المخادعة

الثاني

nada hs
داومت بالمركز وحصلت شغل بصيدليه قريبه ع بيتنه الزمها العصريات... وبيوم من الايام جنت بالصيدليه ولابسه ارقه ملابس حجابي شمر ومعتنيه بنفسي اخر اعتناء.. طبكت سياره كدام الصيدليه ونزل واحد طويل حنطاوي ولحيته خفيفه وملامحه حلوه بس عيونه متبين لان لابس نظاره.. اجه عليه وجان ويايه معاون طبي همين... شمر باكيت دوا ومن وره خشمه كال موجود؟
جاوبته:اعصابك عيني كل الي يجون هم عدهم مرضى مو بس انت!
درت وجهي اريد اجيب الي راده جان يركع الميز بيده وينزع نظارته وصاح:وحضرتج منو وتردين هيج! انطيني الغلاف بسرعه وحده تافهه!
المعاون الي ويايه (حيدر) حاول يهديني واني متخبله شنو هذا يغلط عليه! بس بنفس الوقت انربط لساني مكدرت ارد ...
اخذ الغلاف وراح شخط السياره كدامي حيل.. اني نار وشبت بيه منو هذا وفد نعال وهيج يسوي !
رجعت للبيت ونسيت السالفه تعشينا اني وامي وكعدت ع اللاب شويه وبعدين تذكرت هذا السخيف.. ثاني يوم داومت بالمركز والعصر رحت للصيدليه واني روحي بخشمي ...
كعدت شويه وجنا نسولف اني وحيدر عن وجبه دوه جديده... واجه هذا الغبي مره لخ... نزل وهم نفس الابهه مالته وراد ينطي الوصفه لحيدر .. اني بس راد يناوشها اله مديت ايدي وابتسمت واخذتها منه... باوعت بعيونه حيل وبكل ثقه ابتسمت خفيف وانطيته الي راده... هو هم صفن محجه شي دفع وراح...
حبيت العب ويا شويه واضوجه واوكعه واطرحه زوج مثل الي قبله
من اذكر اكره نفس واكره اليوم الي صرت بي واكره كل الي سويته بنفسي...
وصار الي اريده واجه وره ايام بعد ما ايست منه طبعا وجان وجهه يضحك ومبين مرتاح وحته مجاي علمود دوه اصلا.. كال اريد براسيتول .. اني تعاملت ويا بلطف وكله اباوع بعينه وابتسم
اخذ البراسيتول وراح وصار يتردد قريب ع الصيدليه ويشوفني ويبستم...لحد ما بالطريق امشي للبيت نزل من سيارته وكال ممكن احجي وياج؟ اني تجاوبت وكتله اتفضل مو انت الي قبل كم يوم اجيتنا؟ مثلت اني مشايفته هل فتره قريب من الصيدليه
كال اصعدي رفضت وكتله احجي .. مقبل  عاد كال باجر خليني اشوفج بفلان مكان...
اتفقنا وثاني يوم تأنقت ورحت لكيته منتظر.. عيونه اكلتني اكل
سلمت علي وكعدت .. بده تعارف
-اني اسمي سراج.. وانتي؟
-دكتوره رواء...
-هههههه وشبيج عصبيه؟
-لا مو عصبيه..بس اعرفك بنفسي غير
-تدرين عيونج ذوبتني؟
-احم احم... ع شنو طلبت نلتقي؟استاذ سراج؟
-داشكيلج علتي الي محد يعرف بيها.. گلبي يوجعني..
باوعلي بنظره اول مره اخجل بيها من احد
-اي.. تكدر تروح ع دكتور اختصاصي ...
-لا انتي علاجي اقصد انتي تعالجيني..
ابتسمت وسكتت واني امثل علي دور الغبيه عود واني اعرف جوابه قبل ليكول وحسيت بي ممصدكني طبعا ...
مرت ايام واخذ رقمي وبقه يخابرني يوميه ويوم عن يوم يزيد اهتمامه وحبه صح احس بي مرات هو ملعب بس من اباوع بعيونه مادري ليش احسه صدك يحبني مو جذب...
هوايه مواقف صارت ومشاكل بينا واني ماانجرع وهو كل هذا وتحملني.. سراج جان ابن مسؤول معروف وع اساس يشتغل بوزاره بس هو اصلا ميداوم ومكضيها سفر وطلعات وطبات..
عجبني المركز الي هو بي وايده طايله كلت خوش صيده هذا
ماجنت اعرف بي ضاملي ضمه موخوش...