رحله حياتي ......
طبعا بعد مانخطبنه اني وحيدر استمرت خطوبتنه اربع اشهر بهاي الاربع اشهر حبيت حيدر اكثر جنت قبل اسمع الي كانن عدهن علاقة حب ويخطبهم الي يحبوهم يكولن اكتشفناه بعد الخطوبه مونفس الانسان الي حبيناه يكولون طلعت كل عيوبه الااني اكتشفت بحيدر كلشي حلو كلبه الطيب حنيته عليه عيونه الي تتغير وتشع بسعادة من يشوفني جنت احسد نفسي على حيدر جنت اكول ماكو واحد يحب خطيبته بكد ماحيدر يحبني طبعا اهله مهلكد جانو عاجبتهم اني ولكن هو رادني وهمه مكدر يعارضوو انكضت اربع اشهر وياحيدر نطلع ونروح و كلش تونسنه جنت اشوف نظرات الحسد بعيون صديقاتي جنت اشوف النظرات شلون تتوجه على حيدر من ندخل لمطعم او روح لمكان جنت اكمشه حيل احس عبالك من رح اتمسك بي محد رح يكدر ياخذه مني جنت اخاف تجي وحده تاخذه بس دائما جان يكلي انتي ليش تخافين اني اشوفج احلى وحدة بالدنيا واني اختاريتج الج وعمري مراح المس وحدة غيرج لان الشعور الي احسه اني وياج غريب احس كاانما اني كامش قطعه من الجنه لمن جان يكلي هيجي احس نفسي ادوخ واروح لغير عالم بس اني وياه وبعد فترة ازوجت وكانت تحضيرات عرسي وزواجي احلى ما يكون سويت كل الي تتمنى البنيه اسوي بعرسها وحيدر جان يوافق على كل الي اريده اما والدي فكان عنده حزن لان اني راح افارقه وبليلة عرسي قبل ميجي حيدر ياخذني اجاني بابا للغرفه وكلي اريد احجي وياج عاد كل الي بالغرفه طلعن لان جانن صديقاتي موجودات بالغرفه يمي واختي مها لمن طلعن تقرب والدي عليه كلي جنجونه حبيبة بابا واني اضحكله كلي اليوم طالعه تخبلين احلى عروسه بالدنيا كلي راح احجي وياج سمعيني زين اني غير سعادتج انتي واختج ميهمني شي لهذا السبب قبلت على حيدر لان شفتج انتي مصرة عليه ولان حسيت انو اني اذا امنعج منه معناته داكسر كلبج واني ضحيت بحياتي ومارضيت ازوج لخاطركم انتي واختج اريد اكلج شي خاف يصير بيه شي مااريدج اصيرين ضعيفه واريدج اصيرين قويه لخاطر اختج لان ماعدها غيرج واريدج تعيشين بسعادة ويا حيدر لان اني اكتشفت انو هو كلش يحبج طبعا من حجه هيج بابا اني ظلت دموعي تنزل صدك الاب دنيا تحس البنيه بيها بالامان والحب بابا من شافني ابجي حضني كلي طول مااني عايش مااريدج تنقهرين على شي كلي يله خلي اسلمج للعريس وضحكلي وعدلت مكياجي وطلعت وياه وجان كايدني وصلنه لحد حيدر واول ماوصلت يم حيدر اجه اخوه لحيدر انطاه مسدس وحيدر سحب المسدس وظل يرمي وبعدها اجه عليه وباسني من راسي وصعدني بالسيارة جنت فرحانه الدنيا مسايعتني من الفرحه بس الشي الوحيد الي قهرني نظرات ابويه ودموع مها المهم حيدر هو ساق السيارة واول ماصعدت وياه بالسيارة باوعلي كلي احبج وممصدك هاليليه انتي تنامين بحضني اني جنت خجلانه كلش بس كنت كل شويه اباوع عليه شعور يفوق الخيال لمن تحسين انو اكو جزء من كلبج بعيد عنج خارج جسمج جنت هيجي اشوف حيدر جزء من كلبي المهم انو وصلنه للبيت طبعا اني كعدت وياه اهله بنفس البيت بس بيوم عرسنه كان ماكو احد بالبيت طبعا هو عنده بيوت اثنين بس هو حب انو يبقى ويااهله واني معارضته المهم انو اول موصلنه للبيت الحارس فتح باب الكراج ودخلنه والزفافه والسيارات بقو بره بالشارع ودخلت عمتي ويايه وصعدت ويايه لغرفتي وبوستني وبدلتنه الحلقات ونزلت وهو نزل وره شويه صعد نزع سترته والرباط وخلاهن على الجربايه وغمزلي كلي شبيج خايفه كتله لامابيه كلي لاوالله شبيج كتله اريد بابا طك من الضحك كلي صدك كتله اي والله كلي هسه صرت اني بابا وماما واخوج واختج وخله ايده على كلبي كلي وصرت كلبج كتله حيدر كلي كلب حيدر كتله ليش انت تعاملني هيج كلي يعني شلون كتله يعني اشوفك كلش قاسي ويا الكل ليش بس ويايه رقيق ابتسملي كلي لان احبج ومااكدر اشوفج حزينه ومااكدر اشوفج زعلانه كتله خاف بعدين هم تصير قاسي عليه كلي لتصورين فديوم اذيج او اجرحج بعدين سكت كلي يله رح نظل نسولف كتله ليش شتريد كلي يعني شريد قابل و اني متت من الخجل كلي تعرفين شكد احبج كتله لا مااعرف كلي والله كتله اي كلي دتعاي حتى اشوفج شكد احبج واجه عليه واحلى شعور حسيته اول مره اشعر شعور التملك من عرفت حيدر وحبيته ولحد الان حسيت هذا الجزء الي من كلبي ملكته نمنه والصبح حسيت حيدر كاعد يباوع بوجهي كتله صباح الخير كلي احلى صباح يسلملي هالوجه الي يخبل صدك حسيته احلى صباح وكلام حيدر جان يخلي دكات كلبي ازيد احس كلبي يريد يطلع من مكانه عجيب هذا الشعور الي يخلي كلبي هيجي يدك مابطل ابد من عرفت حيدر الحسني لحد ماصرت مرته وكضيت الليل بحضنه فديت حضنه احلى حضن يكفيني اشتم عطرة يتبع... #الكاتبه #روجمان
