جيتني مثل الشروق اللي محى عتم الليالي

Part 2

جِيهان : المهم حرّكي يا جميله لا نتأخر
ساره : لاتكفين فرفري بالشوارع مالي نِفس أحظر الطابور
جَميله بضحك : عناد بوديتس الحين
جِيهان ضحكت : أيه وديها وحنا نتمشى
ساره كشّرت : وجع
ضحكوا البنات وحرّكوا
—————————————————————
في بيت الجد مساعِد
عند مُهاب و صالح
صالح مسك بطنه : ياولد بطني من ساعه يطّلع اصوات ، جيعان !
مُهاب ضحك : تراي سامع بس تجنبًا للإحراج ماقِلت لك !
صالح : ياعمي أي احراج قم ناكل بس
اتجهوا للمطبخ
مُهاب أشّر عالفرن : ها يَلا اطبخ لنا
صالح حك حاجبه : مالي في الطبخ أنا
مُهاب كتّف يدينه : مب أنت اللي تحّن تبي تاكل ؟ يَلا أخلص
صالح ضرب مُهاب من كتفه : ياولد لاتشخصن ، أنت خابرني مالي فالطبخ ، أنا أحسبنك طبّاخ أثاريّك مانت بعيد عني
مُهاب ضحك : أقول فارِقني
طلعوا من المطبخ وراحوا للمقّلط شافوا سالِم صاحي
صالح كشّر : ياكبدي ذا من قوّمه ؟ مانبيك أرقد !
سالم رفع حاجبه : يالواطِي ! أحشم لادق خشمك !
مُهاب ضحك : ذول يتطاققون وذا خامِد " أشّر على ناصِر "
سالم طالع ب ناصِر ورفسه من رجله : قّم قّم مهب نوم ذا !
ناصِر فرك عينه : الله يرزقني الصبّر ! علامك أنت ترّفس
مُهاب : قّم ياولـ..... قاطَعهم دخَول جدّهم مساعِد : قّم أنت وياه ! بس خامدين تقّل حريم !
مُهاب : سمّ ياجدي هذانا قايمين
مساعِد : يلّا الحقّوني !
صالح بحزن : آخ يا سعّودي وينك فيه تجي تشوف وش مسوين فيني هالسّملق !
ضحك صالح من رفسه مُهاب : المعذره قصّدي سعود
مساعد : قم ياكثر بربرتك !
قاموا العيال مع جدهم وأختَلفوا في أداء الأشغال اللي يجيبون النواقِص من البَقّاله واللي يشّرب الحلال ماء واللي يسقّي الأشجار وإلخ
طلعت اُم ناصِر وهي شايله الفطور
ترّك مُهاب الماء اللي بيدّه واتّجه لأمه باس راسها وشال الفطور : هلا بالحامِل والمحَمول ، عنتس يالغَاليه هاتِي !
ابتسمت ام ناصِر : ماتقّصر يا مُهاب
مساعِد : وينه مصلح ياصِيته ؟
ام ناصِر: هذا هو بيـ....دخل ابو ناصِر : السَلّام علَيكم !
الكُل: وعَليكم السَلام
جلسوا يفطرون ودخلت ام ناصِر للداخل : يلا يا نوره وينه فطُورنا !
نوره وهي شايله الفُطور : يلا جايه يمه
جلسوا في الصّاله ياكَلون
نوره : يمه منهم من عيَال عمي جابِر هِنا ؟
ام ناصِر : إذا ماخَاب ظنّي سالم وصالح
نوره عقّدت حواجِبها : طيّب ليه جايين وحن مو في إجازَه ! مو من عوايَدّهم ! وبَعدين سعود ليه ما جاء ؟
ام ناصِر : تخَيلي حتى عمّتس عبدالله بيجي هو وعَزيزه ونجَـد أمّا عوض شكله ماهو بـ جَاي عشان دوامه !
نوره رفعت كتفَها بعَدم معرِفه : يحَييهم !
————————————————————
في المدَرسه
نزَلت ساره من السياره و ودّعت جِيهان وجَميله
دخلت ومباشرة راحت للأعلى ودخلت فصَلها وتدّور ترف بعيونها ابتسمت من شافتها بالزاويه وراحت لها : ياهلا بـ بنت عمّي !
ترف بإبتسامه : أخَيرًا ! طفشت من الجَلسه لحَالي يابِنت !
ساره : أف لا احكيلتس وش صار معّي بس عشَان أداوِم !
ترف : يوه وش حصَل ؟
ساره : تخَيلي " بدّت تقولها اللي صار " ، وبالنهايه جابَوني جِيهان و جَميله !
ترف وهي تفكّر : أثَاري اخوانتس عِندنا ! و وش سالفَة جَيّة عمّي عبدالله وخالتي عَزيزه !
ساره : علمي علمتس بس.... دخلت المُعلمه : السلام عَليكم
كشّرت ساره : يالليل ، وعَليكم السلام
وأبتدت الحِصص تمشي بشكل طَبيعي
—————————————————————
وصَلوا جابر وعبدالله لبيت مساعِد نزلوا ونزّلوا الأغراض
نجَـد : يمّه ليه حن جايين هنا ماني فاهَمه وش قاعِد يصير !
ام عوض : اقولتس بعَدين لا فضينا !
نجَـد : طيّب !
ابو عوض : يلا يا عزيزه أنتِ ونجَـد
ام عوض : سمّ يابو عوض !
دخلوا لبيت مساعد اللي كان دايم بيَته مفتوح للرايَح والجَاي
قاموا العَيال من سمعَوا صوت البَاب انفتح ويشوفونه عمهم عبدالله و جابر
ابتسم مصلح وراح لعبدالله وحضنه : يالله انك تحييه أسفرت وأنورت ياخوي ! وشلونك عساك طيّب !
ابو عوض : والله اني بخيَر بشوفَتكم يا اهلّي ، مشتاَق لكَم بالحيّل
مُهاب ابتسم وراح لعبدالله وباس راسه : ياهلا بـ عمّي الغالي نورت البيت بجيّتك ! إلا عوض وينه ماشوَفه ؟
ابو عوض : هلابك ياولد اخوي الغالي ولد الغالي ، عوض بيجي لحاله لإنّه الحين مدَاوم ، اتجهه عبدالله لمساعد وباس راسه وحضنه : وشلونك يبه عساك طيّب
مساعد : الحمدلله انا ؟ بخير ، ياللي عصيتني ورحت للمدينه بعدم رضَاي
ابو عوض نزّل راسه بزعل : غَصب عنّي ولا أنا ما ودّي يا يبه مساعد
جلسوا يسولفون بعد ماسلموا على بعض
مُهاب راح لإم عوض ونجَـد : وشلونتس ياخالتي عساتس مرتاحه بالمدينه ؟
ام عوض ابتسمت : الحمدلله انا بخير وصحه وسلامه انتم شلونكم ؟
مُهاب : بخير حنا الحمدلله ! ، التفت لنجَـد : ياهلا ببنت العّم ! كيف امورتس أنتِ زينه ؟
نجَـد ابتسمت : الحمدلله انا بخَير ، انت علومك يا مُهاب؟
مُهاب بإبتسامه خفيفه : انا طيّب الحمدلله ، هاتوا أعاونكَم
أخذ الشناط ودخلها داخل للصاله ونجَـد وام عوض وراه
ام عوض : الا يا مُهاب
مُهاب حط الشناط في الصّاله : لبّيه آمري
ام عوض : مايآمر عليك ظالِم ، وين هي صيِته؟
مُهاب أشّر على المطّبخ : امي ونوره اختي هِنا !
نجَـد : وترف؟
التفت مُهاب لنجَـد وضحك : مَداومه هالمسكيَنه
نجَـد ضحكت وراحت هي وامها للمطبخ
—————————————————————
في المدَرسه
رنّ جرس الفُسحه وطلعت ساره وترف من الفَصل
ساره بقهر : يع يع كريهه مدري وشلون بتدرسنا سنه كامِله ذي !
ترف : اشهد بالله انتس صدقتي ! ماتَنبلع ودّي افرمها ! الا اقولتس مب عمي عبدالله بيجي اليوم ؟ خل ندق على ناصِـر يجي يستأذن لنا لجَل نجَلس مع نجَـد !
ساره دقّت ترف من كتفها وغمزت : وبيجي عوض اكيد "😉"
ترف ابتسمت : الله يرفَق بحَالي ياسويّر ! مُمرض ومزيون وعنده غمّازات ، انا مستغربه شلون للحيني ثقيله مارحت وقلت له اخطبني
ساره شهقت : يالخسيسه ! تنضمين لفريق المتزوجين وتخَليني عزابيه؟ لا والله غير أتهاوش معتس يالخايسه
ترف : امشي بس نتصَل
راحوا لغرفة الإداريات
ساره : أستاذه بطني يوجعني بكلم اهلي !
ترف بتمثيل : آه راسي مصّدع يا استاذه ابوي قال لي اذا صدعّتي كلميني
الإداريه صَباح رفعت حاجبها : كلنا ندَري انكم كذابين الا انتم ! فتحت الجوال واعطتهم : اخلصَي
ترف خذته بسرعه واتصلت على رقم ناصِـر
ناصِـر وهو جالس يقّهوي عمامه أخذ جواله اللي يدّق وكان رقم غريب : يا سعود ! تعّال أبيك
سعود جاء : سمّ يالرئيس ؟
ناصِـر أعطاه القهوه والفناجيَل : قهّوهم شويَات وراجِع !
سعود : رايح وشتسوي؟ تدّق على نسَوان؟
طنّشه ناصِـر وهو يبعد : هلا من معي ؟
ترف غمزت لساره وغيّرت صوتها : هلا بك ا! معك مُعجبه سرّيه
عقّد حواجبه ناصِـر : اختي الله يهديتس مهب زين هالحكي وجاء بيقّفل
ترف بسرعه : لاااتقفل ترف ترف
ناصِـر : ترف ؟ الله ياخذ بليستس يالفاضيّه ! أنتِ مب بالمدرسه؟
ترف ضحكت : لا بالمدرسه بس حبيت الطّف الجو ، تعال طلعّني طفشت
ناصِـر : ماني فاضي كلّمي مُهاب
ترف كشّرت : نفسيّه
ناصِـر ضحك وقفّل
ترف : ادق على مُهاب؟
ساره : ايه يالخبله مافيه غيره
ترف دقّت على رقم مُهاب : الو مُهاب
مُهاب عقّد حواجبه من الصوت المألوف اللي داهمه : هلا اختي ؟ آمريني
ترف : اقول تعال طلّعني من المدرسه
كَبحت ضحكتها ساره من اسلوب ترف
مُهاب ضحك :اوووووه ترف ؟ يالله تحييها اجيتس يعني ولا كيف ؟
ترف : شرايك يعني؟
مُهاب : زين زين عشر دقايق وانا عند الباب
ترف : كفو ياخوي وقفّلت
ساره صفقت يدها بيد ترف : حيّ عينتس انقذتيني من هالمكان التَعبان !
ترف تحنحنت : بالخدمه
—————————————————————
عِند مُهاب
راح للمطبخ ودقّ الباب فنحت له نوره : هلا يا مُهاب
مُهاب : قولي لامي اني طالع اجيب ترف من المدرسه
نوره التفتت لامها : يمه يقولتس مُهاب انه بيروح يجيب ترف من المدرسه
ام ناصِـر: زين انتبه للطريق
مُهاب : أبشري
أخذ مفتاح سيّارته وطلع برا شغّلها وحرّك
بعد عدّة لحظات وصّل نزل وراح لحارس المدرسه: السلام عليكم !
الحارس أمجّد : وعليكم السلام ، وش بغيت؟
مُهاب : سلامتك ، بستأذن لاختي
تذّكر مُهاب ساره : وبنت عمي اذا ماعليك آمر
الحارس أمجّد : أبشر ، اسمائهم لاهنت ؟
مُهاب : ترف بنت مصلح بن مساعد آل شُجاع و ساره بنت جابر بن مساعد آل شُجاع
الحارس أمجد أخذ المايكريفون : استأذان ترف بنت مصلح بن مساعد آل شُجاع و ساره بنت جابر بن مساعد آل شُجاع
مُهاب ابتسم : تسلم يالغالي ماتقّصر ، عساك عالقوه
ابتسم الحارس وراح مُهاب للسياره وماهي الا دقايق ويطلعون ترف وساره وهم مستاانسين ركبت ترف قدام وساره ورا
ترف وهي تبوس راس مُهاب : الله يسععدك يامُهاب ييوووه انقذتنا من المعلمات الخثيثات ذول !
ساره بحماس : اي بالله صادقه ! تستاهل صفقه
صفقوا ساره وترف
ضحك مُهاب : اشهد بالله اني استاهل عن حق وحقيق ! الا ماقلتلكم ؟ نجَـد بنت عمّكم جات !
ترف بحماس : اييه ندري يلا امش امش بسرعه متحمسين نشوفها
ضحك مُهاب ومشى ...............

إنتهى 🦋
شرايكم بالبارت🦋؟
اعتذر لو بارتاتي قصيره بس والله قاعده أحاول تكون طويله 😭
مكافئتكم :🌷🌷🌷🌷🌷🌷🌷