كتله مو البارحه سلمت علينه كال اي بس كلبي منطاني مااشوف فردوس قبل متصعد للطيارة
جان يباوع بوجهي كلي شو عيونج مورمه شنو باجيه كتله لا كلي عيونج مورمه وانتي مصير عيونج هيج الا من تبجين كلش هوايه
كتله اي انقهرت على اهلي لان دافاركهم كال بس علمود اهلج كتله اي كلي ليش دسافرين دلفين كولي الحقيقه
كتله مو كلتلك كلي براحتج بس جان قتيبه يريد اني احجي شي او راد يغير شي بس ماكدر وظل كاعد ويانه ويسولف ويا فردوس ويلعب وياها وجنت اشوف فردوس شلون تباوع على ابوها بلهفه وبااعجاب وبحب من تباوع على ابوها عيونها تلمع ولحد مااجه وقت السفر وصعدتا بالطيارة
الوقت الي راح يفصلني عن حياتي ويخليني اروح لحياة ثانيه سلمت على قتيبه وصعدت للطيارة اني وبنتي وجنت كلش منزعجه وضايجه وتعبانه المهم خلصت الرحله وصلت لتركيا وجان ابن عمتي وعمتي دينتظروني
ورحنه للبيت بعد مااخذت الجنط مالتنه وخلص اجراءات الوصول
وصلت للبيت بيت عمتي جنت تعبانه غسلت ونمت اني وبنتي
ومن اول يوم الي بتركيا تغيرت حياتي
بديت افكر انو شلون اشتغل وادورلي شقه اعيش بيها اني وبنتي
ومشت فترة ولكيت شغله بمحل مال تطريز فساتين
يعني كانت صاحبت المحل تخيط فساتين وتكون الفساتين مال عرس وبيها تطريز فااني اشتغلت بالتطريز وفترة وضبطت الشغله وتعلمت الخياطه واجرت شقه صغيرة على كدي اني وبنتي وبسعر مناسب ورتبتها
ونقلت بيها ويوم عن يوم بديت التهي بحياتي الجديدة وبوضعي ومرت عليه سنتين وخلال هاي السنتين سكنت بيت لاخ وتعلمت الشغل وجان عندي فلوس وفتحتلي مشغل
وشغله كان الحمدلله ماشي واستقريت واجه وقت بنتي
تدخل مدرسه يمكن اني ماوفيت بالوعد الي قطعته لقتيبه انو ارجع بين فترة وفترة حتى يشوف بته لان زحمت الدنيا اخذتني بس فردوس كانت تخابر ابوها وجان دائما يسئلها عليه المهم انو اني استقريت ورتبت وضعي اني وبنتي واعتمدت على نفسي
ويمكن جان شغلي والحياة الجديدة الي عشتها ملهيتني ولكن كلما اكعد لوحدي ولو دقيقه اذكر قتيبه وذكرياتي وكلشي
واذكر ريحت بغداد الله يابغداد
كذب اكو بلد احلى من العراق كذب اكو بلد تجمعنه وتربطنه مثل بغداد
الله ياريحتكً ياعراق
مشتاقه ارجع مشتاقه للهوا الي بي مشتاقه لوجوة الطيبين بغداد يربطني بي اهلي وحبي وعمري وذكرياتي
مو معناته اذا سافرنه وتغربنه معناته احنا منحب العراق
ماكو انسان يتخلي عن وطنه وعن هويته وعن جذورة وانا اعشق العراق ومازلت
الذكريات الي تاخذني بعضها مؤلم وبعضها مضحك وبعضها حزين
والحنين يرهق
ويتعب ولكن اني وجدت نفسي بعمل صحيح غريبه ودائما حس نفسي غريبه وعمري ماشعرت بلانتماء ولكن اشتغلت وبنتي بدت تدرس وعشت هناك فبعد انتهىً
رتبت وضعي
المهم انو
المحطه الثانيه من حياتي انو اني فتحت مشغل ولمن شغلي تحسن
فتحت محل صغير اعرض بي بعض البدلات وهذا المحل كنت اني اكعد بي اكثر شي فمرة من المرات
اجتي وحدة تركيه هي ويا واحد طبعا هي كانت جدا جميله ولكن هو كان جماله مخيف ونظراته مخيفه
المهم انو هما رادو بدله ولكن هو من دخل لحد ماطلع يباوع عليه مانزل عينه ابدا من عليه واني استغربت هاي الحاله لان اني مشفت بلااتراك هذا الشي نهائيا مجانو يباوعون على النساء
ولكن هذا الشخص جان يباوع عليه بنظرات مرتاحيتلها
الي رادو هو وخطيبته بدله وشرحتلها انو اني عندي مشغل اذا تحب اسويلها بدله اصممها الها وبوقتها وافقت وكالتلي انً شاءالله نجي نختار فصال
كتلها اني انتضرج طبعا اني فترة وتعلمت احجي تركي ودخلت دورة لتعليم اللغه الانكليزيه وكلت بس اخلص الانكليزي ابدي دورة مال فرنسي اني جانت امنيتي احجي لغات واسافر واعتمد على نفسي اني كل طموحي راح ودمر من زوجت ولكن اني لحد الان مصرة انو اكمل الحلم الي جنت بانيته
فهسه قررت اكمل كل الي جنت ناويه اسوي من
زمان
وفعلا انو بعد اسبوع اجتني هاي الزبونه علمود البدله واختارت موديل واختارينه انا وياها كل الامور الي متعلقه بالفستان طبعا جانت وحدها مجان خطيبها موجود وارتاحيت لعدم وجودة
مدت تكملت الفستان كانت تقريبا ١٥يوم
يمكن اني كنت من المعدودات الي بدين بهيج نوع من الاعمال ويمكن لو مشتغله هاي الشغله بالعراق مكان نجحت ولكن بسبب عملي تعرفت على اناس راقين وعوائل راقيه مو بس اتراك المهم
انو بعد عشر تيام اجاني خطيبها
والي عرفته من خطيبته انو خطيبها ابن واحد غني
اول مادخل خطيبها سلم عليه وسئل على الفستان وكتله انو بعد خمس ايام يستلمو لان بي شغل بعد
وكلي نسيت اقدملج نفسي
اني اسمي بيزان
كتله اهلا وسهلا اشرفنه طبعا كنت احجي وياة اللغه التركيه
المهم انو بعد ماعرف الموعد راح المشكله انوً
حسيت هو اجاي لان عندة فد غايه ما
ماااجاي حتى يسئل على الفستان اجاي عبالك يتحرى عني يشوفني مااعرف ليش هيج حسيت وهيج مرتاحيت لوجودة ويايه مع العلم كان يتكلم بلطف وبااحترام بس كانت نظراته تتفحصني وهذا الشخص الوحيد الي من جيت لتركيه احد الان حسيت نظراته تريد مني شي
يتبع.....
#الكاتبه #روجمان
