صغيره على الحب
الحلقه التانيه
سالم ... احلام الحوش يطق شوفى منو وكان الراجل ولدك قوليله قالك بوك انسى تخش هينا لين تتربى وراجل زى الخلق ...
احلام ... هدى تفضلى بنتى خشى لصالون .. لحظه بس وناديلك عليها ..
سالم ... منى الا جى ؟
احلام ... هدى بنت جيرانه صاحبت بنتك الا مقعمزه داخل .. خلينى نخس نقولهلها ونجيك ..
خشت احلام لدار واول مافتحت الباب لقت صفرة الغدى الاحطتهالها قبل شوى قاعدة زى ماهى ومتلفته جيهة روشن وتبكى ...
امها ... من امس الظهر ومن بعد ماخوك جابك وانتى على نفس الحال .. لاماكله لاشراب ... شنى الحل معاك .. انتحار هدا ؟
رنا ... ) شبحتلها وهيا منهاره بالبكى ( انى اصلا ميته لا محاله .. لما تفكرو تعطونى لواحد اكبر منى بى 14 سنه متعقد مريض .. تى انتى بروحك تعرفى قداش نهى كانت تحكيلك معقوله لهدرجه هنت عليكم .. بس والله لو نموت ومش رح نوافق ..
امها ... اها يعنى عاجبك صعلوك الا تمشى معه من شجره لشجره خير ؟ وبتهربى معه ؟ تى انتى ياحماره لو فيك درة عقل شن الا خله مايتقدملكش لو كان يبيك ؟ على حسب ماتقولى عنده حوش وسياره وولد من عيله متسميه وهوا وحيد اهله .. يعنى لو يبيك مستعد يتحدى دنيا باش ياخدك ...
رنا ... يوسف مش سئ هوا يبينى وقالى استنينى لين نتخرج ونخدم سنتين وبعدين نجى نتقدملك .امها ... لو انك احترمتى شيبة بوك وخوك وماقعدتيش تلودى معاه من شجره لتانيه .. مافى حد كان رح يجبرك انك تتزوجيه .. بس طالما انتى مش هامك حد ولا معتبره حد فينا لابوك ولاخوك ومستعده تهربى مع واحد هوا فى الاساس زى عين شمس واضح انه مدايره لعبه لتسليه بس ... فاانى خلاص بعد رأى بوك معاش عندى كلام ... والناس بعد بكرا جايين ... وبوك رح يقعمز معاه وبعدين يقرر هل تطلعيله او لا ..
رنا ... اطمنو مش رح نطلعله .. اطلعوله انتم وتزوجوه .. انى مش مصح للامراض العقليه وكان انتم مستغنين عليا انى مش مستغنيه على عمرى ..
امها ) شبحتلها بغل وتحدى وقالتلى ( خلبييييبنى ساكته خير .. ماتخلنيش نعلى صوتى وقدام البنت الا برا .....الولد اقلها معروف وصيته بين ناس معروفه وبشهادته وبانى مستقبله ومش متع نساوين .. اما انه معقد فاهدا شى بايدك تغيريه وراجل على شن يتعود ... ولو بنتكلمو خلينا ندو على سى السيد الا جايبتيه .. فى الاول قالك انى ليبى وبعدين طلع عايش فى لبيه فقط بالله شخص بنى ارتباطك بيه على كدبه كيف بتكملى معاه ؟ى
رنا ... انتى عارفه لانه كان يبينى وخايف لو قالى على جنسيته مش رح نوافق .. وهوا مان خايف يخسرنى بس ..
امها ... انتى دماغك مسكر وانى مش رح نجادلك ... وبوك قال الكلام الا عنده .. بتتزوجى قصى غصبن عنك طالما بوك وخوك وافقو عليه .. واضنى اعطيتك مهله سنه ومعاها ان الا عندك يخلى على دمه حس ويتقدملك .. وفى المقابل .. تلودو مش شجره لشجره وايدكم فى بعض وهوا عاااااادى ولاهامه ماعنده على شن بيخاف وانتى طز فى بوى وخوى اهم شى هوا بس ... ياخسارة تربايتى فيك وتقتى فى اختيارتك .. نوووووضى اغسلى وجهك واطلعى للبنت واياك تجيبى سيره على موضوعك لين يتم تسمعى فياااااااا ؟ ) وطلعت وسيبتلها دار (
واول ماخشت رنا للحمام وغسلت وجهها خطرت فى بالها فكره وطلعت تجرى لى صاحبتها .. واول ناخشت عليها خشت امها وراهم بالعصير وشكلاته وشبحت لبنتها شبحه .. رنا فهمت معناها ... وطلعت
هدى ... خيرك اليوم مامشتيش للكليه دكتور خالد دار كوز وفاتك على اساس بيشوف المعلومات الا اكتسبناها من تانوى هههههه خيرا وجهك شاحب مريضه ؟
رنا .... ) بدو دموع ينزلو ( امس صارتلى عمله سوده دمرتلى كل حياتى .. انى فى مصيبه ياهدى ومش عارفه كيف نطلع منها
هدى ... شن فى خيرك ؟
رنا ... ) مسحت دموعها وقالتلها ( .. نسكر باب صالون ونحكيلك
وهنا قعمز رنا وحكتلها كل الا صار معاها ... واول ماسمعت هدى كل الا صار قالتلها ...
هدى ..... هيييييييييييييييييييييييا حى عليك شن غبارتك يارنا .. كيف بتتصرفى ؟
رنا ... مش عارفه اهلى مسكرين دماغهم وانى مستحيل نتزوج الا يوسف ... اسمعى انى مره اتصلت بيوسف من تلفونك وبعتله رساله مسحتيها ؟
هدى .. لا لا مامسحت شى ...
رنا .... اعطينى تلفونك لو جايبته معاك ؟ معبيه رصيد ؟
هدى .... اى هاك ... ماتقوليش بتكلميه ؟
رنا .... اى لنقوله لو هوا يبنى ويحبنى يتتبت للكل ويجى يوقف على لوى اقل شى .. هدا الباين ان هدكا عاطيهم شهر ونص بس لو تم موضوع يعنى انى فى خلال شهر ونص لو يوسف مادارش حل رح نكون مرة الوحش هدكا ... انى مش متخيله نفسى .. والله نموت ..
هدى .... حاسه بيك والله يارنا .. عاك كلميه .. وانى متأكده ان هوا يحبك ورح يدير حل ..
رنا .... اه اه ياررررررب مايخيبلى ظنى فيه ... اعطينى تلفونك
هدى ... اوك .. هاك اعتقد هدا رقمه ..
خدت رنا تلفون واتصلت واول مافتح الخط قالتله ..
رنا ... يوسف .. انى نكلم فيك من تلفون صاحبتى .. ماتتثلش على تلفونى ماما خداته
يوسف ... شن صار شن فى ؟
رنا .. امى سمعتنى لما نتكلم معاك وخدت تلفون ولو فى امل قبل هالموقف ان مايصيرش من موضوع زواجى .. فابعد الا امى سمعاته مستحيل رح يوقف حد معاى ... يوسف انت لازم ماديرلى حل ..
يوسف .... رنا افهمى عليا ... شن متوقعه منى وانى شهادتى ماخديتها واهلى معارضين
رنا ... اهلك معارضين ؟ توا قولت هكى ؟ خيرا قبل ؟
يوسف ... رنا افهمى عليا ... اهلى معارضين لين ناخد شهادتى ... وانى نفسى حاليا مش مستعد انى نرتبط وانى شرطت عليك من الاول لين ناخد شهادتى ..
رنا ... يوسف اهلى رح يزوجونى شهر هوا .. يعنى اقل شى اوقف على خوى وبوى بس اقنعهم انك شارينى ... انى ماطلبتش منك شى ومقدره وضعك ..
يوسف ... انتى عندك علم انى حاليا مش فى حوشنا ؟ وانى فتحت موضوع معاهم وتعاركنا وبوى لزنى ؟ وقالى قبل ماتاخد شهادتك ماعندك عندى شى ... وانى يارنا بسببك قاعد حاليا فى حوش صاحبى ..
رنا ... انى سبب فى مشاكلك .. خلاص انى بنسكر ..
يوسف ... رنا شفرتى احتمال تتسكر .. معاش فيها رصيد وبتنتهى مدة صالحيتها ... وحاليا ماعنديش رصيد كيف نعبيها ... قولتلك باش ماتفهميش غلط
رنا ... اوك سلام ...
هدى .... شنى ؟
رنا .... معاش فاهمه شى ... مافيش شى معاى ... انى مخنووووقه ومافى حد مفكر فيا وكل يوم الحقير الا اسمه قصى نزيد نكره اكتر ...
هدى .... حبيبتى ماتضايقيش روحك وخليها على ربى وشن كاتبلك .. مرات تحبيه ويكون كويس معاك ..
رنا . ...مستتتتتتتحيل انى نكره ونكره اسمه واى حد ليه علاقه بيه ... تى هدا مريض نفسى انتى مش عارفه ... اناى مش فاهمه .. هدا اخته لكالنا كانت تحكى لامى قداش يكره نساوين ... تبينى انى كيف نتقبله ..
هدى ... باهى على اساس تقدملك اكيد تغير واكيد مر فى حياته بتجربه سيئه وخلاص اجتازها ..
رنا ... ماتحاوليش تتكلمى عليه ... والله لو نازالتى تكلمتىىهكى عليه رح نحطك فى اليلاك لست ومعاش تشوفينى ابدااااا ...
هدى ... خلاص خلاص ياسيدى هوا انى شن بينوبنى من هدا كله .... خلاص انى بنمشى توا وقوليلى بعد بكرا شن بيصير معاك اوك ؟
رنا .... مش رح يصير شى اطمنى ...
ناضت هدى وناضت وراها رنا وسقدتها ور جعت لدارها وسكرتها وراها ... وامتنعت عن الاكل طول اليوم هدكا واليومين الا بعدهم ... وكانت لما تجوع تفتح شنطتها وتاكل من شكلاته الا شاريهالها يوسف اخر مره بمناسبة ان هاليوم كان نفس تاريخ اليوم الا تلاقو فيه ... وطبعا امتناع رتا على الاكل كان مجرد وسيله لضغط على اهلها فقط ...
احلام ... سالم ناس بكرا جايين ... وبنتك قاعده حابسه روحها فى دار ولاماكله لا شراب .. شن الحل بزبط ؟
سالم ... الولد سألنا عليه ... واخلاقه ماشالله فى شارع كله ... ومااضنيش تغير فى فتره الا سافر فيها ... وانى رح نقعمز معاه بكرا ونقرر .. لو كويس او لا ... ومنها نتمو معاهم نهائي .. وهيا حابه تتطلعله بس بشرطى انى ومعاى باش ماطفشاش الله مابارك .. ماتبيش ... رح نتفاهمو ونحددو موعد العرس ...
احلام ... هوا صح الراجل مسافر بعد شهر ونص .. بس ماتحسش اننا هكى رح نتسرعو ؟
سالم ... شنى يعنى ؟ اى حاضر نخلوهم مخطوبين ويسافر هوا وهيا تقعد هنا ودورا نسمعوها هربت صح ؟ هدا الحل فى نضرك ؟
احلام ... عارفه ومعاك الحق انى بروحى معاش نأمنلها بعد ماسمعتها ولامس .. وعارفه انها عنايديه ودماغها كاسح .. بس نخاف ان نكونو ضلمنها هكى ..
سالم ... انى مستحيل نظلم بنتى ... بل بالعكس .. مش رح نخترلها الا شخص الا يستاهلها ... والا يعرف كيف يروضها ويكسرلها نشف راسها ... وبنتك صغيره يااحلام ولو مانقدنهاش من الا هيا فيه رح تتصرف بطريقه تقعد نادمه عليها طول عمرها وانى لو بنت او خوها هيا يصير فيهم شى .. الموت احسنلى ...
احلام ... بعيد السو عليك حبيبى .. وبعون الله مايصير الا لى يرضيك .. بس محمد امتى بتحنن قلبك عليه ؟ والله ينارى يخش من الليل لليل زى خانب بعد ماانت ترقد .. وينوض من الفجر يغسل ويطلع ..
سالم .. خليه يتربى ويعرف كيف يحترم بوه ويتكلم قدامه ... مهم كلموك ناس اكدولك على بكرا ..
احلام ... مفروض بتكلمنى توا ... اها ادكر القط يجيك ينط ...
احلام ... اهلن اهلن
نهى ... اهلين حبيبتى ... سامحينى والله كيف سقدنا ناس وفضيت ... مهم مانعطلش عليك .. بكرا بنجى انى وامى وخوى وبنتفاهمو على كل شى ... لان زى ماتعرفى قصى اكتر تمديد ليه يقدر يمدده شهر ونص ... ومانبو منكم شى يعنى بهدمتها بس والباقى كله يوصلها ..
احلام ... بارك الله فيكم والله مش عارفه شن بنقوللكم .. بس انتم غير تعالو بكرا ويصير خير ...
نهى ... ماتقولى شى هدا نصيب من عند ربى جاها وسعد زى رعد .. ووالله لو تعرف تكسب خوى يااحلام فاهيا شرت راجل وسيد تريس وانتى تعرفى ... وهوا ناوى يبدا معاها صفحه جديده وينسى الا فات ..
احلام ... ان شالله ربى يقدم الا فيه الخير ياررررررب ويهنيهم ... خلاص اتفاهمنا بعون الله ..
نهى .... بعون الله معناها خلاص بكرا نتلاقو ... وفى امان الله ..
احلام ... سلميلى على امك هلبه .. سلام
نهى ... يوصل بعون الله .. سلام ..
خالتى مريم ... اه شن صار معاك ؟
نهى ... زى ماتشوفى والبيك ولدك مازال مارد علينا ولاشرف حضرة جنابه .. واحنا منا لينا عطينا كلمه لناس ..
خالتى مريم .... انتى امس مش قتيلى بعتلك رساله وقالك الا تشوفوه مناسب ديروه ؟
نهى .... امى ماتجلطنيش راهى مش بدله الا بنشروها حنا ... يعنى لازم مايكون مقتنع ومتقبل موضوع باش يقدر بكرا يمشى ويقنع ناس ...
خالتى مريم ... اهو حسه وصل ... ااااص
خش قصى للحوش وهوا ناقرهم ... واول ماخش لدارهوسكر بابها ... جت نهى ووقفت فم الباب وقالتله ...
نهى .... طق طق ... قصى ممكن نخش ؟
قصى .... خشى ..
نهى ... مانبيش نكتر عليك الحكى ... بكرا ماشيين لناس الا كلمناك عليهم .. وبنتمو الموضوع بشكل نهائى .. ولازم ماتمشى معنا وتشوف بنت
قصى ... مافيش داعى ..
نهى ... كيف يعنى مافيش داعى ؟
قصى .... يعنى انتم مش شفتوها وعجبتكم وقررتو ونفدتو ؟ مافيش داعى انى نشوفها وقرارى لارح يقدم ولا يوخر ولاعندى رأى اساس فى هالموضوع وانتى اكتر وحده تعرفى رأى ..
نهى .... يعنى بكرا مش رح تمشى ؟ اقلها برا تفاهم مع بوها وخوها واحنا نساوين نكملو الباقى ..
قصى .... اوووووووووف ماشى ماشى يصير خير ... فى شى تانى مطلوب منى ؟
نهى ... بكرا تجيب معاك بوكى ورد وشكلاته وتلاته كيلو بكلاوه ممكن ؟
قصى ... يصير خير ... اطفى ضى وخودى الباب وراك ..
نهى ... ) شبحتله شوى مع لوية شارب وبعدين قالتله (
نهى .... اوك تصبح على خير ...
وطلعت من دار .... وجبدتها وراها وخشت لدارها ... بينما فى لحظه هيا كانت تتكلم احلام مع بنتها رنا ..
احلام .... شنى يعنى ماتبيش تطلعى ؟
رنا .... مانبيش نطلع ومانبيش نشوفه ... مش انتم شفتوه وعجبكم وقررتو ونفدتو ؟ خلاص مافيش داعى لرئى طالما هوا زايد ناقص ... وانتى اكتر وحده تعرفى رائى شن هوا ... فاصدقينى رائى فيه مش رح ينقص ولا يزيد ..
امها ... يعنى شنى قرارك نهائى ؟
رنا .... اى .. هونى بوى ومحمد فيهم بركه والخير ...
امها ... اوك ... من باب العلم اخته هما بكرا جايين .. وزيدى فكرى تطلعى او لا من توا لبكرا ... وبوك بى طلعتك او من غيرها رح يقرر وينفد وانتى عارفه ..
رنا ... اووووووف .. خلاص اطفى ضى وسكرى الباب وراك الباب
امها ... تصبحى على خير ..
وهنا رنا تلفتت جيهت روشن وتجاهلت كلام نظارت امها ليها ... واول ماطلعت امها من دار انهارت بالبكى لاحساسها ان اكل شى انتهى بالنسبه ليها ....
بس ياترى ... هل هادى نهايه حبها ؟ و رح تستلم للامر الواقع ؟ او انها رح تكافح ؟ وهل رح يتقبلى قصى وجودها فى حياته ؟ او رح يكون الجبل التلجى البارد قدام بركانها ؟ .. كل هالشى رح تشوفوه فى حلقات القادمه بعون الله من ........ صغيره على الحب ..
يتبع
