جـعـفـر الـقـبـضـان

الجزء3

الجزء التالت:
يامن : سيد جعفر انا لقطتا لهل الخدامة قبل ما تهرب من الباب يلي باخرة الغابة , كانت مفكرتو بيودي لبرا
اطلع فيني جعفر و انا نزلت راسي
جعفر: ارفعي راسك , مين انت ؟
سيلينا : انا يلي جبتوني مبارح بالليل لهون ..
صفن فيني شوي
جعفر : اه تذكرتك , ليش بدك تهربي من هون,مية وحدة بتتمنى تكون محلك <
سيلينا : سيد جعفر انا ما دخلني بالقصة و ما بعرف شي , انا بنت يتيمة ما عندي بهالدنيا كلها غير خطيبي يلي بكون هلا انشغل بالو على غيابي المفاجئ و عرسي بعد يومين , الله يخليك سرحني من هون و انا ما بعرف بشغل الخدم انا شغلتي بالخياطة
جعفر : طيب يامن يعطيك العافية , فيك تروح هلا و اكيد رح اصرفلك مكافأة على هالشي بس خبرو لهل الدابة صقر يطلع لعندي هلا
يامن : حاضر سيد جعفر خيرك سابق ما بدنا غير رضاك
طلع يامن و بقيت انا و جعفر بالمكتب , قام من عن مكتبو و هو عم يطقطق اصابيعو ,استند على طاولة المكتب و انا كان رح يوقف قلبي من هيبتو
جعفر : اييييه شو خبرتك ام رائد؟
سيلينا : يا ربي ولله ما بعرفا و لا بتعرفني الي من مبارح بالليل عم حاول فهمكن هالشي رغم كل الضرب و الاهانات يلي وجهتولي اياها , لو بعرف شي كنت خبرتكن
جعفر : ليش اجت تخبت عندك انت بالذات؟
سيلينا : صدفة ...ولله صدفة ,..طلع بيتي بوجها
اندق الباب دقتين و انفتح و فات صقر
صقر:سيد جعفر بعتت وراي؟
اطلع فيني صقر مصدوم
جعفر: هاي ليش هون؟, مين اعطاك الامر بهالشي
الصقر:...... سيد جعفر انا حققت معا و ضربتا كتير و تاكدت بعدين انو ما بتعرف شي
جعفر: أي و كيف تاكدت؟
الصقر: سالت شخص موثوق ساكن بحارتا , قلي البنت مسكينة كتير و يتيمة وعلى قد عقلها و ما الها مشاكل مع حدا و ما بتعرف حدا اكتر من الشاب يلي بكون خطيبا و بتعيش من شغلا , يعني ما في أي علاقة بينا و بين ام رائد , ولله حسيتا مظلومة و بعرفك انت قلبك كبير و ما بتقتل حدا ظلم لهيك ما عرفت وين روح فيا و شفتك مشغول , قلت بحطا بين الخدم لبين ما تفضى و فاتحك بموضوعا لتبت بامرا
جعفر : اممم, هالمرة رح سامحك على هيك غلطة كرمال خاطر معزة ابوك عند ابي وكرمال معزتك الخاصة بقلبي , بس تاني مرة ما بتتصرف بشي بدون علمي
صقر: حاضر بس انت سيد جعفر بتعرفني ما بخطي خطوة بشي قبل ما كون متاكد مليون بالمية و خاصة شي بخص عيلة القبضان , انتو مفضلين علينا
جعفر: طيب طيب
صقر: هلا شو بتحب اتصرف فيا , بتحب لحقا بام رائد؟
سيلينا : شو ؟ شو دخلني فيا (تبكي)..ولله ما بعرفا
جعفر: روح انت هلا و انا بخبرك شو تتصرف
صقر: حاضر
جعفر: ما عجبك الشغل عنا ؟
سيلينا : ...اي ...لا ...عجبني ...لا
جعفر: شو , احكي منيح
سيلينا: ما عجبني لانو انا ما بشتغل هيك شي , انا بشتغل شغلة محترمة و عايشة منا
جعفر : انت بتعرفي اديش الراتب هون, انا متاكد قد يلي بطلعيه على عشر مرات
سيلينا : انا يلي بدي اياه انو اطلع من هون و ارجع لحياتي الطبيعية يلي كنت عايشتا قبل ما افتح هالباب اللعين للمرة يلي قتلتو بدم بارد
جعفر : الخاين بيستاهل القتل
سيلينا : الخيانة مفهوم معقد و بيختلف من شخص لتاني , يلي انت بتشوفو خيانة غيرك بشوفو وفاء,اذا ما وفاء لشخص بكون وفاء لمبدأ معين و انا حسيت من وجه المرة انو ما ارتكبت جريمة بتستاهل هالعقاب الكبير
جعفر : و كيف صارت معك الخيانة وفاء ,حطيتي الاسود و الابيض مع بعضن
سيلينا : لو انت طلبت من صقر يقتلني و صقر ما قتلني و طلعني من هون و خبرك انو نفذلك اوامرك , هيدا شو اسمو ؟
جعفر: اسمو خيانة و غدر و وقتا مصيرو لصقر نفس مصير ام رائد و يلي قبلا و يلي بعدا
سيلينا : انت بالنسبة الك خيانة بس هو بالمطلق وفاء , وفاء لضميرو و انسانيتو و مبادئو بانو ما يقتل حدا مظلوم
زم شفايفو و ما عجبو الحكي
جعفر : ..اممم مفلسفة ,شو عمرك انت ؟
سيلينا : عمري 25 سنة
جعفر : وين اهلك ؟وقت فتنا على الذريبةيلي كنت عايشة فيا ما شفنا حدا معك
سيلينا( : البيت يلي ساكنة فيه ما ذريبة , ما حسيت حالي بذريبة غير وقت حشرتوني بالغرفة المعفنة يلي باخر الغابة , هيدا بيت اهلي بس ابي و امي ماتو من لما كان عمري عشر سنين
جعفر: كيف ماتو ؟ ؟
سيلينا : وقعو بالحنطور بالوادي
جعفر :....طيب على كل حال يلي بشتغل بفيلا القبضان و لو ساعة وحدة ما بيطلع منا فارغ الايدين , منكافيه و منحملو راسو بين ايديه
سيلينا : ما فهمت !!!
جعفر: يعني رح تبقي هون و هلا روحي على شغلك لانو ما فاضيلك
فتح الباب و اجا ليطلع
سيلينا : هيدا ظلم , ظلم كبير
فتل ضهرو و اطلع فيني و رفع حاجبو
جعفر : قصدك تقولي انا ظالم ؟
سيلينا : لا لا لا قصدي قرارك فيه ظلم علي انت خاطب و مرتبط و اكيد بتحب خطيبتك , بتريد حدا يجي يبعدا عنك بالغصب
جعفر : و مين هيدا يلي بدو يسترجي يقرب على خطيبتي , ما خلق لسا
سيلينا : و انا ...خطيبي بكون عم يحترق ليعرف محلي
جعفر : بدو اياكي يجي ياخدك من هون بنفسو بس من هون لوقت يسترجي و يجي , انت رح تبقي هون محل مكان ام رائد الفاضي لتدفعي تمن تسترك على وحدة خاينة و اذا بتفكري ترجعي تهربي صرتي بتعرفي انا شو بقدر اعمل
سيلينا : بس هو ما بيعرف محلي ليجي ياخدني
جعفر : ما تخافي بكون عرف (مبتسم)خلينا نشوف البطل رح يجي ياخد اميرتو من القلعة و يتخطى كل هالحرس او رح يطلع جبان و ما رح يسترجي يقرب
انصدمت بحكيو ,هو و واقف اجت صبية عمرا تقريبا بال 18 سنة قصيرة بيضاء من هيئة لبسا واضح انو لا تقل مكانة و غنى عن جعفر
ورد: حبيبي وينك لهلا؟ طولت علينا
جعفر: يلا خلصت
اطلعت فيني نظرة سريعة بعيون حيرة و نزلو سوا و انا بقيت واقفة بالمكتب عم ابكي على السجن الكبير يلي انحبست فيه و ناطرة البطل ليجي يخلصني , عم ابكي لوجود هيك بشر معتبرتنا حجر شطرنج و تسلاية يعبو فيا وقتن, مسحت دموعي و نزلت على المطبخ , كان الخبر مطبول بالمطبخ بسيرة محاولة هربي, استقبلتني سعاد بسيل من السب و الاهانة و التجريح , و بعدين كملت شغلي تحت ضغط و حراسة مشددة من سعاد و ميرا ,مر يوم و اتنين و تلاتة و اسبوع و انا بعدني عم اخدم بفيلا ال القبضان , كان الامل بطلعتي من الفيلا عم يتلاشى يوم ورا التاني و الحلم الابيض صار اسود و استفساراتي عن سام يلي ما شفت منو أي مبادرة لحد الان عم تزيد كل يوم , اما الشغل مع سعاد متعب كتير و خاصة كرها اتجاهي الغير معروف اسبابو زاد من ضغطا علي و تحميلي فوق طاقتي , بعد اسبوعين طلعت من الفيلا و رحت على الباب , شفت يامن و صقر واقفين عم يحكو مع بعض , قربت لعندن
يامن : شو بدك ؟
سيلينا : بدي اسالكن اجا شاب سال عني ؟
صقر : شو هو هههههه لا ما حدا سال عنك ههههههه اذا حدا سال شو منقلو ؟
يامن : منقلو حضرتك فاضية تقابليه الا لا او منعطيه موعد ؟
سيلينا : عنجد بينزعل عليكن
تركتن عم يضحكو و فتلت ضهري , لحقني صقر
صقر: شو صار معك بيلي حكينا فيه؟
سيلينا : بنفذو اذا بتهربني من هالباب, غير هيك ما رح اعملك شي لانو جعفركن عدل عن قرار قتلي
صقر:اسمو السيد جعفر بس ماشي ....ما تماطلي و اطلعي اليوم قبل بكرا
رجعت عم جر اذيال الخيبة معي , طلعت بوجهي سعاد الحردونة
سعاد: وين كنت ؟
سيلينا :....
بقيت ساكتة و فتت على المطبخ
سعاد : تعي طلعي كاسة هالزهورات لجعفر على الطابق التاني على المكتب, ميرا بالسوق
سيلينا : طيب
اخدت الصنية من سعاد و طلعت لفوق ,دقيت الباب مرتين لسمعت صوتو مع سعلة
جعفر: تفضل
فتحت الباب و فتت
سيلينا : صباح الخير
جعفر:.......
سيلينا : تفضل معافى
حطيت الكاسة على الطاولة و قبل ما اطلع
جعفر: لحظة
سيلينا : أي
جعفر : انت البنت يلي كنت رح تهربي هديك المرة ؟
سيلينا(تتنهد) : ايه
ابو جعفر : نسيت وجودك ,اديش الك هون ؟
سيلينا : ما بعرف ما بقا حسبت و لا عديت ما دام الايام كلها بتشبه بعضا ليش لنتعذب و نعد , ما رح ناخد غير القهر على ايام عم تمر بسرعة قدامنا و نحن ما عم نعيش ولا يوم
ابو جعفر : هههههههه
سيلينا : سيد جعفر ولله يلي قلتو ببكي ما بضحك
جعفر :يلي بسالك سؤال ردي عليه بجواب مختصر ما في داعي لهل الاجوبة الفلسفية , شو اسمك انت ؟
سيلينا : اسمي سيلينا
ابو جعفر :اممم و شو يعني سيلينا ؟
سند ضهرو على كرسي المكتب و بلش ب لعبتو
سيلينا : ضروري يكون لكل اسم معنى ؟
جعفر : ضروري كل حدا بيحمل صفات اسمو
سيلينا : ما بعرف معنى اسمي و ما حاولت اعرفو
جعفر : يعني ما عندك فضول لتعرفي اهلك شو شافو فيكي اول ما جيتي على هالدنيا حتى سموكي هالاسم ؟
سياينا : انت بتقدر تعرف سو معنى اسمي؟
جعفر : اسمك معناه جمال ضوء القمر , اسم لاتيني
سيلينا : حلو
جعفر : شو صار معك ما اجا البطل انقذك لهلا ههههههه
ضحك بشكل مستفز
سيلينا:عمرك شفت اعزل بيحارب بمعركة كلها اسلحة من النوع الثقيل , صار بهيك حالة مجنون
جعفر:ليش العشق ما جنون ؟
سيلينا : الجنون انتقاص من العقل ,يعني فيك تقول الجنون داء و الحب دواء و ما بجتمعو مع بعض , الحب بيدفعك لقدام حتى اذا كنت مريض بيعافيك
جعفر: الكلام معك ما الو نهاية
سيلينا : و اقامتي هون شكلا ما الا نهاية ؟سيد جعفر انا ناطرة عفوك و رحمتك علي , طولت كتير هون و غير التعب و الجهد يلي عم حطو بغير مطرحو, اطلع حوليك في خدم كتير و فيك تجيب لسا
جعفر: بس انت حالة خاصة
سيلينا : و انت عم تعاقبني على انسانيتي, ما بحياتي سكرت بابي بوجه حدا احتاجني
جعفر: انا ما عاقبتك ...لهلا ....انا بالعكس كنت رحيم معك بشكل ملحوظ , بتعرفي لو وحدة محلك فيها عقل و خايفة على روحا ما كنت بتوقف قدامي و تناقشني بهالطريقة , احمدي ربك مية مرة انو راسك بعدو بمحلو
حطيت ايدي على راسي
سيلينا :........
جعفر : انزلي على شغلك و ما بدي اسمعك عم تعملي مشاكل
سيلينا : حاضر
نزلت على المطبخ انا و عم مسح دموعي , استقبلتي سعاد
سعاد : ليش لهلا , كلها كاسة زهورات
على الساعة 12 بالليل قررت اعمل يلي طلبو مني صقر,ما كان قدامي غير هالحل ,اطلعت على ميرا كانت نايمة و عم تشخر , شعلت شمعة و اطلعت من الغرفة, كانت الفيلا كلها هادية و الكل نايم , كنت عم امشي متل الحرامية , اطلعت على الطابق التالت , كان في ابواب غرفة كتيرة ,تابعت حسب ما فهمني صقر للغرفة يلي بتكون باخر االممر , , ما كنت اسمع غير السكون, وصلت للغرفة المطلوبة حطيت ادني على الباب ما كان في أي صوت,بس كان في ريحة عفن عم تطلع من الغرفة , حطيت ايدي على المقبض و جيت لافتح الباب , كان مقفل و هالشي زاد فضولي اكتر,هاي هي الغرفة يلي كانت بدا تخبرني عليا ام رائد بس ما قدرت تكمل للاخير ,كان واضح انو في جوا لغز كبير, خفت كتير من هالفكرة , حطيت عيني على ثقب الباب لشوف شوفي جوا بس كان ظلام دامس , رجعت نزلت على غرفتي انا و عم فكر كيف بدي افتح الباب , تااني يوم رجعت طلعت بنفس التوقيت بس هالمرة كنت عاملة حسابي افتح هالباب , كنت جايبة معي مفك براغي اعطاني اياه صقر و فهمني كيف افتح الباب و كام قطعة ممكن تلزمني , حطيت الشمعة على الارض و بلشت حاول , بقيت ما يقارب الساعة , تلبكت و عرقت كتير و تعبت لمشي الحال , فتحت الباب بهدوء و هفت ريحة بشعة كتير , مسكت الشمعة و فتت , اطلعت حولي كانت بالغرفة اثاث غرفة نوم ,كان على الارض ازاز مكسر و كانو اكل مكبوب و معفن ,كانت الصدمة وقت لمحت بنت قاعدة بزاوية الغرفة , نمل بدني من منظرا يلي بخوف و بقطع القلب بنفس الوقت , سكرت باب الغرفة وراي ,و تابعت مشي لعندا , كان شعرا مغطي وجها ومتكورة على بعضا , قربت لعندا و رفعت شعرا عن وجهها , كانت نايمة , كان لون وجهها شاحب و جسما هزيل, لو ما سمعت صوت نفسا العالي كنت قلت عنا ميتة , صرت هزا شوي لتفيق, فتحت عيونا و اطلعت فيني , كانو عيونا غايرين لجوا كتير , اطلعت فيني كانو عم تطلع بفراغ ,
سيلينا : شايفتيني, مين حبسك هون وليش محبوسة ؟
سالتا و حكيت معا كتير بس ما كانت ترد علي بشي , كانو عم تطلع بفراغ
سيلينا : قومي عن الارض
حطيت الشمعة على طاولة جنب التخت ,وجيت لارفعا عن الارض , كان ما فيها أي قوة ابدا , حملتا و حطيتا على التخت , كان وزنا خفيف كتير و التخت وسخ كتير حتى الغرفة كانت اقذر غرفة بشوفا بحياتي ,بقايا اكل معفن و شباك مدربس و يمكن شهور ما انفتح وغبرة و حشرات معششة بزوايا الغرفة , وقفت اطلع فيا , ما كنت عارفة شو بدي اتصرف و ما كنت قادرة اتحرك لانو خفت يحس حدا على وجودي , تركتا و طلعت و رجعت مسكة الباب و نزلت ,بقيت طول الليل انا و عم اتخيل شكلا و خمن ليش محبوسة و مين حبسا و شو عملت حتى تتعاقب بهالطريقة , خبرت صقر تاني يوم بالشي يلي شفتو , شفت دمعة بعيونو و تغير لون وجهو
صقر: بدي تساعديا
سيلينا : رح ساعدا من دون ما تطلب مني بس مين هاي و ليش محبوسة ؟
صقر: ما تسالي شي , نفذي و بس
سيلينا : رح نفذ مع انو ما كان هيك اتفاقنا
قررت ساعدا , كان مستحيل شوف هيك حالة قدامي و اتركا تموت بدون ما اعملا شي ,تذكرت ستي يلي ربتني كانت تقلي اعملي يلي بمليه عليكي ضميرك و اتكلي على ربك و الله ما بيخذل حدا اتكل عليه , تاني يوم المسا نطرت الكل لينام و على الساعة 2 بعد نص الليل , قمت و شغلت شمعة و طلعت لعندا لاطمن عليا و شوف شو بدي قدملا و كنت اخدة معي دواء فيتامن لانو واضح انو صار معا سوء تغذية شديد , و انا عم فك مسكة الباب حتى فوت لعندا ,سمعت صوت باب عم ينفتح من الطابق التاني,خفت انو حدا يشوفني و اتعاقب, تركتا المسكة قبل ما ثبتا و نزلت بسرعة و انا قلبي عم يخفق مرورا بالطابق التاني , كان بدي بس ارجع على غرفتي
جعفر: مين هون ؟
التفتت شفت جعفر واقف بالعتمة باخر الممر , نزلت ركض و هو لحقني , وقعت الشمعة من ايدي انا عم اركض و انطفت , تفشكل جعفر على الدرج هو و عم يلحقني , تابعت نزول بدون ما التفت لوراي , فتت على غرفتي و حطيت حالي بالتخت انا و عم اسمع دقات قلبي , بعد شوي سمعت صوت جعفر عم يصرخ , فاقت ميرا على صوتو و انا عملت حالي نايمة
ميرا: سيلينا ...سيلينا ....
سيلينا :..ايه ...شبك
ميرا : شو هالصوت؟
سيلينا : ما بعرف اتركيني كمل نومتي
قامت ميرا لتشوف شو القصة قبل ما تفتح الباب و تطلع , دفش الباب جعفر و طلعت ميرا بوجهو , شك فيا فورا ,مسكا من شعرا و سحبا للصالون ,و سعاد و غيداء واقفين عم يرجفو و يتفرجو , انا قمت و عملت حالي متفاجئة متلن بيلي عم بصير , كانت ميرا عم تصرخ وتبكي , زعلت عليا و بكيت لانو مظلومة
جعفر : شو كنت عم تعملي فوق , انا ما منبه عليكن ما حدا بيقرب للطابق التالت
ميرا (تبكي):سيد جعفر ولله ما طلعت و لا قربت....كنت نايمة
جعفر : كذابة ..سعاد روحي نادي لصقر فورا
ميرا : ما انا ولله ما انا
جعفر: شفتك بعيني نازلة من فوق عم تركضي
سعاد : سيد جعفر ممكن احكي كلمتين
جعفر : سعاد مين منكن يلي طلع لفوق ؟
سعاد : ميرا مستحيل تعملا لانو فاهمة القوانين منيح بس ....
اطلعت فيني و زورتني و كملت حكيا
سعاد : بس هاي بتعملا
سيلينا : ااانا ...انااا انا كنت نايمة , ميرا ما شفتيني نايمة , ليش ما غيداء مثلا ليش ما انت بس انت بتكرهيني و بدك تحطي التهمة فيني؟
جعفر (يصرخ ):مين منكن طلع لفوق ...ما تجنوني ..اسمعو اذا ما رح تحكو رح تاخدو عقوبة جماعية , مين منكن كان فوق ؟
غيداء: ولله ما انا
ميرا : ولا انا
سيلينا : ولا انا
سعاد : اكيد ما انا
جعفر: صقرررررر.....صقررررر
صقر: أي سيد جعفر
جعفر : جبلي الكرباج ....هلا منشوف مين منكن طلع لفوق؟
وقف هو و عم يرجف و وجهو احمر و معصب و ح يصب غضبو علينا نحن الاربعة , جبلو الكرباج صقر
جعفر : بلش فين
صار يضربنا صقر متل البهايم و يخفف من جهتي
جعفر: اعترفو مين كان فوق
رجعنا نكرنا كلنا , رجع صقر يضربنا اكتر من قبل
سيلينا : خلص خلص انا .....بكفي .....انا يلي طلعت (تبكي)....انا
جعفر : اخر يوم بحياتك , ارجعو انخمدو و انت تعي معي لهون
...........................................................