محطــات من حيــاتــي

الجزء الخامس

بعدين باوع عليه كلي دلفين انتي
وين تريدين توصلين باوعت عليه كتله مااريد اوصل لمكان ولااصور اني اهمك حتى كاعد تمنعني من السفر كلي اول شي اني اريد بنتي دائما اشوفها مااريدها تتربه بعيد عنيً
ومنو كلج انتي متهميني ضحكت بااستهزاء كتله من البدايه مااهمك من كنت مرتك وكنت معتبرني شي من مقتنياتك  لوحه  او تحفه مجنت تهتم بيه كاانسانه  كاامراة محتاجه عطف وحب وحنان واحساس
وانت مجنت حتى تجبر نفسك حتى تمثل عليه الحب  يله عادي كلمن ياخذ نصيبه كلي اني ماامثل الحب لان اني احبج لان انتي كنتي زوجتي
كلي شوفي راح اكلجً شي واحد
انتي تركتي البيت وطلعتي بس البيت مديكدر يتركج ولا ديكدر يتخله عنج بكل زاويه الج ذكرة بس احنا وصلنه لمرحله خلص الي بينا
سكت وبعدين جان يكلي اني اخليج اسافرين بس بشرط
كتله شنو كلي كل كم شهر تجين هنا حتى اشوف فردوس
وكلما ادكدرين خلي فردوس تخابرني
كتله ان شاءالله
كلي اني مااريد اشعر باانو اني اناني وانو اني فكرت اعيش حياتي واخلي حياتج متوقفه كتله اشكرك لان فكرت بيه وبعدين
سلم عليه وكام وقبل مديصعد بالسيارة جان يكلي  انتي راح تكونين سعيدة اذا سافرتي
باوعت عليه كتله ماادري بس ان شاءالله
كتله زين انت هسه سعيد
باوع عليه وجان يبتسم ابتسامه خفيفيه
كلي هم ماادري بس دورات السعادة تتمثلنه بااشخاص
ودورات  احنا منلكي هذوله الاشخاص او نليكهم ويروحون منه كلامه جان يوجع كلبي وجان يخليني اريد اكمشه احضنه اكون قريبه  منه جان عندي احساس بداخلي يريدني اتقرب منه واحساس  ثاني يخليني جامدة بمكاني
كلي قبل مسافرين اريد اشوف فردوس
كتله اكيد
كلي مجرد فكرت انو انتو سافرون وجان يغير الكلام كال قصدي فردوس تبتعد عني كلبي يوجعني
وصعد سيارته  وراح اول مرة اشوف قتيبه  حزين كان دائمايحاول يظهر قوته وعجرفته ويظهر   انو هو متكبر بس كان الشي الوحيد الي يبين الين بشخصيته بته فردوس
جان كلش يحبها
المهم انو اني قررت فعلا اسافر ورتبت كل اموري وقررت انو اروح لتركيا يم بيت عمتي  لحد ماارتب وضعي والدي انطاني  مبلغ مالي واني جنت عندي هوايه ذهب بعته كله  وصار عندي مبلغ زين وحجزت وقبل سفري بيومين رحت لبيت قتيبه وديت فردوس وظلت يمه باتت وثاني يوم جابها ماحجه شي ويايه جنت اريدة يحجي شي
وجان بداخلي شي يجذبني اله
وجنت مستعدة اذا قتيبه كلي  اني اريدج
واحبج اترك الدنيا كلها واروحله بس هو ماحجه شي كانت نظراته تحجي بس للاسف مااعرف شتحجي جانت بيها الم او حزن بس اعتقد علمود بته او هيج كنت اريد اعتقد حتى اموت الاحساس الي بداخلي اتجاه
سلم عليه وبوس فردوس وقبل ميروح انطاني ظرف
كتله هاي شنو كال هاي مصرف مال فردوس رفضت اخذة بس هو اصر كلي لازم تاخذي هذا لبتي
كلي دربالج عليها ودربالج على نفسج كتله ان شاءالله كلي اذا تحبين باجر اني اوديكم للمطار كتله لا ماكو داعي
والدي يوديني اشكرك هز براسه وراح
من راح دخلت فردوس جوة واني ظليت كاعدة بالحديقه حسيت اكو هدوء قاتل حسيت بالغربه واني بعدني ممسافرة حسيت انو اني وقتيبه خلصت حكايتنه
وحسيت خلص وقتي بالعراق ذكرياتي حزني فرحي
وحسيت الفركه راح تموتني وردت اتراجع بس ماكدرت دورات يصير بداخلنه احساس
انو انريد نقدم على عمل شي ما ولكن نتراجع  بداخلنه شي يخلينه نريد ومنريد
اني مضطربه بفكري وبااحساسيسي بخوفي من باجر من حياة جديدة بخوفي انو اني افشل
وارجع مرة ثانيه كان عندي شعور يكلي شنو اذا رجعتي واذا ماسويتي شي واكو شعور ثاني يكلي لا لتخليهم يكلون هاي انسانه فاشله ماكدرت تسوي شي
وبهاي الاثناء سمعت صوت والدي
يصيحني واجه جان يكعد يمي
كلي ها حبيبتي دلفين شو كاعدة وحدج دتفكرين كتله اي
كلي انتي تعرفين انو انتي بااستطاعتج تتراجعين عن قرار السفر
كتله اي بابا اعرف بس مااريد اني جنت من زمان اريد اسافر من اول مطلكت وانت تعرف كلي اي اعرف
كلي بس اني مسئلتج تريد اسافرين ليش
كلي علمود قتيبه كتله لا يجوز قتيبه سبب من الاسباب
بس موعلمودة اني اريد ابعد اريد اسافر داحس انو اني مداكدر الكي نفسي هنا
اريد ابتعد
كلي براحتج واحنا موجودين وراح نكون بجنبج بكل وقت
كتله اعرف بابا حبيبي وحضنته الله شلون ارتاح
واحس بلامان من احضن والدي

وبديت اتحضر للسفر وارتب بملابسي
ونيمت فردوس من وكت  وجانت اختي نور موجودة وهي مو جانت بس اختي جانت صديقتي وجانت صندوق اسراري وجتي عليه بالليل وجانت عيونها ملاينه دموع كلتلي مداتخيل راح اسافرين كتلهاان شاالله فترة وارجع ويجوز اجيبج اتعيشين يمي
كلتلي دلفين ليش دسافرين
اني اعرف بيج دسافرين علمود قتيبه لان انتي بديتي تنسي بس من رديتي شفتي بالكليه ويا هاي خطيبته تخبلتي وكمتي يوميه اشوفي ودورات تحجين وياة
رديتي تحنين اله
كامت ادموعي تنزل كتلها
موبيدي  نور مصورت نفسي هيج جنت احبه
برغم اني ردت الطلاك منه بس هسه اكتشفت انو اني روحي وياة
واحس نفسي ميته بدونه شسوي كوليلي نور شسوي الله يخليج اني كلبي يوجعني كوليلي شسوي لكلبي
شسوي  اني داتوجع نور اني داموت من داشوف قتيبه داموت حبه بكلبي مابيدي شي اسمه من ينذكر كلبي يحن مرة ثانيه
هو مرضي وهو دوايه عوفيني بلكي اروح ويبرد كلبي
اني تعبانه نور وانتي تعرفين بيه ازوجت قتيبه واني مجبورة وعشت وياة حياة باردة حياة مملله بس حبيته وبرغم هذا ردت انتفض لكبريائي وخدعت نفسي وطلكت منه
بس ياريتني ماطلكت ياريتني ظليت بوجع كلبي بس بقربه
ياريت بس بعد ميفيد لان من اطلكت ظل قتيبه جرح بكلبي ماديطيب تعرفين  شنو الي واجعني اكثر انو هو مااذاني من ردت اطلك ماسوة مشكله ومن يحجي ويايه ميجرحني ولمن اول مرة رفض السفر ضجت منه بس بعدين كلي مااريد اصير اناني
بااتجاهج واني اعيش حياتي وانتي لا لهذا السبب
هاي تصرفاته قتلتني اكثر وجرحتني اكثر

وماتحملت بعد كعدت على الكاع وكمت ابجي بحركه
ونور اختي حضنتني وبجيت لحد ماتعبت وكمت نمت وكعدت من وكت وتحضرت وبدلت اني وبنتي وسلمت على اهلي والدي واخويه ودوني للمطار واني طول الطريق وكلبي مكروب
وصلت للمطار وسلمت عليهم وكعدت وعلما سلمت الجنط وشويه ودخلت للقاعه مال انتظار وجنت صافنه  وماحسيت الا فردوس تركض  وباوعت شفت قتيبه ولابس عسكري وفردوس تركض عليه وهو شالها لمن وصلت يمه واباوع العالم كلها تباوع عليه
اجه عليه كلي ردت اشوفكم قبل مسافرون

يتبع ......

#الكاتبه #روجمان