غصب فصلوني

البارت الاول

بارت ١
على كيفك يمعود حجي راح توگعني من الكيه خلي انزل وعود امشي بعدين....
اني اعلمك....سحبت الباب بقوه عناد بي اتخبل وراح وله ...استغفر الله واتوب اليه والله لو مو رجال بگد ابويه جان خوش رزاله رزلته.
اووف ياربي شوكت ارتاح والله يخلصني من شلعان الگلب هذا..
امشي واحجي ويه نفسي وادردم بنص الشارع....
وصلت لبيتنا هلكانه وشبعانه تعب وحر...
ها خنوسه شلونج ...
هلو ماما شلوني والله طلعت روحي من هالخط التعبان هسه بس لو اثنين بنات يقبلون يجون ويايه چان شفنه سياره اصغر....
بس كُلهن معاندات لان عددنا هوايه والاجره تتوزع على الكل ...
موتني هالحجي يذبني براس الشارع ومجبوره ادگها مشي بهالحر ....
وفوگاها هو ابو الراهي عليه عبالك مصعدني بجگوار ..
شحال لو ماهي كيه مجرقعه من زمن جده...
الام:هههههه نزول على سوالفج وين جانت اكو كيه بزمن جده...
يله حبيبتي روحي بدلي وتعالي حتى نحضر الغده ....هسه كلهم راح يجون..
اي اي رايحه..صدك شنو غدانه ماماتي...
حبيبتي ثريد باگله......
يبوووو والله بزعتينه يوميه ثريد باگله يعني اليوم القولون يگوم يگمز..
سم وزقنبوت خنساء صار كومه ممسويتها....لج اجيت متأخره وتعبانه وابوج مدكدك كرويتة المطبخ...وتعرفين من يسوي شغله...شلون ينگلب وراها البيت....وحرت شنو اسوي وسويت باگله على السريع...
اوف اوف هسه اروح ابدل واجي ..
اي روحي بلا لغوه وتدردم..
الخنساء هو اسمي لتستغربون من الاسم لان اني هم مثلكم بعدني مستغربه ومصدومه...
ابويه من جيت للدنيا اصر يسميني هالاسم وامي گالتله يمعود شيل ال التعريف وبقيها خنساء حالها حال العالم...
بس بقى معاند ومصر على هذا الاسم يكول حتى تبقى مميزه دائما...
خرب حظي عمي يامميزه ياصخام طمغتني بهالاسم طمغ طول العمر..
اني حنطاويه وشعري اسود سرح وطولي 165 سم جسمي مرتب وملامحي جذابه وعيوني واسعه..
عايشه بين 4 ولد 2 اكبر مني الجبير زهير خريج صناعه وعنده ورشه ميكانيك ومزوج وعنده شموسه وطالع من بيتنه لان مرتاح ومرتب اموره....واهل لمى اشترطوا بيت وحده...واني اشوفه صح حتى تبقى المقامات محفوظه والعلاقات حلوه
وعلى حده همام طالب مرحله رابعه لغات جامعه بغداد ....
واني ورا مرحله ثانيه فنون و 2 اصغر مني احمد سادس ادبي واخر العنقود ليوثي صف ثالث متوسط..
مثل اي بنيه عايشه بين 4 ولد يعني تصرفاتي بيها خشونه وماكو انوثه بالموضوع فد شي كلش قليل..
اختلاطي قليل بالبنات لان احسهن چذابات وبس يفيكون ويتعيقلون...

من طبيت للكليه انعجبت بولد كلش حلو اسمراني وهو التوب مال كليتنه وجانت نظراته اليه مبينه نظرات اعجاب ...
انعجبت بي وجنت افرح بشوفته...وره فتره عرفت الاخ گلبه كيا لا والله گلبه گلب تاتا....
نص بنات الكليه لاعب بمشاعرهن ومعشمهن بالحب.
انقهرت شويه وبعدين گلت خل يولي ...وقفلت على گلبي واتلاحگتله قبل لن ينجرح...
عايشه يومي مرتاحه من الدوام للبيت ويه اخواني متونسه ....
بابا مدرس متقاعد وبيتنه ملك وامي معلمه ومدبرين امورنه والحمدلله..
وعدنه سياره عد همام مسوي بيها خط واكثر شي وارد السياره اله ...شايل مصرفه ومطلع مصاريف السياره...
شعلينه المهم يكضي مشاويرنه من نريد نطلع ونفرفر...
اخوتي يحبوني ومدلليني هوايه وعلاقتي بليوثي واحمدكلش قويه ويصطخرولي هوايه..
بس احمد عتقته هالسنه لان سادس خطيه وانقهر عليه...وليوثي المبتلي بيه هسه
لولو حباب اريد بطل سوده بس ساده مو بالليمون من عمو نوري ....لان امك كتمت على نفسي من ثريد الباگله مالتها...
اهو خنساء والله حاره ساعه بالاربعه ...
حباب عليك الله روح ...انطيك اكراميه هم الك...
شكد راح تنطيني ...
عود اشتري قوطيه ببسي لو ازبري..
لا والله مكلفه نفسج مو اني زعطوط تقشمريني بربع دينار ....ماروح اذا متنطيني الف
دولي لك مو كاعده على البنك المركزي هو من مصرفي دادزك.....وبعد اسبوع ويخلص الشهر وبس باقيلي 19 الف...
اهو كامت تقره اليتيمه...هسه بعد يومين تشتغلين مگديه ولوكيه لبابا وامي وهمام
انجب ولك انت المگدي ..غير متكفيني هي 50 الف ينطوني بالشهر حتى مابيها 2000 دينارباليوم...
اي زايده عليج هي فلوس الخط من بابا ...وامي تشتريلج الملابس...شتسوين بيها بعد...
ولك والاستنساخ مال المحاضرات شنو بلاش...
ياولي يابحبوحه لو مايوميه كاعده وتكتبين محاضرات ماخذتلها صور بتلفونج من البنات..
وجع ليث...والاكل من اجوع بالدوام مين اشتري ..
هاهاهاهاها ضحكتيني والله ....لج انتي تشترين اكل ماصدگج والله...
كاااااافي وجع ...كوم عاد راح اموت
ما اروح الا تنطيني الف ...
ماما تعالي على مدللج خبلني يدور مني فلوس حتى يصخرلي...
احمد....شبيكم يمعودين عفيه بيت اربعه وعشرين ساعه مهوسين وهرجه...

غير اخوك خبلني ردت بطل سوده وطلع روحي، بطل السوده ب 500 دينار والعينتين يريد الف..
احمد....دگومي جيبي 500 مالتج لان اني رايح اشتري اقلام من نوري
عفيه حبيبي حمودي انت تسوى هذا ابو صماخ...
كعدت العصريه قريت شويه وساعه ارسم وساعه اگلب تلفزيون ادور مسلسلات تركيه ...
احب قصص الحب والرومانسيه بس ميبين عليه...ههههه
ماما....سوسو سوي عشه انتي اليوم ، اني راسي يريد يطك ضغطي مرتفع ...شربت الحبايه بلكت يهود وارتاح.....
اي ماما شنو اسوي عشه...
شوفيهم شيريدون...اسأليهم وسوي مثل ميريدون
اي هسه..اگوللهم شتريدون عشة بالسره واحد واحد...
باباتي شتريد حبيبي عشة...
بكيفج سوسو حتى لو تسويلي كوب چاي ولفه جبن عرب...
ادلل حبيبي بابا...
وانت استاذ همام المحترم...
محترم غصبن عليج ام لسان...مشتهي باسطرمه اذا اكووو...
اي هاهيه تدلل غالي والطلب رخيص تاج راسي...
انجبي ولج ميلوگلج الادب والنوبه تحجين سوري..
حمودي شتريد ...
حيا الله بس اكل لان ميت جوع..واله اكلج اذا اكو همبرگر سويلي ويا ماعون فنگر وعليه مايونيز وكچب...
ادلل عمي مطعم الهنا عندي...
وانت فصعون افندي شتريد...
والله مشتهي بيتزا واذا لحم بعجين تسوين ميضر ...
اي ادللوااا....متشتهون...
امشي وادردم...ابوكم لابو... مطعم الخلفكم مفتحه اني ولد الاوادم ...
هاي حياة البنيه بين الولد....اني اعلمكم..
همام....يمعوده وينج ساعه تسوين بالعشه مو كتلنه الجوع....
اي ...اي يمعود... هاي عوض متساعدوني ....جيت
فتلهم بالصينيه...
ليث....هياااا عشه اجى العشى..
خبال ليوثي....نزلت الصينيه وحطيتها بالگاع....
همام....خرب يومج هذا شنو يولي....
ولول ولووو عليك ياوول انت....هذا عشه غير...
هذا عشة مسويه لو ريوك ياثوله...
وجع شسويلك طلباتكم تعجيزيه كلت افضها بيض سلگ وجبن وچاي...
عشه خفيف وصحي اكثر حتى متكرشون مو صح بابا..
هاهاها اي صح بابا كعدي اتعشي عاشت ايدج...
كملت العشة وغسلت المواعين ولملمت على السريع...جان يوم خميس وباجر عطله...
يله ماما كملت كلشي راح اروح انام ...حبيبتي تريدين شي مني بعد؟ وصدك شلون صرتي...
حبيبتي صرت احسن وهسه اخذت ڤاليوم 2 بلكت ارتاح وانام.....روحي بنتي نامي..
تصبحين على خير ماما ...
وانتي من اهله حبيبتي...
احلى شي عندي من اروح انام ابقى اگلب بالفيس لان اعشق القصص والرومانسيات ....وبالذات قصص الفصليه الي انتشرت صارلها فتره....
اويلي اموت عليها واعيش وياهم واتمنى ياخذوني فصليه...وكلما اقرالي روايه احلم بنفس اليوم اني ويه البطل...
كملت روايه مال فصليه ساعه 3 الفجر ....اووف شلون روايه تجنن وتطير العقل...
اشو جعت ..البيض يجوع والله ...طلعت اريد اكل شي...رحت للمطبخ وشفت احمد وليث...
هاي شدسوون يولو...
&
&
&
يتبع...❤