غصب فصلوني

البارت السـابع

حطيته براسي ....رغم معاملته الوحشيه الي بالبدايه ...بس هسه مستعدل ...بس يظل متهور...
كلام خاله صح....يعني انطمغت بي مثل منطمغت بأسمي...
خرب بعمي فوك مااسمي مو قانوني...هالنوبه اخذتلي واحد لا اسم ولا تصرفات قانونيه...
مشطت شعري وسويت ظفيره صفح ...عجبني اظفر شعري...من اجيت لهنا كله رافعته لو لابسه حجاب...
اندگ باب الغرفه ...وصحت منوووو...
افتحي الباب اني صگر....
گمت فتحتله....بقى متبسمر بمكانه....
شبيك صافن...اكو شي....
ها ...لاهيج......هاج شوفي هذه الدشداشه اشتريتها هسه...قيسيها وتعالي اشوفها عليج...
سحبتها من ايده...ومشكرته...سديت الباب بوجهه قوي.... خباثه....
صگر....شلون حلوه وعليها عيون تدوخ...
لبست الدشداشه وكلش حلوه هالمره جايبها گلابيه مخصره.....طبعا عليه ذوق كلش حلوو...
حتى ملابسه وعطره وساعته كلش انيقات...
بس لو مو خبالاته...
ها صگر شنو رأيك بيها..
ها ...اي حلوه بس مخصره...
يعني شنو معجبتك...
بالعكس حلوه بس لو ابدلها اجيب القياس الاكبر...
اگلك عندي خوش حل....ليش مترجعها ...وتلبسني من هدوم خاله احسن...
صگر....بعد احسن....ههههه
خنساء....اول مره يضحك راح يصير شي بالدنيا ياربي...
احجي ويه نفسي...راح آلعبك هوايه اصبرلي...
اتخوصرتله وبمياعه...
هسه شگلت....ابقى لابستها لو لا...
صگر...هاي شبيها اليوم...خبلتني...
حلوه بالعافيه ابقي بيها....بس روحي ضمي ظفيرتج وحطي شي على راسج..
صگر....بقيت افكر بحجي امي وريكان ...
صحيح ذيج دللتها دلال متدللت مثلها وحده وطلعت عيونها...
وهاي مخبلها اني اكيد اذا ابقى هيج راح تسوي بلاوي....
والله شايله حسن بنت ال......
كاعد اني وامي بالهول وطب ريكان علينه..وخنساء بغرفتها...
ريكان.....هلو شلونكم
الحمدلله...
هذا الاكل حار ...اروح اصيح خنساء حتى نتعشى
صگر...تعال وين رايح....اني اروح اصيحهااااا
ريكان....سويج والله...
صگر....يله تعالي اتعشي...
خنساء....جنت مدده وابجي مشتاقه لاهلي....والاكثر قلقه عليهم ....ماعرف كلشي عنهم...
اي اي ...جايه.. .
ها هلو شلونكم..
ريكان.....هاي شبيها عيونج حمر....باچيه...
لا عادي....صار عندي البجي تسلايه...
شوفي جبتلج صندوگ سوده (ساده وليمون)...
واي شي تحتاجين....ادللي
تسلم رحم الله والديك ...متقصر...
صگر...اشتعلت بنار وشبيت وطفيت...ريكان حمضها زايد....
ريگان....دنتعشى ...يوم اني باجر راجع لبغداد ....خابروني هسه ...عندي شغل....
ام صگر...والله مشبعت منك ....بعد وكت....
مااطول اسبوع لو 10 وارجع ان شاءالله...
الخنساء....ضجت من گال ريكان راح اروح...لان من اجى لسه ....صگر معاملته متغيره ويايه....خاف من يروح اخو.....هم يرجع لخبالاته ويگوم يضربني.. 
كملنا العشى وسويتلهم چاي ....واريد تصير فرصه احجي ويه ريكان...
بالصدفه چنت دااطفي ماطور المي بالحديقه...وطلع ريكان يدخن...
الخنساء....ريكان اطلب منك طلب...ادري مو من حقي.....بس  گلبي نار على امي واريد اطمن عليها..
ياريت احجي وياها من تلفونك....
ريكان....قهرتني من بجت ...
خرب الاعراف العشائريه الظالمه...
ميخالف انطيني رقمها وهسه ادكلج واحجي وياها...
عفيه حباب جميلك على راسي من فوك وماانسالكيا...
الخنساء....اخذت التلفون وحافظه الرقم ودكيت ..وجاوبتني ...
بديتها بجي....حبيبتي ماما مشتاقتلج كومه شلونج حياتي.....
الام.....يمه بعد روحي ...شلون حالي وراج يالغاليه...روحي لايبه وتدور عليج...
ماما اني زينه ليضل بالج والنبي مرتاحه و الحمدلله..
يامرتاحه اني امج واحس بيج من نبره صوتج....
داحجي مصار دقيقتين وطلع صگر...
باي ماما وسديته...
صگر....وينهم ذوله...كمت مشفتهم بالمطبخ...سمعت صوتهم بالحديقه...
طلعت وشفتها واكفه يم ريكان وتحجي بالتلفون..
ولج خنساااااء ...
ورحتلها صاير عصبي نار...
صگر.....لج خنسااااء شدسووين....
سحبتها من ايدها قوي وطببتها للبيت واخذتها للغرفه وشمرتها على الجربايه...وقفلت الباب...
ريكان...افتح الباب صگر...عوف البنيه بلا خبالات...
ولي منا ريكان اني افتصل بيها ميخصك...
صگر......ويامن چنتي تحجين احجي...بصياح وعصبيه...لج احجي....
الخنساء.....حاطه ايدي على وجهي اخاف يضربني...وابجي...جنت احجي ويه ماما.....
اني شنو حجيت ونبهتج من طبيتي لهالبيت ....مو گلت ماكو شي اسمه اهلي بعد...
والله امي مريضه وگلبي نار عليها ...بس ردت اسمع صوتها...
اي انسيها ...
شلون انساها ....تگدر تنسى امك..
لتجاوبين...
الخنساء....صرت نار...وبعد ماتحمل وگلت وين تريد توصل ويا خلي توصل ...
يريد يموتني...عادي هو اني من طلعت من بيت اهلي وطبيت لبيته متت...
كافي ظلم صار 3 اسابيع مشوفني الويل...حرام عليك مالي ذنب بالي صار...خلي الله بين عيونك....لو اختك تقبل هيج يصير وياها...
جنت مدلله اهلي والوحيده...ومحد يمد ايده عليه...
والزمن ذبني يمك وصرت مكفخه الك...
حتى يوم عرسي دموي ومقرف شنو اذكر بي ...
طول عمري احلم احب وانحب والبس بدله بعرسي ويعاملني حبيبي بلطف وحب واحترام....
بس الي صار شنوووو....
الي صار الله صخم وجهي وذبني على واحد ظالم وحاقد ومعقد مثلك...
انت مو تريد تاخذ بثار اخوك...
هاي اني كدامك اذبحني وخلصني من هالعيشه....وبرد نار گلبك...
ام صگر.....افتح الباب صگر وعوف البنيه ....كافي ظلم...حرام مالها ذنب..
صگر....كلامها آثر بيه....والي گالته كله صح ..
صدك اني تعاملت وياها مثل الحيوان...فتحت الباب وعفتها وركبت سيارتي...وطلعت...
ام صگر....يابنتي اتحملي...هذه قسمتج ونصيبج وانتي اتسميتي باسم رجال بعد....
خاله والله تعبت منه...معاملته وحشيه...احجي وياها بخجل...
تدرين اغتصبني اول يوم اجيت بي للبيت وعافني مثل الچلبه ..گلي هاهيه بس كسرتج..شلون تريديني اتحمله لو احبه...
ام صگر....الله يطيح حظه ويصخم وجهه...ابني مو بعقله ....والله عبالي لسه انتي بنيه...ياعيني...
يله بنتي گومي غسلي ونامي وارتاحي شويه...
صگر....بقيت افتر بالشوارع مرجعت قريب  2
كاره روحي ونفسي....
وكل الي گالته خنساء حقها....
لفيت راسي ونمت لان ورايه دوام...
لا ياربي ....ماريد شنو ذنب الطفل يتحمل اغلاط غيره....
بقيت قلقه ومرت 10  على الموعد...وساعتها اتأكدت صار حمل عندي..
نفسيتي زفت صارت...
صگر....صار كم يوم ساحب نفسي ...الي سويته بيها مو قليل...گلت ابتعد عنها حتى ترتاح...
بس مدااصبر على فراگها بديت اشتاقلها...
وبديت احبها بدون ارادتي...
بس ماريد ابينلها لان هسه اني بنظرها حيوان...
ام صگر...يمه خنساء...شكلك واكلج معاجبني...
ها خاله....ها لا عادي ....نفسيتي تعبانه ...مشتاقه لاهلي وخايفه عليهم وبعد مااتحمل...
الله كريم...ربج يهدي صگر عليج ويرجع لصوابه...
الله يسمع منج خاله...
الخنساء...اجه بالي اوگع الطفل .....شنو ذنبه يجي للدنيا ...وامه وابو واحد مطايق الثاني...
كاعده العصريه بالمطبخ...وفات صگر لابس دشداشه خليجي بيج لونها ...جان شكله كلش جذاب...
حجه ويايه وصارله اكثر من اسبوع ممحاجيني....
صگر...خنساء اني طالع محتاجه شي اجيبلج ويايه....
الخنساء....استغربت هدوؤه وحجيه ويايه...
لا شكرا ماريد....جاوبته بجفاء...
ركب سيارته وطلع..واني استغليتها فرصه هو ماكو...وخاله دتسبح...
رحت بقيت باب الغرفه مفتوح حتى احس على خاله من تطلع من الحمام...لان بطبيعتها تطب غفل عليه بالغرفه...
صعدت على الجربايه وبديت اگمز..ماكو بعدني ثالث گمزه حسيت دخت وراح اخرب ...وراها محسيت بشي...
صگر...بعدني قريب من البيت ...وشفت نفسي ناسي التلفون...من وره خنساء الي ساطرتني سطر...
رجعت للبيت ورحت للهول داخذ تلفوني من الشحن...
شفت باب خنساء مفتوح...
وهي مدده بالگاع...
خفت ورحت ارگض عليها...
صگر....رحت اركض عليها حطيت راسها على رجلي
خنساء ..اكعدي ..اكعدي..
گمت اضرب بوجها وهي متحس...
رحت ركض جبت العطر مالي ورشيت عليها..يالله بدت تصحى وترجع لوعيها....
الخنساء...محسيت بشي بس دخت ومادري شصار وراها...
گعدت وشفت نفسي بحضن صگر...راسا فزيت ودفعته...
شدسوي انت وخر عني...
هاي شبيج  ...شفتج خربانه ودگعدج..
معليك انت بيه...
بس اهدئي وگومي داحطج على الجربايه...
عوفني اني اگوم وحدي...بعدني دايخه كلش....گمت وردت اوگع وسندني صگر...
معجبني يلزمني بس مجبوره...حطني على الجربايه...
شكو شبيج شنو يوجعج...اوديج للطبيب..
لا ماريد ...اني اصير زينه...عوفني واطلع بره رجاءااا..
بطلعتي اجتي امي ...سمعت صوتنه..
ها خنساء خيرج ...شكو شصاير...
صگر....رجعت من بره ناسي تلفوني...وشفتها واگعه بالگاع...
خاله لتخافين مابيه شي ...بس مدانام بالليل وهذا كله ارهاق...
يله بنتي ارتاحي ونامي هسه ...عندج العافيه...
صگر....طلعنه اني وامي من يمها...كتلها
ماما ليش هيج داخت و وگعت...
ياابني البنيه صار عدها ضعف وقله نوم وتنقهر على اهلها هوايه...
شتگولين اروح اجيبلها علاج ...
واحنه شمدرينا ياابني شنو بيها...
ماما...خاف صاير بيها فقر دم...
والله ماادري شنو اكلك ...يجوز...
شنو اجيبلها مال فقر دم...
جيبلها زبيب يفيد لفقر الدم...
صگر...طلعت اركض حتى موعدي ويه الولد عفته...رحت للاسواق... لملمت اشكال...زبيب وعصاير طبيعيه ونساتل..
هاج ماما...عود خل تاكل منها ...ولتكوليلها جبتها اني علمود  متعاند...
همام ...صار فتره ماشي بشغله خنساء...وصديقي البصراوي حمزه واگف ويركض ويايه وممقصر بشي..واليوم چان عدنه موعد ويه المحامي...
السلام عليكم ...حبينا نعرف شنو التطورات بقضية اختي الفصليه..
المحامي...ان شاءالله مبقى شي راح نسوي القاء قبض...وبعدها يصدر الحكم عليه...وياخذله بالقليل 3 سنوات ...
لان هذا العرف العشائري بعد محد يمشي بي ...والقانون وضعله حد...لانه يعتبر سبي البنات بس برضى الاهل....
والي يخالف القانون يتعاقب..
وعفيه عليكم زين سويتوا وتبعتوا بالموضوع قانونيا...
لان الناس اذا تشوف بيها عقوبه وحبس.....راح تترك هالعرف العشائري المتخلف...
بس قليل مثلكم يتجرؤن ويمشون بهيج امور بالقانون...
لان اكثر عوائل البنات يخافون يمشون بالقانون يتصورن راح يبقى بحر الدم مستمر...
المهم اختك والعلم عندالله ...فتره قليله وهي عدكم....
بس تبقى شغله اريد اگولها الك...
تفضل استاذ اسمعك اني...
اني اطلگ اختك بس ترى الشغله متفظ اذا مو بالفلوس...
شلون يعني استاذ...
هااا...اني افهمك...من راح يصدر الحكم على الولد بالحبس...هو راح ينجبر يطلگ حتى تخلون سبيله...
بس تبقى لازم تدفعون لاهل الميت جزء من الحگ..
يعني شگد استاذ..
حسب مايطلبون....ماگدر انطيك رقم محدد...
بس حبيت اوضحلك حتى تكون بالصوره وترتب وضعك....
تسلم استاذ ماقصرت...منتظر تلفونك...
مع السلامه...
مع السلامه...
همام...طلعنا اني وحمزه من المحامي بين الفرحان وبين المسطور...
لك حمزه شلون حلني... منين اجيب هيج مبلغ...اتخبلت وگمت اضرب بايدي...
حمزه....والله ياهمام ترى لازم اهلك يعرفون ...لان هاي شغله محامي وعشاير وفلوس...وانت متدبرها وحدك...
شلون يول اذا اگوللهم ...هسه يبطلون ويوگفون شغل المحامي...بحجه خايفين عليه لو على اخوتي لا ننكتل...
هسه جرب احجي وياهم وشوف ....بلكت يتفهمون الموضوع...
رجعت للبيت وجمعت اهلي كلهم....عندي موضوع مهم وياكم..
زهير...خير همام ترى مناقصيك احنه...
همام....حجيتلهم السالفه كلها من بيعة السياره الى رجعتي هسه من المحامي...
ابو زهير....همام راح تجلطني ياولد....شو انت بكيفك تصرف ..شوكت كبرت وگمت تاخذ قرارات مصيريه...
هذا اخوك مزوج ومخلف وميخطي بخطوه الا يشورني بيها...
همام....ابويه صار عصبي ويصيح ويغلط...
ام زهير....كافي فاروق ليش نظل خايفين.... المحامي مفهم همام كلشي...والدم راح يوگف...بعد شنو هالعناد...
احنه مصدگنه على الله راح تنحل...واذا على الفلوس  نبيع البيت ونخلص بنتي من الضيم الي هي عايشه بي..
ابو زهير...اانتي ليش تخربطين...طز بالبيت ..قابل يغلىٰ على ضنايه ...
بس ذوله ناس شرانيين وگلبهم محترگ على ابنهم...والفلوس متبرد گلوبهم...
همام...يومين ياله اقتنع بابا...
وعمامي وخوالي كلهم وگفوا ويانا وتبرعولنه...
وامي ولمىٰ باعوا ذهبهم...وزهير باع سيارته...
كدرنه نلم مبلغ لابأس بي ...
وبقينه بس ننتظر خبر من المحامي...
الخنساء...صگر حيل تغير ويايه بالتعامل...بس المشكله اني مداگدر اتقبله...
خنساء هاي بالكاونتر نساتل وزبيب اكلي منهم بنتي..تفيدج خاف صاير بيج فقر دم...
منو جابهن خاله...
اني دزيت ولد جوارينه جابهن علمودج..
اتغذي بنتي ليصير عندج ضعف عام...
صگر...خنساء اريد احجي وياج...
اتفضل اسمع...
اني بنظرج هسه حيوان مو انسان...واني مالومج شتريدين تفكرين وتكولين گولي..حقج الف مره..
بس كل الي صار ويايه مو باارادتي..
موتت اخويه چوت گلبي..
وصيري انتي بمكاني.....لو اخوج صاير بي شي شنو يبرد نار گلبكم ...
فصل بالفلوس لو يموت الشخص نفسه الي قتل اخوج...
هاااا ...مو داسألج ليش ساكته متجاوبين...
الخنساء...ساكته واسمع بس مجاوبته...
صگر....واني جنت ناوي امشي الشغله بالمحاكم ...وما اكذب عليج اتفقت ويه محامي  يرتبلهيا مؤبد...
بس لولا تدخل اهل ابويه عمامي ولد عمامي ...وانحرجت ويه  ابو الطيب ..وهمه الي  وازوني على الفصل جان مفصلت ابد لافصل فلوس ولافصل مره...
ومن رادت تصير الكعده اتفقوا عمامي ويايه نفصل بفلوس واني قبلت...
بس من صارت الگعده بينا وبينكم ....اني غيرت الفصل...وگتلهم  اريد مره...
ردت احرگ گلب اخوج واهلج...
الخنساء...گمت ابجي ...وگتله زين اني شنو ذنبي ...هيج صار بيه ...خنگتني العبره وسكتت...
صگر....عاملتج بوحشيه بالاول لان گلبي محترك...
وكرهتج وكرهت اهلج واخوج...
اخويه برمشه عين راح من ايدنه...والفلوس والذبايح الي حضرناها لعرسه ...ذبيناها بفاتحته...
تعالي ...تعالي...سحبني من ايدي وصعدني فوگ...وجاب مفاتيح غرفه جانت معلگه بالحايط...
فتح الباب وطببني...
شوفي ..شوفي هذه غرفته ..شوفي فرشه عرسه ...
فتح الكنتور وراواني ملابسه...وعطوره...
بشرفج كل هذا ومتريديني احقد عليج واحترگ حرگ...يحجي وعيونه مغورگه والعبره خانكته...
الخنساء...بداخلي ...والنبي شگد جنت حاقده عليه ...وعلى عمايله السوده ويايه بذيج الليله...
هسه من شفت غرفة اخو وغراضه وشلون راح برمشه عين ...وهو شلون مذبوح على فراگه....عذرته...
&
&
&
#يتبع....❤