مخلوق ارعبني

1-من هو؟؟!

انا مريم بنت عادية جدا شغالة مدرسة في مدرسة ابتدائي بقالي شهرين الموضوع متعب جدا جيت في يوم عادي زي اي يوم رحت المدرسة مضيت حضور وطلعت فصلي ادوني فصل لتالتة ابتدائي دخلت الفصل وقعدت اعلمهم شوية نحو ما انا مدرسة عربي ادتهم تدريب معظم الفصل حساهم تمام ومتجاوبين معايا معادا طفل واحد وانا خارجة ندهتله

"مريم": اسمك ايه يا عسول انت
"يوسف":اسمي يوسف
"مريم": مالك يا يوسف متدايق ليه
"يوسف":انا مش متدايق خالص
"مريم":امال فيه ايه؟!
"يوسف":اصل عمو اللي كان واقف وراكي كان بيبرقلي فخفت منه
"مريم":عمو كان فين دا طب موجود دلوقتي
"يوسف": اه واقف جمبك بس بصصلك
"مريم": ايه طيب ماشي يا حبيبي روح الفصل دلوقتي عايز حاجة
"يوسف":لا شكرا بس عمو شكله مبسوط دلوقتي

*************

مشيت وانا مش فاهمة حاجة مفيش حد كان معايا ف الفصل غير الطلاب متلغبطة هو في ايه بيحصل روحت البيت وكلام الولد بيتكرر في دماغي قولت ممكن يكون عنده مشكلة نفسية او حاجة بس الاكيد اني مش هصدق حاجة من الي قاله انا كبيرة ومتعلمة دخلت البيت غيرت هدومي لهدوم مريحة ومقدرتش اكل من القلق دخلت السرير فتحت الفون شوية كالعادة مفيش جديد محدش كلمني ولا سال عني حتي بعت رسالة لمروة صحبتي الوحيدة قولتلها هي عاملة ايه لقيتها مبتردش قولت اكيد نايمة شلت الفون ونمت.
صحيت تاني يوم على روتيني العادي غيرت هدومي وفطرت وشربت القهوة ونزلت روحت الفصل حاولت مركزش مع يوسف انهاردة بس لحظته بيتكلم وتمام وبعد ما خرجت لقيته بيندهلي

"مريم":فيه حاجة مفهمتهاش في درس انهاردة
"يوسف": لا فهمته كله بس عمو قالي اقولك حاجة
"مريم":حاجة ايه؟
يوسف: بيقولك هو موجود وتصدقيني عشان انا مبكدبش
"مريم":طب عايز حاجة انا همشي عشان ورايا حاجة مهمة نتكلم بعدين

******************

نزلت للاخصائية بتاعة المدرسة وحكيتلها علي كل كلمة الولد قالها اسمها هدى قالتلي هتروحله الفصل وقالتلي لا هو ممكن يكون عمل لنفسه شخصية خيالية من الوحدة وبيكلمها ف دا طبيعي في المرحلة دي وبردوا هتشوفه وتقولي.
خرجت من عندها هتجنن اصدق ايه كلام الولد ولا كلامها روحت الكافتيريا قابلت مدرسة زميلتي من دفعتي قعدنا نتكلم شوية وبعدها مشينا وسبتها عند باب المدرسة .
شوفت الولد مع مامته ما صدقت اخيرا هتاكد من كلام المدرسة روحت ناحيتهم وسلمت علي مامته اعدنا نتكلم شويه علي مستواه وسالتها

"مريم": هو عنده اخوات
"مامته": اه عنده ولد وبنت وبيحبوه جدا هما اكبر منه بسنة وسنتين.
"مريم": هو بيحب يقعد لوحده كتير
"مامته":لا معظم وقته معاهم .

خفت اكتر مرضتش اقولها حاجة سلمت عليها ومشيت. روحت علي البيت.
_______________
**************