نرجع قبل شهرين من احداث قصتنا الحالية
إتخطفت بت وزير الداخلية والخاطف طلب فدية 2 مليون دولار كندي ايوا كندي ما طلب دولار امريكي ودي من الحاجات الكانت محيرة جهاز الامن والمخابرات الوطني القدر يتكتم على الموضوع وما يصل الصاحفة ولا اي شخص عندو علاقة بالإعلام
وفورا كان متولي القضية سعادة العقيد مدير مكتب ملازم اول سجود
جهاز الامن ماقدرو يرجعو البت نهائيا لكن قدرو يجيو المبلغ وبقو منتظرين تعليمات العصابة الخطفت البت في الموعد الحددو ليهم سابقا
طبعا العصابة متواصلة مع الوزير مباشرة وكل مرة بضربو من موقع جديد ورقم جديد ومابتكلمو اكتر من 30 ثانية..!
الساعة 4 عصرا تلفون الوزير ضرب
الحاج : القروش في شنطة سوداء كبيرة تتختا في صندوق الزبالة تحت كبري المشاة القبل كلية القيادة والاركان الساعة 7 مساءا وماعاوزين اي حركة والا بتجيك بتك ميتة..!
اول سؤال سألو العقيد لي لجنتو من الملازمين انو ليه يختارو مكان قصاد محل حكومي تابع للجيش
ملازم اول عثمان : اغرب مكان يطالب بيه مجرم..! الناس ديل اذكياء شديد بس.
ملازم اول سجود : تقريبا كدا حماية لي زولهم الحيشيل القروش
العقيد : كيف حماية..؟
سجود : معروف انو ناس المباحث وجهاز الامن لما يتدخلو في موقف زي دا بيحصل ضرب نار ولما يحصل ضرب نار قدام القيادة والاركان الجيش حيتدخل والمسؤولين من حماية القيادة حيضربو نار من طرف ودي بتدي العصابة فرصة للهرب او ماتو كلهم بدون ما نعرف اي معلومة ودي خطة زكية جدا
ملازم اول ابراهيم : بعدين ماملاحظن الزمن غريب شوية 7 مساءا دا الزمن الفيه اكبر كمية راجعة من العربي وناس كتار جدا بنزلو في المحل داك.
ملازم اول عثمان : فعلا وممكن زول يشيل الشنطة بدون ما المراقبين يلاحظو
اتنفذ كلام العصابة بحذافيرو لكن جهاز الامن برضو بيعرف يلعب ختو مراقبين مسافة نص كيلو من الموقع ب مناظير بعيدة المدى وقدرو يتعرفو ع الزول الجا وشال الشنطة شكلا فقط ومن اليوم داك متابعينو
في الفجر بت الوزير رجعت بيتهم وسط فرحة سرية وماف زول عارف الموضوع حتى اهلهم القريبين.
لكن جهاز الامن بقا متابع الزول القدرو يحددو كم زول تاني بقابلو انهم من العصابة وعمك الحاج الكبير دا واحد من الناس القابلهم الشاب الاستلم الشنطة لكن جهاز الامن لاحظ بعد متابعة عمك انو دا الزول الوحيد البياخدو منو الشباب كلهم الاوامر
واي زول فيهم متابعنو مخبرين وبسجلو تفاصيل يومو اول بأول.
بعد شهر ونص من المتابعة قررو انو ماف زعيم للعصابة غير عمك الستيني دا صوروه لكن مالقو صورة مطابقة في اي سيستم في البلد ودا الاكد ليهم زيادة بس لسا الموضوع غريب
عمك يومو كلو في الموصلات حايم الخرطوم كلها وبلاقي ناسو في الاسواق لسا ماقادرين يعرفو مقرو ولا بيتو ولا اهلو ولا عارفين تمكن عصابتو قدر شنو ولا ناوين يعملو شنو.
العقيد حاسي انو المعلومات لسا ناقصة عشان يقبضو العصابة دي لسا ماف دليل ملموس عليهم
عملو بالقروش شنو..؟
ناس قدرت تجيب رقم وزير الداخلية وتخطف بتو المراقبة كويس اذن ناس ماهينة ويدها مليانة
بس لحدي اللحظة ما غلطو ولا دقسو
بعد شهرين من المراقبة
العقيد : ملازم اول سجود المخبر بعد متابعة شهرين لي الحاج حدد يوم في الاسبوع الصباح عمك دا بركب نفس الحافلة المتوجهة من شارع الوادي للعربي حتقيفي بعد 4 محطات من محطتو وتركبي نفس الحافلة المطلوب منك تراقبيه وتعرفيه بتكلم مع منو والبيحصل كلو لحدي ماتصلو العربي عاوزو في تقرير اول ماتصلي العربي بتلقيني في مكتبنا الهناك
سجود : حاضر سعادتك بس حاشيل من الخزنة 500 جنيه لاني قاطعة والا امشي بأمجاد الوادي الصباح بدري
العقيد : يازولة شيلي 5 الف ليه 500 وزارة الدفاع عاملة للقضية دي ميزانية مفتوحة..!
طبعا اختنا سجود ساكنة في بحري الصبابي ومابتقدر تجي بعربيتها حقت الجهاز عشان ما تتكشف
وحصلت الحاجات الحصلت في الحلقات ال3 الفاتت
نرجع لي قصتنا
الصادق فتح عيونو ع موية وضو بطارية
الناس الصحوه ملثمين
بعد شوية جا عمك كبير كدا داخل بس زول شديد وجسمو كويس
عمك : وييين احمد يا ناس..؟
واحد قال ليه دا احمد
عمك : انتو حيوانات ولا شنو..؟ دا ما احمد احمد كان راكب معاي الحافلة دا زول تاني
عمك انتا منو يازول ..؟
الصادق : انا احمد
عمك بكل قوتو اداه كف وقال ليهم جيبو لي الايباد
جابو الايباد لي عمك فتح تطبيق غريب اسمو One Bitch والظاهر عليه تطبيق خرائط او جي بي اس
قال ليهم شايفين العلامة لسا في نفس الموقع انا ختيت المتتبع في جيبو في الموصلات وحددتا ليكم الموقع تمشو تجيبو واحد تاني
هنا الضخم جا داخل
الضخم : ياباشا نحنا مشينا نفس المحل وكانو اتنين دا القال هو احمد
يتبع...
