حفر حفره وطاح فيها

الجزء الأول:

يطالع الظلام حوله..يحس بالجو البارد..هواء بارد خفيف ع بشرته..قعد يطالع النار اللي جدامه ..مشعلينها الشياب (يقصد ابوه واصدقائه واعمامه) عشان تدفيهم وبنفس الوقت تحميهم من الذياب او الدببه او اي حيوان مفترس يخطر عالبال..هو قاعد بمسافه مناسبه تبعده عن النار وتدفيه بنفس الوقت..بعد عينه عن النار ويالس يطالع الشباب اللي قاعدين بدايره محاوطين النار.. ملتزقين فبعض عشان يقدرون يحسون بحرارة النار ع جسمهم..تقريبن نصهم عيال عمه ونصهم عيال اصدقاء عمومته واصدقاء ابوه واصدقائه واصدقاء امهاتهم..

السالفه ومافيها اصلن كانت فكرته هو و اصدقائه انهم ياخذون اجازه ويسافرون فيها..وطبعا ابوه مافاته اول ماسمع عن السفره ولانه يحب السفر والطلعات..خطط هو واهله واصدقائه وفكروا يسافرون جماعه..تقدرون تقولون ماخذين طياره بكبرها حقهم بس ..اقصد من كثرهم..

يطالع عيال عمه في منهم يعرفهم وفي منهم مايعرفهم..ومعنهم عيال عمه بس علاقته فيهم مب قويه.. وهالشي يمكن لانه وحيد امه واوبوه..فتعود يكون لوحده..ومايحب يتكلم وايد..بنفس الوقت في من عيال عمه علاقته فيهم زينه..او نقول علاقته زينه مع اللي مستواهم المالي والاجتماعي قريب لمستواه..ابوه اغنى واحد بالعايله وراه عمه مايد..والباقي تقريبن مستواهم الاجتماعي هب لهناك..يعني اهتمام بأنه يكون له شخص قريب له سواء كصديق او غيره ..مب شي مهم بالنسبهله..اصلن ماعنده اعز صديق او شخص مره عزيز ع قلبه..ومع هالشي كل ماكبر بالعمر كلما قل اهتمامه بكل شي..يعني كلما كبر كلما صار اكثر برود واقل اهتمام لعلاقته بالناس..

رد يطالع ربعه وعيال عمه بملامح عاديه او لا مبالاه...مب لانه مايبا يشاركهم بسوالفهم بس لانه ماعنده شي يضيفه او مايهتم يضيف شي..رد يطالع الظلمه حوله..قاعدين بنص الغابه..بفلوريدا..حولهم اشجار..وجدامهم نهر..والجو صقيع..انتبه للحشره حوله..في اكثر من نار ..عند كل خيمه نار..عند خيمة الحريم وخيمة البنات وخيمة الشياب وخيمة الشباب ..الخيمات تقريبن بعاد عن بعض..خيمة الشباب مابين خيمة الشياب والحريم وبعدين خيمة الحريم و اخر شي خيمة البنات..

بقلبه: وها ابوي مانسا حد ماعزمه؟..

قاطع افكاره صديقه جاسم: بيبسي ميرندا ولا شاي ولا قهوه؟

ياسر: بهالبرد..طبعا قهوه..

جاسم.. بدا يصب القهوه بالفنيال ومده له..ياسر بدا يشرب وهو يسمع الشباب فتحو موضوع جاد..

علي: انزين اليوم وانا يعني اتمشى وجي شفت ولدين لاويين فبعض..شو صار بالناس؟

سعيد: ياهووو يا انت؟ حنا فبلد اجنبي وهني اظن عندهم حريه شخصيه..يعني لا تتوقع اي حد بيعترض يوم يشوفون نفس هالمناظر..

علي: لو انا مني..وقاعدين فبلدي لاشرشحهم تشرشيح ماينسكت لهم..

ياسر بدون اهتمام ولع سجاره وبدا يدوخ..يوم انتبه لبنت عمه ساره اللي متزوجه ولد عمها رايحه من خيمة البنات لخيمة الحريم..انتبه لها تطالعه وتبتسم..طبعا ابتسم لها هو الثاني..لفت ويهها وكملت طريقها..