ركبت السيارة ورحت وسئلت اذا اكو غرفه بالفندق بااسم ماجد وانطوني رقم الغرفه كان ماجد ماموجود
طلبت انو ينطوني المفتاح رفضو بالبدايه ولكن كتلهم اني زوجته وداريد اسويله مفاجئه وياريت انو مدكولوله انو اني موجود وعد نطوني نسخه من المفتاح ودخلت للغرفه وكعدت وسديت الاضويه وانتظرت لمدة ساعه وسمعت صوت المفاتيح بالباب كانت الباب دتنفتح وسمعت انفاسهم وكلامهم المشهد الي شفته خلاني احتقر حتى حياتي واتمنى الموت مكانو يعتقدون انو اكو احد بالغرفه وياهم فااخذو راحتهم ولكن اني كنت موجودة وفتحت الضوة وباوعت عليه جانت وياة وحدة زغيرة كلش يمكن طالبه يمه وباوعت عليه من فوك ليجوة استحقرته وكرهته وهو ماعرف شيحجي او شيسوي
ماحجيت وياة شي عفته وطلعت
بس كمت احس بألم بكل جسمي
المهم رجعت للبيت تعبانه نمت بدون حتى ماافكر من حسيت من النوم كنت مااكدر احرك رجلي عطت بجيت صيحت ردت حاولت ماكدرت رجلي جانت واكفه متتحرك
بنتي فردوس جانت نايمه بالغرفه الي يمي من سمعت صوتي جتي كتلها اريد التلفون جابتلي التلفون خابرت على عمتي
على صديقتي الي تعرفت عليها هناك اجوي شافوني شبه مجنونه واصيح وابجي واكللهم انشليت مااكدر امشي وعمتي تبجي وصديقتي
تبجي
وكتلهم ماجد ممنوع يدخل للبيت ولمن حاول يرجع كتله اذا تجي ابلغ عنك الشرطه
واتصلت بااهلي واختي نور كانت بعدها ممزوجه
كالت اني اجيج وفعلا بعد فترة اجتني
بدت مرحله الي هي الدكاترة اغلب الدكاترة كالولي حاله نفسيه دتهيئلج انج مدكدرين تمشين انطوني علاج وبوقتها مابقيت دكتور مرحتله وبعدين احد زبونانتي كالتلي انو اكو دكتور بااسرائيل
يكولون عنه يصنع المعجزات وهذا العالم يتعنوله و يروحله يعالجهم روحيله بلكي يعالجج ولكن اني ماقبلت
والشخص الي فعلا فاجئني بموقفه بيزان من عرف بمرضي واجه وكام يدورلي دكاترة ويساعدني وجانت نظرات القلق بعينه واضحه ماعرفت منو كله على مرضي او مين عرف ولكن قدرت موقفه لان مهما كان
الموقف الي قام بي كان موقف شهم واخير شي وصلوني لدكتور بتركيا بدة ويايه علاج ويوم عن يوم كمت احس بتحسن ورجعت امشي خمس اشهر اني اعاني بعد هاي الرحله الشاقه
رجعت وكفت على رجلي من جديد ولكن اول شي سويته غيرت شكلي كصيت شعري كصير كلش وغيرت لونه وغيرت حتى موديل ملابسي ردت احس بالتجدد واطلكت مرة ثانيه ومو ندمانه يمكن ندمت على قتيبه لان قتيبه حبيته وماجرحني مثل هذا الجرح العميق ولكن اكتشف انو ماجد انسان حقير
لااول مرة اقارن مابين تلث رجال دخلو بحياتي
قتيبه حب حياتي الشخصيه القويه الانسان المهم
ابو بنتي فردوس رجل بمعنى الكلمه ولكن مشاعرة مميته قاتله باردة
بيزان الرجال المتزوج الي لاحقني لفترة والي جنت متاكدة هو حبني بس مكان يفرق هوايه عن ماجد هو هم خائن لان الخيانه موبس جسدين الخيانه بالمشاعر بالفكر
بلااحاسيس
ماجد الي كان اكثر واحد المفروض يراعيني ويقدرضروفي لان يعرف بوضعي وبحياتي واني بت خاله المفروض يراعي هذا الشي وحتى وماقدر جمعنه بيت واطفال اثنين خاني
وخيانته كانت بشعه جدا
يمكن لو كلهم اخليهم بمقارنه راح يتغلب عنهم شخص واحد وهو قتيبه
لان فعلا هو الوحيد الي يمكن برغم الي مريت بيه وياة ماكدرت اكرهه وماكدرت الكي شبيه لقتيبه او اقارنه بااي احد
اني حاليا ام لتلث اطفال امراة مر بحياتها رجال ولكن ولا واحد نصفها ولا واحد حست وياة بلاامان المطلق بالراحه بالسعادة
صنعت شي لان فقدت شي صنعت عمل جيد ولكني فقدت مشاعري
بكل هاي المشاكل الي عشت بيها وبكل الاوجاع الي كسرتني كل وجع مر بحياتي كسر بداخلي شي يمكن هذا الشي صعب يصلح ولكن مفاجئه بعد مفاجئه والحياة
ظلت تصدمني وهالمرة الصدفه حسيت بيها ومضت امل
يتبع....
#الكاتبه #روجمان
