جيتني مثل الشروق اللي محى عتم الليالي

Part 4

ابو عوض : مشيينا للمستشفى
توجهوا جميع نِساء آل شُجاع يلبسون عباياتهم ورجالهم يجهزون السيارات وتوجهوا كلهم ب أربع سيارات للمستشفى

عند مُهاب في المستشفى
نعسان وتعبان جدًا وجالس في كرسي خارج غرفة عوض خوفًا من انه يزعجه وينتظر بس خبر يجيه إن عوض صاحي وبعد دقايق من وضعه طلع دكتور من غرفة عوض واتجهه لمُهاب : اهلًا ، وش اسمك انت و وش تقرب للمريض عوض ؟
مُهاب فَز من نطق ب اسم ولد عمّه : يامرحَبا ، اسمي مُهاب وعوض ولد عمّي وشلونه هو بخَير؟
ابتسم الدكتور : عوض صحى بس انه تعبان شوي ، تقدر تدخل عليه
مُهاب ابتسم ابتسامه عريضه تعّبر عن فرحه الشديده بسلامة ولد عمّه واخوه : تسلم ماتقصر !
دخل بهدوء عند عوض المستلقي على السرير ويناظر بالفراغ ومنظره جدًا مُحزن اتجهه له وباس راسه : خطاك السوء ياولد عمّي !
عوض ابتسم وجاء بيجلس مسكه مُهاب ورجّعه ينسدح : ياولد والله ان ترتاح علامك ! طالع من حادث تراك
عوض بخَفوت : وينهم اهلي ؟
مُهاب تذّكر : الله يذكرك بالشهاده بطّمنهم انك قمت
عوض عقّد حواجبه : من قال لهم ؟
مُهاب : أنا قايل لهم عشان لايفكرون واجد وينشغل بالهم علينا !
عوض هزَ راسه بمعنى "تمام"
أخذ مُهاب جواله وجاء بيدق على عمّه عبدالله واستوقفه دخول العدد الهائل من الناس وعرف انهم اهلهم
ام عوض اتجهت بسرعه لعوض وحضنته وهي ماسكه دمعتها وقامت تتحسس كل مكان بجسمه : عوض يمه انت بخير ! جاك شيء وش يوجعك يمه حبيبي بسم الله عليك
عوض مسك يد امّه : يمه لاتحاتين بسم الله عليتس انا طيب ماعلّي !
راحت نجَـد عند عوض وحضنته وهي تصيح : عوض ياكلب ليه ماتنتبه للطريق خوفتني عليك لو الحين فقدتك لو خسـ....
قاطعها عوض اللي ابتسم : بسم الله عليتس ليه الخوف انا طيّب وزين لاتحاتين !
انسحب مُهاب وطلع عشان ياخذون راحتهم البنات وراح لأخوه ناصر اللي كان يسولف مع سعود:يعيال اقسم بالله اني تعباان
سعود رفع حاجبه: من وشو تعبان يالخسيس ، من ولد عمّك؟
ناصِـر ربّت على كتف مُهاب : رجّال والله لحقت ولد عمّك ! أشهد انك نشمّي وشَهم ياخوي
ابتسم مُهاب من كلام اخوه : الله يرفع قدرك يالغالي والتفت لسعود اللي رافع حاجبه : شبلاك انت نزل حواجبك لاتطير
سعود وهو باقي رافع حواجبه : ليه أنا وصويلح ماحن كذا زيكم ! كله يمصّع شوشتي وامصّع شوشته !
ضحكوا ناصِـر ومُهاب من جاء صالح من وراء سعود وهو ينغزه من خصره : يامرحبَا باخوي ، عيى ما شر تحشّ بي ؟
سعود وهو ماسك خصره : الله يكسر هاليد ! بنكرياسي ياولد
هز راسه ناصِـر بيأس وهو يسحب مُهاب ويروحون بعيد
ناصِـر: وشلون صار حادث عوض و وين ووشلون لحقت عليه أنت ؟
مُهاب جلس يقول لناصِـر السالفه من يوم جاته اشعارات لين المستشفى وقعدوا يتناقشون بالموضوع ويسولفون عنّه
عند سعود و صالح بالمستشفى
صالح : استغفر يالخسيس ، إلا يالسلوقي انا متاكد ماحد سارق ساعتي الا أنت طلعها طلعها لاطلع روحك
سعود أشّر على نفسه : أنا سارق ساعتك ! عاين ب عيني زين كل هالبراءه تسرق ؟
صالح صغّر عيونه : وينهي البراءه ماني بشوفها ؟ طلّع الساعه
سعود : ياولد الحلال ماسرقت شيء امش بس
صالح ابتعد عن سعود شوي ونزّل حذيانه وقال : ياتجيبها يا اصلخ ظهرك ب ذي
سعود رفع ثوبه وشمّره وقعد يركض وصالح وراه واستمروا يلاحقون بعض الين ماوقفوا جميع وقعدوا يلهثون من التعب واستلقوا على الارض بعد ما ابعدوا عن المستشفى جدًا
صالح وهو يرفس سعود من رجله ويأشر على المستشفى : عان كله منك هالحين حنا بعدنا عن المستشفى !
سعود وهو يلهث : يارجال عادّي زينّها وتزين
الساعه 5 المغرب
في غرفة عوض طلعوا بعد ماودعوه لان وقت الزياره خلّص وبيرجعون بيوتهم ركبوا السيارات وتوجهوا لبيت مساعد كلهم وبعد ماوصلوا توجه الكل لغرفته بتعب ماعدا ام عوض وام نجَـد و ام ماجد توجهوا للمطبخ يطبخون العشاء ويسولفون عن حريم الديره وعن فلانه اللي تزوجت واللي ولدت

في غرفة ترف
متجمعين كل البنات منهم ترف وساره وجيِـهان وجميَـله ونجَـد ونوره وجَود بنت جميَـله نايمه
ساره وهي تضحك : ايي بموووت شكلها يفطّس وهي تلاحق منيره وشلتها عشانهم انحاشوا من الحصه
ترف وهي ميته ضحك : تكفون بنات لو انكم معنا كان انهرتوا
ضحكت نوره على تشبيههم : ضحكت على التشبيه كيف لو شفتها
جيهـان وهي تضحك: سويّر وتريف ماتستحون
طالعوا البنات بـ نجَـد اللي تضحك بهستيريه وساكته ووجهها احمر وماتوا ضحك
بعط طامّة ضحك كبرى وسوالف عديده دخلت عليهم ام نجَـد تناديهم للعشاء
عند العيال في المقّلط
متجمعين كلهم سعود وسالم وناصـر وماجد يلعبون بلوت
وصالح و مُهاب يسولفون
وقاطع سوالفهم ولعبهم جوال مُهاب اللي رنّ رد عليه : سمّي يمّه
ام ناصِـر : مُهاب يمه ترا العشاء جاهز تعال الباب الخلفي خذه
قام مُهاب وطلع من المقّلط : أبشري يمه
توجهه للباب الخلفي حق المطبخ ودق الباب طلعت له امه وهي ماسكه صحن الكبسه والسفره
مُهاب ابتسم واخذهم منها : تسلم هاليدين
وراح للمقّلط ودخل : يعيال العشاء يلا
فرش السفره وحط الصحن ونادوا على جدهم وعمامه وابتدوا ياكلون بهدوء زي ماتعودوا
عند البنات في المطبخ
ياكلون بعكس الرجال سفرتهم كانت مليئه بالسوالف والضحك والحش
ام عوض : ايه ياحريم تخيلن انهي تزوجت طليق اختها !
ام نجَـد شهقت : ياكبرهل عند الله ماتستحي هالحرمه ؟
ام ماجد : حسبي الله عليها هالمروحه طيب واحساس اختها !
ترف : ايه بنات الباودر خييال حقهم انصحك تشترون منه
ساره حكت جبينها : مشكله لما تكونين طفرانه
نوره ضحكت : ترف تراي سرقت منتس عطر ديور
ترف شهقت : عمى رجعييه ! وانا ادوره اسحبني ضيعته اثاريه عندتس ؟
ضحكت نجَـد : الحمدلله ماحد يسرق مني
ضحكوا البنات وكملوا سوالف
وبعد ما خلصوا اكل في الساعه 8 مساءًا توجه الكل لغرفته ينَام
عند العيال في المقّلط انسدحوا
سعود وهو يفكر : هالحين ابو فانوس حقيقي؟
صالح : ايه حقيقي لاكلم عنه لايجيك
ضحك مُهاب من وجه سعود اللي ارتاع فعلًا : يارجال حقيقي وتراه ياكل
ناصِـر وهو يضحك: ايه صح صح
ضحكوا العيال وقعدوا يسولفون وتدريجيًا بدا واحد واحد ينام الى ماناموا كل العيال إلا مُهاب اللي ماجاه النوم ابدًا قام وراح برّا يتمشى وكان فيه نسمات هواء بارده وخفيفه وغيوم واجواء تفتح النفس اتجهه عند البِل وفتح الباب ودخل وراحت له مُباشره ناقته "مزيونه " اللي كان يحبها بالحيل ابتسم وجلس وحط راسه عليها وهو يهوجس

في غرفة ترف
البنات ناموا لهم فتره إلا نجَـد اللي ماتتأقلم وتنام ب أي مكان الا بعد مدّه قامت تبي تطلع برّا منها تغّير جو ومنها تتعرف على بيت جدها اللي ناسيته لبست طرحتها بظنها ان الكل نايم وماحد حولها وطلعت برّا تتمشى وتشم الورود ، لفتها باب البِل اللي كان مفتوح وكان فيه شخص حاط راسه على الناقه ومن باب الفضول اتجهت بشويش وبدون صوت تشوف مين هو الشخص لما وصّلت دعست على شوكه صغيره وتألمت وطلع صوت التفت مُهاب للصوت اللي طلع ويلاقي بنت قدامه
نجَـد قالت بصرخه : صد صد من أنت !
مُهاب صنّم من شاف بنت قدامه ومو لابسه الا طرحه وأي كلام بعد
قعدوا لثواني يناظرون ببعض بذهول واستوعب مُهاب وصّد : يابنت وش يطلعتس ب آخر الليل الله يصلحتس ! ادخلي لا يشوفنا احد ويفكـ...
قاطعه دخول جدّهم عليهم والتفتوا بصدمه ووو.........؟

مكافئتكم🌷🌷🌷🌷
التفاعل في التيك مره حلو الله يسعدكم🥹