جـعـفـر الـقـبـضـان

الجزء2

الجزء التاني
جعفر: هاي اشلحا بالسيارة هلا و بعدين منتصرف فيا  تولو مهمة هالدابة
صقر : امرك سيد جعفر
مسكني من ايدي و صار يسحبني ليطلعني برا البيت و قبل ما صرخ حط ايدو على تمي و طلعني من البيت و فتح باب السيارة و دخلني فيا انا و خايفة و عم ارجف من يلي صار ,مشيت السيارة بسرعة البرق ,و قفت بعد نص ساعة على باب فيلا كبيرة (فيلا جعفر القبضان)و مين ما بيعرف هالفيلا, فيلا صاحبا رجل اعمال كبير ,برغم صغر سنو الا انو هو الوارث الوحيد لاملاك ابوه طلال االقبضان و زاد اضعافن بمجهودو الشخصي حتى حقق اكتر ما حقق ابوه و صرلو قاعدة شعبية كبيرة لانو كان معروف بوجهو الانساني , نزلني الشاب هو و عم يهيني و ناطر البت بامري من السيد جعفر يلي كنت اسمع فيه بس ولا مرة شفتو قبل هالليلة
جعفر : صقر خدا على الملحق و افهم منا شو في بينا و بين هديك الخاينة و مين وراهن لانو اكيد في حدا باعتا ؟
سيلينا : ولله ما بعرفا ابدا ...دقت الباب علي هي... كانت خايفة وانا...
جعفر: اتحرك يلا
صقر:حاضر سيد جعفر
مسكني من ايدي و مشينا بعيد عن الفيلا مسافة 200 متر دخلنا بغابة كلها شجر عالي حتى وصلنا على مبنى قديم كتير كان شكلو من برا متل المستودع او كراج و فوتني و ربطني على كرسي من ايدي و رجلي و ضربني اول كف
صقر:اعترفي لشوف شو خبرتك ام رائد ؟
سيلينا : مين ام رائد ...قلتلك ما بعرفا و لا هي بتعرفني ..دقت الباب فجاة
ضربني تاني كف
صقر:كذابة
سيلينا(تبكي):اخ ...ما بعرفا
صقر:شو قلتلك قولي , اذا حكيتي بوعدك حافظ على راسك ؟
سيلينا : قلتلي خبيني عندك بدن يقتلوني
صقر:ما قلتلك ليش بدنا نقتلا ؟
سيلينا : لا ما قلتلي
ضربني تالت كف
سيلينا:اااااخ
صقر:....ما رح تطلعي من هون قبل ما تقولي شو قلتلك ؟
بقي ساعة هو و يحقق معي ويهيني و يضربني و يشدني من شعري ليعرف بس ام رائد شو قلتلي , طلع الصبح علي و فاتت اشعة الشمس من الشباك يلي كان قبالي , رفعت راسي و رقبتي كانت عم تجعني من الغفوة يلي غفيتا بدون ما حس, اطلعت حولي و ما شفت الشاب يلي كان عم يحقق معي و بعد ساعة اجا و فكني و مسكني من ايدي و طلعني من الغرفة
سيلينا : لوين اخدني ...بدي ارجع على بيتي , انا ما دخلني بشي
-امشي انت و ساكتة و اسمعي شو بدي قلك منيح , سيد جعفر اعطى امر بقتلك بس انا رح اعطيكي فرصة تانية بس في مقابل
سيلينا:ايه شو المقابل؟
صقر:اطلعي لهنيك على الفيلا على اخر طابق على اخر شباك من جهة اليمين شايفتيه؟
سيلينا: ايه شو المطلوب؟
صقر: بدي تطلعي لهنيك و تفوتي على الغرفة و تعرفي شوفيا
سيلينا: اها و بلكي عرف جعفركن انا وقتا بصير مصيري متل ام رائد
صقر:ام رائد بهيمة , وانت بكل الاحوال ميتة بس اذا نفذتي يلي عم قلك عليه رح خفف عقوبتك من الدبح للاخف و و ملاحظة كل شي صار مبارح خلص بارضو و ما بدي اسمعك عم تحكي فيه مع حدا من الخدم و ضيفي الو هالحكي يلي صار بيناتنا
سيلينا : طيب انت ليش بدك تعرف شوفي بقلب الغرفة ؟
صقر:شاكك بشي و بدي اتاكد
سيلينا: ما بعرف خايفة
صقر: اذا رفضتي , رح بقتلك متل ما طلب مني سيد جعفر بس انا عم اعطيكي وقت اكتر تعيشي فيه
سيلينا: انا بس بدي ارجع لبيتي
صقر:رح ضمك للخدم هلا و بدي تهزي براسك على كل شي بينطلب منك ,و بالليل بس الكل ينام بتطلعي , لازم تكون حركتك خفيفة , اوعى حدا يحس عليكي و لا تنسي غرفة السيد جعفر بالطابق التاني, اذا رفضتي لنرجع و اذا قبلتي لنتابع طريقنا على الفيلا,شو قررتي؟
سيلينا(تتنهد):طيب موافقة بس انت بدك اطلعني من هون بس خلص يلي طلبتو مني؟
صقر:ماشي
سيلينا : بس لو عرف السيد جعفر انو انت ورا يلي عملتو ام رائد شو رح يعمل فيك ؟
جعفر: رح يعاقبني و انا وقتا ما رح اسكتلك ابدا رح اقتل أي شخص بخصك و براس القائمة خطيبك يلي ما الو ذنب بشي غير انو خطيبتو غبية
سيلينا:خطيبي؟ شو عرفك فيه؟
جعفر:ولو , عرفت عنك كل شي , و ام رائد لو حكت حرف واحد عني كنت لحقتا باولادا التلاتة بس هي اشتغلت صح
وصلنا على باب الفيلا , ما دخلنا من الباب الرئيسي , دخلنا من الباب الخلفي على مطبخ فورا , كانت حالتي يرثى لها, شعري و تيابي مبهدلين كتير , دفشني لعند مرة اربعينة بالعمر
صقر:سعاد, خدي هاي
سعاد: يييه مين هاي ؟ليش هيك شكلا متل العنزة الجربانة؟
صقر:نظفيا و لبسيا تياب خدم و خلوا تخدم معكن و فتحي عيونك عليا منيح ما تطلع خطوة برا الفيلا
سعاد : شو هالقرف , مين جابا ؟
صقر:خديا من تم ساكت انت كمان , هاي جابا السيد جعفر لقاها عم تنكش بحاوية الزبالة تعيت الفيلا و شفق عليا و بدو يشغلا هون
سعاد : الله يطول بعمرو للسيد جعفر اديش انساني و قلبو لله
اطلعت فيني بقرف
سعاد : امشي قدامي لشوف
مشيت وراها انا و عم اطللع باركان الفيلا و الفخامة , هاي الفيلا يلي كنت شوفا من بعيد و ما استرجي انا او غيري يقرب منا و هلا صرت جواتا , دخلت سعاد على غرفة و فتحت خزانة و اعطتني تياب خدم لون ابيض و كحلي
سعاد : فوتي هون اتحممي و لبسين و ضبي شعرك كلو لورا و الحقيني على المطبخ فورا بدون ما تتفتلي فهمانة ؟
سيلينا : أي
فتت على الحمام , كان كل شي نظيف و مرتب , كان كل شي عم شوفو عم يمحي من ذاكرتي اثار الصدمة يلي مريت فيا ليلة مبارح و تحممت و سرحت شعري متل ما امرتني سعاد و لحقتا على المطبخ , شفت صبية من عمري او اصغر لابسة تياب خدم كمان , كانت واقفة مع سعاد , انا وقفت شوي الباب و ما انتبهو علي
ميرا: ...معصب كتير, فطر بدون نفس بس حتى و هو معصب يالله بجنن بجنن بياخد العقل عيونو يا خالتي يا ويلاه من نظرة عيونو رح موت بس على نظرة منو ,ولا ريحة عطرو كنت رح دوخ و اوقع من السحر و الجاذبية....
سعاد:شبك رح تفرطي, شدي حالك شوي, ما بيطلع بوحدة متلك
انتبهت علي سعاد
سعاد : شو واقفة عم تتسمعي على الحكي , انقبري فوتي لجوا
ميرا: مين هاي؟
سعاد : هاي خدامة جديدة بس ما ارتحتلا
ااطلعت علي الصبية بعيون محتارة , فتت انا و متلبكة
سيلينا : انا شو بدي اشتغل ؟
سعاد: روحي نظفي الحمامات
سيلينا : انا بدي نظف الحمامات ؟
سعاد : أي نظفين ما بفرقو كتير عن الزبالة يلي كنت فيا
سيلينا : طيب بس انا ما بعرف وين الحمامات؟
سعاد : ميرا خديا و فهميا كيف تشتغل
ميرا : طيب
سعاد: اسمعي ما تطلعي خطوة لفوق خليكي بالقسم الارضي ,فهمانة؟
سيلينا : فهمت ا
اجت ميرا معي و اعطتني منظفات و تعليمات للشغل ,قبل ما تتركني و تطلع
سيلينا : هلا بتعرفي وحدة اسما ام رائد؟
ميرا : ايه بتشتغل هون بس فقنا اليوم ما شفناها
سيلينا : وين راحت؟
ميرا : ما بعرف , هون ممنوع السؤال عن أي شي , هون منشتغل و منفذ اوامر بدون أي اعتراض او تدخل بشي
سيلينا : طيب اذا بدي احكي مع السيدجعفر ...؟
ميرا: ههههههه انت بدك تحكي مع السيد جعفر
سيلينا : ايه
ميرا:انت شكلك ما في براسك عقل ؟
سيلينا : لا في بس بدي حكيه بموضوع بخصني
ميرا :ههههههههه كمان , كملي شغلك , الخدم ممنوع يحكو مع اسيادن , أي شي بدك اياه اطلبيه من خالتي سعاد و هي بتحللك قصتك
سيلينا : اوووف طيب طيب
كملت شغل انا و مشغول فكري بوضعي و لايمت بدي ابقى هون و بخطيبي سام يلي ما بيعرف محلي و بعرسي يلي بعد بكرا و بطلب صقر مني , بعد ما خلصت شغل , طلعت لكب الزبالة بالحاوية يلي برا , شفت جعفر بالسيارة طالع من باب الفيلا , الحرس ركضو فورا فتحولو الباب و طلع , بقيت واقفة عم اطلع بالباب و اسوار الفيلا العالية , خطر على بالي اهرب من هون بس ما كان في أي مخرج لبرا غير هالباب يلي واقفين عليه حراس اكتر من عدد شعر راسي, طولن و عرضن قدي على عشر مرات
سعاد : .....شبك واقفة ...يلا خلصي و فوتي ...عنا شغل كتير اليوم
تنهدت و غصيت و فتت على المطبخ
سيلينا : شو ضل شغل علي ؟
سعاد : قعدي افرميلي هالفليفلة و الجزر , فرمين بطريقة حلوة اليوم جاي خطيبتو و بيت حماه للسيد جعفر على الغدا و كل شي لازم يكون مثالي و الا منتعاقب جمعا
سيلينا : طيب
بقيت عم اشتغل للساعة 4حتى جهزت اطباق الغدا يلي كانت من كل شكل و لون و صنف , بلشت ميرا و صبية معا (غيداء) ما شفتا الا مرتين بكل هالنهار لانو كان معظم وقتا جوا و بالطابق التاني و ينقلو الاكل لبرا , انا ما كان مسمحلي بعد عن قسم الخدم , انشغلت سعاد و الباقي بالغدا و الحلوى و انا استغليت الفرصة و طلعت من المطبخ لدور على مخرج من هالدائرة ,كان بدي اهرب و انفد بروحي بدون ما دخل حالي بمصايب جديدة , بعدت شوي عن مبنى الفيلا و فتت باتجاه الغابة , كنت عم امشي و اتلفت حولي و خايفة حدا يشوفني و عم دور على باب اطلع منو , بعد مشي عشر دقايق وصلت لدرج اخرتو باب خشبي صغير , طلعت على الدرج بسرعة متل العصفور يلي انفتحلو باب القفص ,حاولت افتح الباب ما نفتح معي ’كان مقفل , حطيت كام حجرة على الارض و اطلعت علين لاقلب ورا الباب بس فجاة طلع صوت رصاص وصوت خشن
_وقفي عندك ...ماتتحركي
خفت , وقفت بمحلي ما عرفت تابع هرب او اوقف بمحلي , من خوفي ما قدرت ابرم ضهري و شوف مين يلي صرخ بس حسسيت على مسدس مصوب عللى راسي
_مين انت و شو عم تعملي عندك؟
فتلت ضهري لعندو و شفت شاب لابس اسود ,طولو متوسط شعرو اسود و بشرتو حنطية بعيون عسلية
سيلينا : اانا انااا اسمي سيلينا...انا من الخدم يلي بالفيلا
_شو عم تعملي هون ؟
سيلينا : انا كنت بدي ...بدي..
_تهربي؟
سيلينا:اهرب!لا ليش لاهرب ....اذا بتريد قيم هالسلاح من راسي
_ليش ما طلعتي من باب الفيلا اذا ما كان بدك تهربي؟
سيلينا : انا كنت عم اتمشى بالغابة , اناجديدة و بعدين قلت حتى ما رجع كل هالطريق , قلت بختصر و بطلع من الباب و بلف اللفة
-انت بتعرفي لوين هالباب بودي؟
سيلينا : لا قلتلك انا جديدة هون ,بس اكيد يعني لبرا
شال المسدس و رجعو لبنطلونو و مسكني من ايدي
_مشي معي لنشوف قصتك
سيلينا : خلص برجع لحالي, بعرف الطريق
_ ما مشكلة انا بوصلك
مشيت معو انا و قلبي عم يدق بسرعة , خفت يخبر حدا انو شافني عم اهرب و لاقي مصير ام رائد
سيلينا : بدك تخبر حدا انو شفتني عم اهرب؟
_ها معناها كنت عم تهربي ؟
سيلينا(تبكي):ايه الله يخليك لا تخبر حدا , خلص ما رح ارجع عيدا , وعد
_ما بقدر ,لازم السيد جعفر يصير معو خبر
سيلينا : لااااا الا هيدا الله يخليك , خلص قلتلك ما برجع بعيدا
_ليش بدك تهربي؟
سيلينا :انا جيت لهون بالغصب , انا بشتغل خياطة بالاصل و عندي بيت و ما بحاجة لهيك شغلة و الاهم انو عرسي بعد يومين لازم اطلع من هون اذا بتريد ساعدني
_اي قولي هالحكي للسيد جعفر هلا
سيلينا : يا الله , رح يقتلني
وصلنا على الفيلا هو و ماسكني من ايدي , دق باب الفيلا فتحتلو غيداء , اطلعت فيني هي و متفاجئة
غيداء: يامن ! ليش ما سكة هيك ؟
يامن : وين السيد جعفر؟
غيداء : جوا بس ما بيقدر يحكيك لانو هون خطيبتو و بيت حماه
يامن : قليلو الموضوع ضروري ما رح اخد من وقتو كتير
غيداء:طيب
راحت غيداء و بقيت انا و يامن واقفين على الباب
سيلينا: دخيل الله ما تخبرو خليني ارجع على المطبخ و بوعدك ما يتكرر هالشي
رجعت غيداء انا و عم اترجاه ليامن
غيداء : بقلك فوتو على المكتب انتظروه ليجي , الحقوني
سحبني من ايدي و مشينا ورا غيداء و اطلعنا على الطابق التاني , فتحتلنا غيداء باب المكتب و فتنا , قعد يامن و انا بقيت واقفة عم ابكي, بعد ربع ساعة انفتح الباب و فات جعفر , اول ما شفتو كنت رح اوقع بارضي من الخوف و صرت ارجف , قام يامن فورا
جعفر : خير يا يامن , انشالله يكون الموضوع محرز