قال رسول الله صلى الله عليه وسلم : "اقرب ما يكون العبد من ربه و هو ساجد فأكثروا الدعاء" رواه مسلم.
----------------
الله يديم لنا لمة الأهل… وضحكة الأصحاب… والناس اللي تسعدنا..
مرت السنه بسرعه ووصل خالد وأهله قبل الزواج بكم يوم ،وطبعا سلمت على عمي وعمتي وطنشت خالد ..
بيتنا اتملئ بالناس.. أقارب وأهل من القرية، جيران ..أصوات الزغاريط والدعاء بالتوفيق ماوقفت وبسمعها كل ماخرجت من غرفتي وقابلت أحد ..
بكره يوم الحناء، واليوم جات المنقشة تنقشني.. وكرهت حياتي.. أتخيلوا رفضت أمي إني أتنقش في غرفتي، وأصرت إني أكون في المجلس ..وصار لي 3ساعات جالسة على نفس الوضعية.. والحريم حولي كأني مزهرية وكل شوية وحده تعلق على النقش ولونه وريحتة.. وكل وحده تنصح بنقشة وحركة ،حتى المنقشه صدعت منهم ههههههههههه ..
-------------
(خالد)
أوقات كثيره مرت عليا وأنا أحس نفسي في حلم ،وكأن ذي الإنسانه مجرد طيف مر عليا، صارت بالنسبه ليا مثل الحكاية ،أسمع عنها من أبويا وأمي..ماحسيتها زوجتي ولا عشت معاها فترة الملكة،اللي المفروض نقرب فيها من بعض،ونعيش فيها مشاعر الحب والغرام..
أدري إني السبب الرئيسي في حالتنا ،بس هيا كمان ما أعطتني أي فرصه علشان ابرر لها موقفي أو أعتذر منها،يمكن لو كانت أكبر ،كانت اتفهمت واتقبلت اللي صار بشكل أحسن من كذا، وماكنا وصلنا لذي المرحله من الجمود وعدم الراحه..
اتحدد الزواج ووصلنا قبل موعده بكم يوم،
وزي ماتوقعت ماشفتها ولاسمعت صوتها، يلاا أصلا ماكنت فاضي لها ،ولا والوضع يسمح بسبب الناس اللي ماليين بيتهم،اهلهم وأقاربهم ،وجهي اتشنج من كثر ما أبتسم واردد "الله يبارك فيكم"
------------
جوري… (يوم الحناء)
همست لأحلام/خرجيني بسرعه من هنا،ولا والله لأخرج ومادخلي بأحد..
أحلام بحده وهمس/بلا هباله مش وقتها.. أصبري ساعة والنسوان بيروحوا..
جوري بضيق/حرام عليكي لي ساعتين محنطة عالكرسي،رقبتي أتشنجت وجسمي كله بيوجعني..
ضغطت أحلام يدها بشويش/خلاص ياقلبي أصبري شوية بس..
جوري بضيق/خلاص أنا بتصرف..
التفتت لسبأ صاحبتها في المدرسة وبنت جيرانهم،مسكت يدها وبرجاء/سبوئه،شوفي علياء وقولي لها تجي..
سبأ/هههههههه.. سبوئه، طيب أيش عندك وأنا أسوية..
أخذت نفس بقوة/شوفي غرفة فاضية وخرجيني من هنا..
سبأبقلق/مالك.. مريضة؟
هزت رأسها بلا.. وراحت سبأ وبعد دقائق رجعت،كلمت البنات ووقفوا كلهم وصاروا يغنوا لها ويصفقوا ووقفتها سبأ مع أحلام وزفوها لبرا المجلس ،وقابلتهم وداد بإستغراب/ليش خرجتوا!!
شافتها جوري ولفت وجهها عالجهه الثانية،
وردت عليها سبأ/داخل كلهم نسوان كبار وزحمة،قلنا نطلع فوق نأخذ راحتنا شوية..
وداد بهدوء/طيب لكن لاتتأخروا.. شوية وتنزلوها علشان النسوان يشوفوها..
كملوا زفتهم للمجلس اللي فوق،وأول مادخلوا قالت جوري/بسرررعه قفلوا الباب..
قبل مايشوفوني..
سبأ/قد حفظوا شكلك ياعروسة..
إلهام/ماشاء الله عليكي شكلك رووعة..
اتأملوها البنات بأعجاب كانت لابسة فستان عودي مطرز بالذهبي وبدون أكمام ، وعلى شعرها طرحة بنفس لون الفستان، ووجهها مغطى ببرقع مثبت عليه سلاسل ذهبية توصل لبداية صدرها، وماباين من وجهها غير عيونها العسلية اللي زاد جمالها بالكحل الأسود والرسمة الفرنسية ، وأيديها مزينة بالنقش الأسود (الخضاب) وهو حجر طبيعي لونه أسود يستخدم في اليمن في النقش والزينة بدل الحناء.. كانت النقوش شديدة السواد على شكل ورود وأغصان متداخلة بإتقان وروعة برز لون بشرتها الأبيض.. اتخصرت جوري وبلكاعه/قصدي يشوفوني كذا..
مدت يدها وسحبت البرقع و فكت البنس اللي مثبتة الطرحة وشالتها وفكت شعرها المجموع في كعكة كبيرة،وسط شهقات البنات المستنكرة لحركتها،لإن العروسة محد يشوفها..
حست أحلام بقلق وهي تسمع وشوشة البنات، وبخوف/أيش فيه..
مسكت يد أحلام وحطتها على شعرها وضحكت لما سمعتها تشهق/هههههههههه، أخيرا أتحررت.. الحمد لله..
ضحكت أحلام وهي تنعكش شعرها/ يامجنونة لو شافتك عمتي هتموتك…
جلسوا عالأرض وجوري تتنهد براحة/والله يابنات لحقتوني على آخر رمق.. رأسي وجعني من كثر ما كنت ثابتة ،خايفة اتحرك وتخرب الطرحة.. حسيت إني أبو الهول وأنا متصنمة ساعتين..
منى بقلق/ لو تجي أمك ولا وحده من نسوان الحارة ياويلنا…
ضحكت جوري والبنات وقفلوا الباب ،بعد مارسلوا يجيبوا لهم أشياء..
سبأ / أنتي ماترتاحي غير لما نتهزأ بسببك كالمعتاد ..
جوري بقهر/لو أعرف من قال إن العروسة ماتتحرك ولاتتكلم ولاتأكل.. كان موته على يدي اليوم..
زينب/كل العرايس كذا ،أنتي بس اللي قليلة ولف..
سبأ بضحك/لو شفتوا أستاذة ردينه قبل فترة… كانت تمشي وتكلم نفسها..
قلت لها مالك سلامات.. قالت أنتي تعرفي جوري من زمان؟ قلت أيوه جيران من زمان.. ليش! قالت ماقد سمعتي إن جوري فيها شيئ.. ملبوسة ممسوسة؟
بحلقوا فيها البنات وانفجروا ضحك لما عصبت جوري/جني يلبس إبليسها يارب.. ليش شافتني بطير ولا بجنن وأقطع ملابسي..
إلهام/ههههههههه،تذكري آخر يوم في شعبان،وقت ماكان عندنا حصص فاضية وكنتي تدوري في الفصول..
هزت رأسها وبمرح/كان يووم روووعة..
سبأ/كان يوم ماشكت فيكي.. قالت أنتي عارفة إني شفت جوري اليوم في المدرسة كلها.. طلعت فصول الثانوي لقيتها.. رحت المقصف لقيتها.. في الإدارة.. حتى عند الحارس لقيتها.. هي بتطير ولا عندها توأم.. وليش مبتسمة على طول زي الهبلا..
شهقت جوري/ أستغفر الله بس، بتحاسبني عالإبتسامة.. الإبتسامة في وجه أخيك صدقة،لازم أمشي مبرطمة زيها.. ولا أكون ملبوسة..
أحلام بهدوء/جوري.. لاتغتابيها..
جوري بنرفزه/يختي جننتني،مش أول مره تقول كذا ..دايما توقفني وتحقق معي من وين جيتي.. وين رايحه.. ليش تضحكي.. أكيد مسوية مصيبة..
إلهام/هي كذا مع الكل.. مش بس أنتي..
منى بتريقة/يابنات أفهموا.. هي بتتصايح مع زوجها في البيت ،وتجي المدرسة تفرغ قهرها فينا.. مابتقدر عليه.. أيش تفعل له تنقصه درجات ولا ترسله للإدارة..
ضحكوا البنات وهم يتذكروها ويتذكروا كيف ماقد أحد شافها تضحك، على طول جدية وماعندها مزح..
سبأ/بيني وبينكم جوري ذاك اليوم مدري مالها.. ماقرت والله.. ولاخلتنا نقر ساحبه البنات معاها.. والمديرة سكتت بمزاجها ،قالت رمضان وعوافي..
جوري بشرح/ياربي منكم.. كنت أودع البنات.. طلعت عند أحلامي ولفيت معاها عالبنات أسلم عليهم.. بعدها نزلنا للفصول الخارجية شفت كم وحده كنت مسلفتها روايات.. ورجعوها لي.. أيش اخليها معاهم علشان معاذ يعلقني في باب الشارع..
إلهام/وعم محمد ،وعمال المقصف .. ليش رحتي عندهم.. كم مره قلنا لك لاتتكلمي معهم..
جوري بعصبية/لا والله.. عم محمد مالكم دخل بيني وبينه.. رحت أبارك له بالشهر، بعدين. حرام عليكم.. من متى وهو حارسنا.. من صف ثالث إبتدأئي.. وماعمره غلط علينا ولازعلنا.. وأي شيئ نحتاجه من خارج المدرسة يشتريه لنا مع إنه ممنوع.. وحق المقصف رحت أشتريت بس مابينا كلام غير السلام وهو لله ..
أحلام بإبتسامة/قصدك ماغلط ولازعلك أنتي.. حتى الشراء مايشتري غير لك أنتي. .
منى/صدق والله ..حتى بنات الثانوي إذا يشتوا حاجه يجوا لك وأنتي تكلميه ويشتري، ولا هم يكلموه ولا يسمع لهم.. وعمال المقصف يمشوكي أول وحده ولو كنتي في آخر الشباك ومن غير ماتطلبي عارفين طلبك.. أيش السر..
جوري ببرود/ولا سر ولاشيئ،واحد يعرفني من يوم سجلت في المدرسة و يعتبرني زي بنته.. وعمال المقصف عمرهم مارفعوا عينهم وهم يبيعوا وكلامهم محترم، مع إنهم في مدرسة بنات.. وفي بنات مايعات وأنتم عارفين.. أما ليش بيقدروني ولا يمشوني قبل الكل،فذا شيئ منهم وأنا ماهروح واسألهم ليش.. وأعتقد كل شيئ قدام الكل..
أحلام بدفاع/أصلا محمد مره وأحنا خارجين من المدرسة،كانوا واقفين معه عند البوابة ولماخرجنا أشر لهم على جوري ووصاهم عليها وقلهم ذي بنتي..
حاولت سبأ تغير الموضوع لما شافت جوري هتزعل من البنات اللي كل مره يقولوا نفس الكلام بحسن نية،وبحدة مفتعله/وليش تخلينا نلف المدرسة ونطلع وننزل،رجلي يومين توجعني..
إلهام بلوم/ أمرك لله صدق ..والله تعبتينا..
جوري بملل وتأكل بسكوت/والله أنا ماغصبت أحد قلتوا ملل،الحق عليا لعبتكم وسليتكم.. كل مره تلعبوا وتغيروا جو وبعدها تتذمروا و----- التفتوا كلهم للباب لما سمعوا شهقة قوية.. وشافوا علياء اللي تطالعهم بذهول، ارتبكوا صحبات جوري اللي من المدرسة ووقفوا بإحراج منها لإن علاقتهم بأهل جوري رسمية،بعكس سبأ وإلهام ومنى وزينب بنات جيرانهم..
علياء بعصبية/أيش بتسووا.. وأيش ذا.. دارت بعيونها عالغرفة كانت مفروشة بجلسة عربية منخفضة باللون البني والبنات كلهم في الأرض وفي الوسط أكياس شيبسات وعصاير وبسكوت وشكولاتات،بس اللي صدمها منظر جوري وهي متربعة عالأرض وشعرها المفرود بطول ظهرها،في حضنها كيش شيبس،وفي يدها بسكوت شوكولاته وروجها ممسوح وجالسة ولا على بالها..
تابعت بحده/أكيد أنتي اللي مسوية كذا محد غيرك..
سبلت عيونها ببرائه/لااا.. أحلام والبنات عزموني..
شهقوا البنات من كذبها وهزوا رأسهم بنفي لعلياء..
ضحكت أحلام/شوفي.. هي قالت تشتي تأكل، وإننا نكلمك ترسليلها حاجة،قلنا خلاص أحنا بنعزم العروسة وندلعها،جمعنا اللي معانا ورسلنا العيال يشتروا لنا..
علياء/يعني أنتي.. طيب عشر دقائق وأرجع القاكي مثل ماطلعتي.. تمام..
جوري بتأفف/حرلم عليكي… رأسي بيوجعني من البنس.. خلاص يكفي.
علياء بحزم/خلاص يلااا. أمشي ذحين قدامي.
صرخت/لاااا.. عشر دقائق وأنزل..
وفعلا بعد عشر دقائق كانت علياء عندهم وعدلت جوري ونزلوا لتحت،وعدى اليوم على خير..
أنت تقرأ
خريف الحب
Storie d'amoreمن منا لايحلم بالحب،من منا لا يبحث عنه. من منا لا يتخيله عملاقا يمشي بيننا فيوزع عطايه وهباته بعشوائيه على قلوب البشر. عندما نحلم بالحب نتخيل عالما رائعا نعيش فيه نتخيل قلوب تحلق في سماء الحب، وتسبح في كلمات الشوق والغزل. قلوب تتهادى بلهفه مغلفة ب...
