حبك قدري وليس اختياري

بارت 13

رحت لبيت اهلي واني حامل بابني وعليه اربع اشهر وكان باجر زواج مهند من سحر حسيت بغصه وقهر حضنت امي  وابجي بكل حرگه وقهر وامي تبجي وياي واختي فرح تبجي كالت هسه اخابر مهند والعب بيه طوبه واخليه فرجه للناس بابا من سمع بالموضوع خابر مهند ورزله رزاله تسوه عمره وحياته وكاله انسى بعد عندك مره من تجيب تجي تاخذ ابنك ومنريد شي يربطنا بيك ودخلت غرفتي ساعه  ١٢ تقريبا وردت انام مكدرت دك تلفوني شفت رقم مهند مشلته دك عليه مره ومرتين رابع مره شلته كال انتي وينج ادك عليج ليش ما تردين وحسيت بيه شارب وموطبيعي كوتله مسمعته لا سمعتيه ومتعمده انتي شنو رحتي وغيرتي رايج احنا شنو اتفقنا مو كلتي اعيش وياكم شنو الي تغير رغد  :مهند الامور تغيرت ابوي ميقبل ارجع بعد واني نفسيتي تعبانه اخاف على الي ابطني من الانفعالات واكيد سحر راح تغثني خليني هنا ارتاح احسن وبعدين خلص هو هذا اتفاقنا وريحتك منه

مهند  :رغد احبج والله احبج ما اكدر اعوفج اذا تركيني والله اجي لبيتكم واسحلج سحل حتى لو يرموني ما اعوفج انتي زوجتي وام ابني والله ما اخليج تنفعلين اني اداريج بس لا تعوفيني

رغد  :مهند اني ما اعرف شسوي ابوي كولش متعصب هسه خليه لحد ما يهده وبعدين الله كريم

مهند :يعني شنو وهذه الفتره ما اشوفج ولا اسمع اخبارج شنو انتي صاحيه شوفي باجر العرس وعكب باجر اجي اخذج قبلتي او ما قبلتي واهلج اني اواجههم واخذج افتهمتي لو لا وطلعه ماكو وعلاوي تنسيه ابن خالتج على كد السلام واي شي زايد اسوي بيج سوايه مشايفتها بعمرج

رغد  :مهند كافي انت شتريد مخابرني تزيد همي

مهند  :اريدج وربي اريدج اريدج انتي مشتاق لريحتج ولحضنج ما اكدر بدونج

رغد : اهدئ حبيبي اني راح احاول ويه اهلي وارجع وياك احبك يا عمري

حسيت بيه هدئ شوي

مهند : رغد تجين وياي مو وما تعوفيني

رغد  :اي حبيبي خلص باجر احجي ويه بابا خلاص

مهند  :يالله عمري روحي نامي مو زين عليج السهر بوسيلي روحج وديري بالج على ابني سيوفي

رغد  :شنو سيوفي منو كال تختار الاسم بكيفك

مهند :حبيبتي مشتهي هالاسم من زمان فدوه اروحلج

رغد  :اني اروحلك فدوه خلاص سيوفي سيوفي ولا يهمك تصبح على خير يروحي

مهند  :وانتي من اهل الخير يا مرتي وحبيبتي

ثاني يوم كان عرس مهند بس ما اوصفلكم حالي عبالك وفاتي مو عرسه حسيت هموم الدنيا كلها على راسي حسيت مالي احد بهالدنيا وشكد صغيره هالدنيا ضاكت عليه واختنكت وصار عندي ارتفاع بالضغط ونمت بالمستشفى واجت اختي نامت وياي ومهند ميدري ملتهي بعرسه

مهند تحضرت للعرس ورحت للحلاق بعد تعرفون سوالف العرسان والله هذا ثاني عرس الي وهمين احس بيه مجبور الاول جبرتني امي وتزوجت رغد وابتعدت عن حبيبتي والثاني جبرت نفسي وتزوجت حبيبتي وبعدت عن زوجتي وحب عمري معادله محيره بالنسبه الي التهيت بترتيبات العرس بس رغد ابد مراحت من بالي واحس اكو فد غصه بحياتي شورطتيني يا امي بهذا العشك صارت الدنيا مغرب ورحت جبت سحر من الصالون وكانت كولش حلوه طالعه وطكينا صور بس مالي نفس بيها احس رغد ملكت روحي واحساسي كملنا مراسيم العرس والاحتفال ودخلنا للمشتمل مالتنا وشلتها لسحر ودخلتها بغرفتها وبديت اتغزل بيها وابوسها واني فكري وعقلي وروحي يم رغد مكدرت اضلم سحر وحاولت اكون طبيعي وياها وصار الي صار وقريب الفجر شفتها نامت واني ولا غمضت عيني ولا نمت كولت خلي اتصل برغد مشتاقلها اليوم مسمعت صوتها ضل يدك ومحد يشيله كلت اكيد نايمه باجر اخابرها ورجعت نمت

رغد نمت مستشفى وبيومها نفسيتي كولش تعبت ونهارت اعصابي وكالو الطفل حالته صعبه لازم ترتاحين ومتكومين وعرفت هو ولد سيوفي اكيد مثل ما راد مهند بس حتى الفرحه راحت وابوه مو يمي خليت موبايلي صامت وكلت خليني انام احسن من بعد المهدئات والابر كعدت الصبح متاخره بالعشره تقريبا بجيت الدكتوره وسجلتلي خروجيه وكالت بس تبقين نايمه واي جهد او حركه ماكو فتحت موبايلي ولكيت مهند مرتين داك عليه وحده الفجر وحده الصبح كلت خطيه يمكن باله بقى يمي واكيد مخابر كدام سحر يخاف على مشاعرها طلعت من المستشفى وتلكوني اهلي بالاحضان وكانو خايفين عليه بقيت نايمه بالفراش تقريبا قريب الضهر وخابرني مهند وابويه كان كاعد مكدرت ارد عليه اخذ بابا الموبايل مني وحجه ويه مهند

بابا  :انت شعندك داك مو كتلك لا تخابر ولا تتصل اي مره ما الك يمنا مهند : خالي بس اسمعني الله يخليك انطيني فرصه اشرحلك

بابا : لا تشرح ولا تحجي الي اجانا منك كفانا رغد من البارحه بالمستشفى من وراك  انساها بعد لا تكول عندي مره

مهند : خالي شبيها رغد بيها شي ابني بيه شي

بابا : لا ما بيهم شي يالله ولي منا وسداه للموبايل وشمره وطلع اني بقيت ابجي اجتي ماما يمي امي  ماما :مو زين عليج يروحي انتي اهتمي بصحتج شوي كولشي ينحل والي تردينه يصير بس انتي صبري

رغد  :ماما والله احبه وما اكدر اعيش من غيره وهمين ما اكدر اروح وياه لان ما اتحمل اشوفها وياه اموت من القهر  واحتاريت شنو اسوي وتعبت ومليت وضليت ابجي لحد ما نمت كعدت العصر ولكيت مهند حارگه للموبايل من الاتصالات كولتلهم ضجت راح اكعد بالحديقه شوي حتى تصيرلي فرصه احجي ويه مهند وفعلا طلعت بره ودكيت على مهند