اماعن نفسي فبعدني اتالم من فقدان احلى شي كان بحياتي بعدني احلم بداخلي ذرات من الامل ولكن صدمتي من حيدر ازوج وره زواجه بااسبوع اتصل عليه عمي كله انريد انخلص اجراءات انفصالك عن جمانه ولكن هو رفض وكله جمانه مااطلكها لوتنكلب الدنيا عمي كله موعلى كيفك لان انت ازوجت وهي بعد متقبل ترجعلك كله اي مااطلكها وفعلا بوكتها صارت مشاكل كلش هوايه بين عمي وحيدر وكام حيدر كل كم يوم يجي لبيت عمي ويكوم يعيط بالشارع ويلم علينه الدنيا وبعدين سمعت انو مرته حامل جان عندي اتصال بزوجة اخو وجانت كل فترة تخابرني واسولفلي فهي كلتلي على انو زوجة حيدر حامل ولكن جانت ادكلي حيدر كلش موسعيد واكثر وقته يروح لبيتكم الي بزيونه يظل هناك دكول ودورات تجي يومين ثلاثه متشوفه مرته وحتى كلتلي وضعه كلش معاجبنه بالبيت امه كلش دضوج علموده المهم ظليت تقريبا سنه كامله زعلانه وكنت يم عمتي ولكن بعض الاحيان كنت اروح يم بيت عمي حازم جنت اشوف دورات بعمو حازم بابا الله يرحمه وبخلال هاي الفترة مها صار عدها ولد وصار عدها اطفال اثنين بنيه ولد يخبلون يوميه اخابرها وافتح الكامره وياها واشوفهم فدوه لعمرهم اما بخصوص حيدر فرفض يطلكني وصراحه حيدر صاحب نفوذ وعلاقات واسعه مااريد اتحدا واحد ياذي لان اخر فترة كام يهدد عمي ويحذره انو ميفتح وياه موضوع الطلاق مرة ثانيه واني كمت اخاف ليصير شي وتطلع من وجهي فتركت السالفه هيج وصرت لااني معلكه ولااني مطلكه ومرت عليه هاي السنه جحيم احساس وعواطفي كلها تجذبني لحيدر كنت يوميه اكعد اباوع صورته الي بالتلفون واسمع الاغاني الي يحبها واقرى رسائله واذكر كل مرة انام بحضنه بعدني احس عطره بيه دورات كنت اكول لنفسي اني انانيه لان داحرمه من شي هو يتمناه وهو الطفل بس موبيدي مااكدر اخلي وحده تشاركني بي صعب مااتقبل هاي الفكرة ومره العصر كنت بيت عمي وندكت الباب ولمن ابن عمي فتح الباب شاف حيدر كله تفضل ادخل مقبل كله اريد جمانه وصاحني محمد ابن عمي وطلعت للحديقه شفت حيدر اول مره اشوف حيدر لحيته طويله وضعفان بشكل كلبي وجعني عليه بس كابرت تقدمت عليه كتله شتريد حيدر كلي اريدج اريدج ترجعين للبيت ويايه كتله اني ماارجع بعد خلص حيدر الي بينه انتهى كلي مااطلكج افتهمي بعد مااطلكج خلص وكمشني من ايدي جرني ولد عمي ودخلوني وصارت هوسه وجان حيدر يسحب مسدس على ابن عمي محمد الخوف اكلني خفت لايكتله لان اعرف حيدر من يصيررعصبي يفقد عدوكفت كدامه كتله راح اجي وياك حيدر وجرني وصعدني بالسيارة وطول الطريق اني دموعي تنزل بس بلاصوت ماادري بوكتها شنو الاحساس الي كان بداخلي احساس انو حيدر اخذني غصبن ماعني احساس الحزن الي شفته بعين حيدر احساس القرب منه الي يخليني احس اني عايشه واتنفس مااعرف شنو الاحساس الي كان بداخلي ولمن وصلنه للبيت نزلت وصعدت لغرفتي وماطلعت منه وباليل حيدر دك الباب عليه كلي اريد احجي وياج جمانه فتحتله الباب كتله شتريد ظل يباوع عليه لمدة طويله وبعدين كلي مشتاقلج اني بدونج ميت ليش متحسين انو اني متعذب ليش متحسين بالنار الي عايش بيها اني اعرفج انتي موانانيه واعرف بيج كلبج شكد طيب وبالاخص ويايه ليش هيجي سوين شدتحاولين تثبتيلي كتله مااريد اثبت شي اريدك اطلكني وخلص كلي اسف مااكدر اطلكج راح اظلين مرتي لحد مااني عايش كتله زين لعد دخلت وسديت الباب جنت فرحانه بحجيه وبنفس الوقت ضايجه وثاني يوم اجتي رسل بت عمي جابتلي ملابسي الي كانت بيت عمتي وحاولت تقنعني انو امشي حياتي وياحيدر على امل فديوم يتغير شي ولكن اني جنت رافضه هذا الشي وظليت فترة احارب حيدر انام اني بغرفه وهو ينام بغرفه وكلما يريد يحجي ويايه اعوف واكوم ومن يجي للبيت واني كاعدة جوة اصعد للغرفه ومن يطلب اكل وياة مااقبل حاربته بس جان كلبي يفرفح عليه من يدخل للبيت بودي اكوم احضنه بودي اخلي راسي على صدره حتى احس باامان مثل قبل من جنت احضنه احس كل تعبي راح بس مااكدر اتنازل ولااكدر اقبل بمحاولاته بس من اشوفه يطلع من البيت جانت النار تاكلني جنت اكول يمكن راح لمرته الثانيه يمكن هسه هو نايم بصفها يمكن يكللها احبج مثل ميكلي جان التفكير يقتلني بس اليوم اول مره حسيت انو اني بحاجة حضن حيدر ردت اعيش مشاعر حلوه ولو لساعات واليوم لمن اجه حيدر بالليل كنت كاعدة داباوع تلفزيون باوع عليه وكلي شعجب مصعدتي للغرفه من شفتيني دخلت اني درت وجهي باوعت عليه ونداريت شفته نزع الساعه مالته وخله المحفظه وسويج السيارة على الميز واجه كعد بصفي واني جنت مسويه نفسي ممهتمه واباوع على التلفزيون بس جان كلبي يدك بسرعه حسيت دكات كلبي راح تفضحني اتقرب كلش عليا واخذ الريمونت مال تلفزيون مني وكمش يدي وكلي جوجه جان من يريد يدلعني يكلي جوجه باوعت بعيونه الي جذبتني من اول يوم شفته من اول مالمحته من جنت اشوف السعادة بعينه من يشوفني باوعت بعينه وحسيت مشاعري فضحتني كلي والله ماحبيت غيرج ولا حسيت بيوم بالسعادة بدونج واني داتعذب واني داشوفج كدامي بس مااكدر المسج اني حبيت كلشي بيج ولحد مراح اموت مراح احب غيرج انتي احلى شي صار بحياتي لتعوفيني جمانه اترجاج اني بدونج مثل الطفل بعد مستحملت من هيج وحضنته قوي مثل مجنت احضنه قبل حسيت براحه موطبيعيه جان مشتاقلي بشكل واني هم جنت مشتاقتله رحت وياة بااحلى عالم تمنيت مااصحه منه ابد تمنيت ابقى عمري كله احلم مرت تقريبا شهر وعلاقتي حلوه بحيدر وبعدني داحلم بس بده يروح لمرته الثانيه او دورات جانت تخابرة دكله بطني توجعني اريد اروح للدكتور واني جنت احس سجاجين دكطع بيه والحلم الي جنت داحلمه خلص وهسه رجعت للواقع
