم الحنة .كذااب والله كداب يابابا ماتصدقوهش كلامو كامل كدب وخرطي جامي درت حاجة تغضب ربي ولا تهبط راسكم انا بنتك وتربيتك وتعرفني كيفاه وهادا راه يكدب _علاه نكدب كنتي تجيني ونتلاقاو وواحد مايعلم حتا تلاقينا قبل عام انا ونتي نعرفو بعضنا من نهار هشام تضارب مع هاداك الحبايسي وادا تتفكر يازوهير راك جيت وشفتها معايا اتفكر _هاديك كانت أول مرة نشوفك فيها واش دخلها فالموضوع هشام كان يضارب ونتا فتحتلي طريق باه نفوت برك _ماتقاطعينيييش كيكونو رجال يهدرو نساء يسكتو وباه يكون في علمكم في نفس نهار هاداك قبل لا تروح تعمر الماء تلاقيتها خارجا من الكوروار ليبين داركم ودار الجيران وكانت مع راجل بصح ماعرفتوش باسكو خرج من الجيهة ثانية شفت غير ظهرو _يااالكداب هاداك الانسان هو .....(فقت مع روحي وشفت في نجوى موسعتلي عينيها وليت سكت ) _خالدة كملي كلامك شكون راجل ليكنتي معاه وعلاه تتلاقايه في هاديك لبلاصة _هنا تحتمت نطق مجاهد وبدلهم الموضوع _عمي خلو حتا نتهدنو كامل ونهدرو درك كل واحد راه يقدف في خوه وراح نخرجو منها خاسرين بلا فايدة _ادا ماش مستوعب خوك راه يقدف في شرف بنتي وفي عرضي واش من تهدينة تهدر عليها حتا خوك محمود وواقف معاه وخوكم من الدار ماش خارج حتا يقول الحقيقة والصح وبلا كدب للناس الكامل الحاضرة _راح ليه خوه محمود قالو خويا رمضان ادا راك تكدب بلا مبالغة تعيش هاد الموضوع واعر وحساس _نتوما يلزم تصدقو بلي هادي طفلة ماهيش بريئة وحتا عايلتها نقولهالكم من التالي ناس بلا شرف يبيعو بناتهم ويدخلو عليهم رجال والمقابل الدراهم وخالدة منهم وانا غلطت معاها وشفت بعيني وكانت حابة نسترها _هنا الكل تصدم من كلامو وبابا تهجم عليه ضربو بصح خاوتو بعدوه وقالولو درك نفروها (كانو خايفين أكثر من زوهير وولاد فاميلتي باسكو وصل الموس لعظم وراح يخرج من ميت ) _قالهم محمود خلاااص لقيت الحل خالدة مادام رمضان متأكد من كلامو نسترو بنتكم نتا برك يا عمي أقبل ورمضان حنا نقنعوه _بابا هادي اهانة ليا وليك ماتقبلش ماتقتلنيش بالحياة انا بنتك وتربيتك راه يكدب _ نطق رمضان .انا نقول للناس الحاضرة كاملة ادا ماصدقتوش كلامي ومادام صرات بيناتنا خلوة من قبل وتعتبر مرتي شرعا درك نرجعها على عصمتي وندخلها للشمبرة ونمدلكم الدليل على كلامي بلي مافيهاش ريحة الشرف (طريقة بكري راجل يدخل ويخرج من شمبرة في دقيقتو يكون فراها مع مرتو ) بصح ويكون في علمكم راح نرجع نطلقها من جديد انا بنتكم تبقى غير هيا مانبقاش معاها وادا حتمتوها عليا كتر من ليلة قسما بالله غير انا نقتلها بيدي وندفنها وعندي السبب وهو الشرف ماكانش حاجة اكبر من الشرف_نطق محمود .ماتخممش عمي انا خوه لكبير وأكيد يسمعلي وراح يقنع وادا تحبو يعاود يفتح عليها ويديها لدارو ووعد مني ماش راح يطلقها ويرجعها لهنا باشكو رمضان على حستب كلامو غلط مع بنتكم وخلصت لحكاية وفات الحال فيلزم تقبل بواش نهدر .
قريتي ديري جام
الحلقة 3
بقلم لينا صبرينة
كداب نتا انسان ماتخافش ربي واش تسال من عندنا حتا راك تقدف فينا بهاد لكلام وتشوه في صمعتنا بابا ماتقبلش وماتصدقش لواش يهدرو وهو راه غير يكدب صح موالفة نتلاقاه بصح برا قدام ربي وعبادو جامي كنت معاه في خلوة قبل مانخاف منك نخاف من ربي ورمضان راه نيتو حاجة خلاف انا والله مادرتها خاطيني واذا قبلت راح تكون اهانية ليا وليك بشكل مباشر .(هنا بابا وخويا حسيتهم كانو حابين يضربوني ويهرسوني برك حاكمين رواحهم قدام الناس باه مايثبثوش عليا التهمة كتر) جات تنطق يما سكتها بابا وقالهم بنتي واثق فيها ونديها لطببية وتبينلكم بلي هيا بنت أصل وصاينة شرفي ونتا ممنوع تقربلها ولا تدخل لدارك _زاد نطق خويا .شكون ليخليه يزيد يقربلها قبل لايزيد يخزر فيها ولا ينطق بكلمة الموس ليوم نمشيه في رقبتو _لقينا خويا خرج من صالة باين كاش ماراح يدير مصيبة ومحمود ومجاهد جراو لرمضان قالولو روح اجري اهرب ماعندنا مانديرولك درك خلي ومبعد يهدنو ونلقاو حل _هو بقى مصمر ويشوف ليا حتا دخل خويا في يدو موس كبير كيشفناه تفجعنا ويما بدات تصوغ عليه وبابا جرى لعندو قالو ماش وقت دير جريمة فيه اسمعني وحط عقلك في راسك (حسيتهم يهدرو بعينيهم وفي راسهم تخمام) .راحو ليه ولاد عمي باه يحكموه يخرجوه ماخلاهمش قالهم واحد مايمسني نعرف نيتكم مجاهد روح شوف ولد عمنا يجيب طونوبيل قدام الدار راني فاهم بلي ضربة جايتني منهم على الظهر ماندييرش الثقة باسكو رجعنا كينهدرو الحقيقة يجبدو بينا الموس _مجاهد راح خرج وخويا بقى غير يسب فيه ويتحلف ورمضان مستهزء بيه حتا دخل مجاهد قالو امشي نخرجك _ قبل لا نروح نقول لجميع حاضر هادي طفلة ولو تدوها لطبيبة ولا يجو 10 قابلات يشوفوها وتخرج عذراء افهمو بلي يكدبو وغطاو على بنتهم باسكو الصح كلو راه عندي خالدة باعت شرفها وسودتلكم وجوهكم وهبطتلكم راسكم نتوما عايلة تاع الرخس طفلة لولا مبطلين عليها باينة كاش مادارت كيفها بعد باسكو زينها نورمالمو ألف واحد يتمناها ماتدخلش لعقل شكون هاد راجل ليبطل عليها ويسمح فيها الأمر واضح وزيد بنتكم الثانية رجعت مطلقة وراكم عارفين السبب نتوما ليناسبكم ويتقرب منكم يعرف قيمتكم المنحطة ليفيها غير لوساخة بلا ماندكرو ليراه تحت القبر _هنا كانت راح تتخلط بصح حكمو زوهير باسكو كان راح يدير جريمة فيه ويعشي مباصي ومجاهد خرج رمضان بالزور لبرا وبابا خرج لافامي كامل والجيران برا بقاو غير الأقربون من جيهة يما ومن جيهة بابا وجدي طول الوقت قاعد مشوكي ويسمع برك حتا داوه لدارو _غلقو الباب بعد ماراحو وكما توقعت زوهير وبابا حاولو يخرجو مني كلام وافعال انا خاطيني منهم كيبقيت نقول خاطيني وندافع على روحي طاحو عليا ضرب هرسوني ودقدقو لحمي بالركل والكفوف وكملو عليا بالسانتورة ولافامي حاولو يجبدوهم عليا مي ماش سامعينهم بصح انا جرحي كان كبير واغمق كتر من هاد الضرب المبرح وليتوجع كثر بابا بعد ماكمل معايا دخل يما لشمبرة وعطاها طريحة واعرة بالعصا وحط عليها كل اللوم كيكانت تديني معاها لدار جدي وكيفتحو الباب لقينا يما مسكينة بابا كسرلها يدها بلا رحمة حتا داوها لعيادة قريبة باسكو كانت تعيط من الوجاعة وانا حبسوني فالبيت ونسمع فيهم يهدرو مع نجوى وهيا تقول أنا خاطيني فيها ماشفتها ماسمعتها مانعرف والو__فات يوم عمري ماراح ننساه دموعي مانشفوش وكل دمعة تحكي على أوجاعها .فليل نسمع في عمتي تقولهم فتحولها خلي تاكل راهي بالجوع بصح بابا قالهم خلوها لتم فالظلام محبوسة مذلولة بالاك تتفكر حاجة دارتها بهدلت بينا ومسحت بينا الدوار بالفضايح الله لا تربحها سور كاينة حاجة دارتها حتا رمضان خرج فيها وفينا هاد لكدوبات .عماتي الزوج كانو تاني يدعو عليا غير أم نصيرة لي دايما حنينة بصح عمتي لي عايشة معانا وعمتي لكبيرة وكيلهم ربي باه يهدنو الأوضاع نسمع فيهم يحرضو فيه عليا وعلى يما لي ماش عارفة كيفاه حالتها درك .هاديك ليلة بقيت غير نتفكر ونستوعب في رمضان من اول دقيقة شفتو فيها لليوم مالقيت حتا غلطة درتها معاه ولا مع غيرو بصح علاه قدف في شرفي ودار معايا هادي لفضيحة راسي رجع يسطر لدرجة ماقدرتش نركز وغلبني رقاد __لغدوا فتحولي الباب ومعايا عمتي صغييرة عساسة غسلتلي وتسب فيا هيا يلزم نكونو كما هيا ماجاهاش مكتوبها يعني كون صابت حتا حنا مانتزوحو مانندبو حسيتها راهي تنتقم مني عندها حقد يمشي في عروقها مع الناس كامل __لبست وداوني لمدينة لطبيبة كان معايا بابا وزوهير وعماتي _دخلت حسيت روحي محكوم عليا اعدام وراح نطلع للمقصلة .
الحلقة 4
بقلم لينا صبرينة
شافتني طبيبة وعماتي واقفين على راسي وأنا حاسة نفسي راح يتقطع عليا نتنفس بصعوبة مع رجفة حكمتني. كي كملت قالت طفلة راهي صبية عدراء مبروك عليك بنتي _هنا في طوع نفرح زدت بكيت وجاني انهيار عصبي حتا دخل عندي بابا وضربني زوح كفوف كان حاسبني صح بلي فقدت شرفي حتا خبروه عماتي .بصح طبيبة ماخلات مابقات فيه دارتو دروس ومواعيض على واش دار باسكو لحمي ووجهي باين عليه علامات الضرب__رجعوني لدار واخيرا شفت يما مربوط يدها رجعت نبوس فيها ونطلب فالسماح وهيا تبكي معايا _رحت للبيت نحي قشي دخلت نجوى وسكرت الباب _اسمعي وشبيكي لبارح قريب فضحتيني هبلتي _تباني نتي لي هبلتي انا وين ونتي وين جايا درك تحاسبي فيا على هادي النقطة.ادا ماكيش عارفة راني قريب وتدفنت حية وراني درك كيف الجثة الهامدة ونتي تهدريلي على مصلحتك _بصح ماش تزيدي تفضحيني معاك نتي بزاف _باه يكون في علمك انا حياتي دمرت وحتا نتي حياتك راحت معايا ووالدينا وخويا واسمنا رجع فالارض كبري عقلك شوي _وحتا واش دخلنا فيك أصلا مادام طبيبة شافتك وقالت بلي راكي عدراء تخلاص الحكاية _في منامك تخلاص درك واحد مايصدق لا ورقة لا طببيبة لا قابلة رمضان فضها عليا هدر كلام كببير وواعر مستحيل يصدقوني ويصدقو دارنا درك راح يصدقوه هو ويصدقوهم هوما نبقاو حنا عايلة القلاليل وهوما المقاقم فهمتي _واش من مقاقم عايشين في دار قريب تريب عليهم _بصح بالنسبة لينا حنا هوما عايشين في قصر عليها قتلك الناس يتبعو المظاهر والإسم اكثر وراكي تعرفي عقلية دوارها كيف دايرة _خالدة قوليلي رمضان علاه دار هكدا _ديراكت نزلو دموعي وقعدت فاالأرض وبديت نندب ماعلابليش علاه ماش عارفة وااله ماضريتو ولا ظلمتو يوم علاه دار فيا هكدا ماش فاهمة _دخلت خالتي وبناتها وبقات تمسح على راسي وتركح فيا قاتلي بربي مايكون غير الخير برك ادعو خوكم مايتهورش باسكو كون يلقاه سور يقتلو _علاه رمضان وينو ؟_ لبارح كيخرج ديراكت طونوبيل داتو من تم مابانش وزوهير راه شاعل وزاد شعل معاه ولاد عمك راهم متحلفين فيه الحكاية هادي ان شاءالله تخرجو منها على خير _ودعتني بيها ببناتها ووراحو وحتا عمتي ونصيرة راحو بقات غير لكبيرة فدار __هاديك ليلة بعد سمعت صوت برا يعط بإسمي عرفتو رمضان بصح صوتو جاني شغل سكران كان ثقيل فالهدرة_خاااالدة خااالدة نبغييييك نحبك خااالدة ارواحي لعندي نسيني فيها وفي خويا راكي سكنتيلي في قلبي سامحيني خااالدة _ديراكت سمعتهم كامل فطنو بيه خرجو بصح مالقاوهش وزوهير رجع يسب بالمقلوب وراح حتا لدارهم ومالقاهش باين عليه مخبي في كاش دار من صحابو _كيزدت حكمت بلاصتي جاتني حالة إدراك تفكرت كي همسلي لبارح في وذني وقالي هشام كحل لقلوب وزيد درك قالي نسيني في خويا .قلبي سوطا من بلاصتو يعني حاط اللوم على هشام في موت خوه سليمان عليها رجع حاقد عليا وعلى دارنا يعني حاب ينتقم بصح كيفاه ينتقم ياك حتا خويا ومات مع خوه ماقدرتش لا نفهم اسئلتني لا توقعاتي __لغدوا بابا وزوهير دخلو لدار بصح وجوهم مايطمنوش .دخلو ديراكت لشمبرة زوهير وغلقو على رواحهم ونسمعو غير فالتقرقيب والهدرة ماش واضحة وكييخرجو شفنا هاديك شمبرة مقلبة حاجة مافي بلاصتها سقساتهم عمتي ماحبوش يردو وخرجو للحوش نسمعو فيهم جابو سيرة هشام .قدمت لينا نجوى قالتنا دخلو لداخل علاه راكم تتسمعو هدرة رجال حنا واش دخلنا نخاف منهم يشوفونا ها يهجمو علينا بالطرايح _نطقت عمتي .ايه مايعيا كلشي يبان برك خالدة دخلي فرزي الخرابة هادي تاع شمرة _رجعتلها نجوى لالا خليها ترتاح وانا نفرزها __رحت قعدت وشوي و جات نصيرة تلوح فلكلام عليا .اسمعي درك رمضان صيبو طلقك شرعا بقا غير يطلقك فالمحكمة وراجل مايزيد يقرب منك علابالك بيها هادي وحتا ختك راهت فالهاوية _الحياة ماش غير راجل مايهمني لا فيه لا في غيرو _مممم قصدك غيرو ليكان يبعتلك براوات هاداك صيييبو نساك ياختي مابقالو ووجود والدليل عندو زمان مازاد بعتلك والو _نتوما في راسكم لحجر شوفو انا واش نخمم ونتوما وين تخمو _هزيت روحي ورحت للحوش نقعد وحدي شوي ولقيت زوهير شحوطني بالطباط لراسي نضت وبدا يعيط ويسب فيا وكمل عليا في وسط الدار بالضرب حتا تعب باه طلقني ويما بيد وحدة ماقدرتلوش ونجوى في هادو الامور ماتدخلش روحها بيها بعمتي صغيرة.
قريتي ديري جام
الحلقة 5
بقلم لينا صبرينة
فاتو يامات جحيم ورعب عايشة فيه فالدار ورمضان كان قد كلامو رفع قضية ويوم طلاقنا تحدد وكان مرة على مرة يجي يلوح كلام ويعيط بإسمي ويهرب في نص الليل مافهمتش كيفاه راه يخمم ولا شكون راه يعاون فيه هنا فالدوار وأكيد رجع يسكن فالمدينة باه مايلقاوهش ودارنا كون يصيبو مايشوفوش وجهي ويما مسكينة تخاف من بابا بزاف لدرجة كيجا خالي وجدي ليه يحابسبوه واش دار فيها مي هيا وقفت مع راجلها ماش ضدو وهادا كامل على جالنا تحمل ونصبر مازلت نية بزاااف . والناس برا تلوح عليا فالهدرة ومرات يرمو علينا لحجر ويسبونا ويهربو وحتا يرمو علينا كلام ساقط وخامج والهدرة على قد ماهي تكبر وتزيد حتا خرجو فينا كلام كبير وماكانش منو وصلو حتا لشرف يما كيلقاو بابا كرسلها يدها زادو فيها بزاااف وبلا كلام رمضان وفاميلتو ليزادو الطين بلة وبابا رجع يتبهدل كيخرج ولو قالهم بلي شافتني طبيبة وبنتي شريفة بصح على حساب كلامو ماصدقوهش وبابا كلما يتضغط يجي لعندي يفرغ غشو يقولي نتي سباب نتي ويماك جبتولنا العار ودخلتوه لهادي الدار ولحياتنا كنتو تضلو يوميا برا سيرتو نتي كنتي تروحي تعمري بزاف الماء والناس حفظوك . نطقت ليه عمتي قاتلو نتوما رخفتولها السانتورة عطيتوها الحرية تستاهلو واش صاري فيكم بسبابها _سكتي نتي صوتك مانسمعوش اصلا هزي قشك نديك عند خويا درك نجوى ماهيش وحدها فالدار_علاه كنت معيشني عندك غير على صلاحك وعساسة على بنتك خليني نقولك ماراكش داير فيا مزية هادي دار بابا والبيت تاعي نبقى فيها كما نحب ماراك توكل ماتشرب فيا قايمة بروحي مالا خليني في حالي ومادخلش روحك فيا _خلاها وراح هو مايحبش يناقشها بزاف باسكو نقاش معاها يخليها تدخل في انهيار عصبي وترجع ماش في عقلها _خااالدة نوضي نوضي خملي الدار وديرينا واش ناكلو رهجتينا بفضايحك _دخلت للبيت وغلقت عليا الباب وخليتها تغلي وتخبط عليا فالباب بصح انا كنت غارقة في مصيبتي ورمضان ماقدرتش نخرجو من عقلي لاصورتو فارقت عينيا لا كلامو خرج من وذني .صدمتي عايشتها بأنفاس صعييبة __في ليلة نسمع في بابا وخويا فالحوش يهدرو مع بعض وزوهير يهدر قال نحكمو نقتلو ولا نباصيه في كاش حاجة أصلا ليلة ناوي على حاجة نرجعلهم بيها الضربة _ولدي يكفينا واش دار هشام المصيبة تاعو كببيرة فينا وباين ماش راح تتنسى ومنها بدينا نفهمو ردة فعلو والفضيحة ليحطها فينا وانا من الاول غالط كيمديتلو خالدة ووثقت فيه وفيهم مالا حتا نتا ماتزيدش تكبرها قتلك يلزم نجيبوه لتحت رجلينا ياولوكان من تحت الارض ونحتمو عليه يصحح غلطتو مع خالدة يتزوجها ويصححها معانا يلزم يسكتهم ويقول كلشي هدرو فينا كدب وغير اتهامات باطلة ويفهممهم السبب هكدا الناس تسكت على الاقل يتزوجها مدة قصيرة عليها قتلك يلزم نوصلو معاه لحل وسط باسكو ماكانش خلافو ليخرجنا من هادي الغرقة تاع العار رجعت برا مانقدرش نطلع راسي وكلشي ضدي _دييراكت خرجت عندهم .كيفاه حابين ترجعو تزوجوني لهاداك الانسان نتوما في عقلكم ؟؟_بلعي ودخلي لدار لا نهرس فمك _بصح بابا هاد الانسان قدف في شرفي وشرفك كييفاه تقبلو ترجعوني ليه انا مانقدرش نزيد نقابل وجهو ديرو اعتبار لقيمتكم وواجهو الناس من واش خايفين انا جامي نزيد نقابل هاداك الحيوان _تقاببليه بسيف عليك وهادي هدرة رجال نتي ويماك جبتولنا العار مالا تتحملو المسؤولية وتنفدي كلامي درك نلقاوه برك ونحكولو الحار في فكو وتشوفي كيفاه _ختي ادخلي باسكو وجهك يديرلي اعصار داخلي ادخليييي _دخلت وبقيت خايفة من كلامهم انا كون نصيب نبقى طول عمري محبوسة ولا يرجع يتزوجني _في نفس الليلة حنا راقدين سمعنا عياط رمضان وكان عياط غير عادي وهاد المرة يعيط بإسم زوهير _خرجنا من البيت لقيت بابا خرج من الصالة بصح زوهير ماكانش فدار تحتمت بابا لبس خرج وحدو لعندو وحنا خرجنا للسطحة نتفرجو .كانت ظلمة وغير ضوء طونوبيل تاعو ومنها شفنا رمضان متهول وحاكم بابا من القشابية ومحاصرو فالحيط ويسب ويعيط يقوللو وليدك ليوم نشرب من دمو وينو الخواف _دييراكت تهجمو عليه من وراه زوهير وولاد عمي حكموه وزوهير يضحك عليه قالو عارفينك تجي تجري كيتسمع براجل تقرب من ختك وهدر عليها بالعاطل _دخلوه لدار وحنا زربنا دخلنا وهوما حاكمينو كي لكبش خرجوه للحوش ربطوه وكما كانو حابين جابوه راكع عند رجليهم وبابا زاد فرغ غشو كامل وقتلو بالضرب ومامبا خمس دقايق جاو خاوتو محمود ومجاهد فالاول ماحبوش يفتحولهم الباب باه يدخلو بصح كيهددوهم يجيبولهم الجدارمية خافو وفتحولهم دخلووو راحو ديراكت عند خوهم مي ولاد عمي ماخلاوهمش يقربو وحتا زوهير كان في يدو موس كبير ومحمود قرب منو يحاول فيه باه مايتهورش وفي نفس الوقت قالو كون تدير حاجة ولاد عمي يشكو بيه وتباصي .
الحلقة 6
بقلم لينا صبرينة
تهدنو بصح خوه لكبير بقى قدام زوهير ومجاهد قدام خوه خايف من أي حركة سريعة من عند زوهير ورمضان كاين باين عليه الخوف_ رمضن خويا اسمع مني وارج تزوج بالطفلة وسكت الناس باسكو لا زوهير راح يسكت لا باباه لا فاميلهم ادا ماخممتش غي روحك خمم في خواتاتك _خواتاتي أمانة عندكم عارف خدش مايقيسهم مادامهم معاكم بصحح مانسمحلوش يبعت رجال يروحو لقدام الدار ويعيطو لبناتنا بأساميهم ويقولو عليهم ألفاظ رخيسة _كما رخست بختي وبينا درت هكدا لخواتاتك ويستاهفو _ماكانش أرخس كيفكم لزوج فاقدين شرفهم وتزوجو فيهم بطريقة تاع البيع والشراء وبلا ماندكر خوكم واش دتر قليل الشرف والتربية درك راه عند مولاه يتعدب في نار جهنم _(كامل شفنا في بعضنا واش دخل هشام واش حكايتو مع رمضان حتا حاقد عليه ) _نطق مجاهد .علاه واش مدخل هشام قولي واش صاري _اسمه خويا هشام ماتجبدش سيرتو درك باسكو ررانا في موضوع ختي _ختك اضربها اقتلها ادفنها مايهمنيش بوحدة هجالة _كان راح يقدم ليه وحكمو محمود ويترجى فيه يصبر _والله العظيم ماني حابس ياإما ندبحو قدام عينيكم يايرجع يصحح غلطتو _اديها من عندي ومن تالي خالدة ماش راح نتزوجها وكلشي درتو تستاهلوه ياولوكان الثمن تقتلني ماش راح نسترها_مالا اترحم على روحك _ زرب عاود محمود حكم زوهير ويحاول ييهدن فيه ويقولو اصبر نلقاولها حل وسط لقتيلة ماتدي ماتجيب وتتفرها غير في والديك قلوبهم يزيدو يتحرقو عليك وحنا نزيدو نخسرو خونا الثاني ونتا حياتك تضيع فالحبس أكيد ماش راح نسكتو عليها مالا حط عقلك في راسك__ وبعد مناوشات بالكلام زوهير نطق _ادا حابين خوكم مانقتلوش يا يصحح غلطتو ولا تعطوني بنتكم نتزوجها باه نسكتو الناس اكيد كيشوفونا ناسبانكم يفهمو بلي كلشي خرجتو فينا كدب وفي نفس الوقت خاوتك يوقفو معانا _نطق رمضان وهو يضحك وعيط عليا .خاااالدة خااالدة ارواحي تسمعي خوك راه يقارن فيك بختي الشريفة العفيغة ليماتعرفش الضوء تاع برا _كيقال هكدا جرحي زاد غمق كتر وكتر وخويا هبل في عقلو وهاد لهبال كنت انا ضحية فيه __من هاديك دقيقة كبرت لحكاية والموس تقاس بيه رمضان وتجرح ودمو رجع يجري فااحوش هنا خاوتو خافو عليه ورجعو غير يهددو وبابا أكيد خاف على زوهير وقالهم ادوه وروحو بصح ردو بالكم تشكيو بيه هاد المرة انا لي مانسكتش ونرجع ضربتي أضعاف_نطق زوهيير .وغيركم خمو في كلامي ياتعطوني بنتكم يترجعو خالدة قيمتها وترجولنا قيمتنا _هزوه وخرجو شفنا بزاف رجال مجمعين باين من فاميلتهم ___ لغدوا صباح بكري سمعت يما مع بابا فالكوزينة يفطرو ويحكو وانا كنت فاطنة سمعتهم من بلاصتي قاتلو يما مدهالو وخلاص راجل متربي ومادام طلبها وهيا في وسط هادي لفضيحة يعني نيتو صافية وحاب يسترها _لا لا مافيهش لامان وبناتي درك كينزوجهم يلزم كيخرجو من الدار هادي مايرجعوش لعندي مانقبلهم مطلقين ولا أرامل يلزم نزوجهم براجل قادر على شقاه ويتحمل المسؤولية حتا نهار ربي يدي أمانتهم درك بناتي مانقبلهمش يرجعو لعندي يكفيني واش جاني منهم _(ربي يهديه بصح ماكنتش فاهمة تفكيرو الحقيقي ورراح يجي نهار ونفهمو ) _ مور الظهر جاء ليا بابا قالي نوضي لبسي هيا نديك لطبيبة _علاه ترجعني ليها _راني برا نستنا _شفت مع يما قاتلي نوضي بنتي ديريلو رايو وكما يقول نفديلو كلامو ماعندك واش ديري _يما ادا نتي تقبلي بالسكوت وماتحبش تدافعي على روحك فأنا ماش كما نتي ديجا ياريت الموت تديني كرهت هادي لمعيشة __كنت نلبس دخلت نجوى وحسيتها مقلقة وتايهة _وشبيكي كاش ماصرا _لالا برك هاد ليام رجعت نشوف مجاهد بزاف _تواحشتي ياماتك معاه _هاد ليام شبعت رخس منو وبزااف ثاني وكلامو وجعني _وقتاه تلاقيتيه وكييفاه قدرتي.
الحلقة 7
بقلم لينا صبرينة
قدرت وخلاص وعرفتو هاز عليا حقد كبير _وقتاه تلاقيتيه فهميني _ليام ليقبل عرسك شفتو برا وانا لقيت فرصة وخرجت لعندو وهدرنا _ردي بالك تزيدي تخرجي ليفينا يكفينا اصلا بيك زدت تفضحت _عومي بحرك واش دخلني في فضيحتك انا بزيني نجيب عشرة رجال راكعين عندي _شنفت عليها وخرجت تتاخد بيها بعقليتها وبتخمامها _لقيتو يستنا فيا فالباشي ومع زوهير يسوق .ركبت ورحنا داوني لبلاصة خالية وقارا جاء في بالي ليوم نهاري وراح يقتلوني ويدفنوني نشوف معاهم وخايفة حتا نطق بابا _خالدة جبناك هنا باه واحد مايسمعنا فالدار رانا لقينا الحل باه الفضيحة هادي نديرولها حل مانقدروش نبقاو عايشين في وسط العار وفي نفس الوقت مانقدروش نسمحو فالدار وخدمتنا هنا فالدوار ونبعدو حنا ناس قيس رواحنا مانقدروش على معيشة المدينة _اهيه ويعني ؟!_حبيت نقولك بلي من ليام ليفاتو خممنا نروحو ونبعدو بصح مانقدروش يلزم نتعايشو على قد حالنا عليها جاء واحد وخطبك مني وقبلت ومور ماتطلقي نزوجك ليه _سكت بقيت غير نشوف ونسمع _خطبك مجاهد وراح تتزوجيه وبفم ساكت _اااه مجاهد خو رمضان و....._ايه ايه هو يلزم تتزوجي من واحد من خاوتو يلزم هادي العايلة تناسبنا باه الناس تسكت والثأر ليعند رمضان لينا نحبسوه .زوهير كان واضح كلامو يايمدونا بنتهم يارمضان يصحح غلطتو وكيبقى مخشن راسو مجاهد تقدم لينا وخطبك _يعني هو خاف على ختو تدخل لدارنا ونتوما ماخفتوش على بنتكم تدخل لدارهم ولا ماخفتوش يزيدو يعاودولي نفس سيناريو _درك ماعندنا علاه نخافو باسكو مالقيناش حل ومجاهد قنعت بكلامو وبالخصوص كييقال واحد مايسمع حتا نهار العرس يعني نهار تعقدي معاه هو نفس نهار عرسكم هاداك نهار العايلتين لزوج يسمعو ونحطوهم تحت الأمر الواقع ويدخلك لدارو وهاد لحكاية تبقى بيناتنا انا ونتي وخوك ومجاهد برك لا يماك لا ختك لاحتا واحد يسمع كلشي راح يصرا بالسر _علاه بالسر _باسكو رمضان راه غير ينبش ويحوس على سبايب هو قالهم كيطلقك راح يروح للخارج ومن الاحسن مانحكو لحتى واحد باه نتفاداو مشاكلو _ختي كما قالك بابا نتي تقولي ايه وخلاص باسكو عندنا خيارين برك والخيار الاول ولينفضلوه انو رمضان يقنعوه يستر عليك ويسترنا من العار بيلصقو فينا وإذا ماحبش ويطلقك ساعتها كاين الخيار الثاني هو مجاهد _لالا لزوج مانقدرش وشبيكم تقتلوني ولا نقبل بواش راكم تهدروه_ماش راح نقتلوك ماراناش عايشين في عصر الجاهلية بصح باه يكون في علمك الظغط يولد الانفجار كون ماتقبليش راني ندير جريمة في رمضان صح راني صابر ومتحمل بصح مانقروش نبقاو نسمعو فالناس يهدرو علينا وعلى شرفنا بهادي الطريقة كتر من هكدا _كما قالك خوك انا خسرت هشام ماش حاب نزيد نخسر الثاني وزوهير نعرفو بسباب الظغط ليعايشو قادر يدير مصيبة وكبيرة ثاني وساعتها لتم نتي تبقاي تلومي في روحك باسكو الحل بين يديك يلزم تقبلي وخلصت الهدرة اصلا متجبناكش نسمعو رايك جبناك باه نعلموك وتاخدي حدرك _بقيت نسمع فيهم وهوما يقنعو فيا وانا تخمامي كلو في رمضان مانقدرش نزيد نكون معاه وزيد كون يعرف بلي خوه حاب يتزوجني كيفاه يدير وحتا تخمامي راح عند نجوى كون تعرف بمجاهد كيفاه يكون ردة فعلها ومجاهد علاه خمم يتزوجني واش نيتو ؟ وكون نرفض خويا مصيرو الحبس ويبقى الانتقام يجري في دم العايلتين لزوج لقيتها منا تشوي ومنا تكوي بصح ماراحش نكون ضحية بعد الحقيقة ليراح نسمعها ونشوفها .
