الوصب

6

" تأخرتي ، صار لي ٣ ساعات انتظرك" قالت نجد بثقة و هي تمشي لعندي

"وش جابك هنا؟ زوجك يدري؟"  ما ردت علي  و هي تحدق بعيوني و وقفت عندي لين ما صار يفصل بينا الا القليل ، صرفت نظري لشفايفها اللي للان ما انسى طعمهم

"يارا بنتي ، اشوفك قابلتي خطيبة فيصل" ، دفتني نجد بعيد عنها بأنفاسها المتضاربة ، ايش؟

"خطيبة فيصل؟" قلت و عيوني على نجد اللي كانت تطالع في الارض تتهرب من نظراتي

"اي ، ما تشوفينها جميله كامله والكامل الله" قالت امي باعجاب واضح ، مو من جدها نجد بتجلطني والله

"انتِ وينك؟ عزيز قال انك بتجين من زمان ؟" قالت امي وهي تضمني لحضنها ، ابعدت عنها بعد ثواني و طبعت قبله على راسها

"تعرفين زحمة الرياض ، و فيه شرطي قفل الطريق" طلعت مني الكذبه بدون ما اشعر ، اعرف ان نجد تعطيني نظرات حاليًا

"طيب يالله ادخلي عن البرد و سلمي على الضيوف يبونك" قالت ثم دخلت جوا

"نقاشنا ما انتهى نجد" قلت بهمس بس هي اللي تسمعه وانا الحق امي

دخلت وانا بالي مو معي ، كيف نجد خطيبة فيصل مو هي تزوجت ؟ كيف كذا و نورة كانت تدري وما قالت لي ليه؟

وليه نجد بتتزوج فيصل وهي تدري انه ولد اخوي ، احتاج اجابات واضحة باسرع وقت ممكن

"و هذي يارا جت" قالت امي بفخر ، تنقلت عيوني بين الضيوف ادور وين نورة ، شفتها تطالعني بنظرات ندم و اسف ، ابتسمت للضيوف و مشيت اسلم عليهم كلهم ، العدد تقريبًا ٤٠ شخص مع زوجات اخواني و خواتي و الاحفاد

"ما شاءالله تبارك الله يا يارا احلويتي كثيرر" قالت عجوز ما اعرفها ، ابتسمت بتسليك و انا اهمس شكرًا

مشيت لعند نورة و جلست جنبها

"يار-"

"اوص ولا كلمه ، بتفاهم معك بعدين" نزلت راسها و اؤمات بتفهم

ما اعرف ليه يدي بدت ترجف، ما اعرف كيف اتصرف كل شيء صار فجأه، حسيت بيد نوره توضع على فخذي رفعت رأسي

"صار لها تكلمك من فترة" قالت وهي تأشر على المرأة اللي جالسة جنب امي ، قمت ورحت اجلس جنب امي من الجهة الثانية

"امريني" قلت لها وانا احط يدي فوق يد امي

"قبل شوي اسولف مع امك اقول ورا ما جت يارا للخطبة" ام نجد قالت بابتسامة

"والله الاشغال يا خاله " قلت وقلبي ينحرق ، ما كنت ابي اول لقاء بينا يكون كذا ، صح انا و نجد ما طولنا بالعلاقة كانت سنه ونص تقريبًا بس حسيت اني ابي اكمل ، و في النهاية طلعت الوحيدة اللي ماخذه الموضوع بشكل جدي