ماساة امرأة

الجزء 12

#قصه_ماساة_امراءة
للكاتبه فردوس عبد اللطيف
الجزء 12
فتحت الرساله وخربت كعدت على القنفه رجلى ما تشيلنى (انى طالعه ومراح تندلونى وماخذة وياى الجواز ويجوز اطلع لمكان بعيد تخلصون منى )
جمدت بمكانى ما اعرف شاسوى المن احجى بنتى راحت من ايدى ضاعت والفضيحه وشماته الكرايب كل هذا اجه بتفكيري كلت لازم اتصرف بعقل لزمت اعصابي واول شي اتصلت بولدى امجد وحسام جوى بسرعه للبيت انطيتهم الرساله قروهه امجد ظل يضرب راسه بالحايط ويصيح الحقيرة جابتلنه العار لو الزمهه اقتلهه
يمه لاتسوى بنفسك هيج ترجع انى ارجعهه كلى
بعد منين ترجعيهه فكرت التهور ميفيد طلعت سالت المحل الى كبالنه كال مشافهه بيت اختى هم مشايفيهه اتصل على تلفونهه مغلق
امجد زين الناس الى راح يجون الخميس شكلهم وعمامى شحجيلهم عالى المصيبه واليوم اثنين
يمه انت معليك انى اتصل بعمك اتصلت بحماى وكتله الغى موضوع المحامى العريس كال ليش كتله البنيه مريضه لاتجون رجاءا
كال بكيفكم
وراها اخذت ابنى كتله ماكو غير رافد المصخم هى تعرفه احتمال راحت عليه
ماكنت اعرف طبع بنتى عنيده ومن تصر على شي تسوى عبالى تخاف تسويهه
كلى امجد وين نندل بيت رافد
نسال انى حافظه المكان من اجوى سالتهم على بيتهم بمنطقه يم الحسينيه يم الجسر رحنا وظلينه نسال  ولكينه البيت طبيت عليهم انت ام رافد كالت اى وهذا ابو ليش تسالين
كتلهه بنتى يم ابنج وحجيتلهم اشلون اجه خطبهه كالو احنا نرجعهه الكم وابو كال والله اقتله اذا مسوى هيج شغله كلت لامه سالى بناتج وسالى هو واخذت رقمهم ورجعنا امجد ظل يتقيا طول الطريق من القهر والتعب واحنا يومين لا اكل ولا شرب متسممين والطريق بعيد للراشديه
وصلنه للبيت واحد يباوع بوجه الثانى عدنه عزا بله ميت لا نكدر نحجى ولا نخطو اى خطوة بسبب الفضيحه ولا اكدر اسكت كتلنى القهر اتصل على تلفونهه ماكو مغلق
دزيتلهه رسايل كتلهه رجعى ما راح نزوجج بس رجعى كليلنه انت وين طمنيني عليج راح اموت
ثالث يوم فتحت تلفونهه حجت ويه اختهه وبعدين حجت وياى
كتلهه يمه ليش سويتى هيج ما فكرتى باخوانج بي باختج
كالت مو انت ما دافعتى عنى تخليتى عنى ومكدرتى تسويلي شي وانى هسه يم رافد بيت اخته ببغداد الجديده وسدته
عندى صديقتى بصراويه اسمهه عاليه بيتهم ببغداد الجديده رحنا عليهه وحجيتلهه كالت اكدر اساعدج وارجعها
كتلهه بختج
اتصلت بجماعه وانطتهم تفاصيل اهله وعنوانهم واسماءهم
كالو باجر انتظرى من عدنه خبر بس لازم مبلغ كتلهم شكد كالو مليونين
مضطرة اقبل ميخالف وانى بيتى مابي ولافلس وحايره بالعيشه
رحت لاختى حجيتلهه كتلهه لحكينى اشلون كالت ذهبي عند امى روحى عليهه وكليلهه انى اريده واخذى بيعى اخذت الذهب ورحت للسوك وبعته وانى بالسوم والفلوس بالجنطه وصارت مداهمه وانى كوة امشي على رجلى وين بي اركض واحتاريت وين اتختل بين المحلات علما خلصت وطلعت تكسي كبل للبيت
اتصلو بي الجماعه كالو ترحين لمقهى ببغداد الجديده وتنطينا الفلوس
وصورة بنتج واحنا نرجعهه
رحت وحدى ولدى مقبلو ابحدى بس اخاف عليهم بوقتهه قتل بالشوارع بدون سبب وشوارع بغداد فارغه الناس قليله وخايفه راح اقابل شخص ما اعرفه
وصلت للمقهى اتصلت بالتلفون واشرلى رحت يمه نطيته الفلوس كتله شوكت راح تلكون بنتى كال معليج يجيج الخبر بس انطيته عنوان اهل رافد واسمه الثلاثى وعنوان اهله وانى راجعه بالطريق دك تلفونى اتصلو اسراء ورافد وحجو وياي وانى ما مصدكه ضلو يتوسلون بي ورافد يكول خاله انى معلى هى جتى على وانى رجل واحبهه ما تخليت عنهه واهلى شعليهم داخلين عليهم ومكسرين اغراض بيت اهلى وضاربين ابوى راشدى معليكم بابوى هو شعليه
اسراء ماما احنا تزوجنا والعقد موجود عندى لاتشتكون عليهم
كتلهه لعد ابقي على اتصال بي واريد نسخه من العقد
وراها الجماعه الى نطيتهم الفلوس خابرو يردون 400 الف وراها 800 كتلهم بعد ماعندى فلوس وطبعا كله دين
كرهت نفسي وكرهت جهالة الحياة كلهن كرهتهه
انوب خوانهه كالو لازم نكتل الولد كتلهم هو تقدملهه بس انتو كتوله جيب اهلك جبرتوهه تسوى هيج
هى ضحيه مجتمع وتقاليد والبنيه يتيمه ومحرومه من الحنان فقدت ابوها وهى زغيرة
بعدين خابرت تريد ملابسهه كتلهه دزيلي عقد الزواج دزته ويه رافد واخذتله الملابس والتقيت بي يم العلاوى وجبت عقد الزواج راويته لخوانهه ولاختى
للحكايه بقيه   f