هاي بنوتات🥹
عساكم طيبين مره وحشتوني واعتذر عن القطعه بس كنت مشغوله بدراستي🥹.
وصلوا مُهاب وساره وترف لبيت مساعد
دخلوا ساره وترف بشكل سريع مما أدى إن الرجال يفزون
مساعد: شبلاكم ! جايكم شيء حصل لكم شيء منا ولا منّا ؟
عبدالله : علامكم يابناتي !
دخَل وراهم مُهاب وهو يضحك : استريحوا ماحاصل الا كل خير ! بس هالخبلات متحمسات يشوفون بنت العَم ! "نجَـد "
ترف حكت حاجبها بورطه من نظرات مصلح لها اتجهت له وباست راسه : ياهلا بالغَالي ! ابك وحشتني وين الناس !
مصلح رفع حاجَبه : توتس شايفتني الفجَريه يالنصّابه !
التفت لساره : يامرحبَا ببنت اخوي ! وش جابتس
ساره اتجهت وباست راس جدها مساعد : أبد جايه مع ترف !
مساعد : وين هو فيه ماجد ؟
ساره بهدوء : بيجي بعد شوي هو وامي وحرمَه ! التفت لعبدالله وراحت سلّمت عليه : هلا بـ عمّي ! وشلونك عسى امورك زينه ؟
عبدالله ابتسم : يامرحبا ! بخير دامتس بخير ، يلا روحي أنتِ وترف مع بنتي نجَـد لاتجلس لحالها
ساره ابتسمت " تبيها من الله 😂": أبشر
اتجههوا ساره وترف مع بعض للداخل وقعدوا يدورون نجَـد بلهفه وشووق ! صادفوا نوره طالعه من الغرفه وهي منحاسه مع اسوارتها اللي تحاول تقفلها رفعَت نظرها للبنتين اللي كانوا أمامها تمامًا : يوه ماصدقنا على الله افتكينا منتس يا ترف ! لا وجايبتلنا سويّر معتس عز الله فلحنا
ترف :حاصِل لتس إني اختتس اصلًا ! وين نجّودي نبيها
ساره رفعت حاجبها : وشدخلها سويّر ابفهم الحين ! اخلصي نبي نجَـد
نوره بضحك: عانوها بالمطبخ منكرفه مع الوالده
ساره وترف ضحكوا
ساره ضحكت :والله غير ماروح لايكرفونني معها
ترف : نويّر المزيونه اختي العزيزه نادّيها لنا تكفين
نوره ابتسمت : أبشروا مع انكم ماتستاهلون
ترف كشرت : زين زين ناديها بس
راحت نوره تمشي للمطبخ ودخلت شافت نجَـد تشتغل وهي مكشره وواضح مالها خلق ضحكت: نجَـد
نجَـد التفتت لها وتركت اللي بيدها : لبّيه
نوره: تعالي بكلمتس
نجَـد راحت لها : وشو
نوره : بنقذتس من الكرف ذا ، سويّر وتروف جَوا
نجَـد ابتسمت : في ذمتس!
نوره ضحكت : اي والله
نجَـد التفتت لامها : يمه بنات عمي جَوا بروح لهم
ام عوض : ايه زين بس ان سويتوا ازعاج والله لانومتس عندي
نجَـد : ابشررري
ضحكوا ام عوض وام ناصِـر ونوره وكملوا شغل
نجَـد وهي تمشي بحماس وتعد الخطوات وأخيرًا وصلت لغرفة ترف دخلت بمداهمه وصرخت : يياااااهلااااا
ترف وساره التفتوا للي فتح الباب بقوه وهم منفجعين بس من شافوها نجَـد صرخوا جميع
ترف اتجهت تحضن نجَـد: نجوووووووودي ! وحشتيني حييل
نجَـد بادلتها الحصن: مب كثري ترووف مب كثري
ساره كشّرت : سلامات انا طرف ثالث؟
التفتت نجَـد لساره و سحبتها معهم بضحك : ماعاش اللي يخليتس طرف زايد
ابتسمت ساره : ياببععد هالدنيييا ، اشتقنا لتس حيل ترا !
كملوا سوالف وضحك وهم مبسوطين
عند العيال برَا
جَلس مُهاب بعد ماخلص كل شغله واستغرب من الرسايل اللي تجيه ورا بعض فتح جواله وهو معّقد حواجبه ودخل على رسايل تجيه من عوض ولفته رسالة " نَخيتك ياخوي أنا بحاجتك الآن ! " فز بصدمه وهو يرد " أبشر بي وينك فيه "
ناظر فيه صالح من فَز واتجهه له : علامك ياولد !
مُهاب وهو مستعجل اخذ مفتاح سيارته وجواله : قل لابوي واخواني إن عندي مشوار ضروري ولا تحسسهم ان فيه شيء ، زين!
صالح مسك يدّه قبل يروح : ياولد قل لي وش حاصل ! ولا مانيب تاركك
مُهاب زفر بعصبيه : مب شغلك قل لاهلي اللي قلت لك عليه وبس !
صالح خزه : وش صاير يا مُهاب
مُهاب وهو يرفع صوته : اقولك مب شغلك ! تفهم ولا ماتفهم ؟
صالح رفع حاجبه وترك يده : الله يهديك ياخوي جاي اتطمن عليك وذا كلامك لي؟ رح رح بحفظ الله !
مُهاب راح بإستعجال وفتح جواله لجَل يشوف عوض والمصيبه انه مارد ، زاد توتَر مُهاب وهو مو داري وين بيروح اصلًا فَتح سناب وابتسم بإنتصار لما شاف موقع عوض مفتوح ومشى له ومانتبه ان الطريق طويل !
في بيت جابَر
جَود راحت لجَدتها " سلمى " وقعدت بحضنها : جدّه ، وين سعود و ساره ؟
سلمى مسحت على شعرها بحنّيه : هم ياعيون جدّه في بيت جدّك مساعد ، نروح لهم ؟
قاطع كلامها دخول جميَـله وماجد
ماجد ابتسم وباس راس امه وبعده جميَله
ماجد : هلا بالغاليه هلا بحلوة اللبن ! وشلونتس ؟
ابتسمت ام ماجد : بخير بشوفتكم
جميَـله ابتسمت : عساه دوم ياخالتي ! إلا اقولتس ترا البنات كلهم في بيت عمّي مساعد "احترام"
ام ماجد : ايه يلا نروح لهم هالحين نادّي جيِهان
جميَـله : أبشري من عيوني
راحت لغرفة جيِهان ودقّت الباب ودخلت : جيِهان ، بنروح بيت عمّي مساعد الكل هِناك ، تروحين ولا مابتروحين ؟
جيِهان قامَت من السرير : إلا يلا بروح
YOU ARE READING
جيتني مثل الشروق اللي محى عتم الليالي
Romanceتبدأ أحداث روايتي عند البطله نجَـد اللي تكون عايشه في المدينه و بيوم امها وابوها يقررون يسافرون لسبب بنعرفه في الروايه ويخلون البطله وأخوها في بيت جدها اللي في الديره وآخر الليل تقرر تروح عند " البِل " وتحصل البطل جالس مع ناقه ويدخل عليهم جدهم ومن ه...
