حياتي متخله من المفاجئات يعني دورات صير امور بحياتنه غريبه شلون تتركب ماادري و صدك الدنيا صغيرة والوجوة تتلاكه مهما ابتعدت
تقريبا الي ثمن ايام بالكليه اداوم وشفت قتيبه جان ويا وحدة بحيث هي طايرة تباوع عليه وممصدكه نفسها
سئلت شنو هذا مين سويت نفسي مااعرفه
كالولي هذا ضابط قتيبه وخطيبته اداوم هنا مرحله ثانيه وكل كم يوم يجي ياخذها من الدوام لو يجبها واني جنت اباوع عليه من بعيد جان لابس الملابس الزيتونيه وهو حلوو وهيبه
والمسدس مالته بخصرة ومن يمشي عبالك بس هو بالدنيا
ولكن اذكرت شي المني جدا اذكرت من منعني اداوم ومقبل يخليني اخلص دراسه
وكلت بكلبي صدك اكو ناس حظوظ
المهم ظليت اراقبه من بعيد
محاولتي للتناسي كانت فاشله لان اني اكتشفت بعد مرور سنتين على انفصالي عن قتيبه مازلت من اشوفه كلبي ينبض بقوة وعيوني تلمع والشمس تشرق على جوانب احلامي دورات نحب انسان للدرجه الي تخلينه منكدر نعيش بدونه و احنا كبشر بداخلنه حب وعشق واحاسيس بس في اغلب الاحيان نكبده واني كنت احب
قتيبه بس كنت احاول انو اعتبرة مو شي ضروري بحياتي
وطبعا بعد اخر مشكله صارت بينه بسبب انو ردت اسافر بلا علمه قتيبه كام ميجي لبيتنه كام السايق يجي ياخذ فردوس ويرجعها
وللاسف مكنت اشوفه
ولمن شفته جنت اليوم كمت اتكلم ويا نفسي اكول لروحي تغير لو بعدة هو نفسه هذا الانسان المتعجرف المغرور والمتكبر القاسي
بس ليش هسه نظراته الها مدل على قساوة ليش مجان يباوعلي هيج ليش مجان اكو حرارة و شوك بنظراته
بعدين اتذكرت اني وين وشصار واذكرت المكان والزمان ولملمت شتات نفسي
وانتبهت لروحي وعرفت انو اني رحت لبعيد هوايه بتفكيري
وقررت انو مثل ماجنت ماافكر بقتيبه هسه هم ماافكر بي
وفعلا كمت اتهرب منه لان كان هوايه يجي للكليه يمكن جان عايش قصت حب من جديد وديعيشها بكل تفاصيلها المهم انو ورة تقريبا كم يوم من دوامي صادف انو اني خلص دوامي وداطلع وقتيبه جان ديدخل لداخل الكليه وجان يشوفني واني سويت نفسي مشفته ومشيت بس هو صاحني كلي دلفين
نداريت عليه وجان كلبي يدك بسرعه وعبالك اول مرة اشوفه واول مرة اسمعه يصيح اسمي
نداريت وهو اجه وكف بصفي طبعا هو اطول مني
فلمن اباوع عليه ارفع راسي واباوع عليه واحلى شي من جنت ارفع راسي واباوع عليه لان من جنت قبل وياة من اريد شي منه جنت اسوي هيجي لان جان هو يحب هاي الحركه جان يحب من اتقرب كلش من عندة وارفع راسي واظل اباوع بعيونه جان يكلي احسج مثل الطفله الي تريد شي وجنت دائما اكله يعني اني طفله جان يبتسم ابتسامته المغرورة ويكلي اي انتي الطفله مالتي وانتي احلى طفله هذا الشي الوحيد الي جان يكوله الي مجان رومانسي ولاجان حتى يكلي احبج الا ماندر جنت اتمنى كلمه منه ولحد الان نفس الشعور يراودني
كل هذا ذكرته من سمعت صوته ورفعت راسي وباوعت عليه وكتله هلو قتيبه
كلي هلو
دلفين شلونج كتله الحمدلله اني بخير
انت شخبارك وشلونك ان شاءالله بخير سكت
شويه وجاوبني كلي اني زين بس انتي شعندج هنا كتله اني طالبه بالكليه اني اداوم هنا
سكت اني باوعت عليه وبعدها نزلت راسي وكمت احاول اتهرب من نظراته وبعدها
سمعته يكلي ليش متباعين عليه معقوله انتي هلكد كارهتني دلفين
دكات كلبي كامت تتسارع اكثر واكثر ورفعت راسي وخليت عيني بعينه وكتله اني عمري ماكرهتك قتيبه
ظل ساكت كلي باابتسامه بيها استهزاء عمرج ماكرهتيني ليش يعني قابل بسبب حبج الي انصدمت بكلامه وضحكته وكتله اي احبك وانت اول واحد حبيته
ولتصور انت انو راح تجي وحدة تحبك بكدي
وعفته ومشيت عالسريع وتندمت على الكلام الي كلته لان مجان المفروض احجي هيج والمفروض اصلا مااجاوبه شلون خليت نفسي بهذا الموقف المحلو وشلون اكون هيج ضعيفه واكله وهسه شنو النظرة الي اخذها عليه
وبيومها كلش ضجت وحتى ضجت من الكليه وثاني يوم ماداومت للكليه وضجت من فكرت وجودي اصلا بالعراق وقررت انو احجي ويا قتيبه مرة ثانيه بموضوع سفري ولان هو هسه راح يزوج بلكي يقبل اسافر
وبيوم الخميس بالليل اجه هوً الي ياخذ فردوس
هو كل خميس يجي ياخذها بس اليوم اجه بالليل دياخذها وكان كل مرة السايق ياخذها بس هالمرة هو اجه
واستغليت الفرصه انو احجي وياة ولمن طلعتله فردوس
هو جان واكف المهم كلتله اريد احجي وياك بموضوع ضروري
كلي على باجر وكلي راح تبات فردوس يمي اليوم وباجر من اجي انسولف اني وياج زين كتله اي زين انتظرك
وراح هو وفردوس وثاني يوم جاب فردوس العصر
واني طلعت وسلمت على قتيبه جان لابس بنطرون اسود وقميص اليوم مجان لابس عسكري
كلبي ينخطف من اشوفه معقوله هذا الانسان الي جنت مزوجته واني الي ردت انفصل عنه بسبب اهماله الي وبسبب برودة هذا نفسه الي من اشوفه تتسارع نبضاتي وتتعثر خطواتي لو صدك يكولون منحس بقيمته الشي او حب الا من نتخله عنه
او نتركه
سلمت عليه وكلتله اني اريد احجي وياك كلي اي احجي اشرتله انو نكعد على الكراسي الي موجودة بالحديقه كلي يله راح كعد واني كعدت كدامه
سوة هاي الحركه مالته الي ينزل راسه ويباوعلي صفح
كلي اي كتله اني اريد اسافر كلي وتالي دلفين رجعنه على نفس الموضوع كتله قبل متعيط وصير عصبي اسمعني اني اريد اسافر اعيش حياة جديدة كلي بس انتي عايشه حياتج ودداومين
كليه بعد شكو كتله بس اني مامرتاحه اني اريد اغير كلشي بحياتي
كلي اني كتلج اخذ فردوس منج ضحكت كتله اي وين توديها يم خطيبتك تربيها
كتله ليش تغالط نفسك وانت تعرف محد يتحمل بنتي غيري فعلويش دسوي هيج
كلي مسافرين وكام اني انفعلت كلش كتله مو علي كيفك اسافر
واعيش حياتي لو بس انت من حقك تعيش وكاعد تراهق وتحب ومبين شكد مرتاح
شفتك من تضحكلها من كل كلبك فعلويش دصير اناني وتريد بس انت تعيش واني لا اني
طبعا جنت داحجي وعيوني مغوركه بالدموع ومنفعله
كلش وهو جان يباوعلي بااستغراب ولمن سكتت اتقرب عليه كلي وانتي كاعدة تراقبيني ظليت ساكته
كلي اول مرة اشوفج هيج منفعله وتحجين بوجع
يتبع......
#الكاتبه #روجمان
