سر القلاده

وجدتها !!!

اخذت جوالي ورحت المطبخ بسرعه خفت على اخواتي ..دخلت المطبخ وهنا كانت الصدمه شفت شخص طويل اسود نحيف واطرافه طويله وكان بشع بشكل مرعب .. غمضت عيوني بقوه وكتمت الصرخه في داخلي .. فتحت عيوني ولقيته اختفى .. ركضت لغرفتي والدمعه في عيني وقلبي ينبض بسرعه .. قفلت الباب واتصلت على ابويه وما يرد اتصلت اربع مرات ولا رد واستمريت اتصل الى ان رد ويوم رد قال: وش فيك ..قلت عرفت وش صار لأمي .. قلتها وانا منهاره والدمعه في عيني ..قال: وش صار وليش خايفه يا بنت .. قلت تعال ..تعاال .. قال: مسافة الطريق وانا عندكم ..قالها وهو متردد وما كان وده يجي .. فجأه حسيت في شي بارد يلمس رقبتي ويهمس في اذني بطلاسم .. لفيت راسي بسرعه اناظر ولا شفت شي .. طلعت من الغرفه ورحت غرفة اخواتي وقفلت الباب .. انتظرت ابويه ساعتين والمشكله ان بين بيتنا والمستشفى ثلث ساعه .. اتصلت على ابويه و رد ..قلت له وينك وانا معصبه قال: ليش وش فيك .. قلت : لي ساعتين انتظرك .. قال: ليش تنتظريني قلت لك ما بجي الليله .. انا هنا عضيت لساني من الصدمه.. وقلت : ابويه انت كنت نايم قبل شوي ..قال: لا ليش .. قلت اتصلت عليك مية مره ولا رديت .. قال: ماجاني شي .. قلت: بسرعه ((تعال)) قال: ليش .. قلت: بسرررعه .. جا ابويه بعد نص ساعه جا عندي قلت له اللي صار كله .. وجه ابويه ما تغير كأنه عارف وش فيه.. سألته وانا متردده : ابويه ايش اللي شفته واللي شافته امي ..رد وقال: لا لا ما..مافي شي وكان خايف وهو يجاوبني .. رحت انام وتطمنت بما ان ابويه موجود في البيت نمت وحلمت في اشياء ما يفهمها عقل بشري قمت وانا مفجوعه .. حصنت نفسي وبعدها قمت تجهزت للمدرسه وانا احس اني في عالم ثاني من الأشياء اللي شفتها في الواقع والحلم .. رحت المدرسه و دخلت الفصل وجلست فجأه كلهم يناظروني .. نادتني الابله وقالت: فيك شي صار لك شي .. رديت بسرعه وقلت.. لا!! ليش؟ ..قالت: انتي قولي لي ايش صاير لك.. ليش على رقبتك كدمات .. قلت بصوت عالي .. اييش!!!؟ ركضت للحمامات ويوم وصلت للمرايه هنا كانت الصدمه .. رقبتي كان لونها ازرق كأن احد خنقني .. رحت عند المرشده واستأذنت .. جا ابويه اخذني.. قلت رجعني البيت وانا متوتره وخايفه من ابويه .. رجعنا البيت غيرت ملابسي وتمددت على السرير فجأه حسيت شي تحتي وسحبته.. لقيت تحتي قلاده فيها حجر كريم .. ناظرت فيها بتركيز .. ولقيت احرف على الحجر الكريم وكانت مو واضحه بس قدرت اقرأها بس الحروف ما تشكل كلمه مفهومه