الحلقه التالته عشر ..
حوش بسرعه وركبت لدارها ... وخشت للحمام ... وفتحت دوش وخشت تحته وقعدة تبكى ... وفرغة كل طاقة الدموع منها ... واول ماحست روحها ارتاحت شوى ... لبست روب دوش وطلعت ... وفى اللحظه الا طلعت فيها من الحمام ... طقت الدار خبطين ... وانفتح الباب ...
سيرنا ... مدام فى ضيفه اسمها نسرين فى صاله ..
رنا ... نسرين ؟ شن جيبها ان شالله خير ...اوك توانى وننزل ضيفيها لين ننزل ..
سيرنا ... اوك مدام ...
وطلعت سيرنا وخلت رنا تبدل فى ملابسها ...
وبعد عشره دقايق نزلت ...
رنا .... اهلييين حبيبتى شرفتينى والله ونورتى بيتى .
نسرين ... نو نورك حبيبتى ... والله استغربت من تصرفك امس لما مشيتى فجأه وخفت عليك وقولت خلى نطمن عليك .... ونعزمك مره لاننا مدايرين حفلة باربكيو وعازمين جيران كانوع من تعارف ... فالو حابه تنضميلنا بكرا نتمنى بجد ..
رنا .... والله نتمنى بس نسأل قصى ونرد عليك ...
نسرين .... اها اوك خلاااص معناها مادما اطمنت عليك انى خلينى نمشى لان وراى ستين الف شى واولهم مشوار سوق ... شن رايك لو فاضيه تمشى وتسايرنى ؟
رنا .... والله كيف كنت فيه ... فى سوق قريب منا هنا تمشيت لين وصلتله ... بس خليك نهدروز ونحكو وعند العشيه بطولها شن رايك ؟
نسرين .... والله ماعارفه شن نقولك بس انى بروحى خلى ضيق يالله نقعد والا يصير يصير اخرتها موت هههههههه
رنا ..... ههههههههه اى والله .... شن مخططه لحفلتك بكرا ؟ وكيف خطرت فى بالك
نسرين .... والله نحكو انى ومحمد ... مهم قال تعرفت على عيله تانيه كويسين قراب مننا من جيهه تانيه مهم ... قالى فاقررت نديرو حفله تعارف لعل وعسى نمشو ونجو على بعض .. اهو نوع من الونسه وتوطيد العلاقات فى نفس الوقت ... وانى نوع راجلى اجتماعى جداااااويحب ناس ..
رنا .... عكس قصى ... انى قصى يحب العزله والاماكن الا مافيها ناس كان يلقى يقعد بروحه ...
نسرين ..... اها معناها هدا علاش اسكنتم هنا ... ابتعدتو على الناس قدر الاماكن .
رنا .... ههههههههه هكى شى ... بس انى عكسه ... نحب ناس ونحب والتعارف والاصدقاء ....
نسرين ... باين عليك ... يالله ربى يخليكم لبعض يارررررب ..
رنا ..... نسرين بنسألك سؤال خاص ...
نسرين ... ان شالله خير تفضلى حبيبتى ..
رنا ..... علاش مافكرتوش يكون عندكم عيل يملى الفراغ الا ببنكم ؟
نسرين ..... ااااااااااه رنا فتحتى على جرح كبيررررر ... نتمنى انى وهوا ... بس للاسف ... فى يوم دار حادت ... ومنها دكتور قاله عندك امل ضعييييف جدااااا انك ترزق بااطفال ...
رنا .... ولايهمك حبيبتى ... طب تطور والعلم تطور واكيد فى حلول
نسرين .... مافى شى وماحاولناش معاه ... وخلينها على ربى فى الاخير وخلاص ... يالله نخليك توا وبكرا مع ساعه 6 العشبه خلينا نتلاقووتعالى انتى وزوجك
رنا .... ان شالله خير حبيبتى
نسرين .... اوووك سلام
رنا .... سلام ...
طلعت نسرين ... وركبت رنا لدارها ... وحطت سى دى فيروز ) زعلى طول ان وياك ( ... وطلعت من شنطتها كتاب كانت جايبته معاها وماكملتاش للكاتبه احلام مستغامى بعنوان احببتك اكتر مما ينبغى .... وبدت تتصفح فى اوراقه لحد ماغالبها نعاس ورقدة ومافاقتش الا على صوت كندرة قصى فى دروج ومفاتيحه الا يضربو فى بعض ...
وهنا طلعت من دار تجرى ومبتسمه وفتحت باب غرفتها ووقفت تشبحله ... بينما هوا تجاهلها وكأنها مش واقفه اصلا .... وكمل طريق وخش لداره وسكرها وراه ...
وهنا قعدة مصدومه من ردة فعله بعدين قررت تخش لدار وتكلمه ... واول ماوصلت فم الباب طقت طقتين وخشت ..
رنا .... ممكن نخش ؟
قصى .... شن فى ؟
رنا .... علاش تجاهلت وجودى ؟
قصى ... وعلاش نعطيه قيمه ... فى فرق بين الاتنين ؟
رنا .... مش رح نسألك علاش تتصرف هكى ... لانى مش متوقعه منك رد ... بس حبيت نتطمن عليك بعد ليلة امس ..
قصى ... علاش امس شن صار
وناض من سرير بعد مافك كندرته وشخشيره ... وفك ساعته وحطها على كمدينو .. وفتح دولاب وهوا يسمعلها ويطلع فى حوايجه ..
رنا .... انت مش متدكر اى شى ؟
قصى ..... انتى جايه تسألينى انت شن متدكر ؟ لامش متدكر اى شى ... واخر شى متدكره انى ركبت لدارى باش نرقد ... وخدى حوايجه وخش للحمام وسكره وراه ...
رنا .... فى حفلة تعارف جيرنا مدايرينها ليبين وجو اليوم عزمونا ... نقدر نمشى وانتى معاى اكيد ؟ انى مليت من تقعميزة الحوش ..
وهنا قصى اكتفى انه مايردش ويخليها تحكى بروحها ...
رنا .... من فضلك ممكن ترد عليا ؟ حفله بكرا العشيه وانى بجد حابه نمشى
وقصى .... اكتفى بصمت ...
وفى اللحظه هيا قعدة تتمتم بينها وبين نفسها ..
رنا .... كيف توقعت انى اصلا بكل غباء انك توفق ... انت هوا انت ورح نندفن هن لين نموت ...
وطلعت وسيبت دار وخشت لدارها ... على امل انه يوافق ...
وبعد توانى طق الباب فاانتفضت بالفرح وواست شعرها وبيجامتها وقالتله
رنا .... تفضل ..
سيرنا .... مدام الغدى واتى .
رنا .... هوا انتى ... والله بديت نكلم فيك ونشوف فيك اكتر منه شينك عيشه وخلاص مانبيش نأكل
سيرنا ... اوك مدام ...
ونزلت .... وبعد شوى نزل قصى وقاللها ...
قصى .... وين مدام ؟
سيرنا .... مدام ماتبى تأكل
قصى .... فطرت هيا ؟
سيرنا .... لا لا مدام مافيش فطور مافيش غداء ...
قصى .... اوك ... ركبيلها صفرتها فوق ...
سيرنا .... اوك
ووتت صفره وركبتها فوق وخشت بيها ليها ..
رنا .... من قالك تركبيلى الصفره فوق انى قتلك مانبيش
سيرنا .... مستر قصى ...
وهنا رنا قعدة تفكر شوى بعدين قالت لى سيرنا ...
رنا .... لا لا مانبيش ناكل شى .... خلاص اطلعى ...
ودارت روحها منهاره بالبكى .... على امل يركب يكلمها ...
بس اول مانزلت سيرنا وحكتله الا صار قاللها ...
قصى ... اوك خلى صفره فى مطبخ ولو جاعت رح تنزل تاكل
وكمل غداه وركب لغرفة نومه يرتاح بس قبل مايركب قاللها ...
قصى ... انى تعبان شوى بنركب لغرفتى فوق ومانبى حد يزعجنى لحد بكرا
سيرنا .... اوك مستر
ركب قصى فوق واول ماوصل غرفتها كمل طريقه عااااادى وخش لغرفته ... وهيا قعدة تراقب فيه من تحت شق الباب على امل انه يخش .... واول مايأست ... طلعت من دارها وقعدة ماشيه جايه فى ممر باش تدور سبله تقنعه بيها انها تمشى .... لحد ماخطرت فى بالها فكره عبيطه ... فا مشت جيهت دارها ودارت روحها كيف بتطلع ... واغمى عليها طاحت تبرزمت ....
واول ماطاحت واتبرزمت .... قعدة اكتر من تلاته توانى طايحه وهوا ولاعبرها .... فافتحت عين وسكرت عين وقعدة تشوف يمين يسار ورجعت وقفت .... وقربت جيهت داره لعله ماسمعش تبرزيمه ... ومره هادى قررت تركب فوق الكرسى وتطيح من فوقه باش تجى طيحه اقوى ويسمعها .... وبالفعل ركبت فوق الكرسى .... وكيف بتقول
رنا .... 1 2 3 ... وبتنقز ....
وهيا كيف رجل على هوا ورجل على كرسى فتح الباب وطلع وكان باله فى شى تانى لحد ماقام عينها ولقاها متشنقله فوق الكرسى ... وفى لحظه هيا نزلت عليها دمعة ماروكو او سبنك لما يكون متزرط وتجمدت مع بعضها ... وحاولت تطلع بجمله مفيده من وراء موقفها صعب ..
قصى .... شن تديرى فوق الكرسى ؟
رنا ..... امممم اممممم ... احم احم .... ندير فى شوى تمرينات رياضيه ...
قصى .... تمرينات رياضيه فوق هالكرسى الا جنب دارى ؟
رنا ..... عندك مشكله ؟
وبدت تتمرن على اساس ... واحد اتنين واحد اتنين .... يع يع يع يع ..... وه وه وه وه ... احد اتنين واحد اتنين .... هروله فى محل ..... فتح ضم فتح ضم ....
وهنا هوا قعد يشبحلها وبجد مستغرب .... طفله ؟ طفله فى مخيم صيفى .... ومشى وسيبها ونزل باش يجيب حاجه من سياره ...
رنا ..... شيت شييييت عباش اطلع لما بنفد الفكره .... بس الحمد لله والله انى عبقريه كيف طلعت بالفكره هههههههه نهببببببل يامحلاااااانى .... بس توا شن الحل .... اها على اساس توا دروحنى كنت نتمرن وسخت .... وهوا يجى يقيمنى ويسخف عليا ويقولى امشى ياهووووووووو
تمااااام حسه سكر الباب ..... تمااااام .... بيركب بيركب .... يالله دروحنى صايخه ... واحد اتنين تلاته .....
وجت فى وسط اللممر ودارت روحها متلوحه وصايخه ... وفاتت دقيقه الاوله والتانيه والتالته والراجل مافيش لاصوت لاحس لامس .... وهنا رنا ضربها خنس بعد هالهدوء مفاجئ والا توقعت منه انه نزل فى نص طريق وخش لدار مكتب ..... ولكن احتياطيا .... فتحت عين وسكرت عين باش تعرف وين مشى .... واول مافتحت عينها .... جتها صدمه تلاتية الابعاد ....
قصى ..... )قدام وجهها ( ..... شن ديرى ممكن تشريحلى الوضع الا انتى فيه ؟
وهنا رجعت غمضت عينها وتمنت الارض تنفتح وتبلعها او حد يرد بدلها ويطلعها من هالموقف السخيف بس لقت روحها مضطره ترد وتواجهه ... فافتحت عيونها وقعمزة وقالتله بعد صمن لعدة توانى ...
رنا ... اووووووووف شن هالحوش هوا الواحد ماياخدش راحته حتى فى ممر
قصى .... تبى ترقدى فى ممر وتاخدى راحتك ؟ انتى بجد مجنونه او عندك فيوز مهناكش ؟
رنا ..... لو سمحت لووووووو سمحت انى اعقل وحده فيكم ... وهادى ياباش مهندس يقولوها يووووغا .... وانى حاليا نطبق فى تمرين اليوغا للاسترخاء ... وهوا صح يطبق وانتى مقعمزه ... بس الباين انى استرخيت فوق لزوم بس وصحيا هدا هوا مطلوب ... فهمت توا ؟
قصى .... باهى ممكن تاخدى بعضك وتسترخى فى دارك وطبقى هالتمرين لين تكتفى ... بس لو شفتك هنا تانى بى هالمنظر صدقيييينى مش رح نتردد لحظه فى انى نبلغ عليك مستشفى الامراض العقليه .... تفهممممممى فياااااااا ولانعيط ؟
رنا ..... نفهم فيك خلاااااااص ... شن هالحوش دكتاتورى مافيش اى شى تديره براحتك
وخشت وقربعت باب الدار باايدها ..
هنا باءت كل محاولات رنا بالفشل واقتنعت باانها خلاااااااااص مش رح تمشى ...وطلعت للبلكونه وقعمزة تقرا فى الكتاب ... وفاتت ساعات ورا ساعات ورانا قافله على روحها الدار وسارحه فى كتابها وبين افكارها الا تودى فيها وتجيب .... لحد ماشافت لساعه لقتها ساعه 11 فى الليل ...
فاخشت من البلكونه ... وتوضت وصلت العشاء ... وقعمزة تدعى لربها يحنن قلبه عليها ويخليها بكرا تمشى وتشوف ناس جديده .... وبعد ماكملت دعائها قامت صلايه وخشت لسريرها ورقدة .. ومافاقتش الا مع ساعه 1 ظهر على صوت سيرنا ..
سيرنا .... صباح الخير مدام ...
رنا .... صباح الخير ... ساعه كم توا ؟
سيرنا .... ساعه 1 ظهر ...
رنا .... خيرك مانوضتنيش على فطور ؟
سيرنا .... مستر قصى قالى ماتنوضيها واعطانى باكو هوا انسلمهولك ...
رنا .... اوك برى وتيلى فطورى وخليه ...
وهنا خدت رنا صندوق وفتحاته ... فالقت فيه بدله بسيطه متع حجاب وراقيه تناسب ماشية عشيه ومعاها ورقه مكتوب فيها ..
قصى .... رح تلقى سواق ساعه 6 يستنى فيك باش يحطك .... وساعه 9 ياخدك ...
رنا ..... ياهووووووووووو واخيراااااااااا رح نمشى انت احلى شرير فى العاااااااالم ...ههههههههههه .... وقعدة تنقز فوق سرير زى مجنونه
