*******************************
الماضي الذي لا ينسى
The unforgettable past
*******************************
حلات عينيها وناضت شادة في عنق ديالها لي كيحرقها لقات راسها في بيت نعاس بتصميم عصري حوايجها مبدلين ناضت مخلوعة جيهت بالكون لي كان محلول واحد ستارة فيه كتمشي وتجي بسباب الهوا علات ديك تسارة وخرجات للبالكون وهي تصدم منظر بنيات بتصميم اندلسي اصيل وجميل وشارع نقي وزوين ناس كتمشى وناس صايگة طونوبيلاتها علات راسها لسمى وهي تصدم بان ليا علم إسبانيا حكات عينيها بصدمة اواه واش هي وصلت حتى لأروبا
جوديا جات وقفت من مورها وقالت : الجو هنا زوين اليوم
ضارت قافزة حيت تخلعت
ياسمين : كي كي درنا وصلنا لهنا
جوديا : عندي طرقي الخاصة زد على ذالك مغاديش نبقاو هنا بزاف
ياسمين : ولله ما بقيت فاهمة شي حاجة اروبا لي كنت باغيا نجي ليها بقرايتي وصلت ليها اليوم هاربة من بوليس
جوديا مجوبتهاش ضارت داخلة وقالت : اجي عتقي روحك وكولي شي حاجة
ضارت ياسمين تابعا جوديا وكضور راسها في مكان كان عظيم عظيم
خرجت من داك بيت نازلة لتحت تابعا جوديا وقالت : بغيت نسولك
جوديا : هضري
ياسمين : كتاجري في مخدرات
جوديا كانت غاديا ناحية كوزينة غير سمعتها شنو قالت وهي توقف ضارت عندها نص ضورة وقالت : لا
ياسمين : اذن كتبيعي البشر
لا
كتاجري في حشيش
لا
كتقتلي بنادم وتاخدي فلوس
لا
اذن نتي زعيمة شي مافيا بحال دكشي ديال مسلسلات
لا
ولكن كفاش منين جبتي هاد فلوس كلها باش توصليني هنا وتاخدي هاد بلاصة كبيرة وزوينة
جوديا جلست فوق طبلة ديال كوزينة محطوط عليها فطور وقالت : حتى شي حاجة من كاع دكشي لي قلتي ما صحيحة غير رتاحي
ياسمين جرات كرسي حتا هي وجلست وقالت : اذن شنو
جوديا : تزوجت واحد راجل شارف خانز فلوس منين مات ورتو في رزقو هاذا ما كان
ياسمين بقات حالة فمها بصدمة وقالت : ميمكنش عنداك تكوني قتلتيه
جوديا : واشنو بان ليك
ياسمين : ميمكنش
جوديا ضحكت وهادي اول مرة تشوفها ضاحكة وقالت : كولي لله يعطيك عقل كولي
حنات راسها على طبلة فيها مالذ وطاب من جبن فرماج زيتون خبز حتى من اتاي كاين شكلاط كرواصة وال اخره من فطور لي طاحت فيه الاخت عمية ياسمين كتاكل مكتعقل اما جوديا كتاكل غير بشوية عليها
سلاو فطور ناضت غسلات ياسمين يديها ومسحاتها
جوديا : سيري طلعي بيتك رتاحي اليوم مغاديش نتحركو غادي نبقاو غير هنا
ياسمين : ونتي فين غادي تمشي
جوديا : حتى بلاصة انا غادي نبقا هنا مهم نتي سيري رتاحي بحالك
ياسمين : اه صافي وخا شكرا
خرجات ياسمين من كوزينة طلعات في دروج للبيت لي خرجت منو دخلات وسدت باب عاد نتابهت للحوايج لي لابسة جات كيوت بديك بيجامة قصيرة ديال دار في غوز تلاحت على ناموسية لي جاتها رطيطبة وغمضات عينيها حيت باقي كتحس بالعيا
جوديا ناضت جمعات طبلة وخرجت من كوزينة لواحد بيت كاين تما لتحت حلاتو ودخلات ليه وشدات باب مورها تلقائيا تشعل ضو وبانت واحد لالة مولاتي روينة تم كلشي مقلوب راس على عقل خاصها تجمعها نيت حاليا ما كاين ما يدار
دازو سوايع قلال ياسمين ناعسة وجوديا قي بيتها شادة عليها ديك روينة لي كانت باغيا تجمع خلاتها هكاك وجالسة في أرض وسط ديك الحالة كانو شي وراق مرمين بإهمال طبالي مقلوبين الحوايج مشتتين فكل بلاصة تقول حرب نايضة تم زاج مهرس تلفزة تم مهرسة ومرمية في أرض اي حاجة منطقية في بيت يا مهرسة يا مقلوبة راس على عقل كانت مربعة رجليها لابسة اسود كيف العادة ولكن هاد مرة لابسة غير شورط وسوتيمات فقط فيديها تصويرة باين عليها قديمة مكمشة وتقريبا غادي تقطع شعرها مجموع وشي خصلات نازلين على وجهها ورقبة ديالها ملامحها لوحة مبهمة شادة ديك تصويرة مكترمش نهائيا بعيد عليها
خيال كانت جالسة من مورها كتشوف فيها حتى قالت : دكشي عمرو غادي يتنسى كتحاربي باش تنساي ولكن فكل مرة كترجعي لنقطة 0 وسمة ماضي ديري لي درتي مغاديش تزول محفورة في قلب قبل اي بلاصة اخرى
جوديا طوات ديك تصويرة وحطاتها على قلبها وقالت وهي مرجعة راسها لور : صفحة وطويتها انا مقلتش ليك باغيا نسى. شنو داز انا بغيت غير نتعايش مع لي فات
خيال : ياه امتا وليتي بحال هكا كنظن بلي مدرتش خدمتي معاك مزيان قصتك مغاديش تسالي هنا اجوديا قصتك عاد بدات وراحة هي الحاجة وحيدة لي متولفيش عليها بزاف باش متندميش من بعد
شتت تركيز جوديا بواني باب لي كان باغي شي حد يحلو متحلش حيت شاداه من داخل ناضت من على الأرض دارت ديك تصويرة في الأرض وناضت حلات باب وطلت غير براسها لقاتها ياسمين : سلام عرفتك غادي تكوني هنا قلبت عليك وملقيتكش دكشي لاش
خيال من داخل : عار لما عطي لمها شي سم تنعس ما تنوض
جوديا: بغيتي شي حاجة
ياسمين : انا لا غير بغيت نسول فيك وصاف
جوديا بقات كطلل عليها غير براسها رادا الباب باش متبانش ليها ديك روينة وقالت : الى بغيتي تاكلي راني جبت شي سخرة راها في تلاجة خودي لي بغيتي طيبي وكولي
ياسمين : وخا وخا ونتي
جوديا : انا كليت غير بصحة
ياسمين : اهاه. صافي وخا بسلامة
هي ضارت مشات وجوديا شدت باب من داخل وقالت : مرة جاية منين نكون كنهضر معها متبقايش تخشي ***** في هضرة
خيال : اووووو. مكنقدرش معنديش معها يعني شخصية ديالك 122 معجبهاش هاد خيتي نهائيا معرفتش علاش وليتي حنينة فجأة
جوديا مشات جيهت الحمام وقالت : الى نتي هي انا خاصك تكوني عارفة لاش كندير انا هكا او لا ألكلاخ
خيال بقات كتشوف فيها اما جوديا دخلت للحمام
حقيقة انها كتهضر مع راسها بينما في واقع مكاين معها حتى حد كتبت الوضعية النفسية الحرجة لي جوديا فيها حاليا
كانت حالة روبيني كتغسل وجها بلما منين علات راسها بانت ليها خيال متكية على حيط من خلال المريا وقالت : كديري هاد شي حيت كون كانت باقيا عايشة كانت غادي تكون في عمر ياسمين ياك
جوديا تبسمت نصف تبسيمة وقالت : صباح الخير وهزات فوطة كتمسح وجهها
خيال : ولكن ياسمين راها ماشي جود اجوديا وخا في العمر هو هذاك الى انه لا علاقة بيناتهم مدخليش عقلك فشي وهم مغاديش تخرجي منو سالمة
جوديا : ماشي شغلك خرجي سوقي انا عارفة مزيان بلي ماشي بحال بحال الى انه باغيا نجرب داك احساس تكون عندك مسؤولية اخت صغر منك ومن حقي
خيال : مع وحدة مكتجيك حتى حاجة اجوديا ردي عقلك لبلاصتو
جوديا تعصبت وقالت بلغوات: بعدي مني خرجي من راسي خرجي من حياتي مليت ما نشوفك ونسمعك فين ما مشيت بعدي عليا
بقات معافرة وكتغوت غير مع راسها ختماتها فاش ضربت يديها مع مريا وخرجت من حمام يديها ليسر كتسيل وهي غاديا جاية في بيت مداتها لا فحالة يديها لي عامرة دم لا في زاج لي من تحت منها وصلات هاد انسانة لمرحلة مبقاتش كتحس بألم نهائيا تألمت وألمت بما فيه الكفاية بزاف ديال ناس جلست فوق سرير دايرا يديها بجوج في راسها كتسنى تهدن باش متزيدش دير شي حاجة اخرى تأدي بيها صحتها مزال **********
أنت تقرأ
الشرير قصرا The Evil Palace
Mystery / Thrillerشرير ما معنى كلمة شرير هو شخص لي كيخلي دائما الكراهية والحقد تعمي ليه طريق والبصيرة شكون هو علاش وكيفاش ولا هكاك حتى حد ما كيعطي للموضوع اهمية نهائيا كيتفدى الإنسان يعطي لعقلو اسباب منطقية لداك إنسان او حتى تفسيره اليوم رجعت بقصة جديدة مخال...
