غصب فصلوني

البارت الحـادي عشـر

اذا خايفه من الفضايح ....سوي الگتلج عليه...
لك ارعن شلون والله حرام ...هاي ام شلون احرمها من ضناها...
لعد اني مولي واحلمي تشوفيني بعد...
اوگف يول ...اوگف...
ميخالف ...اودي الطفل لاابو ..بس يبقى يمها كم يوم...والله حرام عليك....
اني گتلج...يطلع الطفل من الصاله وناخذه اني وياج گبل ....لان من تشوفه تتعلق بي اكثر وتتفرعن علينه اكثر...
شدعي عليك ياهمام...منين جتك هالقساوه...الله يهديك...
ام زهير ...طلعت الممرضه وبشرتنه بالولد...وگالتلنا خنساء زينه بس يصحوها من البنج وناخذها على الغرفه...
ام زهير ...اتخبلت ...همام گاعد وياكل بگلبي  وموتني ويتهدد ويتوعد...
الممرضه جابت الطفل وانطتنيا...
ام زهير...شگد حلو وصغير خطيه...انقهرت عليه...
ام زهير...زهير عفيه جوعانه روح بسيارة عمك جيبلنه غده  صار العصر ومحاطين لگمه بحلوگنا...
اي ماما رايح...
راح زهير ...وحجيت ويه لمىٰ...
لمى ابني المخبل شسوه بيه وناوي يعلگ الدنيا الارعن...
ليش شنو ديگلج...انتبهت عليه يتوعد ويتحلف...
يريدني اودي الطفل لاابو هسه گبل لتشوفه المگروده...
لمىٰ....خاله حرام عليكم والله.... خلي تشوفه امه وترضعه بالاول...
لابنتي هي اول تالي تدري راح ندزه...
خل نودي قبل متشوفه وتتعلق بي...
خاله هسه زهير يتخبل...
متشوفين دزيته ...خل نلحگ نروح...الله يصخم وجهك ياهمام...
ام زهير...اخذت الطفل اني وهمام طلعنا اله بيان على السريع بالفلوس مشيناها راسا....وسمينا يوسف لان هي تريد تسمي يوسف....
واخذنه تكسي وطلعنه بوجهنه ...حتى نلحگ نرجع قبل ليتأخر الوقت...
ام زهير ....الطريق كله مقهوره على بنتي وعلى الي جرالها...بس اني ابني مادري شبلاه وتحول علينه ...
(يمكن ديسويها شغله عناد...لان انحبس واخته انفصلت ..وفوگاها نطينه فلوس...
ماگو غير تفسير)
لمى.....اجه زهير جايب الاكل...وعرف بااخو وامه راحوا....كلش انقهر واتعصب...ويخابرهم وميجاوبون عليه....
الخنساء....صحيت من البنج وبديت ارجع لوعيِ...فتحت عيوني ...شفت زهير ولمىٰ فوگ راسي....
الخنساء....احجي بصوت ناصي ...مسطوره من البنج....ابني ابني...يوسف...
زهير....الحمدلله على السلامه خنوسه...شلون صرتي حبيبتي...
لمىٰ....اجر وعافيه حبيبتي والحمدلله على سلامتج...
وين ابني ...اريده...
زهير...شويه ونجيبه بس حطوا بالخدج(الحاضنه)...
ليش عفيه...شنو بي...
مابي شي لتخافين ...بس تعبان وهسه يرتاح
ويجيبوا الج....
ام زهير...وصلنا لبيت صگر ، ومخليت همام ينزل ...مهما يكون هو كاتل اخوهم ، حتى لو انحلت الامور...
صگر....توني جنت راجع من المستشفى ، تعبان جان راسي صارله كم يوم يوجعني ويريد يطگ...رحت وطلع عندي زياده بالدم...سحبت الزايد...ياله ارتاحيت...
متمدد واندگ الباب ...طلعت افتح...وامي طلعت ورايه...تخاف عليه من الوكت..
فتحت الباب وشفت ام خنساء ...انصدمت...
ام زهير...السلام عليكم...
هذا ابنك اليوم جابته خنساء...وهاك اخذه ...
لان خنساء متريده...ومتريد اي شي يربطها بيك...
صگر...
طبعا الموقف لايوصف ...بس فاتح حلگي ومندهش من الحجي ......ذبته ام خنساء بحضني وراحت...
واني وامي صافنين واحد بوجه الثاني...
صگر...بقيت ساكت ...طبيت جوه وبحضني الطفل...
ولاول مره دموعي نزلت...ماعرف احاسيس متخالطه...
بين صدمه وفرحه لان عندي ولد...وبين حزن وقهر على الي سوته خنساء...
صگر....ماما صار عندي ولد اني ...والله ممصدگ ...الحمدلله والشكر...
ام صگر...مبارك عليك ياابني...فرحانه...بس مصدومه من امه شلون صخت تذب ضناها وهو لحمه حمره...
صگر...
امي سوت اللازم وغسلتله وبدلتله وشربته الحليب...لان دازين ويا جنطه كامله،حتى الحليب...
اباوع عليه هوايه ماخذ مني ومن امه...
اخذته امي يمها ينام بالغرفه ...
ميت قهر عليه...وكرهت خنساء وذاك الحب تحول لحقد...شلون ضمت عليه..وشلون انطاها گلبها تشمره هالشمره...هو شنو ذنبه...الافكار حايره بدماغي...
وقررت العب بيهم طوبه...وارفع قضيه...لان طلع طلاقنا باطل...وهسه هي بعدها على ذمتي....
ساعه اگول هيه لو تكرهني ومتريده للطفل چان ذبته...ويجوز هذا الموضوع الي ذكرته بالرساله...
والاسم مسميته على الاسم الي احبه..ليش سمته يوسف لو مالي معزه عدهااااا...
لا لا لا لو عندي معزه چان حاولت توصلي وتتصل بي هاي سبع اشهر مختفيه...
الخنساء...يازهير ..يالمىٰ ...اريد ابني...ممعقوله يخلوا هلگد بالحاضنه...گمت ابجي ..جيبوا الله يوفقكم جيبوا...
زهير...حبيبتي اهدئي ..
شكو شصاير احجو...شنو مات الطفل...
لا اسم الله...مابي شي مو وميت...
لعد وينه...صدگ امي وينها...بس لا ودته لا ابو...سألتهم وبقوا ساكتين...
گمت اضرب على وجهي واصيح وابجي...اتهسترت
يمه ابني ...جيبولي ابني ...ياناس ياعالم...انكسر ظهري...اهلي والوكت عليه..
زهير...شفتها فقدت ...اني ولمى نهدي بيها..
مو زين عليج ياعيني...لتسوين هيج انتي مريضه ومسويه عمليه...
الله ياخذني ان شاء الله واخلص من ضيمي وقهري...
اووووف ياگلبي انفاسي
جمر ...نار بصدري مشتعله حتى دموعي عبالك تيزاب...
لمى...زهير فدوه خل تجي الممرضه تضربها ابره مهدئه...
ضربوني الابره ومحسيت ...نمت..
لمى....زهير هاي خاله تاخرت ...جنها متلحگ تجي تبات ويه خنساء...انت روح بات يم اهلي علمود شموسه ....
ام زهير...وصلنه متاخرين لبغداد...ورحنه لبيتنا..لان المستشفى ...لازم يبات مُرافق واحد ويه المريض...
واكيد لمى باتت وياها...
ثاني يوم الصبح رحت للمستشفى واجه زهير ورايه...واتعارك ويايه واتخبل...عكس الغبي اخو تماما...
الخنساء...تبجي وتعاتبني..مردت گلبي...
ليش يمه ...ليش هنت عليج...شلون انطاج گلبج..مو جربتي فراگ الضنه من فارگتيني شلون تلوعيني...ليش مشيتي وره ابنج ومافكرتي بي شراح يصير...الوكت عكس ويايه وظلمني...
واستكثرتوا عليه افرح باابني ...مااسامحكم واحللكم ليوم الدين ...انتوا مو بشر بعملتكم هاي..ماصدگ اكو هيج بشر بس انتو قاسين وگلوبكم حجر...
ام زهير...كافي بنتي گطعتي گلبي...والله على عمه عيوني...خفت عليج وعلى ابنج...لان همام الله طيح حظه...حلف يأذي الطفل...وشافت لمى شسوه بيه صخمني وعزاني بالمستشفىٰ...
الخنساء...الله ينتقم من كلمن ظلمني وحسبي الله ونعم الوكيل...
صگر...فرحان باابني...رحت ثاني يوم جبتله چربايه وبيها تول كلش حلوه ونصبتها بغرفه امي...
صگر...ماما ليش يبجي يوسف ....عبالك هوايه ...وبس يتقيء...
عادي ابني...عادي...
ام صگر...يومين ويوسف ...العفو مديستفرغ امعاءه (العگ) وبطنه منفوخه وهوايه يتقيء...
بالليل خابرت على دلال ...وهمه صار عدهم علم هي وريكان بالطفل ...صگر مبشرهم وفتح كامره وشافوا ...
ام صگر...شلونج بنيتي دلال..
أگلج شو يوسف بس يبجي ويتقيء وبطنه منفوخه ومذب وصخ البطن....شسويله...
والله ماما ..ماادري...بس شوفي ...
دهنيله بطنه بزيت الزيتون شويه...وخففيله الحليب خاف دسم ...
وانتظري منا لباجر بلكت يرتاح ...
ان شاءالله...مع السلامه..
الله وياج ...عنده العافيه
الخنساء ...لزمتني السخونه وبقيت 3 ايام بالمستشفى وطلعنه وحالي حال ...لان صار عندي حمى النفاس ...وتدهورت احوالي لااكل ولاشرب ...گوه يجبرني زهير احط شي بحلگي.....
وگاعد وابجي على ابني....
مبين عليه مكتوبتلي التعاسه ..وراح اگظي عمري بس بجي...
لمىٰ ...خنساء لزمتها الصخونه ومتفكها خطيه.... الحليب مجمع بصدرها ويأذيها...
خاله خطيه خل نجيبلها (ملاطه )تفرغ حليبها وترتاح
بلكت تفكها الصخونه...
لا معليج انتي لمىٰ خلي لتسحبي بلكي ينشف حليبها...
لمى...خاله هوايه چانت قاسيه عليها بس اني متحملت وانقهرت عليها...
لمىٰ...خنوسه حبيبتي گومي اوديج للحمام اغسلج واغيرلج ملابسج....
الخنساء...اسمع امي ولمىٰ متجادلات ...بس احس روحي تعبانه وعظامي مكسره...
گومتني لمىٰ وياها للحمام..وگعدتني وبدت تفرغ بالحليب  واني موجوعه...وتغسلي المكان بالمي الحار وارتاحيت كلش..
هاخنوسه مو تحسين نفسج فرق الالم شويه ...
اي والله عاشت ايدج...شويه ارتاحيت...
بس باعي لتگولين لخاله ...تگلب الدنيا علينا...
الخنساء...گمت يوميه من اضايق افرغ الحليب وارتاح...وابقى ابجي على ابني..واتحسب على اهلي..
صگر....صار عمر يوسف 4 ايام وهو على وضعه
تقيؤ وبطنه منفوخه وبده يحرحر...
اخذته اني وامي ورحنا للطبيب..فحصه الدكتور..
والله ان شاك الطفل عنده شلل بالامعاء...
الافضل تاخذه وتطلع بي لبغداد...تودي لمستشفى الطفل ..هناك يسون اللازم...لان اجهزه متوفره وعمليات...
صگر...تسلم دكتور...
اتفقت ويه امي ناخذه ونطلع الصبح بي لبغداد...
وصلنا للمستشفى...وسووله تحاليل وزرع واشعه داخليه...وكل الاجراءات اللازمه...وحجه ويانا الدكتور...
انت ابو للطفل...
نعم دكتور..
عيني ابنك عنده مرض شلل القولون الأمعائي ...
شنو يعني دكتور....
الطفل عنده خلل في الجزء النهائي للقولون ومسبب تقليل الحركة الدودية للأمعاء وصاير  انسداد وظيفي ومسبب شلل جزئي أوكامل  و الفضلات تراكمت في  القولون وسبب توسع القولون وهذا الانتفاخ بالبطن ...
همزين جبتوا راساا قبل ليوصل الشلل للمستقيم
واحنا راح نسوي الاجراءات اللازمه حاليا..
هسه شگد وزن الطفل...
4كيلوات دكتور...
&
&
&
#يتبع....❤