اعترف مجنون في حبك رغم عقلي الكبير

١

في فيلا أبوعبدالمجيد..
الساعه وحده الفير..
وكل الانوار بالفيلا طافيه ما عدا الحديقه وصالة الدور الثاني اللي كانت الاناره فيها خافته

صعد عبدالمجيد الدري بخطوات هاديه ومتعبه..مر عالصاله وشاف التلفزيون شغال على قناة توب موفز..ويارا منسدحه عالقنفه ونايمه ببيجامتها الحرير الوردي قميص وشورت صغير..راح لها ونزل لها ومسك ايدها: ياارا..ياارا

يارا فتحت عيونها وابتسمت لما شافته: همممم عبدالمجيد؟؟
عبدالمجيد ابتسم : ئي..شمقعدج لهلوقت؟؟ وليش طالعه ببيجامتج جذي؟؟
يارا ابتسمت وهي تتعدل وترفع شعرها بأهمال: كنت بنطرك وما حسيت بنفسي ونمت..
عبدالمجيد باهتمام: ليش تبين شي؟؟
يارا رجعت قعدت بتوتر: اممم كنت باخذ رايك بسالفه..امممم..اممم
عبدالمجيد رغم تعبه يا وقعد يمها لما حس بجدية الموضوع: يارا شفيج؟؟ صاير شي ما أدري عنه؟؟
يارا رفعت ريولها لصدرها وضمتهم: اممم قالك أبوي أن عمي خالد خطبني لمشاري لما أبوي خطب أمثال لراكان!!

عبدالمجيد تنهد وهو يفرد حواجبه بأصابعه وينزل غترته وعقاله ويبطل أزارير دشداشته: قالي..بصراحه ما توقعت أن عمي يختارج أنتي..معنج الصغيره..كنت حاط ببالي ورود!!

يارا بقلق: انزين عبدالمجيد أنا خايفه..مشاري وايد عود علي..أنت احسك أبوي اشلون اهو أكبرك منك بسنتين

عبدالمجيد ابتسم لآخته الصغيره المدلله عنده ومسح على شعرها: خلاص قولي أنج ما ارتحتي وارفضي

يارا تنهدت: أبوي موافق وقالي فكري ولا تنسين أن قرارج بيأثر على خطبة أخوج..وعلى علاقتي بأخوي

عبدالمجيد ابتسم: شوفي أنا مشاري أعرفه
..سألي مساعد عنه اهو يشوفه بالمستشفى على طول..الكل يمدح بأخلاقه وطيبته وحنانه على خواته..أنتي فكري وقرري

يارا بتردد: ما أدري عبدالمجيد ما أدري أحسه وايد عود..اممم يعني تقريبا بيني وبينه ستعش سنه

عبدالمجيد بهدوء: صح بس مشاري ما فيه أي عيب..ومثل ما قتلج الرأي الاول والاخير لج

يارا تنهدت: أبوي وراكان وريماس وريان موافقين..أما أمي وورود ومنتهى ما عرفت موقفهم شنو؟؟

عبدالمجيد وقف: أحسن شي قومي صلي واستخيري وفكري عدل ونامي وإن شاء الله..الله يكتب لج اللي فيه فيه الخير

يارا ابتسمت..وقفت وباست خده: آوك بوووون وي..
عبدالمجيد ضحك وهو يمشي لغرفته: هههههههه بون ويي ولا تطلعين بلبسج جذي مره ثانيه اوك

يارا ضحكت ودخلت غرفتها وانسدحت بفراشهاا ونامت..

في فيـلاا أبومشاري..
الساعه ثنتين الا ربع الفير..

بغرفة ريماا

كانت قاعده عالنت بين المنتديات اللي مشاركه فيهاا ومندمجه حدها..الاضاءه خافته الا من نور الابجوره الأصفر والتكييف البارد والظلام يلف المكان