غصب فصلوني

البارت الثاني

شنسوي ...دنسوي اكل وناكل...كتلنه الجوع من وراج ياخانم..
حبابين عليكم الله سوولي اكل وياكم...
لو تطگين منسويلج...
حبابين...
نسويلج بيضه مثل معشيتينه...
اووي لعبت نفسي الغده بيض خبط ويه الباگله والعشة بيض سلگ وهسه بيض...عليكم الله حسبوا حسابي وياكم..انتو شراح تاكلون....
احنه راح نگلي طاوة طماطه وهمام يريد بيتنجان مگله..
اي اي اموت عليهن اثنينهن....واني احميلكم الخبز  واشلف خيار واطلعلكم طرىشي..
سوينه الاكل واكلنا ورحنا نمنا...
طبعا مااگوللكم....البيت انقلاب الولد نايمين بالهول علمود يلعبون بلي والحب والكرزات بالگاع والمطبخ يبجي...بس كاتلني النعاس....عفت كلشي والصبح كلت اگوم الملم..
وصلت فراشي الله...وذبيت زروك  ونمت نومه عميقه...
حلمت اني بدال بطله قصه الفصليه وشلون اجوي اخذوني بالغصب واني عود ابجي بس بداخلي فرحانه وطايره ياله ياله انام بحضن ابو غتره....
ازوجنه وبعدين گام يحبني البطل ...يمه فدوه... وعشنه قصه حب وكتبوا عنها  كل الصفحات العراقيه والعربيه ...
وجبت توم ولد الله ....واحد يشبهني و واحد يشبه ابووو.... بس صار عندي كرش من وره الولاده  وضجت وحبيبي انقهر عليه...واخذني ورحت سويت عمليه تجميل يم مركز باربي...وصحوني من البنج ويگولولي...
مدام  مدام گعدي...
وگعدت فازه على صوت امي تندغ بيه وتعيط ...
گعدي خنسااااء كافي نوووم ...نايمه للظهاري يمعوده ابوج راح يجي من صلاة الجمعه...
گعدت اباوع على بطني..واصيح ماكو كرش،ماكو كرش هياااا...
خبال الخبلج خنساء شبيج يولي انجنيتي..
اوووف مو انتي خبلتيني ...هو هيج يگعدون الواحد...
واني حلمانه الناس ديگعدوني بكل هدوء ويكولولي مدام مدام...وانتي گعدتيني مثل العاصفه...
دكومي مخبله غسلي...ولحكيني على المطبخ بسرعه
اي اي....كمت اطوطح دايخه من امي العاصفه شون هبطتني ...اوف كعدتني من احلى حلم...
امشي وافرك بعيوني..كل شويه الزم كرشي واضحك...
غسلت وجهي ورحت للمطبخ...
ها ماما شسوي وياج...
الام...ليش هيج البيت گالبي ياظلام ...موتدرون بيه مريضه ومالي خلگ..
عيني واني شكو ،ذوله ولدج لاعبين جوله بالبيت...
والمطبخ منو گالبه لعد؟
والنبي محمد همه گلوا طماطه وبيتنجان وخبصوا الدنيا واني حضرت الطرشي وحميت الخبز بس..
عبالي اغسل المواعين بس صارت بالاربعه ودخت ورحت نمت...
اي وشبيج كعدتي مثل المخبله تتمضحكين ماكو كرش ماكو كرش..
هههههه لا هيج لحالي...
لج دكولي شحلمتي...لازم هم قاريه قصه وحلمتي بالبطل...
اي والنبي....شدراج ماما
اي مو هاي انتي كل خميس تعيشين قصه وتتخبلين اسبوع من وراها....
هههههه اي والله...حلمت اخذوني فصليه والبطل يجنن وجبت توم وخرب جسمي من الحمل....والبطل وداني ديسويلي عمليه حتى يروح الكرش...
خبال يابنتي...وشسمه البطل مالتج هالمره..
ليث.....اجيت للمطبخ وسمعت خنساء تسولف لاامي وتضحك ...وراسا جاوبت امي من سألت على البطل...
ليث....ماما البطل اسمه خالد بن الوليد لان يلوك ويه الخنساء..ههههه
لابشرفك ضحكتني شگد بايخ... وجع و سم ليث اني اعلمك اذا بعد تصنف على اسمي...
لج عليج الله سامعه بنيه اسمها الخنساء غير بس بالتاريخ قارين عن هذا الاسم...
واني شكو ...قابل اني سميت روحي...غير بابا الله يسلمه سماني بهالاسم...
بنتي حبيبتي معليج بي.... اسمج حلو ومميز..
اي ماما انتي بس قشمريني ...والله فد منحرجه من هالاسم حتى بالكليه من يصيحلي الاستاذ الخنساء اخجل ...لان گايله للطلاب اسمي خنساء...
يله خنفساء سوينه ريوگ...
سم وزقنبوت اسويلك يانذل اني اعلمك  ...
الجمعه دائما ثگيله وگوه تمشي وبابا يخبص النه البيت لازم يطلعنه شغله من جوه الكاع...وهاي الجمعه اشتغلنا فلاحين طلعنه تنظيف الحديقه ...واكيد وكعت براسي وبراس ليث ...لان حمودي سادس...وهمام اكيد مقامه ميسمحله ينزل لمستوانه ويشتغل فلاح مثلنه...
كضيناها كله لعب بالحديقه بالطين ههههه...
اووف مصدگت خلص النهار ورحت قتيله الفراش ونمت نومه عميقه ...محسيت الا احد يلعب بخشمي...وفزيت...
اوي يمه فدوه لها الصباح الحلو البي شموسه...حبيبه عمتو اموووواه يانونتي...فصعونه اول متجي لبيتنا گبل تجي لغرفتي اموت عليها...
بقينه اني وشموسه نتمرعص بالفراش وادغدغ بيها
والعب وياهااا...
صحصت وكمت غسلت ولميت كفشتي ورحنا اني وشموسه بالهول اسلم على زهير ولمى...
طبعاا يوم السبت مخصص لبيت زهير يجون من الصبح ويروحون بالليل...كلش نتونس وياهم
لمى ورده وزهير حبيبي كلش حنين ويحبنه ...واكيد الي تحلي اليوم كله شموسه المدلله...
فديتها وفديت كعكولاتها(شعرها ملولو يجن)
ولكم صباح الخير ياحلوين نورتونا...بست زهير
هلو سوسو حبيبتي مشتاقين...
هلو لمى حبي شلونج..
حبيبتي اني بخير...
ها ماما شنو غدانه اليوم دائما السبت الغده مميز...
ليش يولي شمقصره بغداكم باقي الايام...
احجي بصوت ناصي ويه لمى ،اي صحيح من الباگلا الي نافختنه بيها واضحك....
نزول عليج لتصنفين ..اكل خاله يخبل...
ولج خنيسه  شنو كاعد دردمين عليه...
ماكو شي يوم سلامتج...
نتوونس وياهم نگضيها لو اكل لو بالمطبخ لمى تسويلنا حلويات لان مشهوره بيها ...واليوم سوتلنه كنافه بالجبن طلعت روعه ...ونصايح لمى المتخلص...
حبي خنوسه انتي بنيه وحلوه غيري شويه من لبسج رتبي شعرج كلما اشوفج ظفيره صفح وجينز...
انتي حلوه ...وشويه حركات مايعه مال انوثه مو حركات خشنه...
اي ست  لمى ان شاءالله على الجايات اسويهن..
راحوا بيت زهير بالليل وامي من يروحون كلش تنقهر حيل متعلقه بشموسه .... تجُرلها يومين كآبه وبعدين تعيد برمجتها....
كعدت مثل كل يوم داتحضر واروح للكليه...
اني لبسي كله سبور جينز وعليه قمصان طولها وسط ...بحكم رابيه ويه ولد ...يعني ما البس تنوره ولا فساتين الاماندر...
عادي چان يومي بالكليه مابي جديد..ورجعت بالخط ويه عمو الحجي الي شالع گلبي...هالمره سوه عناد بيه ونزلني بعد ابعد بحجه الطريق مسدود..
نزلت والخبالات تقره الف عندي...لابوك لابو اليصعد وياك بعد ابو سنون المكسره وشوارب المكناسه ....فوك القهر صابغها بشگار وطالعه جنها مكناسة خوص...الطريق كله ادردم مثل المخبله ويه نفسي...وممركزه
وصلت على بعد 3 بيوت عن بيتنا ووعيت على روحي ...وشفت باب بيتنا هوسه ...
يمه رجلي بعد متعيني اريد اوصل بعد مابيه...مو صارت  3بيوت عبالك 3 شوارع...
طبيت لبيتنا اركض وتلكاني لولو يبجي...
لك شكو لولو خو مو بابا صاير بي شي ...
لا بابا زين...
الحمد لله....لعد امي صاير بيها شي مو....
امي هم زينه...
وقزرقط متحجي لعد شكووو...
همام...
شبي همام..
دعم ولد ومات..
عزه العزاني وشنو صار هسه...
جتي الشرطه واخذت همام وابويه خابر عمامي مثل مدشوفين هسه وكلهم التموا...
طبيت اركض مثل المخبله على ماما ....اعرف ضغطها هسه علگ و وصل للعشرين...
ام زهير...اوف ياهمام مين جتك ياوليدي...هالطيش مالك متبطله....
ماما حبيبتي الله يخليج لتسوين بروحج هالشكل ...
ربج كريم ويفرجهاااا من يمه..
يتبع....❤