سلااام غبرت هاد الشهر سمحولي كان عندي بزااف مايدار
انا انكمل ليكوم قصتي
- - - - - - - - - - - - - - - - -
الصراحة الحياة ضلامة فعيني ملي ماتت ماما حيت كانت هي
سببي فالحياة عمرني تخيلت بلي اعيش شي نهار بلا
مانشوفها
تغيرت بزااف كانفيق كلبس اي توني او سبرديلة او نخرج
نبقى غير كنتمشا مرة كلقى راسي حدا الجبل دال طريق
حي صيناعي لي بحي النهضة ، مرة حدا لبحر ديال الرباط
كل مرة او فين غادا ، ماشي انا لي كنقول فين نمشي
رجلي لي كايبقاو غاديين تا كانوصل لشي بلاصة نجلس كنت
الوقت كولو ساكة
القراية مابقيتش حطيت فيها رجلي ، داز شهرين على هاد
الحال ، عيطات ليا عمتي و قالت بلي اتعطيني كل شهر
1000 درهم باش الى خصاتني شيحاجة او جابت لي
الفلوس فداك الشهر ، كيف شديتهو هزيت منهم 100
درهم او مشيت للتيران نتفرج ف الرجاء 💚
حسيت بلي هاديك هي بلاصتي و بدات الفرحة كدخل لقلبي
ولا اي ماتش كانلبي توني او نمشي للتيران ، خواتاتي
عمرهم سولوني فين غاديا ولا فين جاية دازت الايام
واحد نهار كانت الرجاء لاعبة بمدينة الحسيمة و مقدرتش
مانمشيش ، تافقت معا البنات و دراري ديال كازا لي
كنعرف باش نمشيو بالكار مجموعين نوصلو نتفرجو او رتاحو
فشي بلاصة و الرجو ، المهم خاص القليلة خاصنا يوماين
مشيت جمعت صاكي فيه حوايجي او فلوس او خرجت نيشان
للمحطة بن زيان تجمعنا مشينا وصلنا و تفرجنا المهم دازت
زوينة
ملي رجعت للدار لقيت القربالة نايضة العائلة كايقلبو او
خواتاتي مع العلم قلتها ليهوم مي قالك صحاب ليهوم كنضحك
او ما انمشيش و ختي علمات عند البوليس المهم روييينة
كلشي فداك الوقت بغا يتحكم فيا او العائلة فين كانو عاد
جايين كيبغيو غير يتشفاو
المهم داز داك النهار فصباح جات ختي لكبيرة قالت ليا شوفي
عمتي عيطنا ليها او ما بقاتش اتعطيك لفلوس و قالت ليا
بلي اتزوج هيا و ختي او كل وحدة اتمشي لدارها و قالت
ليا نتي خليك ساكنة هنا مع جدة وحنا ديما انبقاو نجيو عندك
هضرتها ماعنات ليا والو حيت ماكنتش كنبقا نهضر بزاف او
نقوليها شرحيليا صافي تزوجو انا مالي
دازت الايام بزربا ادي نسرع شوية حييت كل يوم فيه قصة داكشي بزاف
المهم ختي دارت العرس صغير فالدار خطوبة يعني وقفت معاها ف اي شي وقفة ديال الرجولة تادازت دوم الأيام
ومشات لدارها من وراها بشهر ختي لكبيرة تهية تزوجات او مشات لدارها
او انا بقيت عند جدة فالدار ، فوقت قل من سيمانة ، جات عندي جدة قالت ليا جمعي حوايجك او سيري عند شي ختك سكني معاها انا باغا نسد داري و نمشي لدكالة لبلاد يعني
ما عرفت ماندير عيطت لخواتاتي بزوجهوم قالو ليا حنا يالاه تزوجنا ماعدنا كينديرو ليك سيري عند شي صاحبتك اولا انعيطو لجدة نهضرو معاها
جات عندي جدة مور ساعة قالت ليا شوفو ماتعيط لا لختك لا لعمك هزي حوايجك او خري ليا من داري ماعندي ماا ندير بيك اتزيديني غا بالمصروف
- - - - - - - - - - - - - - -
معاملة ديال خواتاتي كانت خايبة بزاف ما بغيتش نتفكرها او
نكتبها حيت عارفة بلي ايبدا يتكون ليا الحقد من جيهتهوم
