المخادعة

الاول

nada hs
اسمي رواء واني من العماره... جنت عايشه ويه امي وابويه واخواني 4 ... كلهم اكبر مني واني الصغيره بيهم...
ابويه الله يرحمه جان مدللني وممخليني بحاجه احد.. حالتنه زينه اخواني وابويه يشتغلون ونحصل هل مقسوم...
اكثر شخص شجعني ع الدراسه هو ابويه.. جانو 2 من اخواني مكملين كليه تربيه...
جنت شاطره وجبتها سنه ع سنه نجاح واعفاء.. من وصلت السادس اخواني كالو مو اله دخلين كليه ماعدنا بنات اداوم ويه ولد.. بس ابويه مقبل وكال اني متأمل بيها حيل... وفعلا ردت اكسر الخط الي مخلينه انو البنيه متنفع بس للزواج والاطفال درست ليل ونهار وبدون دورات والحمد لله جبت معدل يرفع راس ابويه.. صح مجانت ذيج الفرحه القويه لاهلي لان دائما يشوفوني بعين ناقصه..
حجيت ويه ابويه ع موضوع التقديم وع يا جامعه وكلي شتردين قدمي انتي رفعه راسي مااكسر بخاطرج..
سألت البنات ومدرساتي وكلها شجعتني اقدم ع جامعه بغداد وطبعا خليت الصيدله اول كليه..
اخواني اول معرفو عارضو وابويه قنعهم وطبعا لو ما معدلي عالي مجان قبلو ابد بس شويه صار بعينهم هل شي وشافوني ابجي والطم فسكتو ..
طلع القبول مثل ماردت .. وبقيت العطله كلها اجهز ملابس للدوام اني وامي ونسوان اخواني وجانت فرحتي تارسه الدنيا..
طبعا اشتريت كلها تنورات طوال وقمصان عراض وطلعت بيهن مثل فزاعه الخضره ههههه ماجنت اعرف شلون الناس عايشه ابغداد..
اول مره رحت بيها لبغداد ابويه جان ويايه وسجلنا سوا بعدين خلاني ورجع بعد مااطمئن عليه وانطاني مصرف
بقيت بالقسم الداخلي وشفت بنات اشكال الوان .. اني بطبعي مااختلط حته بالمدرسه عندي اثنين مقربات بس ومن دخلت كليه تفاركنه..
جانت دخلتي للكليه ولبغداد كلها نقطه تحول بحياتي.. اول مداومت استحيت من نفسي ومن ملابسي الي لابستها وربطتي الي لافتها مثل شيله امي هههه
جنت احس كلها تباوعلي وتضحك.. وخاصه جانت الصيدله اكثر طلابها متحضرين وابهاتهم دكاتره وملابس وتصرفاتهم كلها تختلف.. الحجي واللهجه تختلف بحيث اول مدخلت اكول( انه) كلها تبتسم وادنك وبداخلهم ضحكه اكبر بس يستحون..
هوايه كلمات خلتني بمواقف محرجه ومره الاستاذ كال اي انتي شرحي.. كتله استاذ انه؟ جان يكول جا ياهو ؟
والطلاب كلها ضحكت وصرت معروفه ببنت العماره لو يكولون يا هاي محافظات ويستهزوءن... كل شي اختلف عليه وحسيت نفسي مخنوكه واني بديار غرب وتندمت لان جيت يمهم..
لاعندي صديقات بالقسم ولا حتى بالكليه.. كلها تحاول تبتعد عني ماادري اني هيج جنت احس؟!
المهم جانت اول سنه بالنسبه الي دمار.. التمت عليه منا محافظه جديده وبعيده عن اهلي واول مره ابعد عنهم.. ومنا مرحله دراسيه تختلف عن كل السنوات الفاتت...
جنت اصبر بروحي كوه والتهي بالدراسه وبعد ماطلعت اعلى درجات صار الي احترامي نوعا ما...
جنت كل شهر او شهرين يله انزل لاهلي واخابرهم كل يومين تلاثه .. اكثر شي ابويه جان واكفلي وكفه ويخابرني ويسأل اذا محتاجه شي واني بودي اصرخ واكله تعال اخذني منا ..
كل مره انزل بيها لاهلي ابويه جان يجيني لبغداد ونرجع سوا وبكل مره الكه الهوسه والعزايم ذاك حدها وكل شي ماافتهم من نزلتي...nada hs
مرت اول مرحله اليه واني مااعرف اصرف ولااكل ولااشرب بحيث اموت من الجوع استحي اشتري لفه واكلها.. حته بطل المي استحي ارفعه واشرب ... جنت احس الناس كلها تباوعلي..
اول مرحله جنت الاولى ع الدفعه لان جان ملجئي الوحيد هناك القرايه...
من رجعت بعطله اخر السنه حسيت نفسي غريبه وكانو تعودت ع مكاني هناك وع كليتي وعرفت انو اني مكبره الموضوع ع لاشيء
بديت يوميه اخطط للسنه الجديده وبديت اتذكر البنات شون يحجن وبلباقه ومو مستحيات .. بالعطله همين التقيت بصديقاتي زينب وفداء وحجيتلهن ع الي صار وهنه شجعني وكالن غيري لبسج وكلامج واحجي مثلهم...
عاد اني لميت كل ملابسي مال اول مرحله وانطيتهن لامي كتلها مالبسهن.. هي استغربت وحجيتلها كالت يايمه بس احجي ويه ابوج خاف ماعده يشتريلج ملابس جديدات... حجت ويه ابويه واخواني هم سمعو كالو نلملها شتريد وشتحتاج لان صدك شافو مستقبلي كدامي واني شاطره...
رحت للسوك واشتريت ارقه لبس موجود .. اخذت تنورات اضيق وقمصان ارتب واشيك وحتى بنطرونات اخذتهن بس امي كالت لتشوفيهن لنسوان اخوانج ههههه فديتها امي تريدني اطلع احله وحدهnada hs
بقيت فرحانه بنفسي وبملابسي الجديده كأني هبله هههه...
اخذت اذن من امي وعدلت حاجبي وامي ضامتني خاف اخواني يشوفوني وميقبلون ههههه جان كل شي عجيبه ولازم ناخذ اذن من العائله كلها..
داومت اول يوم وكلي ثقه بنفسي .. اخذت مكياج من بنيه ويايه بالغرفه وخليت خفيف... طبعا ماوصفتلكم شكلي .. اني ناعمه طولي وسط ولاسمينه ولاضعيفه.. بشرتي حنطيه وعيوني بني كبار واحلى مابوجهي وباقي ملامحي زينه... شعري دائما مظفور لان هاي عادات لازم يبقه طويل لحد مااتزوج وبعدين بكيف زوجي اكصه اولا...