بعد اسبوع اتصلت بي سما .. اجبت : الو !
سما : مرحبا شهد شلونج .
شهد : الحمد لله تمام ، وانتي ؟
سما : الحمد لله .. اتصلت دا اكولج باجر نزور دار المسنين ونسويلهم احتفال وكذا ، تجين ؟
شهد : اكيد اجي ، اي ساعه ؟
سما : التجمع ساعه 8:30 بالمؤسسه .
شهد : اوك ، بيباي
سما : بيباي .
كنت فرحه جدا لانني سأرى يوسف مرةً اخرى وكذلك لانني سأساهم غدا في رسم ابتسامه على وجوه المسنين .
قمت بتحضير ثيابي قبل النوم .. وايضا بتوقيت منبه هاتفي لكي استيقض مبكرا ..
في الصباح رن هاتفي عند الساعه السادسه .. استحممت وارتديت ثيابي ؛ تنورة طويله باللون الازرق الغامق 'نيلي' وقميص سمائي ، ارتديت حجابي الابيض ذو الفراشات السمائيه وحقيبتي وحذائي الابيض ..
قمت بوضع كحلتي واحمر شفاهي الزهري .. وتوجهت الى الاسفل .
كانوا ابي وامي وعلي يتناولون الفطور .. قلت : صباحوو .
ابي : صباح النور .
علي : صباحو ام كفشه .
قلت : بابا كوله ليكولي ام كفشه .
امي : لتدوخونا من الصبح .. شهد وين رايحه من الصبح !
قلت : عاا سوري نسيت اكوللكم البارحه اتصلوا بيه المؤسسه وكلولي لازم تجين باجر لان ديسون احتفال بدار المسنين .
امي : شهد صعدي لغرفتج بدلي ملابسج ونزلي ساعديني بشغل البيت بدال متضيعين وقتج بأشياء تافهه .
قلت : بابا حبيبي احجي وي ماما الله يخليك .
ابي : روحي حبيبتي معليج بيها .
نظرت امي لابي بطرف عينها وقالت : معليها بيه مو 😒 مو باجر الي يتزوجها لبنتك يرجعها عليك ثاني يوم .
ابي : وليش ديرجعها هو وين يلكا مثل بنتي اصلا .
امي : ليش ديرجعها ! متعرف تسوي اي شي بالبيت ولا تعرف تطبخ متكولي لعد ع شنو متزوجها .
ابي : تتعلم بعدين .
نهض علي ليقول : الحمد لله ، اني رايح لكليه .
قلت : علي حباب وصلني بطريقك .
علي : يلا كومي بسرعه .
امي : الله يحفظكم .
اوصلني علي الى مقر المؤسسه .. توجهت للداخل كان يوسف فقط موجود هناك !
جلست على احد الكراسي المتواجده في المكان بعد ان القيت عليه تحية الصباح .. اجاب : صباح النور .
شهد : اشو ماكو احد !
يوسف : احنا جايين من وقت لساتها ساعه 8 .
