حليت ليه لساني وانا دارسة الخطة مزيان .. وحاسبة الخطوات ديال زاهية من الباب ديال برا لباب ديال داخل .. وهو باقي متردد ... حلات زاهية الباب .. ودار يشوف شكون .. وانا بخفة غير متوقعة هزيت يدي لسما وخبطتها ليدو لي هاز فيها الموس ولحسن حظي هي لي كانت فيها عضتي .. من الألم طلق الموس ودفعتو برجلي ومع كنت جابدة شقف ديال المرايا فيدي حطيتها ليه نيشان على عنقو بإحكام ,, غير هو لي يعرف للإجرام .. زاهية داخلة مصدومة الظاهر جنونها مشاو معاها وكلهم فدار غفلون
- زاهية .. هانتي لا تقولي مخلية بعبولة فدار .. أش بان ليك ندوز عليه ونديروه يتشوا .. راه طلعات ليا صوبة فالراس
- زاهية : شكون هداك ؟
- أنا : وشكون عرف .. لقرد لاخور .. واش ماعمرك سمعتي بلي الهاجم يموت شرع .. تهز يديك على لالاك بنت سيدك تعطيك الطرش وتزيدك
- هو : غاصبري عليا أبنت شارفة .. إلى مادفنتكش وانت حية أنا ماتسماش
- أنا : واش بصاااح ؟؟ قالك إكرام الميت دفنه .. أما أنا مغانعطيكش هاد الشرف .. من بعد مانشبع منك نعطيك لكلاب يقددوك
- زاهية : سكتي نعرفو شكون هو بعدا
- هو : أنا أشارفة هو لي غاتكون موتك على يدو .. انت وهاد الحشرة
واخا حاطا ليه شقف ديال المرايا على عنقو ..زعايمي لاخور طيرني بيدو بحال شي كاشة عامرة بالغبرة .. جا راسي على رجل ديال طبلة .. أما هو وقف وزاد عند زاهية مكمل هضرتو
- هو : أنا هو مول دار جديد ومن ليوم مابغيتش نشوف الحتالة ديال وجهكم فداري ... راه سيفط ليك إنذار مع جدارمية شهر لي فات ..يالاه يالاه جمعو عليا شطايطكم ودركو عليا زلايفكم
- زاهية : ولكن في غانباتو فهاد ليل ؟؟
- هو : فالخلا وجلا .. فجهنم الحمرا أنا مالي
- زاهية : صبر علينا غير تا لصباح
- هو : دقيقة هي لي نعطيكم .. هدا إلى مابغيتوش نلوحكم بيديا
- زاهية : دقيقتك بخر بيها ... دنيا جمعي الوقفة ويالاه نخليوه فهاد الخربة بوحدو كي طيرا بقر
أنا بقيت غير كنتفرج فيهم أو هادي هي زاهية لي قالت ليك مكاينش ولد المرأة لي يخرجها من هاد دار .. تا أنا ماشي من العاكزين مشيت كنطير جمعت حوايجي فالميكة لي كانو فيها وتبعت زاهية لي مادات معاها تا باش تنقي سنانها .. غير خرجنا وهو يزدح من مورانا الباب ..
- دنوبي وخرجو فيك أزاهية .. تا تلاّت بيك ليام وجا نهار ويتزدح عليك الباب..
- واش كتشفاي فيا
- حاشة ... مابيني وبينك غا الخير .. يلاه نخليك نمشي بحالي .. المسامحة
- فين غادة فهاد ليل وفهاد جبل
- كيفاش فين غادة .. راه جابني عندك با الله يسمح ليه باش نسكن معاك ماشي باش نتشرد معاك فزناقي ... زاهية تلاحي من قدامي وسيري تكمشي من تحت شي شجرة راه البرد عليك
ضرت وخليتها وما حسيت غير بشي حاجة كاتجرني من ظهري وباغا تقسموليا على جوج .. وكل مكانقاوم كاتزير عليا ... وفرمشة عين ولات زاهية قدامي .. وشدات ليا بداك لقطبان المصديين ديال صباعها وجهي تا حسيت بيهم غايدخلو فيه
- واش دخول لحمام بحال خروجو .. باك عطاك ليا ماشي سكنك معايا .. ندير بيك لي بغيت .. وداك تفلفيل ديالك قلتليك كلعيه منك
- آآآه قوليهم يطلقو من ظهري ونهضرو
- ماعندنا فاش نهضرو .. هضرتنا هنا سالات ... مناقصني همك تا نتي نزيدو براكة عليا غير هاد (طيييييط)...
مشات وخلاتني .. أوف ترددت واش نتبعها .. ولكن جنونها شاديني من جهة لي ضارني .. مشينا تحت واحد شجرة مقابلة مع دار وجلسنا لا هي لي جلسات أما أنا تكسلت .. مع عظامي كلهم كايضروني يخ ماقدوني إنس تزادوني جنون ..
- أجي انت أش كاتشوفي ؟
- كانشوف البعابع .. كيفاش شكانشوف
- كنتي قلتي ليا غايجي راجل وهاهو جا
- والله إلى بصح يااااااه ... وليت شوافة أستغفر الله .. دابا كنشوف .. بلاتي نشوف ... غييير كبي لما على كرشك أزاهية سيد بط نبت وناوي على خزيت ..ههه غير كنضحك بلا ماتحرشي جنونك عليا تاني ... دابا أش غاديري فهاد خونا فالله
- تا نتي جاو عشرة قبل منو .. وكلهم دارو نفس التصرف .. وقبل مايطلع نهار خرجو كايجريوا بالغوات .. تاهدا غايكون بحالهم .. غير تفرجي
- (بتنهد)كنتمنى .. تصبحي على خير
دورت وجهي وماحسيت براسي إمتى قطعت ... واخا كان البرررد ولكن العيا كان لا يوصف · · ·
YOU ARE READING
المنفى_الغريب
Юморhello this is my first story but she isn't my own story okii...... #moroccan_storie قصة واشمن قصة كوميدية 100% .. الضحك والتقشاب وزيد عليها روح المغامرة.. اكيد غادي تكون بلمسة رومانسية عنوان القصة: #المنفى_الغريب للكاتبة : #asmae_ely ...
