مخلوق ارعبني

3-مشوشة

مشيت من المدرسة وانا متلغبطة وقررت اني اروح اي كافيه يمكن افهم اي حاجة روحت كافيه قريب من بيتي شوية دخلت وقعت على ترابيزة علي جنب وطلبت عصير ساقع عشان اهدي شوية وقعدت افكر في كلام يوسف لازم اصدق عشان يظهر بس كنت خايفة اصدق وارجع اندم قررت اني مش هصدق حاجة وان اكيد فيه حاجة غلط ممكن يكون عيب في الموبيل او اي حاجة عادي يعني وكل ده وانا مش مقتنعة ولا فاهمة ايه الي بيحصلي ده وعملت ايه عشان يحصلي كده قعدت وافتكرت الحادثة بكل تفاصيلها واد ايه انا كنت تمام قبلها وليا صحاب كتيرر وكل ده كان بسببه هو كان بيديني ثقتي في نفسي وحشني اووي وحشتني ثقتي في نفسي وحشني تشجيعه ليا ضحي بنفسه عشان يحميني اما كنت بكلم ماما في التلفون وبعدي الطريق كان فاضي وهو كان ادامي مستنيني وبشاورله وخلاص كنت قريبة منه جدا لكن القدر خلي العربية فجأة تكون بيني وبينها سنتي بالضبط اخر حاجة فكراها صرخته باسمي وهو جي يزقني والعربية خبطته صحيت زي المجنونة بدور عليه وكل ما اقول لحد يقولي ميعرفش حاجة عنه ومكنش فيه ساعة الحادثة غيري من 3سنين وانا مش قادرة انساه ابدا قلبي وتفكيري ليه لوحده من غير اي حد معاه ولسه بتمني يكون عايش حتي لو مش عايزني بس يكون عايش محدش يعرف الموضوع ده غير عمر اخويا وماما وحشني اووي حازم يارب يكون عايش مشيت من الكافيه وانا بموت نسيت موضوع يوسف لمجرد اني افتكرت حازم روحت علي البيت بعد ما هديت شوية روحت علي اوضة عمر اكلمه في الموضوع اللي عمري ما هبطل اكلمه فيه

"مريم":عمر يا حبيبي عملت ايه؟
"عمر":في ايه؟؟!
"مريم":فيه ايه يا عمر انت نسيت..!
"عمر":لا طبعا منستش بس المفروض انتي اللي تنسي
"مريم":انسي قوللي موتي ارحملي انا حاطه كل الي باقي من املي في الموضوع ده عليك
"عمر":انا بقالي 3سنين بدور عليه يا مريم دا زي الابرة في كومة اش الاقيه ازاي.. مسبتش مستشفي ولا قسم مدورتش فيهم اعمل ايه اكتر من اللي عملته
"مريم":دور يا عمر انا بجد مش هقدر اعيش من غيره لو بتحبني متوقفش افضل دور لحد ما تلاقيه
"عمر":فوقي دا ممكن يكون ماات
"مريم":مات!! مات ازاي لا ممتش هيموت ازاي انا لسه حاسة انه عايش وكويس كمان صدقني عايش ان شاء اللّه عايش
"عمر":بردوا متربطيش نفسك بيه عيشي حياتك هتحبي وتتحبي تاني
"مريم":احب واتحب دا مكنش حب علي قد ما كان روح فيا كان بيزودلي ثقتي في نفسي كان بيحبني لدرجة انه ضحي بنفسه عشان اروح احب بعده، واما يرجعلي وهو كله امل اني مستنياه يلاقيني حبيت غيره ابداااا انا اموت اريحلي من اني اجرحه
"عمر":طب اهدي وانا هدور عليه تاني وعشان خاطري اهدي كده وارجعي مريم بتاعة زمان الي مبتوقفش ضحك ولا هزار من كتر عياطك بقيتي ست عجوزة ولا اللي عندك 60سنة انتي لسه صغيرة علي الهّم اللي انتي حاطة نفسك فيه دا يا حبيبتي
"مريم":حاضر يا عمر هحاول عشانك انت ارجّع مريم بتاعة زمان وعشان حازم اما يرجع يلاقيني زي ما انا متغيرتش لسه بضحك واهزر اوعدك يا عمر
"عمر" :هي دي مريومتي اللي بحبها ايوة ارجعي بس عشان نفسك ارجعي عشانها هي تستاهل، عايزة حاجة تاني
"مريم":لا عايزة سلامتك

***********

خرجت من اوضة عمر وانا ناسية موضوع يوسف خاالص وكل اللي كان في دماغي هو حازم وقررت اني بجد ارجع مريم اللي حبّها روحت علي اوضتي ووقفت ادام المراية لقيت نفسي فعلا في جسم واحدة معرفهاش شعري اللي قصيته بقا يدوبك يعمل كحكة صغيرة جدا وشي اللي كان جميل ملاه الهالات حطيت كونسيلر تحت عنيا وحطيت روج خفيف ابتديت ارجع زي الاول فتحت دولابي لقيته متكركب وشكله غريب عمري ما حبيته يكون كده طبقته ورتبته قررت ارجع لهوايتي المفضلة من جديد وهي الرسم اللي بيحسسني اني عندي طاقة ايجابية شغلت اغنية كنت دايما بحب اسمعها وحازم كان بيقعد يتريق عليا وانا مشغلاها اقوم معنداه ومعلياها اكتر لحد ما يجي يقولي اسف اطفيها ويجبلي ايس كريم وحشني جدا روحت شغلتها وسبت ايدي ترسم براحتها كنت متوقعة ممكن ارسم ايه غيره؟؟ اللي شاغلي تفكيري رسمته اه ودي كانت تاني مره ارسمه اه عدي 3سنين علي الحادثة بس لسه ملامحه محفورة في قلبي وعقلي والصورة الاولي عمر خدها مني عشان التحقيقات للبحث عنه وقالي انه مش هيعرف يجبها تاني وانا حاولت ارسمه بعدها كتيرر بس كنت بفشل يمكن عشان رجعلي احساسه من الاغنية رجعلي صورته مسكت الصورة وحضنتها ونمت صحيت تاني يوم وحطيت الصورة في دولابي جمب ادوات الرسم و طلعت لبس عشان اروح المدرسة طلعت بنطلون اسود وعليه تشيرت بنص كم احمر ومعاه جاكيت اسود مع كوتش اسود وشنطه سودة دخلت خدت شاور وغيرت وخرجت حطيت ميكب خفيف ونزلت و اول مرة من 3سنين افطر مع ماما وعمر واقعد اهزر وسلمت عليهم ومشيت وصلت المدرسة وطلعت ع الفصل اصلي عندي الحصة الاولي سلمت علي الولاد وهزرت معاهم شوية وشرحتلهم درس ونص وكنا ماشين كويس جدا ف المنهج ادتهم كويز صغير ودرجتهم كويسه فيه وانا خارجة لاحظت يوسف مع اني كنت نسيته خالص ومخدتش بالي منه طول الشرح خرجلي بره الفصل

"يوسف" :ازيك يا ميس
"مريم":تمام وانت يا حبيبي
"يوسف" :شكلك كده احلي بكتير
"مريم":شكرا. عايز حاجة
"يوسف":بيقولك انه بيحبك
"مريم":هو مين ده
"يوسف" :عمو
"مريم":هو عمو دا اسمه ايه؟
"يوسف" :هو قالي اقولك ان اسمه...
رن جرس الفسحة والولاد خرجوا من الفصل ومشفتش يوسف وسطهم قولت بكره ابقا اشوفه بس هو مين ده الي بيحبني
**************
نزلت للاخصائية 'هدى' عشان اعرفها اني تمام

"هدى":ليه جيتي انهارده قولتلك ارتحيلك اسبوعين
"مريم":لاانا تمام قوليلي ايه اللي خلاكي تمشي امبارح جري كده
"هدى":يوسف مش هو
"مريم":مش فاهمة حاجة
"هدى":يوسف الي بتكلميه مش موجود
"مريم":ازاي يعني انا لسه مكلماه
"هدى":يوسف اللي كلمته انا هو يوسف الوحيد اللي في فصلك وعينه سودا ومليان شويه اما قولتيلي عينه زرقا قولت يمكن اكون مخدتش بالي او اتلغبطت في الولد روحت الفصل سالت عن كل اللي اسمهم يوسف مكنش فيه غير يوسف اللي انا كلمته انتي متأكده انك كلمتي ولد بالموصفات دي واسمه يوسف
"مريم":اه انا حتي لسه مكلماه حالا
"هدى" :مريم انتي مبتخديش اي ادوية
"مريم":لا خالص اصدك ان ديه هلاوس وكده لا خالص
"هدى":طب انا المفروض ابعت تقرير للمديرة بكلامك وخدي بالك ده ممكن يخليكي تتفصلي من الوظيفة
"مريم":طب ممكن تديني اسبوع بالظبط وهحاول اشوف المشكلة فين بعد ازنك اسبوع بس
"هدى":اسبوع لكن اكتر من كده مش هقدر ونصيحة مني تابعي مع اي دكتور نفسي
"مريم":شكرا ليكي عن ازنك

مشيت وانا مش فاهمة اي حاجة بس كنت متاكدة اني بكرة هلاقي الحل لكل اللي انا فيه لكن انا دلوقتي متشوشة جدا
___________
**********